Ti 1

Ɔsom mu Biakoyɛ—Dɛn na Ɛsɛ sɛ Ɛkyerɛ ma Wo?

1, 2. (a) Dɛn so na wogyina de ɔsom mu biakoyɛ a ɛyɛ nokware reba wɔ yɛn bere yi mu? (b) Ɔkwan bɛn so na Bible no ka nea ɛrekɔ so no ho asɛm?

WƆ WIASE nyinaa no, ahokeka bi a ɛyɛ anigye a ɛde kɔ ɔsom mu biakoyɛ ho rekɔ so. Ɛreka nnipa a wofi aman ne mmusuakuw ne kasa horow nyinaa mu abom. Wɔn biakoyɛ no nyɛ gyaa a wɔagyaa wɔn gyidi mu na ama aba saa. Ɛnyɛ sɛ wɔagyae kasa a wɔkasa tia asetra kwan a ɛne Onyankopɔn Asɛm no nhyia nti na aba saa. Ɛnde dɛn na ɛma ɛba saa? Nokwasɛm a ɛyɛ sɛ nnipa a wofi mmaa nyinaa rehu Yehowa sɛ ɔne nokware Nyankopɔn koro no na wofi wɔn pɛ mu rema wɔn asetra ne ne trenee akwan ahyia no nti.—Fa toto Adiyisɛm 15:3, 4 ho.

² Eyi ma nkɔmhyɛ bi a odiyifo Mika kyerɛw too hɔ bɛyɛ mfe 2,700 a atwam ni no nya mmamu. Ɛdefa “nna a edi akyiri no” ho no, ɔkyerɛwee sɛ: “Amanaman pii bɛkɔ akɔka sɛ: Mommra mma yɛnkɔ [Yehowa] bepɔw so nkɔ Yakob Nyankopɔn fi, na ɔnkyerɛ yɛn n’akwan, na yɛnnantew n’atempɔn so.” (Mika 4:1, 2) * So wuhu sɛ ɛno rekɔ so?

3, 4. (a) Ɔkwan bɛn so na ɛyɛ nokware sɛ “amanaman” no redan aba Yehowa nkyɛn? (b) Nsɛm bɛn na ɛsɛ sɛ yebisa yɛn ho?

 ³ ‘Aman’ mũ biara nni hɔ a wɔaba Yehowa honhom mu ofi no mu a wɔrebɛsom. Mmom no, ankorankoro a wofi aman yi mu na wɔreyɛ saa. Bere a wosua Yehowa Nyankopɔn dɔ atirimpɔw ne ne su a ɛyɛ anigye no ho ade no, ɛka wɔn koma kɛse. Wofi ahobrɛase mu hwehwɛ nea Onyankopɔn hwehwɛ wɔ wɔn ho akyi kwan. Mpae a wɔbɔ no te sɛ ɔbarima gyidifo Dawid a ɔno na ɔkaa eyi no de no: “Kyerɛkyerɛ me nea wopɛ yɛ, na wone me Nyankopɔn.”—Dwom 143:10.

⁴ So wuhu sɛ woka saa nnipadɔm kɛse a wɔresom Yehowa no ho? So sɛnea wudi akwankyerɛ a wo nsa aka no so di adanse sɛ wuhu ampa sɛ efi Yehowa hɔ? ‘Wonantew n’atempɔn so’ kodu he?

Ɔkwan A Wɔfa So Nya

5. (a) Awiei koraa no, ɔsom mu biakoyɛ mu bɛtrɛw akodu he? (b) Dɛn nti na Yehowa somfo a wobɛba abɛyɛ mprempren no gye ntɛmpɛ, na ɔkwan bɛn so na yebetumi aboa afoforo ma wɔayɛ eyi?

⁵ Yehowa atirimpɔw ne sɛ abɔde a wɔwɔ adwene nyinaa bɛyɛ biako wɔ ɔsom mu—wɔremfa atoro nnaadaa wɔn, wɔremfa wɔn ti mpempem esiane sɛ wonhu atirimpɔw a ɛwɔ asetra mu ankasa nti. Hwɛ sɛnea yɛn ani gyina ɛda a wɔn a wɔte ase nyinaa behyira nokware Nyankopɔn koro no! (Dwom 103:19-22) Nanso ansa na ebetumi aba saa no, ɛsɛ sɛ Yehowa yi wɔn a wobu ne dɔ ahenni no animtiaa na wɔyere wɔn ho sɛ wɔbɛma afoforo asetra asɛe no fi n’abɔde mu. Ofi mmɔborohunu mu di kan de kɔkɔbɔ ma wɔ nea ɔbɛyɛ ho. Nnipa a wɔwɔ baabiara wɔ hokwan sɛ wɔbɛsesa wɔn akwan. Enti wɔ yɛn bere yi so nso wɔreka asɛm a egye ntɛmpɛ yi wɔ wiase nyinaa: “Munsuro Onyankopɔn na monhyɛ  no anuonyam, efisɛ n’atemmu dɔn adu. Na monkotow nea ɔyɛɛ soro ne asase ne ɛpo ne asuti no.” (Adiyisɛm 14:6, 7) So woagye saa asɛm a wɔaka no atom? Sɛ saa a, ɛnde wowɔ hokwan mprempren sɛ wo ne Yehowa ahyehyɛde no bɛyɛ adwuma de aboa afoforo ma wɔayɛ saa.

6. Bere a yɛasua Bible mu nkyerɛkyerɛ atitiriw no awie no, nkɔso foforo bɛn na ɛsɛ sɛ yɛbɔ mmɔden nya?

⁶ Ɛnyɛ Onyankopɔn atirimpɔw ne sɛ ɔde nnipa a wɔka ara kwa sɛ wogye Yehowa di na wɔpɛ sɛ wɔtra Paradise na bere koro no ara mu wodi wɔn ankasa pɛsɛmenkominya nneɛma akyi no bɛba n’ahyehyɛde no mu. Ɔpɛ sɛ nkurɔfo nya “ne pɛ ho nokware nimdeɛ,” na ɛsɛ sɛ eyi da adi wɔ wɔn asetra mu. (Kolosefo 1:9, 10, NW) Bere a nnipa a wɔwɔ anisɔ asua Bible mu mfitiase nkyerɛkyerɛ akyi no, wɔbɛpɛ sɛ wɔpere kɔ Kristofo onyin mu. Nea wɔpɛ ne sɛ wobehu Yehowa wɔ abusuabɔ kwan so, na wɔama n’Asɛm no mu ntease a wɔwɔ atrɛw ayɛ kɛse, na wɔde adi dwuma kɛse wɔ wɔn asetra mu. Wɔpɛ sɛ wɔyɛ sɛ wɔn soro Agya no na wɔda ne su ahorow no adi na wosusuw nneɛma ho sɛnea ɔyɛ no. Eyi ka wɔn ma wɔhwehwɛ akwan a wɔbɛfa so anya adwuma a ɔrema wɔayɛ wɔ asase so wɔ yɛn bere yi mu no mu kyɛfa kɛse sɛnea wobetumi. So woreyɛ saa?—Efesofo 5:1; Hebrifo 5:12–6:3; 1 Timoteo 4:15.

7. Akwan horow bɛn so na nokware biakoyɛ tumi yɛ yiye nnɛ, na ɔkwan bɛn so na wɔfa nya?

⁷ Bible no kyerɛ sɛ ɛsɛ sɛ wɔn a wɔsom Yehowa no yɛ nnipa a wɔaka abom biako. (Efesofo 4:1-3) Ɛwom sɛ yɛte wiase bi a emu apaapae mu a yɛda so ara ne yɛn ankasa sintɔ ahorow redi aperepere de, nanso ɛsɛ sɛ saa biakoyɛ yi yɛ nea ɛwɔ hɔ nnɛ. Yesu bɔɔ mpae srɛe sɛ n’asuafo nyinaa nyɛ biako, wonnya nokware biakoyɛ mu anigye. Dɛn na eyi bɛkyerɛ? Nea edi kan koraa no, sɛ́ wɔne wɔn  ho wɔn ho bɛyɛ biako. (Yohane 17:20, 21) Eyi reba saa mprempren bere a wɔde afotu a wonya wɔ Yehowa “fi” no di dwuma no.

Nneɛma Ahorow Bɛn Na Ɛboa Ma Biakoyɛ Ba?

8. (a) Dɛn na yenya bere a yɛn ankasa de Bible no susuw nsemmisa a ɛfa yɛn ho no ho mmuae ho no? (b) Bere a wubua nsemmisa a ɛwɔ atifi hɔ no, susuw nneɛma a ɛboa ma Kristofo biakoyɛ ba no ho.

⁸ Nneɛma atitiriw a ɛde biakoyɛ yi aba no bi na wɔada no adi wɔ ase hɔ no. Bere a wubua nsemmisa a edidi eyinom so no, susuw sɛnea emu biara ka wo ne Yehowa ne wo mfɛfo Kristofo ntam abusuabɔ no ho. Nsɛm yi a wubegyina kyerɛw nsɛm a ɛwɔ hɔ no so asusuw ho no bɛboa wo ma woanya adwene ne nhumu a efi Onyankopɔn hɔ a ɛyɛ su a yɛn nyinaa hia no. (Mmebusɛm 5:1, 2; Filipifo 1:9-11) Enti susuw nsɛm yi ho mmiako mmiako:

(1) Yɛn nyinaa som Yehowa na yegye hokwan a ɔwɔ sɛ ɔde nea eye ne nea enye ho gyinapɛn besisi hɔ no tom.

Sɛ yɛboapa bu yɛn ani gu Yehowa afotu wɔ biribi a ɛte sɛ nea ɛyɛ ketewaa ma yɛn ho so a, obebu no dɛn? (Luka 16:10; fa toto Malaki 1:6-8 ho.)

Sɛ yɛanni Yehowa ahyɛde ahorow no so bere nyinaa a, so ɛkã afoforo? (Fa toto Romafo 5:12; Yosua 7:20-26; 1 Ahene 14:16 ho.)

(2) Wiase baabiara a yɛwɔ no, yɛwɔ Onyankopɔn Asɛm no a ɛkyerɛ yɛn kwan.

Bere a yesisi gyinae ahorow no, asiane bɛn na ɛwɔ nea “yɛte nka” sɛ ɛteɛ ara kwa a yɛbɛyɛ no mu? (Yeremia 17:9; Mmebusɛm 14:12)

Sɛ yennim afotu a Bible no de ma wɔ asɛm bi ho a, dɛn na ɛsɛ sɛ yɛyɛ? (Mmebusɛm 2:3-5)

(3) Yɛn nyinaa nya honhom mu aduanma nhyehyɛe koro no ara mu mfaso.

Tebea horow bɛn na wɔn a wonhu honhom mu aduanma  nhyehyɛe ahorow a Yehowa ayɛ no wom? (Fa toto Yesaia 1:3; 9:16; 65:14 ho.)

(4) Yesu Kristo ne yɛn Kannifo ne nea yɛn nyinaa nam no so bɛn Yehowa wɔ ɔsom mu, na ɛnyɛ onipa bi.

So yɛn mu bi wɔ biribi a ntease wom a wobegyina so agye adi sɛ, sɛ́ nnipa no, wɔkorɔn sen afoforo? (Romafo 3:23, 24; 12:3; Mateo 23:8-10)

(5) Ɛmfa ho sɛ ɛhe na yɛte no, yɛhwɛ Onyankopɔn Ahenni no kwan sɛ adesamma anidaso koro pɛ.

Ɔkwan bɛn so na eyi bɔ yɛn ho ban wɔ nneɛma a ɛde mpaapaemu ba ho? (Mateo 6:9, 10; Mika 4:3)

(6) Honhom kronkron ma wɔn a wɔsom Yehowa nya su horow a ɛho hia ma Kristofo biakoyɛ.

Ɔkwan bɛn so na yɛma kwan ma Onyankopɔn honhom no sow n’aba wɔ yɛn mu? (Dwom 1:2; Mmebusɛm 22:4; Adiyisɛm 3:6; Asomafo no Nnwuma 5:32)

Ɔkwan bɛn so na honhom aba a yɛbɛsow no nya yɛne Yehowa ntam abusuabɔ so tumi? Yɛne yɛn nuanom nso ɛ? (Galatifo 5:22, 23)

(7) Ɛyɛ yɛn nyinaa asɛyɛde sɛ yɛbɛka Onyankopɔn Ahenni ho asɛmpa no.

Ɔkwan bɛn so na asɛnka adwuma yi mu kyɛfa kɛse a yɛne mfɛfo Kristofo nya no nya sɛnea yɛte nka wɔ wɔn ho no so tumi? (Fa toto Kolosefo 4:7, 11 ho.)

9. Sɛ yɛde nokware ahorow yi di dwuma wɔ yɛn asetra mu ankasa a, dɛn na efi mu ba?

⁹ Nokwasɛm ahorow yi a wubegye atom yɛ ade biako. Tra a wobɛtra ase ma ɛne no ahyia no gye pii sen saa. Nanso sɛ yɛyɛ saa a, ɛtwe yɛn bɛn Yehowa kɛse. Fekuw a yɛne mfɛfo gyidifo bɔ nso ba bɛyɛ denhyɛ fibea. Sɛnea Dwom 133:1 ka no: “Hwɛ oye a eye ne fɛ a ɛyɛ sɛ anuanom bom tra faako.” So w’ankasa wunhu sɛnea ɛyɛ anigye sɛ wubefi wiase no ne ne pɛsɛmenkominya su no nyinaa mu na wo ne afoforo a wɔdɔ Yehowa ampa abehyiam wɔ nhyiam horow ase no?

 Kwati Nneɛma A Ɛde Mpaapaemu Ba

10. Dɛn nti na ɛho hia sɛ yɛhwɛ yiye na ama yɛakwati ahofadi honhom?

¹⁰ Sɛnea ɛbɛyɛ a yɛrensɛe saa biakoyɛ a ɛsom bo no, ɛsɛ sɛ yekwati nneɛma a ɛde mpaapaemu ba. Eyinom mu titiriw biako ne ahofadi honhom. Yehowa boa yɛn ma yekwati denam hu a ɔma yehu ne farebae a ɔne Satan Ɔbonsam no so. Ɔno na ɔdaadaa Hawa ma osusuwii sɛ ɛbɛyɛ nea eye ama no sɛ obebu n’ani agu nea Onyankopɔn aka no so na wasi n’ankasa gyinae ahorow no. Adam kɔkaa ne ho wɔ saa atuatew adeyɛ no mu. Nea efii mu bae no bɛyɛɛ amanehunu maa wɔne yɛn. (Genesis 2:16, 17; 3:1-6, 17-19) Yɛte wiase bi a saa ahofadi honhom no adonnɔn no mu, enti sɛ ɛho behia sɛ ɛsɛ sɛ yedi saa honhom no so wɔ yɛn ankasa mu a, ɛnsɛ sɛ ɛyɛ yɛn nwonwa. Yehowa fi ɔdɔ mu boa yɛn ma yɛyɛ saa denam afotu a ɔnam n’ahyehyɛde no so de ma no so.

11. Dɛn na ɛbɛkyerɛ sɛ yɛresiesie yɛn ho ama asetra wɔ Onyankopɔn trenee Nhyehyɛe Foforo no mu ampa?

¹¹ Ɛnam saa ahyehyɛde no so na yɛahu bɔ kɛse a Yehowa ahyɛ sɛ ɔde ɔsoro foforo ne asase foforo a “trenee te mu” besi mprempren tebea yi ananmu no. (2 Petro 3:13) Yɛn ani gye bɔhyɛ a ɛne sɛ ɛrenkyɛ wobeyi wiase bɔne yi afi hɔ na wama asase yi adan Paradise no ho. Nanso so yɛn asetra kwan kyerɛ sɛ yɛresiesie yɛn ho ampa ama asetra wɔ wiase a trenee na ɛbɛyɛ ade titiriw a wosua no mu? Bible no ka kyerɛ yɛn pefee sɛ: “Monnnɔ wiase anaa nneɛma a ɛwɔ wiase. Sɛ obi dɔ wiase a, Agya no dɔ nni ne mu.” (1 Yohane 2:15) Ɛyɛ nokware sɛ nneɛma pii wɔ wiase no mu a yɛn mu biara mpɛ. Nanso so wiase no mu nneɛma a ɛhaw asetra mu anigye a yenya mprempren no nkutoo na yɛmpɛ? Anaasɛ yɛpow ne honhom—n’ahofadi su, ne nkutoo  ho a esusuw ma ɛtra so—no nso? So yɛde reyɛ yɛn su ampa sɛ yebetie Yehowa na yɛafi yɛn koma mu ayɛ osetie ama no a honam no nsusuwii a ɛbɔ eyi abira biara mfa ho? Ɛsɛ sɛ yɛn asetra nyinaa—ɛmfa ho sɛ ɛhe na yɛwɔ anaasɛ dɛn na yɛreyɛ no—di adanse sɛ yɛn nsusuwii ne yɛn adwene yɛ Onyankopɔn de.—Mmebusɛm 3:5, 6.

12. (a) Dɛn nti na ɛho hia sɛ yɛde hokwan no bedi dwuma mprempren de asua Yehowa akwan na yɛadi akyi wɔ yɛn asetra mu? (b) Dɛn na kyerɛw nsɛm a ɛwɔ nkyekyem no mu no kyerɛ ma yɛn sɛ ankorankoro?

¹² Sɛ Yehowa bere a wahyɛ sɛ ɔbɛsɛe nneɛma nhyehyɛe bɔne yi ne wɔn a wɔdɔ n’akwan nyinaa no du a, ɔrentwetwɛn ne nan ase. Ɔrentu saa bere no nhyɛ da na saa ara na ɔrensakra ne gyinapɛn ahorow no sɛnea ɛbɛyɛ a obegye wɔn a wɔda so ara rebɔ mmɔden sɛ wɔde wɔn ho bɛbɔ wiase no, wɔn a koma fã nkutoo na wɔde sua Onyankopɔn apɛde ne ne yɛ ho ade no. Mprempren ne bere a ɛsɛ sɛ wokeka wo ho! (Luka 13:23, 24; 17:32; 21:34-36) Enti, hwɛ sɛnea ɛyɛ anigye sɛ wohu “nnipakuw kɛse” no sɛ wɔregye hokwan titiriw yi atom na wɔde ahopere rehwehwɛ akwankyerɛ a Yehowa nam ne dɔ ahyehyɛde no so de ma no na afei wɔde biakoyɛ nantew n’atempɔn so!

[Ase hɔ asɛm]

Asɛm No Mu Nti̇̃mu

● Dɛn ne Yehowa atirimpɔw wɔ ɔsom ho?

● Bere a yɛasua Bible mu nkyerɛkyerɛ atitiriw no awie no, nkɔso foforo bɛn na ɛsɛ sɛ yɛbɔ mmɔden nya?

● Dɛn na yebetumi ayɛ, sɛ́ ankorankoro, sɛnea ɛbɛyɛ a nneɛma a ɛde biakoyɛ ba a yɛasusuw ho no benya yɛn asetra so tumi sɛnea ɛsɛ?

[Adesua no ho Nsɛmmisa]

 [Mfonini nkutoo na ɛwɔ kratafa 4]