E tokouke a tino e fai mai me e tali‵tonu latou ki te Atua. Kae kafai e ‵sili atu me ko oi te Atua, ka maua ne koe a tali kese‵kese e uiga ki ei. Ki nisi tino, a te Atua se famasino sauā, telā e fakasala ne ia a tino ona ko olotou mea ‵se. Ki nisi tino, a ia e alofa kae loto fakamagalo faeloa, faitalia me ne a mea e fai ne latou. Kae e tali‵tonu a nisi tino me i te Atua e ‵mao ‵ki eiloa kae e se fia saga mai ki a tatou. Ona ko te uke o vaegā kilokiloga kese‵kese, e mafai o mafau‵fau a te tokoukega me e se mafai eiloa o iloa ne latou a te Atua.

E mata, e tāua ke iloa te Atua? Ao, e tāua eiloa. A te iloa faka‵lei ne koe te Atua e mafai o aoga kae tāua ki tou olaga. (Galuega 17:26-28) Ko te pili malosi o koe ki te Atua, ko te lasi foki o te alofa mo te fesoasoani o ia ki a koe. (Iakopo 4:8) Tela la, a te mauaga o te iloaga e uiga ki te Atua e mafai o iku atu ki te ola se-gata-mai.—Ioane 17:3.

E mafai pefea o iloa ne koe te Atua? Mafaufau ki te tino telā e iloa ‵lei ne koe, kāti se taugasoa pili o koe. Ne ati aka pefea a te vā fakataugasoa tenā? Kāti ne iloa ne koe tena igoa, ana uiga, mea e fiafia mo mea e se fiafia a ia ki ei, e pelā foki mo mea ne fai ne ia mo ana palani, mo nisi mea aka e uke. Tenei te auala ne fakapilipili ei koe ki te tino tenā—ne tauloto ne koe a mea e uiga ki tou fafine io me ko tou tagata.

I se auala tai ‵pau, e mafai o iloa ne tatou te Atua mai te mafaufau ‵loto ki mea konei mai lalo:

• KO OI TE IGOA O TE ATUA?

• A IA SE VAEGĀ TINO PEFEA?

• NE A MEA NE FAI NE TE ATUA?

• NE A MEA KA FAI NE IA?

• E AOGA PEFEA KE ILOA NE KOE TE ATUA?

Ne fakatoka eiloa a te mekesini tenei ke tuku mai i ei a tali faka-te-Tusi Tapu ki fesili konā. Ka fesoasoani mai eiloa a mataupu konei ke iloa ne koe me ko oi te Atua mo te auala ka maua i ei ne koe a mea aoga māfai ko maua ne koe se fesokotakiga totino mo ia.