Ahenni a “Wɔrensɛe no Da”
Ti 10
Ahenni a “Wɔrensɛe no Da”
1, 2. (a) Nokwasɛm bɛn na wiase nsɛm a esisi no si so dua da biara, ne wɔ ɔkwan bɛn so? (b) Dɛn ne ano aduru biako pɛ?
WIASE nsɛm a esisi da biara no di nokwasɛm no ho adanse sɛ adesamma nnyaa anigye wɔ Yehowa tumidi a wɔapow na wɔbɔ mmɔden mmom sɛ wobedi wɔn ho so no mu. Adesamma nniso nhyehyɛe biara nni hɔ a ɛde mfaso horow abrɛ adesamma a animhwɛ nnim. Ɛwom sɛ nnipa de wɔn wiase nyansahu ayeyɛ nneɛma akodu baabi a ebi mmaa saa da de, nanso wontumi nyii bɔne, ɔyare ne owu mfii hɔ mmaa wɔn nkoa mu biako mpo. Nea ɛne ɛno bɔ abira no, amanaman no kɔ so yɛ akode horow afoforo a ɛyɛ hu mmoroso. Anuɔdensɛm a enye koraa kɔ so. Mfiriyɛ ho nyansahu, adifudepɛ ne anibiannaso ka bom sɛe asase, nsu ne mframa. Nneɛma bo a ɛkɔ soro ne adwuma a wonnya nyɛ ma ɛyɛ den mmoroso ma nnipa pii sɛ wobenya asetra mu ahiade. Nkurɔfo ho pere wɔn sɛ wobenya ɔkwan bi a wɔbɛfa so afi mu.—Ɔsɛnkafo 8:9.
2 Ano aduru ne dɛn? Ɛne Onyankopɔn Ahenni a Yesu kyerɛɛ n’akyidifo sɛ wɔmmɔ ho mpae no. (Mateo 6:9, 10) Hwɛ aseda ara a ɛsɛ sɛ yɛde ma sɛ mprempren ahotɔ a ɛde bɛba no abɛn pɛɛ!
3. (a) Ɛdefa saa Ahenni yi ho no, dɛn na esii wɔ soro wɔ 1914 Y.B. mu? (b) Dɛn nti na eyi ho hia yɛn?
3 Efi 1914 Y.B. reba no, Onyankopɔn Ahenni a ɛhyɛ Yesu Kristo nsa no redi dwuma dedaw. * Saa afe no mu na nea na Daniel ahu wɔ nkɔmhyɛ anisoadehu mu no bae ankasa wɔ soro. “Nea Ne Nna Akyɛ,” Yehowa Nyankopɔn, de “tumi ne anuonyam ne ahenni” maa onipa Ba Yesu Kristo, “ma aman, nkurɔfo ne kasa horow nyinaa som no.” Daniel rebɔ anisoadehu no ho amanneɛ no, ɔkyerɛwee sɛ: “Ne tumi yɛ daa tumi a ɛrentwam da, na n’ahenni yɛ nea ɛrensɛe da.” (Daniel 7:13, 14) Ahenni yi so na Onyankopɔn nam bɛma nnipa a wɔdɔ trenee atumi anya nneɛma pa pii a enni ano a ɔbɔɔ ne tirim wɔ ho bere a ɔde adesamma awofo a wodi kan no too Paradise no.
4. Ahenni no ho asɛm bɛn na yɛn ani gye ho kɛse, na dɛn ntia?
4 Ahenni no nkoa anokwafo ani gye sɛnea wɔahyehyɛ nniso yi ne ne dwumadi ho yiye. Wɔpɛ sɛ wohu nea ɛreyɛ mprempren, nea ɛbɛyɛ daakye ne nea ɛrehwehwɛ afi wɔn hɔ. Wɔhwehwɛ mu yiye na bere a wɔyɛ saa no, anisɔ a wonya ma no no kɔ so yɛ kɛse na wosiesie wɔn ho na ama wɔaka ho asɛm akyerɛ afoforo.—Dwom 48:12, 13.
Nhwehwɛmu Bi A Ɛka Koma
5. (a) Ɔkwan bɛn so na Kyerɛwnsɛm no kyerɛ onii a Mesia Ahenni no da n’amansan tumidi adi no? (b) Enti nea yesua fa Ahenni no ho no ka yɛn dɛn?
5 Nneɛma a edi kan a nhwehwɛmu a ɛte saa no da no adi no mu biako ne sɛ Mesia Ahenni yi yɛ Yehowa ankasa tumidi ho nhwɛso. Ɔno na ɔde “tumi ne anuonyam ne ahenni” maa ne Ba no. Ne saa nti Ahenni yi fii ase dii tumi akyi no, nne ahorow a efi soro kae ma ɛfatae sɛ: “Wiase ahenni ayɛ yɛn Awurade [Yehowa Nyankopɔn] ne ne Kristo de, na [Yehowa] bedi hene daa daa.” (Adiyisɛm 11:15) Enti biribiara a yehu wɔ Ahenni yi ho ne nea etumi yɛ no twe yɛn bɛn Yehowa ankasa ho kɛse. Ɛma yenya ɔpɛ sɛ yɛbɛbrɛ yɛn ho ase ama ne tumidi daa.
6. Dɛn nti na yɛn ani gye ho titiriw sɛ Yesu Kristo yɛ Yehowa sodifo abadiakyiri?
6 Hwɛ oye a eye sɛ Yehowa de Yesu Kristo asi ahengua so sɛ ne sodifo abadiakyiri! Sɛ́ Odwumayɛfo Panyin a Onyankopɔn de no dii dwuma ma ɔyɛɛ asase ne onipa no, Yesu nim nea ehia yɛn sen sɛnea yɛn mu biara nim. Afei nso, ɔdaa no adi fi adesamma abakɔsɛm mfiase pɛɛ sɛ ‘n’ani ka nnipa mma mu.’ (Mmebusɛm 8:30, 31; Kolosefo 1:15-17) Saa ɔdɔ no so araa ma n’ankasa baa asase so de ne nkwa bɛmae sɛ agyede maa wɔn. Ɔnam saayɛ so de nea wɔnam so begye yɛn afi bɔne ne owu mu mae na ɔma yenyaa daa nkwa hokwan.—Mateo 20:28.
7. (a) Nea ɛne adesamma nniso bɔ abira no, dɛn nti na saa nniso yi bɛtra hɔ daa? (b) Abusuabɔ bɛn na ɛda “akoa nokwafo ne ɔbadwemma” no ne ɔsoro nniso no ntam?
7 Eyi yɛ nniso a egyina hɔ pintinn na ɛtra hɔ daa. Wɔnam nokwasɛm a ɛyɛ sɛ Yehowa ankasa nwu da no so sii tra a ɛtra hɔ daa no so dua. (Habakuk 1:12; Dwom 146:3-5, 10) Nea ɛne adesamma ahene tebea bɔ abira no, Yesu Kristo a Onyankopɔn de Ahenni no ahyɛ ne nsa no nso nwu da. (Romafo 6:9; 1 Timoteo 6:15, 16) Wɔn a wɔbɛka Kristo ho atra ɔsoro nhengua so no ne afoforo 144,000 a wɔyɛ Onyankopɔn asomfo anokwafo a wɔayi wɔn afi “mmusua ne kasa ne nkurɔfo ne aman nyinaa mu” no. Wɔma eyinom nso nkwa a owu nnim. (Adiyisɛm 5:9, 10; 1 Korintofo 15:42-44, 53) Wɔn mu fã kɛse no ara wɔ soro dedaw, na wɔn mu nkaefo a wɔwɔ asase so no na wɔyɛ “akoa nokwafo ne ɔbadwemma” kuw a ɛde nokwaredi ma saa Ahenni no nneɛma kɔ so no.—Mateo 24:45-47.
8, 9. (a) Nkɛntɛnso a ɛde mpaapaemu ne ɔsɛe ba bɛn na Ahenni no beyi afi hɔ? (b) Enti, sɛ yɛpɛ sɛ yekwati Ahenni no atamfo a yɛbɛyɛ a, ahyehyɛde ne dwumadi ahorow bɛn na yɛbɛpow sɛ yɛde yɛn ho bɛfrafra mu?
8 Afei ɛrenkyɛ, wɔ Yehowa bere a wahyɛ ato hɔ mu no, n’abrafo dɔm bedi dwuma de atew asase no ho. Wɔbɛsɛe saa adesamma a wofi wɔn ankasa pɛ mu nnim Onyankopɔn na wɔmpɛ sɛ wobegye ne tumidi atom na wobu ɔdɔ nsiesiei horow a ɔnam Yesu Kristo so yɛ no animtiaa no afi hɔ daa. (2 Tesalonikafo 1:6-9) Eyi bɛyɛ Yehowa da, bere a ofi tete atwɛn ma wɔde asan ne din ho sɛ Amansan Hene no.
9 Wɔbɛsɛe atoro som ne adesamma nniso ahorow ne wɔn dɔm nso a wiase yi sodifo bɔne a aniwa nhu no no adaadaa wɔn no nyinaa korakora. Wɔbɛsɛe wɔn a wɔda wɔn ho adi sɛ wɔyɛ wiase yi fã denam ahopɛ, nkontompo ne ahohwibɔ asetra akyi a wodi so no nyinaa. Wobeyi Satan ne n’adaemone afi hɔ a wɔne asase sotefo nnya twaka biara na wɔasiw wɔn kwan mfirihyia apem. Ahotɔ bɛn ara na eyi bɛyɛ ama wɔn a wɔdɔ trenee nyinaa sɛɛ yi!—Adiyisɛm 18:21, 24; 19:11-16, 19-21; 20:1, 2.
Ne Botae Ahorow—Sɛnea Wɔyɛ Du Ho
10. (a) Ɔkwan bɛn so na Mesia Ahenni no bɛma Yehowa atirimpɔw a ɔwɔ ma asase no ankasa no anya mmamu? (b) Dɛn na eyi bɛkyerɛ ama nnipa a wɔte asase so saa bere no?
10 Mesia Ahenni yi bewie Onyankopɔn mfitiase atirimpɔw ma asase yi ho dwumadi koraa. (Genesis 2:8, 9, 15; 1:28) Ɛde besi nnɛ no, onipa ntumi nnii saa atirimpɔw no ho dwuma. Nanso, wɔde “wiase a ɛreba” no ahyɛ onipa Ba Yesu Kristo no ase. Wɔn a wobenya wɔn ti adidi mu wɔ Yehowa atemmu a ɔde bɛba nhyehyɛe dedaw yi so no nyinaa bɛyɛ biako ayɛ adwuma wɔ Kristo ase sɛ Ɔhene na wɔde anigye bɛyɛ biribiara a wahyɛ wɔn sɛ wɔnyɛ sɛnea ɛbɛyɛ a asase no nyinaa bɛdan Paradise. (Hebrifo 2:5-9) Adesamma nyinaa bedi wɔn nsa ano adwuma na wɔanya aba bebree a asase no bɛsow no mu mfaso kɛse.—Dwom 72:1, 7, 8, 16-19; fa toto Yesaia 65:21, 22 ho.
11. (a) Ɔkwan bɛn so na Ahenni no bɛma ne nkoa anya adwene ne nipadua mu pɛyɛ? (b) Dɛn na ɛbɛka eyi ho?
11 Bere a wɔbɔɔ Adam ne Hawa no na wɔyɛ pɛ na na ɛyɛ Onyankopɔn atirimpɔw sɛ wɔde wɔn asefo a wɔn nyinaa yɛ pɛ wɔ adwene ne nipadua mu bɛhyɛ asase no so ma. Ahenni no tumidi ase no, saa atirimpɔw no bɛyɛ hɔ wɔ ɔkwan a ɛyɛ anigye so. Eyi hwehwɛ sɛ woyi nea bɔne de bae no nyinaa fi hɔ, na ɛno nti, ɛnyɛ sɛ Kristo som sɛ Ɔhene nko, na mmom sɛ Ɔsɔfo Panyin nso. Ɔde boasetɔ bɛboa ne nkoa a wɔyɛ osetie na ama wɔanya n’ankasa ne desani nkwa afɔre a ɛpata bɔne no bo a ɛsom no mu mfaso. Anifuraefo ani bebue. Asotifo aso bɛte asɛm. Honam a onyin anaa ɔyare asɛe no no bɛyɛ foforo asen abofra de. Ɔhonam mu mmerɛwyɛ ahorow a wontumi nsa nyinaa befi hɔ ama akwahosan pa aba. Ɛbɛba sɛ obiara rennya biribi nnyina so nnka sɛ “me yare,” efisɛ wobegye adesamma a wosuro Onyankopɔn afi bɔne adesoa ne nneɛma a ɛyɛ yaw a ɛde ba no mu.—Fa toto Yesaia 33:22, 24, NW; 35:5, 6; Hiob 33:25; Luka 13:11-13 ho.
12. (a) Dɛn bio na ɔdesani pɛyɛ hwehwɛ? (b) Ɔkwan bɛn so na wobenya ɛno, na dɛn na ebefi mu aba?
12 Nanso pɛ a wɔbɛyɛ no sen nipadua a ɛte apɔw ne adwene a emu da hɔ a wobenya. Nea ɛka ho ne Yehowa nipasu ahorow a wɔbɛda no adi sɛnea ɛfata, efisɛ wɔyɛɛ onipa wɔ ‘Onyankopɔn suban so, sɛ ne sɛso.’ (Genesis 1:26) Sɛnea ɛbɛyɛ na woayɛ saa no, ebehia ɔkyerɛkyerɛ pii. Eyi yɛ Nhyehyɛe Foforo a “trenee te mu,” enti sɛnea odiyifo Yesaia ka siei no, “trenee na asase no sotefo besua.” (2 Petro 3:13; Yesaia 26:9, NW) Su yi de asomdwoe ba—aman nyinaa mufo, nnamfo, obi ankasa abusua ne nea ɛsen ne nyinaa no, wɔne Onyankopɔn ntam. (Yesaia 32:17; Dwom 85:10-13) Wɔde nkakrankakra bɛkyerɛkyerɛ wɔn a wosua trenee no Onyankopɔn apɛde a ɛwɔ hɔ ma wɔn. Bere a Yehowa akwan ho dɔ atim wɔn komam no, wobedi eyinom akyi wɔn asetra mu biribiara mu. Onipa Yesu a ɔyɛ pɛ no tumi kae sɛ ‘meyɛ nneɛma a ɛsɔ m’Agya ani daa.’ (Yohane 8:29) Hwɛ sɛnea asetra bɛyɛ anigye bere a ɛno abam wɔ adesamma nyinaa ho no!
Nea Ayɛ Dedaw No Da Adi
13. Fa nsemmisa a ɛwɔ atifi hɔ no kyerɛkyerɛ nneɛma a Ahenni no ayɛ dedaw no ne nea ɛno nti ɛsɛ sɛ yɛyɛ no mu.
13 Nneɛma a ɛyɛ fɛ a Ahenni no ayɛ no da adi pefee dedaw ma nnipa a wɔwɔ gyidi aniwa no hu. Nsemmisa ne Kyerɛwnsɛm a wɔabobɔ din a edidi so no bɛkae wo eyinom bi, ne nneɛma a Ahenni no nkoa nyinaa betumi ayɛ na ɛsɛ sɛ wɔyɛ mprempren nso:
Henanom na Ɔhene no yɛɛ ade tiae kan, na ekowiee dɛn? (Adiyisɛm 12:7-10, 12)
Kuw bɛn mufo a wodi akyiri anoboaboa so na wɔde adwene sii ntɛm ara bere a wɔde Kristo sii agua so akyi no? (Mateo 24:31; Adiyisɛm 7:1-4)
Wɔ Mateo 25:31-33 no, adwuma foforo bɛn na Yesu ka siei sɛ wɔbɛyɛ bere a watra n’ahengua so akyi ne ansa na ɔbɛsɛe abɔnefo no?
Ɔkwan bɛn so na wɔnam yɛ adwuma yi? Henanom na wɔyɛ bi? (Mateo 24:14; Dwom 110:3; Adiyisɛm 14:6, 7)
Dɛn nti na amammui ne nyamesom asɔretiafo antumi ansiw ano? (Asomafo no Nnwuma 5:38, 39; Sakaria 4:6)
Sɛ́ nea afi ɔkyerɛkyerɛ adwuma a wɔreyɛ no mu aba no, nsakrae ahorow bɛn na aba nnipa a wɔbrɛ wɔn ho ase hyɛ Ahenni no tumidi ase no asetra mu dedaw? (Yesaia 2:4; 1 Korintofo 6:9-11)
Ahenni No Su A Ɛtra Hɔ Daa
14. (a) Kristo bedi hene bere tenten bɛn? (b) Dɛn na wɔbɛyɛ wɔ saa bere no mu?
14 Bere a wɔde Satan ne n’adaemone ahyɛ bun no mu akyi no, Yesu Kristo a ne mfɛfo adedifo 144,000 ka ne ho no bedi tumi mfirihyia apem. (Adiyisɛm 20:6) Saa bere no wɔde adesamma bɛba pɛyɛ mu. Wobeyi nniso ne mpanyinni ne tumi nyinaa a ɛsɔre tia Yehowa no afi hɔ. Sɛ Yesu yɛ ɛno wie a, ɔbɛdan Ahenni no ahyɛ n’Agya nsa, “na Onyankopɔn ayɛ ade nyinaa mu ade nyinaa.”—1 Korintofo 15:24, 28.
15. Ɔkwan bɛn so na ɛyɛ nokware sɛ saa Ahenni yi yɛ nea ‘wɔrensɛe no da’?
15 Enti Yesu ankasa gyinabea wɔ asase yi ho bɛsakra. Nanso ne tumi no bɛyɛ “daa” tumi na n’Ahenni bɛyɛ “nea ɛrensɛe da.” (Daniel 7:14) Ɔkwan bɛn so? Ɛne sɛ nniso tumi no renkodi afoforo a wokura botae horow a ɛsonsonoe nsam. Nneɛma a Ahenni no bɛyɛ no ‘rensɛe da.’ Nea Ahenni no yɛ de san Yehowa din ne n’atirimpɔw a ɛfa asase yi ho no begyina daa.
[Ase hɔ nsɛm]
Asɛm No Mu Nti̇̃mu
● Dɛn nti na Onyankopɔn Ahenni no ne adesamma nsɛnnennen ano aduru biako pɛ? Bere bɛn na efii ase dii tumi?
● Dɛn na w’ani gye ho titiriw wɔ Onyankopɔn Ahenni no ne nea ɛbɛyɛ no ho? Dɛn ntia?
● Nneɛma a Ahenni no ayɛ bɛn na yetumi hu dedaw? Afã bɛn na yɛwɔ wɔ eyi mu?
[Adesua no ho Nsɛmmisa]
[Mfonini wɔ kratafa 84, 85]
Trenee na ɔmanfo no besua
