Ti 14

‘Me Ne Mo Yɛ Ahenni Apam’

1. Anadwo ansa na Yesu rewu no, anidaso bɛn na ɔde sii n’asomafo no anim?

ƐYƐ anadwo ansa na wɔrekum Yesu no na ɔka kyerɛɛ n’asomafo anokwafo no sɛ: ‘Trabere pii wɔ m’Agya ofi. Merekɔ makosiesie baabi mama mo, na faako a mewɔ no mo nso moaba hɔ.’ Ɔka kyerɛɛ wɔn bio nso sɛ: “Sɛnea m’Agya ne me ayɛ ahenni apam no, saa ara nso na me ne mo yɛ apam.” (Yohane 14:2, 3; Luka 22:29, NW) Anidaso a ɛyɛ nwonwa bɛn ara na ɔde sii wɔn anim sɛɛ yi!

2. Nnipa baahe na wɔne Kristo benya ne soro Ahenni no mu kyɛfa?

² Nanso Yesu ankyerɛ sɛ saa asomafo no nkutoo na wɔne no bedi tumi wɔ ne soro Ahenni no mu. Akyiri yi, wɔma ɛdaa adi sɛ nnipa 144,000 a wɔatɔ wɔn afi asase so benya saa hokwan a ɛyɛ nwonwa no. (Adiyisɛm 5:9, 10; 14:1, 4) So ebinom rebɔ mmɔden sɛ wɔn nsa bɛka eyi?

Ahenni Adedifo No Anoboaboa

3. Wɔ ne baguam ɔsom adwuma no mu no, hokwan bɛn na Yesu twee adwene sii so?

³ Bere a Herode Antipa de Osuboni Yohane kɔtoo afiase akyi no, Yesu yɛɛ baguam asɛnka ɔsatu bi a emu yɛ den a ɔtwee adwene sii “ɔsoro ahenni” no so wom. (Mateo 4:12, 17) Ɔmaa nkurɔfo hui sɛ wobenya hokwan ahyɛn saa Ahenni no mu na n’asuafo de nnamyɛ tiw saa nkonim bo no.—Mateo 5:3, 10, 20; 7:21; 11:12.

4. (a) Bere bɛn na wɔde honhom kronkron sraa Yesu asuafo a wodi kan no? (b) Dɛn na ɛkyerɛ sɛ efi saa bere no reba no na ɔredan adwene akɔ Ahenni adedifo no anoboaboa so?

 ⁴ Wɔde honhom kronkron sraa wɔn a wodi kan no wɔ Pentekoste, 33 Y.B. mu. (Asomafo no Nnwuma 2:1-4; 2 Korintofo 1:21, 22) Wɔdaa Onyankopɔn nsiesiei ma nkwagye a ɛde obi kɔ ɔsoro asetra a owu nnim mu no adi. Petro de “ɔsoro ahenni no ano nsafe” buee saa nimdeɛ yi ano—maa Yudafo kan, wɔn a wodii hɔ ne Samariafo ne afei Amanaman mufo. (Mateo 16:19) Ná wɔde adwene resi nniso a ebedi adesamma so tumi mfirihyia apem no so titiriw na na ɛkame ayɛ sɛ nkrataa a efi honhom mu a ɛwɔ Kristofo Hela Kyerɛwnsɛm no mu no yɛ nea wɔde kɔmaa Ahenni adedifo kuw yi—“ahotefo,” “wɔn a wɔfra ɔsoro frɛ no mu” no titiriw. *

5. So na frɛ a wɔfrɛɛ wɔn kɔɔ ɔsoro asetra mu no fi ye a woye sen Onyankopɔn nkoa a wodii wɔn anim no nti?

⁵ Ná ɛnyɛ sɛ wɔ ɔkwan bi so no woye sen Yehowa nkoa a na wɔawuwu ansa na Pentekoste, 33 Y.B. reba no nti na na wɔrefrɛ wɔn akɔ ɔsoro asetra mu no. (Mateo 11:11) Mmom no, na afei na Yehowa afi ase repaw wɔn a wɔbɛyɛ Yesu Kristo yɔnko adedifo no. Bɛyɛ mfeha 19 wɔ eyi akyi no, na ɔfrɛ biako a ɛne ɔsoro de no nkutoo na ɛwɔ hɔ. Na ɛyɛ ɔdom a Onyankopɔn yii no adi kyerɛɛ nnipa dodow bi a wɔato wɔn dodow ano hye sɛnea ɛbɛyɛ a ɛbɛma n’ankasa atirimpɔw ahorow a nyansa ne ɔdɔ wom no anya nkɔso.—Efesofo 2:8-10.

6. (a) Dɛn nti na ɛsɛ sɛ bere du sɛ ɔsoro frɛ no ba awiei? (b) Hena na ɔbɛkyerɛ nneɛma kwan sɛnea ɛbɛyɛ a nkɔmhyɛ a ɛfa “nnipakuw kɛse” no ho nso bɛbam, na dɛn ankasa na aba?

⁶ Wɔ bere bi akyi no, nnipa 144,000 a wɔato wɔn  ano hye no dodow no bɛso. Na sɔ a wɔbɛsɔw honhom mu Israelfo no ano sɛ nnipa a wɔagye wɔn atom no awiei bɛyɛ nea abɛn. (Adiyisɛm 7:1-8) Afei Yehowa nam ne honhom ne n’Asɛm no mu ntease a wama n’ahyehyɛde a aniwa hu no anya no so bɛkyerɛ nneɛma kwan sɛnea ɛbɛyɛ a ɔbɛma n’atirimpɔw fã foforo anya mmamu sɛnea wɔaka ho asɛm wɔ Adiyisɛm 7:9-17 no. Wɔbɛboaboa “nnipakuw kɛse” bi a wofi amanaman nyinaa mu a wɔwɔ anidaso a ɛyɛ anigye sɛ wobefi ahohiahia kɛse no mu aka na wɔatra ase daa wɔ pɛyɛ mu wɔ asase so Paradise bi mu no ano. Sɛ yesusuw nea asi no ankasa ho a, ɛte sɛ nea ɛda adi sɛ ɔsoro frɛ no baa awiei wɔ bɛyɛ 1935 Y.B. mu, bere a wɔtee “nnipakuw kɛse” no asase so anidaso no ase pefee no. Efi saa bere no, wɔde Yehowa asomfo ɔpepem pii a wɔwɔ asase so ha abɛka ɔsoro kuw no mufo nkaefo a sɛ wɔde wɔn toto ho a wɔyɛ kakraa bi no ho.

7. So ebetumi aba sɛ ebinom a wɔwɔ hɔ nnɛ mpo betumi anya ɔsoro ɔfrɛ no, na dɛn nti na wubua saa?

⁷ So eyi kyerɛ sɛ mprempren Onyankopɔn mfrɛ obiara mma ɔsoro asetra anaa? Ebedu bere a wɔbɛsɔw wɔn ano awie no, ebetumi aba sɛ wɔn a wɔwɔ saa anidaso no mu kakraa bi renni nokware na ɛbɛyɛ nea ɛsɛ sɛ wɔpaw afoforo si wɔn ananmu. Nanso ɛte sɛ nea ntease wom sɛ ɛnyɛ nea ɛbɛtaa aba.

Honhom Mu Mma—Wɔyɛ Dɛn Na Wohu?

8. Nkyerɛkyerɛmu bɛn na Paulo de ma a ɛkyerɛ ɔkwan a wɔn a wɔde honhom awo wɔn no nam so hu saa nokwasɛm no?

⁸ Onyankopɔn honhom ma Kristofo a wɔabɔ wɔn asu a wɔanya ɔsoro frɛ no nya awerɛhyem sɛ wɔagye wɔn atom sɛ honhom mu mma. Ɔsomafo Paulo daa eyi adi bere a ɔkyerɛw krataa kɔmaa “ahotefo” a na wɔwɔ Roma na ɔkaa tebea a na nokware Kristofo nyinaa wom wɔ saa bere no mu  no ho asɛm no. Ɔkae sɛ: “Dodow a Onyankopɔn honhom ka wɔn no, wɔn na wɔyɛ Onyankopɔn mma. Na moannya nkoayɛ honhom a mode besuro bio, na mmom moanya abagye honhom a ɛno mu na yɛteɛm sɛ Abba, agya! Honhom no ara ne yɛn honhom di adanse sɛ yɛyɛ Onyankopɔn mma. Na yɛyɛ mma a yɛyɛ adedifo nso, Onyankopɔn adedifo ne Kristo yɔnkodifo, nanso gye sɛ yɛne no hu amane ansa na wɔahyɛ yɛn ne no anuonyam bi.”—Romafo 1:7; 8:14-17.

9. Ɔkwan bɛn so na ‘honhom no ara’ ne wɔn a wɔyɛ Onyankopɔn mma ampa no honhom di adanse?

⁹ Wɔtwe yɛn adwene si akwan abien a wɔde asɛm “honhom” no di dwuma wɔ ha no so: “Honhom no ankasa” ne “yɛn honhom.” Nea edi kan no yɛ Onyankopɔn adeyɛ tumi a aniwa nhu no. Ɛkanyan ne honhom mu mma ma wonya gyidi sɛ wɔagye wɔn atom sɛ Onyankopɔn mma a wɔde wɔn ho. Saa honhom no nam Onyankopɔn Asɛm a efi honhom mu a ɛne Bible a ɛte sɛ krataa a wakyerɛw akɔma ne honhom mu mma no nso so di ho adanse. (1 Petro 1:10-12) Bere a wɔn a wɔde honhom kronkron awo wɔn no kenkan nea Kyerɛwnsɛm no ka kyerɛ wɔn a wɔyɛ Onyankopɔn honhom mu mma no, wogye so ma ɛfata sɛ: ‘Ɛno fa me ho.’ Enti Onyankopɔn ankasa adeyɛ tumi nam akwan horow so ne wɔn honhom a ɛne tumi a ɛkanyan wɔn ankasa adwene ne wɔn koma no di adanse sɛ wɔyɛ Onyankopɔn mma. Enti nea ɛne nea Onyankopɔn honhom kyerɛ no hyia no, wɔde wɔn adwene ne wɔn koma si anidaso a ɛne sɛ wɔne Kristo yɛ yɔnko adedifo no so na wogye Onyankopɔn honhom mu mma asɛyɛde ahorow no tom.—Filipifo 3:13, 14.

10. (a) Nneɛma ahorow ankasa bɛn na ɛnkyerɛ sɛ obi yɛ Kristoni a wɔasra no? (b) Adwene bɛn na ‘nguan foforo’ no nya wɔ afã a wɔwɔ wɔ Onyankopɔn atirimpɔw mu no ho?

¹⁰ So ɛte saa wɔ wo fam? Sɛ saa a, wowɔ hokwan  a ɛyɛ nwonwa. Nanso ɛbɛyɛ mfomso sɛ obi bɛka sɛ esiane sɛ ɔwɔ anisɔ a emu yɛ den ma honhom mu nneɛma a emu dɔ anaasɛ ɔyɛ nnam wɔ asɛnka adwuma no mu anaasɛ ɔwɔ ɔdɔ a emu yɛ den ma ne nuanom nti, ɔyɛ Kristoni a wɔde honhom asra no. Saa nneɛma no yɛ nea wohu wɔ “nguan foforo” no mu pii nso ho. Nea wɔkenkan wɔ Kyerɛwnsɛm no mu a ɛfa Kristo yɔnko adedifo ho no ka wɔn koma nso, nanso ɛnyɛ nea wɔka sɛ biribi a Onyankopɔn mfa ntoo hɔ mmaa wɔn no yɛ wɔn de. (Fa toto Numeri 16:1-40 ho.) Wohu Onyankopɔn mfitiase atirimpɔw ma asase no na wɔde anisɔ yɛ ade sɛnea ɛbɛyɛ a wobenya mu kyɛfa.

Di A Wodi Wɔ Ɔkwan A Ɛfata So

11. Henanom na wɔkɔ afe afe Yesu wu nkae no ase na dɛn ntia?

¹¹ Nisan 14 wɔ afe biara mu no, Yesu Kristo akyidifo a wɔde honhom asra wɔn a wɔwɔ wiase afanan nyinaa kae ne wu wɔ bere a owia akɔtɔ no akyi ma ɛne ahyɛde a ɔde maa n’asomafo no hyia. (Luka 22:19, 20) “Nguan foforo” no nso kɔ bi sɛ bɛhwɛadefo a wɔkyerɛ obu na ɛnyɛ sɛ wokodi abodoo no na wɔanom bobesa no bi.

12. Ɔkwan bɛn so na tete Kristofo a na wɔwɔ Korinto no mu binom antumi ankyerɛ Awurade Anwummeduan no ho anisɔ?

¹² Eyi nyɛ nyamesom mu amanne hunu bi na mmom ntease a tumi wom ayɛ no ma. Ɔsomafo Paulo de afotu a anibere wom kɔmaa afeha a edi kan Kristofo a wɔn mu binom ankyerɛ anisɔ a ɛfata amma afahyɛ no sɛ: “Nea obedi abodoo yi, anaasɛ ɔbɛnom Awurade kuruwa yi ano sɛnea ɛnsɛ no, obedi Awurade nipadua ne ne mogya ho fɔ.” Dɛn na ɛma wɔyɛ adifo a ‘wɔmfata’? Ná wonsiesie wɔn ho yiye wɔ koma ne adwenem. Na mpaapaemu wɔ asafo no mu. Afei nso na ebinom didi na wɔnom tra so ansa na nhyiam no adu so. Wɔamma Awurade  Anwummeduan no anyɛ wɔn asɛnhia. Na wonni tebea a ɛbɛma wɔahu aniberesɛm a ɛwɔ nea abodoo ne bobesa no kyerɛ no mu no mu.—1 Korintofo 11:17-34.

13. Abodoo ne bobesa a wɔde ma wɔ Nkaedi no ase no kyerɛ dɛn?

¹³ Dɛn na ɛno kyerɛ sɛ? Ɛnkyerɛ susuw a wosusuw sɛ abodoo ne bobesa no sakra wɔ anwonwa kwan so no. Ɛnyɛ nea wɔsan de Kristo bɔ afɔre bio wɔ Nkaedi no mu biara ase wɔ ɔkwan bi so. Kyerɛwnsɛm no ka sɛ “wɔde Kristo bɔɔ afɔre prɛko sɛ ɔnsoa nnipa bebree bɔne.” (Hebrifo 9:28, NW; 10:10; Romafo 6:9) Abodoo ne bobesa a mmɔkaw nnim no yɛ sɛnkyerɛnne ara kwa a egyina hɔ ma Yesu nipadua ankasa a ɔde bɔɔ afɔre ne ne mogya ankasa a ohwie gui no. Nanso hwɛ sɛnea nneɛma yi ankasa som bo kɛse! Wɔde Yesu desani nipadua a bɔne nnim no mae sɛnea ɛbɛyɛ a adesamma wiase no betumi anya hokwan atra ase daa. (Yohane 6:51) Na ne mogya a ohwie gui no di atirimpɔw abien ho dwuma—ɛtew nnipa a wɔkyerɛ gyidi no ho fi bɔne mu na afei nso ɛma apam foforo a ɛda Onyankopɔn ne honhom mu Israel asafo a emufo yɛ Kristofo a wɔde honhom asra wɔn ntam no di dwuma. (1 Yohane 1:7; 1 Korintofo 11:25; Galatifo 6:14-16) Ɛyɛ nsiesiei ahorow a ɛsom bo yi na etumi ma Onyankopɔn bu “kuw ketewa” no mufo bem na wɔde ɔdesani pɛyɛ ankasa dom wɔn no. (Luka 12:32) Wɔyɛ eyi sɛnea ɛbɛyɛ a honhom kronkron no betumi awo wɔn sɛ Onyankopɔn mma na ama wɔne Kristo anya ne soro Ahenni no mu kyɛfa. Bere a wodi Nkaedi abodoo no bi na wɔnom bobesa no bi afe biara na wɔnam saayɛ so di wɔn soro anidaso no ho adanse no, wɔhyɛ anisɔ a wɔwɔ sɛ wɔwɔ “apam foforo” a Kristo yɛ ne ntamgyinafo no mu no mu den na emu dɔ.—Hebrifo 8:6-12.

 “Yɛne Mo Bɛkɔ”

14. (a) Dɛn nti na “nguan foforo” no nni Nkaedi abodoo no bi na wɔnnnom bobesa no bi, nanso dɛn na wɔde ahopere rehwɛ kwan? (b) Wobu fekuw a wɔne Ahenni adedifo nkaefo no bɔ no dɛn?

¹⁴ “Nguan foforo” no hu sɛnea Yehowa ne ne nkurɔfo a wɔasra wɔn di no na wɔde wɔn ho abɛbɔ wɔn ho na wɔka sɛ: “Yɛne mo bɛkɔ na yɛate sɛ Onyankopɔn ne mo na ɛte.” (Sakaria 8:20-23) Ɛnyɛ sɛ wɔbom hyia nko, na mmom wɔbom ka Ahenni ho asɛm no wɔ asase so nyinaa. Nanso wɔmmfa “nguan foforo” no nka honhom mu Israel ho nkɔ “apam foforo” no mu na saa ara nso na wɔnka “Ahenni apam” a Yesu ne wɔn a wɔapaw wɔn sɛ wɔne no benya ɔsoro asetra mu kyɛfa no ho ma enti wonnni Nkae abodoo no bi na wɔnnnom bobesa no bi ma ɛfata. (Luka 22:20, 29) Nanso bere a “apam foforo” no di n’atirimpɔw ho dwuma, wɔboaboa “kuw ketewa” no mufo a wotwa to no ano kɔ ɔsoro Ahenni no mu no, “nguan foforo” no hu sɛ eyi kyerɛ sɛ nhyira horow a wɔnam saa Ahenni no so benya wɔ asase so no rebɛn. Wobu no sɛ hokwan a wɔanya wɔ ‘nna a edi akyiri yi” mu sɛ wɔne Ahenni adedifo nkaefo anokwafo no rebom asom.

[Ase hɔ asɛm]

Asɛm No Mu Nti̇̃mu

● Dɛn nti na Kristofo Hela Kyerɛwnsɛm no mu nsɛm no mu pii twe adwene si ɔsoro anidaso no so?

● Ɔkwan bɛn so na wɔn a wɔawo wɔn sɛ Onyankopɔn mma no hu no saa? Nkae abodoo no a wodi ne nsa no a wɔnom no kyerɛ dɛn?

● Ɔkwan bɛn so na “nguan foforo” no da no adi sɛ wɔne “kuw ketewa” no yɛ biako ampa?

[Adesua no ho Nsɛmmisa]