MEA E FAI MAI NE TINO

E ‵kilo atu a tino e tokouke ki te kemupolo e pelā me se tafaoga ‵lei, māfai fua e talia i te tulafono. A nisi vaega o te kemupolo kolā e talia i te tulafono ko lotto a te malo, ke maua ei a tupe kolā e aoga ki tino o te fenua.

PATI I TE TUSI TAPU

E se taku mai i te Tusi Tapu a te pati kemupolo. Kae e maua i ei a nai akoakoga fakavae kolā e fakaasi mai i ei a lagonaga o te Atua e uiga ki te kemupolo.

A te pogai tonu o te kemupolo—ke maua ne koe a tupe a nisi tino māfai ko sili koe—e ‵teke tonu ki te fakailoaga i te Tusi Tapu ke “fakaeteete i vaega katoa o te kaimanako.” (Luka 12:15) A te ‵tonuga loa, e fakamalosi aka a te kemupolo ne te kaimanako. E fai ne pisinisi kemupolo ‵lasi a fāiloga ‵lasi kae e se fakamatala ‵tonu atu ne latou a te foliki o te avanoaga ke mafai o sili se tino, me e iloa ne latou a te manakoga o tino ta‵fao kolā e fia mau‵mea vave, ke fai olotou peti ‵lasi i fale kemupolo. I lō te fesoasoani atu ki se tino ke fakaeteete i te kaimanako, e fakamalosi aka ne te kemupolo a te manakoga ke maua a tupe i auala vave.

E fakavae eiloa a te kemupolo ki se fakamoemoega kaimanako: ke maua ne koe a tupe a nisi tino ta‵fao māfai koe ko sili. Kae e fakamalosi mai a te Tusi Tapu “ke se ‵sala atu faeloa a tino taki tokotasi ki tena ‵lei eiloa, kae ki te ‵lei o te suā tino.” (1 Kolinito 10:24) Kae e fai mai foki te tulafono e tasi i te Tulafono e Sefulu: “E se ‵tau mo koe o manako ki . . . so se mea a tou tuakoi.” (Esoto 20:17) Kafai ko fakamoemoe se tino kemupolo ke sili a ia, ko manako tonu eiloa ke puke ma ia a tupe a nisi tino ta‵fao.

E fai mai foki te Tusi Tapu ke fakaeteete i te kilokiloga me i te manuia se malosi telā e mafai o maua i ei a fakamanuiaga. I Isalaelu mua, e isi ne tino ne seki lava te lotou fakatuanaki ki te Atua kae kamata o “fakatoka se taipola mō te atua o te Manuia.” E mata, ne talia ne te Atua ke tapuaki atu ki “te atua o te Manuia”? Ikai, ne fai atu a ia ki a latou: “Ne tumau eiloa koutou i te faiga o mea ma‵sei i taku kilokiloga, kae ne filifili ne koutou a te mea telā e fakafanoanoa mai ki a au.”—Isaia 65:11, 12.

E tonu, i nisi koga o te lalolagi, a tupe kolā e maua mai i te kemupolo, e fakaaoga ke ‵togi ki ei a akoakoga, atiakaga i mea tau tupe, mo nisi mea kolā e aoga ki tino o te fenua. Kae ko te fakaaogaga o tupe konā e se ‵fuli i ei a te auala ne maua mai i ei—ko faifaiga kolā e fakamalosi aka ei te kaimanako mo te kaiū, mo te manatu me e ‵lei atu ke isi se mea e maua i lō te seai.

“E se ‵tau mo koe o manako ki . . .  so se mea a tou tuakoi.” —Esoto 20:17.

PATI I TE TUSI TAPU

E fakailoa mai i te Tusi Tapu me i “tino kolā e ma‵nako ke mau‵mea latou e ‵to atu ki te fakaosoosoga mo te malei mo manakoga sē aoga kae fakalogo‵mae kolā e fakamasei kae fakaseai atu i ei a latou.” (1 Timoteo 6:9) A te kemupolo e fakavae ki te kaimanako kae ko te “kaimanako” se mea fakamasei tino telā e aofia ne te Tusi Tapu i amioga kolā e ‵tau o ‵teke malosi atu ki ei.—Efeso 5:3.

Mai te ‵saga malosi atu ke maua vave a koloa, e fakamalosi aka ne te kemupolo a te fiafai ki tupe—se mea telā e taku i te Tusi Tapu e pelā me “ko te māfuaga o vaegā mea ma‵sei katoa.” A te manako ki tupe e mafai o fai mo fai se fakamalosiga masei ki se ola o se tino, telā e iku atu ki te manavase malosi mo te fakamaseiga o te fakatuanaki o se tino ki te Atua. I se auala fakatusa, e fakamatala mai i te Tusi Tapu, me i a latou kolā e maleigina ne te fiafai tupe e iku ki te “‵suki ne latou a latou eiloa ki logo‵maega e uke.”—1 Timoteo 6:10.

A te kaimanako e māfua mai i ei a te sē lotomalie, telā e fai ei a tino ke se lotoma‵lie ki olotou tulaga i mea tau tupe, kae fakamasei ei te lotou fia‵fia. “A te tino e fiafai ki siliva ka se mafai o lotomalie ki siliva, penā foki loa te tino e fiafai ki koloa kae e isi sena peofuga e maua sāle.”—Failauga 5:10.

A te fia miliona kolā e maleigina ne te kemupolo e iku atu ki te fakavalevale ki te kemupolo. E lauiloa a te fakalavelave tenei me e lau i miliona a tino fakavalevale ki te kemupolo i Amelika fua, e ‵tusa mo sukesukega ne fai.

E fai mai se faataoto e tasi: “A te tofi telā ne maua muamua i auala kaimanako ka se fai pelā me se fakamanuiaga i te fakaotiga.” (Faataoto 20:21) Ne iku atu a tino fakavalevale ki kemupolo ki te faiga o kaitalafu e uke io me ko se ola ‵lei olotou pisinisi kae ‵galo atu ei a te fia o galuega, avaga mo taugasoa. A te fakagalue aka o akoakoga fakavae i te Tusi Tapu e mafai o fesoasoani atu ki se tino ke ‵kalo keatea mai i ikuga sē ‵lei kolā e mafai o fai ne te kemupolo ki te olaga mo te fiafia.

“Ko tino kolā e ma‵nako ke mau‵mea latou e ‵to atu ki te fakaosoosoga mo te malei mo manakoga sē aoga kae fakalogo‵mae kolā e fakamasei kae fakaseai atu i ei a latou.”—1 Timoteo 6:9.