Kamfo Yehowa sɛ Nokware Nyankopɔn No
Ti 2
Kamfo Yehowa sɛ Nokware Nyankopɔn No
1. (a) Hena ne nokware Nyankopɔn no? (b) Bere a yesua ne ho ade no, ɔkwan bɛn so na ɛsɛ sɛ ɛka yɛn ankasa asetra?
ƆSOMAFO Paulo kyerɛw kɔmaa ne mfɛfo Kristofo sɛ, ɛwom sɛ anyame pii wɔ hɔ de, nanso “yɛn de, Onyankopɔn biako pɛ na yɛwɔ, Agya no . . . ne Awurade biako, Yesu Kristo.” (1 Korintofo 8:5, 6) “Onyankopɔn biako” a na Paulo reka ne ho asɛm no ne Yehowa, nneɛma nyinaa Bɔfo no. (Deuteronomium 6:4; Adiyisɛm 4:11) Nnipa a wɔwɔ anisɔ a wosua ne su horow ne nneɛma a wayɛ ama adesamma no ho ade hu sɛ ɛtwe wɔn bɛn no wɔ ɔkwan a wontumi nyɛ ho hwee so. Dɛn na efi mu ba? Ɛyɛ ade a ɛda hɔ sɛ wɔbɛkamfo Onii a wɔn ani gye ne ho kɛse yi, na wɔbɛyɛ saa denam nsɛm ne nneyɛe so. Bere a ɔdɔ a wɔwɔ ma Onyankopɔn no yɛ kɛse no, wɔte nka sɛ ɛsɛ sɛ wɔka ne ho asɛm kyerɛ afoforo, na sɛ́ nnipa no, wɔpɛ sɛ wosuasua no sɛnea wobetumi. Bible no hyɛ yɛn nyinaa nkuran sɛ yɛnyɛ saa, sɛ: “Munsua Onyankopɔn sɛ mma adɔfo, na monnantew ɔdɔ mu.” (Efesofo 5:1, 2) Sɛ yɛde saa afotu no bedi dwuma a, ɛho hia sɛ yehu Yehowa sɛnea ɔte no ankasa.
Onii Ko A Yehowa Yɛ
2. Onyankopɔn su horow a ɛda nsow a ɛka yɛn ma yeyi no ayɛ no bi ne nea ɛwɔ he?
2 Wɔ Bible mu nyinaa no yehu nsɛm pii a wɔaka no tẽẽ a ɛda Onyankopɔn su horow a ɛda nsow no adi. Bere a wokenkan eyinom no, gye bere susuw nea su horow yi yɛ ankasa ne sɛnea ɛho hia ma wo no ho. Sɛ nhwɛso no: “Onyankopɔn ne dɔ.” (1 Yohane 4:8) “N’akwan nyinaa yɛ trenee.” (Deuteronomium 32:4) ‘Ɔno nkyɛn na nyansa wɔ.’ (Hiob 12:13) Ɔyɛ “den tumi mu.” (Yesaia 40:26, NW) Bere a wususuw su ahorow yi ho no, so ɛnka wo mma wumfi w’ani a egye Onyankopɔn ho no mu nyi no ayɛ?
3. Yehowa su afoforo bɛn na ɛma yɛn ani gye ne ho kɛse?
3 Bible no rekɔ so ama yɛahu Yehowa su a ɛyɛ anigye no, ɛka kyerɛ yɛn sɛ ɔyɛ “Onyankopɔn mmɔborohunufo ne ɔdomfo, nea n’abodwo kyɛ na n’adɔeyɛ ne ne nokware dɔɔso pii.” (Exodus 34:6) “Na wo, [Yehowa], wuye na wode firi.” (Dwom 86:5) “Na [Yehowa] de n’aniwa kyini fa asase nyinaa so, sɛ ɔde denyɛ bedi ama wɔn a wɔn koma di mũ wɔ ne ho no.” (2 Beresosɛm 16:9) “Onyankopɔn nhwɛ onipa anim, na mmom ɔman biara mu, nea osuro no na ɔyɛ ade trenee no, ɔpɛ no agye no.” (Asomafo no Nnwuma 10:34, 35) Yehowa ‘ma nnipa nyinaa ade kwa’ na ɔyɛ “anigye Nyankopɔn.” (Yakobo 1:5; 1 Timoteo 1:11, NW) Hwɛ anigye ara a ɛyɛ sɛ wobɛsom Onyankopɔn a obi ne no nsɛ yi na woanya ne hwɛ a efi ɔdɔ mu no!
4. (a) Ahofama bɛn na Yehowa hwehwɛ, na ɛho hia dɛn? (b) Dɛn na Dwom 34:3 to nsa frɛ yɛn sɛ yennya mu kyɛfa?
4 Nea ɛne ne su horow no hyia ne nokwasɛm a ɛyɛ sɛ ɔyɛ ‘Onyankopɔn a ɔhwehwɛ ahofama a edi mu’ no. (Exodus 20:5, NW) Sɛ yɛbɛsom no wɔ kwan a ɛsɔ n’ani so a, ɛsɛ sɛ yɛde yɛn ho nyinaa ma no. Yɛrentumi nnɔ wiase a Satan ne ne nyame no nso. (1 Yohane 2:15-17; 2 Korintofo 4:3, 4) Yehowa hu trenee biara a wɔyɛ wɔ ani so ara kwa no. Ɛnyɛ nea yɛyɛ nko na ohu kɛse na mmom sɛnea yɛte nka wɔ ne ho ne nnipa ko a yɛrebɔ mmɔden sɛ yɛbɛyɛ nso. Sɛ yɛdɔ trenee ampa a, ɔboa yɛn. (Yeremia 17:10; Mmebusɛm 15:9) Esiane onii ko a Yehowa yɛ no nti, nnipa ɔpepem pii a wofi wiase nyinaa de anigye agye Bible mu odwontofo no ɔfrɛ no so a ɔno na ɔkyerɛw eyi no: “Mo ne me nkamfo [Yehowa] kɛseyɛ, na momma yɛmmom mma ne din so.” (Dwom 34:3) So woyɛ wɔn mu biako?
5. Dɛn na ɛbɛboa yɛn ma yɛanya Yehowa su ho ade a yesua no mu mfaso kɛse?
5 Sɛ wohwehwɛ Onyankopɔn su horow a ɛkorɔn no mu yiye a, ɔpɛ a wowɔ sɛ wobɛka ne ho asɛm no mu bɛyɛ den na ɛbɛboa wo kɛse wɔ mmɔden a wobɔ sɛ wubesuasua no no mu. Hu (1) nea su no mu biara yɛ pɔtee, nea ebia ɛma ɛyɛ soronko wɔ su afoforo no ho, (2) sɛnea Yehowa ayi no adi ne wɔ henanom ho ne afei nso (3) sɛnea wubetumi ayi no adi anaasɛ sɛnea ɛsɛ sɛ ɛka wo nsusuwii.
6. Bere a wode ɔdɔ yɛ nhwɛso no, kyerɛ sɛnea wubetumi ahwehwɛ Yehowa su ahorow no mu? Yɛ eyi denam nsemmisa a ɛwɔ nkyekyem yi awiei a wubebua no so, fa kyerɛw nsɛm no bra wo mmuae no mu.
6 Susuw nhwɛso biako pɛ ho wɔ ha. Bere a Bible no ka sɛ, “Onyankopɔn ne dɔ” no, dɛn na ɛkyerɛ? (1 Yohane 4:8) Ɛwom, ɔdɔ ahorow pii na ɛwɔ hɔ. Hela asɛmfua a wɔde dii dwuma wɔ asɛm yi mu no ne a·gaʹpe a ɛkyerɛ ɔdɔ a ɛkorɔn sen biara, te sɛ nea Yehowa Nyankopɔn ankasa yɛ ho nhwɛso no. Ɔdɔ a ɛte sɛɛ yɛ su a pɛsɛmenkominya nnim koraa adi a woyi. Bere a ɛno wɔ w’adwene mu no, w’ankasa hwehwɛ nsemmisa a ɛwɔ ase hɔ no ho mmuae denam kyerɛw nsɛm a ɛwɔ hɔ no a wode bedi dwuma no so.
Ɔkwan bɛn so na su yi da adi wɔ Yehowa adebɔ nnwuma no mu? (Asomafo no Nnwuma 14:16, 17)
Yehowa dɔ ma adesamma ho nhwɛso a ɛsen biara ne nea ɛwɔ he? (Yohane 3:16) So onipa papayɛ nti na Yehowa yɛɛ eyi? (Romafo 5:8)
Ɔkwan bɛn so na ɛsɛ sɛ nea Yehowa nam ne Ba no so yɛe no nya ɔkwan a yɛfa so bɔ yɛn bra no so tumi? (2 Korintofo 5:14, 15, 19)
Akwan horow bɛn so na sɛ́ Kristofo no yebetumi akyerɛ sɛ yɛwɔ ɔdɔ koro no ara ma mfɛfo Kristofo? (1 Korintofo 13:4-7; 1 Yohane 4:10, 11; 3:16-18)
Henanom nso na ɛsɛ sɛ yeyi ɔdɔ adi kyerɛ wɔn, na ɔkwan bɛn so? (Mateo 5:43-48; 28:19, 20; Galatifo 6:10)
7. Wɔ wo kokoam adesua mu no, ɔkwan bɛn so na wubetumi anya nsɛm a ɛte saa ara a ɛfa Yehowa su afoforo ho?
7 So wobɛpɛ sɛ wohwehwɛ Yehowa su afoforo no nso bi mu hwɛ? Sɛ́ nea edi kan wɔ wo kokoam adesua mu no, dɛn nti na wonsɔ “atɛntrenee” ne “nyansa” nhwɛ, ne afei ebia “adɔeyɛ” ne “mmɔborohunu.” Sɛ wode Ɔwɛn Aban Asafo index ahorow no ne Bible concordance di dwuma a, wubenya nsɛm pii a ɛde nkyerɛkyerɛmu a ɛsom bo ma.
Boa Afoforo Ma Wonhu Nokware A Ɛfa Onyankopɔn Ho No
8. (a) Anyame bɛn na nnipa a wɔwɔ wiase no som? (b) Hena na ɔhyɛ basabasayɛ yi nyinaa akyi, na dɛn nti na woka saa?
8 Nea ɛne nokware Nyankopɔn no som bɔ abira no, nnipa som anyame ɔpepem pii foforo. Wɔ afeha a ɛto so anan no mu no, Kristoman gyee “Baasakoro” gyidi a Babilonfo, Misrifo, Hindufo ne Buddafo dii kan kyerɛkyerɛe no toom. Nea ɛka Onyankopɔn ho adwene yi ho no, sodifo ahorow a wɔwɔ tumi, agumadifo ne nnwontofo a wɔbɔ mmɔden kɛse wɔ hɔ a wɔsom wɔn te sɛ anyame. Sika, ahopɛ ne ɔbarima ne ɔbea nna nso abɛyɛ anyame a wɔde ahofama kɛse ma wɔn. Hena na ɔhyɛ ne nyinaa akyi? “Wi yi ase nyame,” Satan Ɔbonsam. (2 Korintofo 4:4; 1 Korintofo 10:20) Ɔnam anifere kwan biara a obenya so bɔ mmɔden sɛ ɔbɛdan nkurɔfo afi Yehowa ho, anaasɛ anyɛ yiye koraa no ɔbɛma wɔn ahofama no mu apae.
9. Dɛn ne ɔkwan a eye sen biara a wobɛfa so aboa obi ma wahu nokware a ɛfa Onyankopɔn ho no?
9 Ɔkwan bɛn so na yebetumi aboa saafo yi, sɛ́ ɛyɛ wɔn a wɔka sɛ wɔyɛ Kristofo anaa afoforo, na wɔahu nokware a ɛfa Onyankopɔn ho no? Akwan a eye sen biara no mu biako ne sɛ yɛbɛboa akyerɛ wɔn nea Bible no ankasa ka wɔ nokware Nyankopɔn no ho ne onii ko a ɔyɛ. Afei ɛho hia sɛ yɛde abrabɔ a ɛda su pa adi kyerɛ eyi wɔ yɛn ankasa asetra mu.—1 Petro 2:12.
10. Sɛ yɛne obi a ogye Baasakoro di rekasa a, dɛn nti na ɛbɛyɛ nea nyansa nnim sɛ yebesusuw sɛ yenim nea ogye di ankasa?
10 Na sɛ wɔn a wɔyɛ Kristoman asɔreasɔre no mufo bi gye yɛn kyim ka sɛ wɔn “Baasakoro” gyidi no fi Kyerɛwnsɛm mu nso ɛ? Nea edi kan koraa no, hu sɛ ɛwom sɛ “Baasakoro” nkyerɛkyerɛ no ho nkyerɛkyerɛmu a wɔahyɛ da de ama wɔ hɔ de, nanso nnipa pii kura wɔn ankasa adwene wɔ ho. Ma kwan ma wɔnkyerɛ wɔn adwene, na afei boa wɔn ma wɔmfa nea wogye di no ntoto nea ɛwɔ wɔn ankasa Bible mu no ho. Hyɛ wɔn nkuran nso wɔ bere bi akyi ma wɔmfa asɔre no nkyerɛkyerɛ ankasa ntoto Onyankopɔn Asɛm no ho.
11. Fa nsɛntitiriw anum no mu biara mmiako mmiako na fa nsemmisa ne kyerɛw nsɛm a ɛka nkyekyem yi ho no di dwuma susuw hyia a “Baasakoro” nkyerɛkyerɛ no ne Kyerɛwnsɛm nhyia no ho.
11 Bere a wowɔ nnipa komapafo a wobɛboa wɔn ho ɔpɛ wɔ w’adwene mu no, susuw sɛnea wubetumi de nsɛm a ɛwɔ ase ha no adi dwuma de asusuw nsɛm a wɔada kyerɛw nsɛm yi adi wɔ ho no ho no ho:
(1) Baasakorofo no bi si adwene yi so dua sɛ honhom Nnipa baasa na wɔwɔ hɔ (Agya, Ɔba ne Sunsum Kronkron) nanso wɔyɛ Onyankopɔn koro pɛ.
Nanso so Asomafo no Nnwuma 2:4, 17 kyerɛ sɛ “Sunsum Kronkron” anaa “honhom kronkron” no yɛ onipa?
Dɛn nti na eye sɛ wobɛhyɛ nnipa dodow a wɔka wɔn ho asɛm wɔ kyerɛw nsɛm a edidi so yi biara mu no nsow? (Yohane 17:20-22; Asomafo no Nnwuma 7:56; Adiyisɛm 7:10)
(2) Ebinom gye di sɛ “Baasakoro” no mufo nyinaa wɔ anuonyam koro, ne sɛ obi nyɛ kɛse anaa ketewa nsen ɔfoforo, ne sɛ wɔyɛ tipɛn na wɔn nyinaa wɔ hɔ daa.
So Kyerɛwnsɛm no gye tom saa? (Sɛnea ɛbɛyɛ a wubenya ho mmuae no, hwɛ Yohane 14:28; Mateo 24:36; Adiyisɛm 3:14.)
(3) Nnipa binom twe adwene si Yohane 1:1 so sɛ edi “Baasakoro” ho adanse. Wɔka sɛ Hela asɛm a ɛwɔ ha no nni adekyerɛsɛm (“bi”), na enti ɛsɛ sɛ kyerɛwsɛm no kenkan sɛ: “na Asɛm no yɛ Onyankopɔn,” na ɛnyɛ “onyame bi” mmom.
Nanso nnipa baahe na wɔka wɔn ho asɛm wɔ Yohane 1:1? Baasa? Anaa baanu? Ɔkwan bɛn so na Yohane 1:18 nso bɔ “Baasakoro” nkyerɛkyerɛ no abira?
Ɛyɛ nokware sɛ Hela kasa no nni adekyerɛsɛm, nanso kasa ahorow pii de di dwuma, na wɔyɛ saa wɔ saa kasa ahorow no mu na ama wɔatumi ada nsɛm adi wɔ ɔkwan a ɛteɛ so. Sɛ obi te nka sɛ enye sɛ wɔde adekyerɛsɛm no bedi dwuma bere a wɔrekyerɛ Yohane 1:1 ase a, so ɔbɛpɛ sɛ woyi fi Asomafo no Nnwuma 28:6, sɛnea wɔakyerɛ ase wɔ King James Version ne afoforo mu no? (Ɔkwan foforo a wɔfa so kyerɛ Yohane 1:1 ase sɛnea ɛte wɔ An American Translation mu ne sɛ, “na Asɛm no yɛ kronkron,” kyerɛ sɛ, na ɔwɔ su kronkron ahorow a Onyankopɔn wɔ no bi.)
(4) Baasakorofo gye kyim nso sɛ wɔ Genesis 1:1, 26 no Hebri asɛmfua a wɔkyerɛɛ ase “Onyankopɔn” no ne El·o·himʹ na eyi wɔ dodow kabeam wɔ Hebri kasa mu a nea ɛkyerɛ ankasa ne “Anyame.”
Dɛn nti na ɛno nyɛ nea ɛboa honhom Nnipa baasa wɔ “Onyankopɔn biako” mu nkyerɛkyerɛ no?
Sɛ ɛkyerɛ “Baasakoro” wɔ Genesis 1:1 a, dɛn na ɛkyerɛ wɔ Atemmufo 16:23 a ɛde el·o·himʹ di dwuma ma “nyame” a Hebri adeyɛ kasa no wɔ obiakofo kabeam na ɛnyɛ dodow kabeam no?
Dɛn nti na wɔde Onyankopɔn dii dwuma wɔ dodow kabeam wɔ saa nsɛm yi mu wɔ Hebri mu? Eyi ne ɔkwan biako a Hebri kasa no fa so da anuonyam anaa tumi ho adwene adi. Sɛ ɛkyerɛ nea ɛboro onipa biako a, adeyɛ kasa a ɛka ho no nso bɛyɛ nea ɛwɔ dodow kabeam, nanso ɛnte saa wɔ atifi hɔ asɛm no mu.
(5) Esiane si a asɔre ahorow no si Yesu so dua (a nokwasɛm a ɛyɛ sɛ wɔayi edin Yehowa no afi Bible nkyerɛase pii mu no ka ho) no nti, Yesu nkutoo ho na nnipa binom susuw bere a wɔabɔ Onyankopɔn din no.
Nanso nhwɛso bɛn na Yesu yɛ maa yɛn sɛ yensuasua wɔ ɔsom ho? (Luka 4:8)
12. Dɛn nti na Yesu frɛɛ n’Agya no “nokware Nyankopɔn koro” ma ɛfatae?
12 Ɛwom sɛ wɔka Yesu ho asɛm wɔ Kyerɛwnsɛm no mu sɛ “onyame” ne “Onyankopɔn tumfoɔ” mpo de, nanso ɔhyɛɛ n’Agya anuonyam, na ɔfrɛɛ no “me Nyankopɔn ne mo Nyankopɔn.” (Yohane 1:1; 20:17; Yesaia 9:6) Ɔne Mose a na wadi kan aka eyi no yɛɛ adwene sɛ: “[Yehowa] ne [nokware] Nyankopɔn a obi nni hɔ nka ne ho.” (Deuteronomium 4:35) Yehowa yɛ soronko koraa wɔ nneɛma a wɔsom wɔn te sɛ ahoni, nnipa a wɔde wɔn ayɛ anyame ne Satan Ɔbonsam ho. Nea ɛne eyi nyinaa bɔ abira ne sɛnea Yesu frɛɛ no no, Yehowa ne “nokware Nyankopɔn koro no.”—Yohane 17:3.
‘Nantew [Yehowa] Din Mu’
13, 14. Dɛn na ‘hu a wubehu’ Yehowa na ‘woanantew’ ne din mu no kyerɛ?
13 Adwenem basaayɛ wɔ mfe pii mu wɔ onii ko a Onyankopɔn yɛ ho akyi no, ɛyɛ nnipa pii anigye bere a wohu Onyankopɔn ankasa din Yehowa no wɔ wɔn Bible mu nea edi kan no. (Exodus 6:3) Nanso sɛ ‘wɔnantew Yehowa din mu daa’ nkutoo a na wobenya saa nimdeɛ no ho mfaso daa. (Mika 4:5) Eyi gye pii sen hu a wobehu edin Yehowa no anaasɛ ka a wɔbɛka ara kwa sɛ wɔyɛ Yehowa Adansefo.
14 Ɛdefa nea Onyankopɔn din no kyerɛ ho no, Dwom 9:10 se: “Wɔn a wonim wo din de wɔn ho bɛto wo so . . . [Yehowa].” Dɛn na ɛno hwehwɛ? Egye pii sen edin Yehowa no a wubehu a ɛno nkyerɛ sɛ wode wo ho to Yehowa so no. Onyankopɔn din a ‘wubehu’ wɔ ha no kyerɛ hu a wubehu Onyankopɔn ko a Yehowa yɛ, woanya obu ama ne tumidi, na woadi n’ahyɛde so. Saa ara na ‘Yehowa din mu a wobɛnantew’ no kyerɛ wo ho so a wubehyira ama no na woagyina n’ananmu sɛ n’asomfo no mu biako na woatra ase ma ɛne Onyankopɔn apɛde ahyia ampa. (Luka 10:27) So woreyɛ saa?
15. Sɛ yebetumi asom Yehowa daa a, dɛn na ɛho hia bio wɔ asɛyɛde ho adwene a yebenya no akyi?
15 Sɛ yɛbɛsom Yehowa daa a, ɛsɛ sɛ nea ɛsen asɛyɛde ho adwene kanyan yɛn. Ɔsomafo Paulo ka kyerɛɛ Timoteo a na ɔde mfe pii asom Yehowa dedaw no sɛ: “Fa Onyankopɔn som pa ahofama yɛn wo ho sɛ wo botae.” (1 Timoteo 4:7, NW) Ahofama fi komam na ɛba; anisɔ ma onipa a wɔreyi adi akyerɛ no no na ɛkanyan obi. “Onyankopɔn som pa ahofama” yɛ obu kɛse a wonya ma Yehowa ankasa. Ɛda ɔdɔ mu a esiane ɔne n’akwan ho anisɔ nti wofi de ho bata ne ho adi. Ɛma yenya ɔpɛ sɛ yɛbɛma obiara adi ne din no ni kɛse. Sɛ yebetumi anantew Yehowa, nokware Nyankopɔn no din mu daa a, ɛsɛ sɛ yenya “Onyankopɔn som pa ahofama” sɛ yɛn botae wɔ asetra mu.—Dwom 37:4; 2 Petro 3:11.
Asɛm No Mu Nti̇̃mu
● Onipa bɛn na Yehowa yɛ? Ɔkwan bɛn so na yenya mfaso wɔ ne su no mu biara a yenya mu ntease yiye no mu?
● Ɔkwan bɛn so na yebetumi aboa nnipa afoforo ma wɔahu nokware a ɛfa Onyankopɔn ho no?
● Dɛn na ‘hu a wubehu’ Yehowa na ‘woanantew ne din mu’ no kyerɛ?
[Adesua no ho Nsɛmmisa]
