Te Kilokiloga a te Tusi Tapu

“Tafaoga Fakama‵taku”—E a, e ‵Tau o ‵Tofo Koe ki ei?

“I ASO NEI, KO TOKOUKE I A TATOU KO SE FAI PELĀ ME NE TINO MAIMOA KI TAFAOGA, KAE KO EVA IFO MAI VAKALELE, ‵KAKE IFO I LŌPU MAI MAUGA, FAKA‵SEKE IFO I PAOPAO I KOGA E ‵TAFE MALOSI IFO EI A VAI, KAE KOU‵KOU MO MAGŌ.”—TE NUISPEPA KO TE WILLOW GLEN RESIDENT.

E FAKAASI mai i te fakamatalaga tenā a te gasolo aka o ‵kese a tafaoga. A te lauiloa malosi o vaegā tafaoga pelā mo te eva ifo mai vakalele, te ‵kake i mauga e ‵fonu i kiona, te fakaeva o vakalele kae fakaaoga a palesūti, mo tafaoga fakama‵taku e igoa ki te BASE jumping *, e fakaasi mai i ei a te fia‵fia o tino i te lalolagi ke fai ne latou a mea fakama‵taku. A te faka‵seke i kiona, te ‵tele atu i pasika-ta-ki-vae i mauga, te faka‵seke i laupapa mo taka fai teka, ko momea aka ei te fakama‵taku o mea e fai ne latou i olotou fakatau‵faiga i mauga ma‵luga, mauga ‵sifo, mo koga ma‵luga kae ke eva ifo foki mai i se koga ‵mao. E pelā mo te mea e fakaasi mai i te mekesini ko te Time, a te gasolo aka o lauiloa a “tafaoga fakama‵taku”—ko tafaoga kolā e fakama‵taku ki ola o tino—e fakaata mai i ei a te fia‵fia o te fia miliona o tino ke ‵kau atu ki ei, “telā e fakamalosi atu ei ki tino ta‵fao i fakaotiga o vaiaso mo tino apo, me e maua ne latou i ei se lagonaga fiafia i te faiga o mea fakama‵taku faitalia te iloa ‵lei ne latou a te masei mo te sē ‵lei o tafaoga konā.”

Kae ko te lauiloa malosi o te mea tenei, e maua mai foki ei a ikuga fakama‵taku. Ko gasolo aka faeloa o tokouke a tino e pa‵kia māfai ko tō silia olotou mea e fai ki tafaoga kolā e tai ‵lei. I Amelika i te 1997, a te aofaki o tino kolā ne pa‵kia i te faka‵sekega i laupapa fai teka, kae ne avatu ki te fa‵kaimasaki, ne gasolo aka i se 33 pasene, e 31 pasene i te faka‵seke i kiona, kae 20 pasene i te ‵kake i mauga. Kae sili atu te ma‵sei o nisi tafaoga, e pelā mo te mea e fakamaoni mai ne te aofaki o tino ‵mate ona ko tafaoga fakama‵taku. E iloa ‵lei ne tino kolā e ‵lago atu ki ei a te fakama‵taku o tafaoga penei. Ne fai mai se fafine telā ne tafao sāle i te faka‵seke i kiona, penei: “A te mate e nofo faeloa i toku mafaufau.” Ne fai mai se tagata apo i te faka‵seke i kiona, me kafai “koe e se pakia, ko tena uiga, ne seki taumafai malosi koe.”

E ‵tusa mo manatu ‵tonu konei, e mata, e ‵tau o kau atu se Kelisiano ki vaegā tafaoga penā? E fesoasoani mai pefea te Tusi Tapu ke fakaiku aka me e ‵tau io me se ‵tau o ‵kau atu tatou ki tafaoga fakama‵taku?  A te mafaufau ki lagonaga o te Atua e uiga ki te tāua o te ola, ka fesoasoani mai ke tali aka a fesili konei.

Te Kilokiloga a te Atua ki te Ola

E fai mai te Tusi Tapu ki a tatou me i a Ieova “ko te pogai o te ola.” (Salamo 36:9) I tafa o te faitega ne ia a tino, ne fakatoka faka‵lei foki a mea katoa ko te mea ke mafai o fia‵fia tatou i te olaga. (Salamo 139:14; Galuega 14:16, 17; 17:24-28) Tela la, se mea ‵tau eiloa ke fakaiku aka ne tatou me e manako a ia ke tausi faka‵lei ne tatou a mea kolā ne tuku mai ne ia mo te atafai. A tulafono mo akoakoga fakavae kolā ne tuku ne ia ki te fenua o Isalaelu, e fesoasoani mai ke fakatāua ne tatou a te manatu tonu tenā.

Ne manakogina i te Tulafono a Mose ke puipui ne tino taki tokotasi a ola o nisi tino katoa. Kafai e se fai te mea tenei kae mate atu ei se tino, a te tino telā ne mafai o puipui ne ia a te fakalavelave tenā, ka mafai o agasala i te fakamaligi toto. E pelā mo te fakatonuga telā ne tuku atu ki se tino e faite sena fale fou, e ‵tau mo ia o faite se ‵pui fakatamilo i luga i te tuafale pāpā o tena fale. Kafai e se fai penā, ka agasala a ia i te fakamaligi toto māfai e tō ifo se tino mai te tuafale kae mate. (Teutelonome 22:8) Kafai ne ‵tui fakafuasei ne te pulumakau se tino kae mate, e se ‵tau o ‵losi atu ki te tino i a ia te pulumakau. Kae kafai e masani o ‵tui ne se pulumakau tagata a tino kae ko oti ne fakailoa atu a te mea tenā ki te tino i a ia te pulumakau, kae e se tausi faka‵lei ne ia, kae ne mate i ei se tino, ko agasala ei te tino i a ia te pulumakau, kae e mafai foki o tamate. (Esoto 21:28, 29) Ona ko te tāua o te ola ki a Ieova, e fakaasi mai i tena Tulafono a te tāua ke tausi kae puipui faka‵lei a te ola.

E malamalama a tavini fakamaoni a te Atua me e fakasino atu foki a akoakoga fakavae konei ki te faiga o mea kolā e fakamataku ki te ola. I se tala e tasi i te Tusi Tapu, ne fakaasi mai ne Tavita a tena fiainu “ki vai mai te vaikeli i tafa o te mataloa o te ‵pui o Peteleema.” I te taimi tenā, e pule atu te kau Filisitia ki Peteleema. I te lagonaga ne latou a te manakoga o Tavita, ne olo atu a sotia e tokotolu ki te koga e ‵nofo i ei a te kau Filisitia, ne asu mai ne latou a vai mai te vaikeli i Peteleema kae avatu ki a Tavita. Ne a mea ne fai ne Tavita? Ne seki inu a ia ki te vai kae ne ‵ligi ne ia ki te laukele. Ana muna: “E seki mafaufau eiloa au mai te kilokiloga a toku Atua ke fai te mea tenei! E mata, e ‵tau au o inu ki toto o tāgata konei, kolā ne talia ne latou ke ‵tu olotou ola i se tulaga fakamataku? Ne ‵tu olotou ola i se tulaga fakamataku i te aumaiga ne latou a vai konei.” (1 Nofoaiga Tupu 11:17-19) Ne seki talia eiloa ne Tavita ke tu te ola o se tino i se tulaga fakamataku mō te mea ne manako a ia ki ei.

E penā foki te mea ne fai ne Iesu, i te taimi ne tofotofo a ia ne te Tiapolo, kāti i se fakaasiga, ke eva ifo a ia ki lalo mai te ‵pui maluga o te faletapu, kae ke onoono aka me e puipui a ia ne agelu ke mo a ma pakia io me ikai. Ne tali atu a Iesu: “E se ‵tau mo koe o tofotofo a Ieova tou Atua.” (Mataio 4:5-7) Ao, ne iloa ne Tavita mo Iesu me se mea sē tonu i te kilokiloga a te Atua, ke fai a mea kolā e fakama‵taku ki te ola o se tino.

Mai fakaakoakoga konei, kāti ka mafau‵fau tatou, ‘E iloa pefea ne tatou a te tafaoga telā e fakamataku? I nisi taimi, a tafaoga masani kolā e se fakama‵taku eiloa, e mafai o oko ki se tulaga fakamataku, e iloa pefea ne tatou māfai ko se ‵tau o ‵kau atu ki ei?’

E Mata, e Aoga ke ‵Tofo ki ei?

A te iloilo mo te fakamaoni o se tafaoga telā e mafau‵fau tatou o ta‵fao i ei, ka fesoasoani mai ke iloa ne tatou a te tali. Kāti e mafai o fesili ifo tatou, ‘E pefea te tokouke o tino ne pa‵kia i te tafaoga tenei? E mata, ko oti ne fakamasani faka‵lei au ki te tafaoga io me e isi ne mea e mafai o puipui ei au ke mo a ma pakia? Ne a mea e mafai o ‵tupu māfai e tō io me e fakatau ‵se i te taimi e eva ifo ei au io me e isi se mea e tupu ki mea e puipui ei au? E mata, ka pakia malie fua au i ei, io me e mafai o pakia malosi io me mate au i ei?’

A te faiga o mea fakama‵taku e pelā me ne mea fakafia‵fia, e mafai o pokotia i ei a te fesokotakiga tāua o se tino mo Ieova, kae se mafai foki o maua ne ia a tauliaga fakapito i te fakapotopotoga. (1 Timoteo 3:2, 8-10; 4:12; Tito 2:6-8) E manino ‵lei, me kafai e ‵kau atu tatou ki tafaoga fakafia‵fia, se mea ‵lei mō Kelisiano ke mafau‵fau ki te kilokiloga a te Mafuaga e uiga ki te tāua o te ola.

[Fakamatalaga mai lalo]