Nkwa ne Mogya—So Wubu sɛ Ɛyɛ Kronkron?
Ti 20
Nkwa ne Mogya—So Wubu sɛ Ɛyɛ Kronkron?
1. (a) Onyankopɔn bu nkwa dɛn? (b) Ɔkwan bɛn so na yebetumi akyerɛ sɛ yɛn ani sɔ Onyankopɔn akyɛde a ɛne nkwa no?
ƐNSƐ SƐ ɛyɛ yɛn nwonwa sɛ ɛsono nkwa ho adwene a Onyankopɔn wɔ koraa wɔ wiase no de ho. Onyankopɔn fam de, ɔdesani nkwa yɛ kronkron. Wubu no saa anaa? Yɛdan Onyankopɔn a “ɔma nnipa nyinaa nkwa ne ɔhome ne ade nyinaa” no koraa. (Asomafo no Nnwuma 17:25-28; Dwom 36:9) Sɛ yɛwɔ Onyankopɔn adwene no bi a, yɛbɛbɔ yɛn nkwa ho ban. Nanso yɛremmu Onyankopɔn mmara so sɛ yɛde rebɔ mmɔden akora yɛn mprempren nkwa so. Yebu Onyankopɔn bɔhyɛ a ɛfa daa nkwa ma wɔn a wɔwɔ ne Ba no mu gyidi nokwarem ho no sɛ ɛsom bo.—Mateo 16:25, 26; Yohane 6:40; Yuda 21.
2. Hena su a ɔwɔ wɔ nkwa ho na wiase no yi adi, na ɛtɔ bere bi a eyi de adwene bɛn na ɛba?
2 Nea ɛne eyi bɔ abira no, Yesu kae sɛ Satan Ɔbonsam, wiase yi sodifo no yɛ “owudifo fi mfiase.” (Yohane 8:44; 12:31) Efi n’atuatew kwan a ɔfaa so no mfiase pɛɛ na ɔde owu baa adesamma so. Wiase no abakɔsɛm a basabasayɛ wom no da ne honhom adi. Nanso Satan betumi ayi su bi a ɛte sɛ nea ɛsono adi. Ne saa nti, nnipa a ne nsusuwii anya wɔn so nkɛntɛnso no ka sɛ, bere a ebia eye sɛ wobɛyɛ onyamesomfo no, sɛ nkwa ho ba asɛm a, ɛbɛyɛ mfaso ama wo sɛ wubetie wɔn “abenfo” afotu mmom sen sɛ wobɛfa asɛm bi afi Bible mu aka. (Fa toto 2 Korintofo 11:14, 15 ho.) Bere a wuhyia nkwa-anaa-owu tebea bi no, ɛhe na wo koma bɛdan akɔ? Ampa, ɛsɛ sɛ ɛyɛ yɛn pɛ sɛ yɛbɛsɔ Yehowa ani.
3. (a) Dɛn nti na ɛsɛ sɛ yɛn ani gye nea Bible ka wɔ mogya ho no ho titiriw? (b) Kenkan Genesis 9:3-6 ne Asomafo no Nnwuma 15:28, 29 na afei fa kyerɛw nsɛm yi bua nsemmisa a ɛwɔ atifi hɔ no.
3 Onyankopɔn Asɛm da abusuabɔ a emu yɛ den a ɛda nkwa ne mogya ntam adi, sɛ: “Ɔhonam kra [anaasɛ nkwa] wɔ mogya no mu.” Sɛnea nkwa yɛ kronkron no, saa ara nso na Onyankopɔn ayɛ mogya kronkron. Ɛyɛ biribi a ɛyɛ ne de a ɛsɛ sɛ wodi ho dwuma wɔ kwan a ɔpene so nkutoo so. (Leviticus 17:3, 4, 11; Deuteronomium 12:23) Enti eye sɛ yebesusuw nea ɔhwehwɛ fi yɛn hɔ a ɛfa mogya ho no ho yiye.
Kenkan Genesis 9:3-6
Nneyɛe horow a ɛwɔ wo mpɔtam hɔ bɛn na ɛhwehwɛ sɛ woma w’ani da wo ho so na woanni aboa mogya?
Esiane nea wɔaka wɔ nkyekyem 4 a ɛfa aboa mogya ho no nti, wobɛyɛ w’ade dɛn wɔ ɔdesani mogya a wobɛnom (a wɔyɛe wɔ Romafo agodibea a na wɔde nnipa goru atɔprɛ ahorow ase no) ho?
Sɛnea wɔakyerɛ wɔ nkyekyem 5 ne 6 no, hena titiriw na ɛsɛ sɛ obi yi ne ho ano kyerɛ no wɔ ɔdesani mogya a obehwie agu no ho?
Kenkan Asomafo no Nnwuma 15:28, 29
So eyi kyerɛ sɛ ahwehwɛde ahorow no bedi dwuma akosi bere bi nko anaa? Ɛfa yɛn ho?
Sɛnea wɔkaa asɛm no wɔ ha no yi ɔdesani mogya fi mu anaa?
So kyerɛwsɛm no kyerɛ sɛ wɔ tebea a egye ntɛmpɛ mu no, wobetumi de adi dwuma anaa?
4. Sɛnea wɔaka ho asɛm wɔ ha no, Kyerɛwnsɛm no kyerɛ sɛ dɛn na ɛho hia sɛ obi yɛ na wanni mogya ho fɔ?
4 Ɛdefa ɔdesani mogya ho no, yɛrentumi mfa no sɛ yɛn ho a yɛbɛtwe afi awudi ho ara kwa no ma yedi bem. Kyerɛwnsɛm no kyerɛ sɛ, sɛ yɛyɛ ahyehyɛde bi a edi mogya ho fɔ wɔ Onyankopɔn anim no fã na yɛmpɛ sɛ yɛyɛ ne nnebɔne no fafafo a, ɛsɛ sɛ yɛtwe yɛn ho fi ho. (Adiyisɛm 18:4, 24; Mika 4:3) Ɛfata sɛ wodi ade a ɛte saa ho dwuma ntɛm ara.
5. Ɔkwan bɛn so na asɛnka adwuma no ho mmɔdenbɔ ne ho a wɔbɛde afi mogya ho afodi ho no wɔ abusuabɔ?
5 Wɔ Onyankopɔn asomfo a wahyɛ wɔn sɛ wɔmmɔ ɔsɛe a ɛreba wɔ ahohiahia kɛse no mu ho kɔkɔ no fam no, mogya ho fɔ a wonni no hwehwɛ sɛ wɔde nokwaredi ka saa nkrasɛm no kyerɛ. (Fa toto Hesekiel 3:17-21 ho.) Ɔsomafo Paulo buu ne ho sɛ ɔde nnipa horow nyinaa ka esiane ɔsom adwuma a wɔde hyɛɛ ne nsa no nti. Bere a na wadi Onyankopɔn nhyehyɛe ma nkwagye ho adanse fefeefe akyerɛ wɔn akyi nkutoo na ɔtee nka sɛ wade ne ho afi wɔn mogya ho asodi ho. (Romafo 1:14, 15; Asomafo no Nnwuma 18:5, 6; 20:26, 27) So wo nsiyɛ wɔ asɛnka adwuma no mu da ani a ɛda hɔ a ɛte saa ara adi wɔ asɛyɛde a ɛda Yehowa Adansefo nyinaa so no ho?
6. Twaka bɛn na ɛda asiane kwan a wobesiw ne obu ma kronkron a nkwa yɛ no ntam?
6 Ɛsɛ sɛ yebu asiane ahorow a ebetumi ama obi awu nso aniberesɛm. Wɔ Mose Mmara no ase no, na wommu obi a ɔnam asiane so ma onipa foforo wu no sɛ onni fɔ. Ná wɔtwe wɔn aso. (Exodus 21:29, 30; Deuteronomium 22:8; Numeri 35:22-25) Sɛ yegye nnyinasosɛm a ɛwom no tom a, yɛbɛhwɛ yiye na yɛammoa amma asiane bi a ebetumi ama obi awu ansi bere a yɛka afiri, denam ade a nyansa nnim a yɛbɛyɛ anaasɛ tebea bi a ahobammɔ nnim a yɛbɛma ho kwan wɔ yɛn fi anaa yɛn adwumam no so. So wo su wɔ saa nneɛma yi ho da anisɔ a edi mũ a wowɔ ma kronkron a nkwa yɛ no adi?
Mogya A Wɔde Di Dwuma Wɔ Nnuruyɛ Mu Nso Ɛ?
7. (a) Obi mogya a wode gu ɔfoforo mu no ne kronkron a mogya yɛ no hyia anaa? (b) Dɛn nti na ntease nnim sɛ wɔbɛka sɛ ahyɛde a ɛkyerɛ sɛ ‘munnyi mo ho mfi mogya ho’ no fa nneyɛe a na abu so wɔ afeha a edi kan no mu nkutoo ho?
7 Ɛwom sɛ adeyɛ no nyɛ foforo de nanso titiriw no wɔ afeha a ɛtɔ so 20 yi mu no, wɔde mogya adi dwuma akɔ akyiri yiye wɔ sɛnea wɔde ma obi foforo a adwene no sɛ wɔde regye no nkwa no mu. Wɔde mogya a wɔmfraa mu ne mogya mu nneɛma titiriw ahorow di dwuma saa kwan yi so. Ampa, saa ayaresa akwan horow a wɔfa so no nkyerɛ sɛ ɔyarefo no renwu. Nokwarem no, ɛtɔ bere bi a owu di akyi ba sɛ nea efi mogya a wɔde dii dwuma wɔ ɔkwan a ɛte saa so no mu ba tẽẽ. Nanso nea ɛho hia kyɛn so no—So Bible ahwehwɛde a ɛne sɛ yenyi yɛn ho mfi mogya ho no fa saa nnuruyɛ mu adeyɛ yi ho anaa? Yiw! Mogya a wɔbɛtwe afi abɔde foforo biara, onipa anaa aboa, mu de agu obi nipadua mu no to Onyankopɔn mmara. Ɛkyerɛ obu a wonni ma kronkron a mogya yɛ no. (Asomafo no Nnwuma 15:19, 20) Hwee nni hɔ a wobegyina so aka sɛ ahyɛde a ɛne sɛ ‘munnyi mo ho mfi mogya ho’ no fa nneyɛe ahorow a na ɛwɔ afeha a edi kan no mu nkutoo ho ma enti wɔayi nnɛyi nnuruyɛ ho dwumadi ahorow no afi mu. Susuw asɛm no ho hwɛ: Hena na ɔbɛka sɛ otuo a wɔde bekum onipa a ɛnyɛ mmara kwan so no nka Bible ahyɛde a etia awudi no ho, esiane sɛ na wɔnyɛɛ atuo sɛnea ɛte nnɛ no de besi akyiri yi koraa no nti? Na so ɛbɛyɛ nea ntease wom sɛ wɔbɛka sɛ asabow a wɔabara no fa anonne ahorow a na wonim wɔ afeha a edi kan no mu nkutoo ho na ɛmfa nnɛyi nsa ahorow a ano yɛ den no ho anaa? Nnipa a wɔpɛ sɛ wɔsɔ Onyankopɔn ani nokwarem no de, asɛm a ahyɛde a ese ‘munnyi mo ho mfi mogya ho’ no ka no mu da hɔ pefee ma wɔn.
8. (a) Wobɛyɛ dɛn atumi ahu sɛ aduruyɛ bi fata ma Kristoni anaasɛ dabi? (b) Sɛ oduruyɛfo bi pɛ sɛ ɔtwe w’ankasa mogya no bi si hɔ na afei wasan de agu wo nipadua mu bere a ɔyɛ wo oprehyɛn a, Bible nnyinasosɛm bɛn na ebetumi aboa wo ma woasi gyinae pa? (d) Ɔkwan bɛn so na ebia obi besusuw ayaresa a ɛhwehwɛ sɛ mogya no fa afiri bi a enni ne nipadua mu mu no ho?
8 Nanso, ebia nnuruyɛ ahorow bi a emu nna hɔ yiye bɛma nsemmisa bi asɔre. Ɔkwan bɛn so na wobetumi adi eyinom ho dwuma? Nea edi kan no, bisa wo oduruyɛfo no ma ɔnkyerɛkyerɛ ɔkwan a ɔpɛ sɛ ɔfa so no mu yiye. Afei gyina Bible nnyinasosɛm so fa mpaebɔ hwehwɛ mu. Ebia oduruyɛfo no bɛhyɛ nyansa sɛ ma wɔntwe w’ankasa mogya mfa nsie na sɛ ɛho hia a wɔde adi dwuma wɔ oprehyɛn bi a wɔbɛyɛ akyiri yi mu. So wobɛpene so? Kae sɛ, sɛnea Onyankopɔn Mmara a ɔnam Mose so de mae no kyerɛ no, ɛsɛ sɛ wohwie mogya a wɔayi afi abɔde biara mu no gu fam. (Deuteronomium 12:24) Yɛn a yɛwɔ hɔ nnɛ no nni Mmara apam no ase nanso asɛntitiriw a ɛwom ne sɛ mogya yɛ kronkron na sɛ woyi fi abɔde bi mu a, ɛsɛ sɛ wɔsan de ma Onyankopɔn denam hwie a wobehwie agu ne nan ntiaso a ɛne asase so no so. (Fa toto Mateo 5:34, 35 ho.) Ɛnde ɔkwan bɛn so na ebetumi ayɛ nea eye sɛ wɔde wo mogya besie (bere tiaa bi mpo) na afei wɔasan de agu wo nipadua mu? Nanso sɛ bere a oduruyɛfo reyɛ wo oprehyɛn anaasɛ ɔresa ɔyare foforo bi no ɔka sɛ ɔbɛma wo mogya no afa afiri bi mu na asan akɔ wo nipadua no mu bio nso ɛ? Wobɛpene so anaa? Ebinom ate nka sɛ, sɛ wodi kan de nsu bi a mogya nnim hohoro ade no mu a, wobetumi ama ho kwan a wɔn ahonim renhaw wɔn. Wɔabu afiri no sɛ wɔn mogya nkwaadɔm no ntoaso. Ampa, ɛsono sɛnea tebea biara te, na wo na ɛsɛ sɛ wusi gyinae. Nanso ɛsɛ sɛ wo gyinaesi no ma wunya ahonim pa wɔ Onyankopɔn anim.—1 Petro 3:16; 1 Timoteo 1:19.
9. (a) Sɛnea ɛbɛyɛ na woanya awerɛhyem sɛ wɔbɛkyerɛ obu ama gyinae a woasi sɛ ‘wubeyi wo ho afi mogya ho’ no, dɛn na ɛsɛ sɛ wudi kan yɛ? (b) Wɔ aniberesɛm mu mpo ɔkwan bɛn so na ɛtɔ mmere bi a wubetumi akwati akasakasa a enye? (d) Sɛ oduruyɛfo bi anaasɛ ayaresabea bi bɔ mmɔden sɛ wɔbɛhyɛ wo ma woagye mogya a, dɛn na wobɛyɛ?
9 Sɛnea ɛbɛyɛ a wubenya awerɛhyem sɛ wo oduruyɛfo no bɛkyerɛ obu ama wo gyinaesi a ɛkyerɛ sɛ ɛsɛ sɛ ‘wuyi wo ho fi mogya ho’ no, wo ne no nkasa ansa na ayaresa mu aniberesɛm bi asɔre. Sɛ ɛho behia sɛ wokɔ ayaresabea ma wɔsa wo yare a, hwɛ sɛ wobɛkyerɛw ama wɔn sɛ ɛnsɛ sɛ wɔde mogya di dwuma na afei w’ankasa wo ne oduruyɛfo a ɔbɛhwɛ wo no nka ho asɛm. Nanso sɛ aniberesɛm a wonhwɛ kwan ba nso ɛ? Mpɛn pii wubetumi akwati akasakasa a enye denam obu kwan so nkɔmmɔ a ntease wom a wo ne oduruyɛfo no bɛbɔ na woahyɛ no nkuran sɛ ɔmfa n’ahokokwaw nni dwuma mfa mmoa wo nanso ɔnkyerɛ obu mma wo Kristoni ahonim a wowɔ no so. (Mmebusɛm 15:1; 16:21, 23) Nanso sɛ ebia ayaresabea adwumayɛfo a wokura adwempa ka sɛ mogya a yɛrepow no de yɛn nkwa bɛto asiane mu ma enti wɔbɔ mmɔden sɛ wɔbɛhyɛ yɛn ma yɛapene so a, ɛnde dɛn? Ɛsɛ sɛ gyidi a yɛwɔ sɛ Yehowa akwan teɛ no ma yegyina pintinn. Ɛsɛ sɛ nokwaredi ma Yehowa ma yɛpow denneennen, efisɛ yɛpaw sɛ yebetie Onyankopɔn mmom sen nnipa.—Asomafo no Nnwuma 5:29; fa toto Hiob 2:4; Mmebusɛm 27:11 ho.
Asɛm No Yɛ Anibere Dɛn?
10. Dɛn nti na nea wɔkyerɛ sɛ mogya a wɔde bɛma no ho hia ma wɔde agye nkwa no nsakra yɛn adwene wɔ asɛm no ho?
10 Wɔ nnipa a wonnya nhuu Yehowa no fam no, ɛtɔ bere bi a akyinnyegye ahorow a ɛpene mogya a wɔde ma obi so no bɛyɛ te sɛ nea wɔde kyerɛ obu kɛse ma kronkron a nkwa yɛ no. Nanso yɛn werɛ mfi sɛ nnipa bebree a wogye akyinnye saa no nam yafunu a wotu gu so pene nkwa a wɔsɛe no so. Yehowa nim nkwa ne mogya ho asɛm pii sen ayaresa mu “ɔbenfo” biara. Ɛda adi sɛ N’ahyɛde ahorow nyinaa wɔ hɔ ma yɛn yiyedi, na ɛbɔ yɛn mprempren nkwa ne nea yɛhwɛ kwan daakye ho ban. (Yesaia 48:17; 1 Timoteo 4:8) Ɛsono ahyɛde ‘munnyi mo ho mfi mogya ho’ no anaa?
11. (a) Dwuma bɛn nkutoo na Yehowa maa Israelfo kwan sɛ wɔmfa mogya nni? (b) Sɛ́ Kristofo no, dɛn nti na eyi ho hia yɛn yiye?
11 Wosi aniberesɛm a ɛwɔ obu a wobenya ama kronkron a mogya yɛ no mu no so dua denam nea Yehowa ka faa dwuma biako pɛ a wobetumi de mogya adi ho no so. “Ɔhonam kra wɔ mogya no mu, na mede mama mo afɔremuka no so sɛ wɔmfa mpata mma mo kra; na mogya na wɔde pata ma ɔkra. Ɛno nti na mise Israel mma sɛ: Mo mu ɔkra biara nnni mogya.” (Leviticus 17:11, 12) Mmoa mogya a wohwie guu Yehowa afɔremuka so a ɛne saa ahwehwɛde no hyia no nyinaa yɛɛ Yesu Kristo mogya a ne bo yɛ den no sunsuma. (Hebrifo 9:11, 12; 1 Petro 1:18, 19) Ne saa nti wɔnam Onyankopɔn mmara a ɛbara adwuma foforo biara a wɔde mogya yɛ no so sii kronkron a Yesu mogya ankasa yɛ no so dua. Yebetumi ahu afi eyi mu sɛ mogya ho dwuma a wodi wɔ ɔkwammɔne so no kyerɛ obu a wonni koraa ma Yehowa nsiesiei a wayɛ ama nkwagye denam ne Ba no so no.
12. Sɛ nokware Kristoni hyia owu mpo a, dɛn nti na ɔremfa mogya ho dwuma a wodi wɔ ɔkwammɔne bi so no so mmɔ mmɔden sɛ obenya nkwa atra ase?
12 Bere a obi hyia nkwa—anaa—owu tebea bi no, hwɛ sɛnea ɛbɛyɛ ade a wanhwɛ ankɔ akyiri sɛ ɔbɛdan n’akyi akyerɛ Onyankopɔn! Ɛwom sɛ yɛn ani sɔ nnwuma a nnuruyɛfo a wofi ahonim pa mu yɛ ade yɛ no de, nanso yɛmmɔ mmɔden ahopere mu sɛ yɛbɛma yɛn ankasa anaa yɛn adɔfo akɔ so atra ase nna anaasɛ mfe kakraa bi bio denam Onyankopɔn mmara a yebebu so so te sɛ nea nkwa yi ne ade nyinaa. Yɛwɔ gyidi wɔ Yesu mogya a ohwie gui no bo a ɛsom ne daa nkwa a ɛma etumi ba no mu. Yefi yɛn koma nyinaa mu gye di sɛ wɔde daa nkwa betua Onyankopɔn nkoa anokwafo—wɔn a wowuwu no mpo—ka.—Yohane 11:25; 1 Timoteo 4:10.
Asɛm No Mu Nti̇̃mu
● Dɛn na ɛma nkwa ne mogya yɛ kronkron? Dɛn nti na wiase no ka sɛ ɛsɛ sɛ wonya adwene a ɛsono wɔ ho?
● Ɛdefa mmoa ho no, ɔkwan bɛn so na yɛkyerɛ obu ma kronkron a wɔn mogya yɛ no?
● Akwan horow bɛn so na ɛsɛ sɛ yɛn nyinaa kyerɛ sɛ yebu ɔdesani nkwa sɛ ɛyɛ kronkron? Saa a yɛbɛyɛ no ho hia dɛn?
[Adesua no ho Nsɛmmisa]
