Ti 3

So Onyankopɔn Asɛm no Mu Denneennen

1. (a) Ɔkwan bɛn so na tete Israel huu nokware a Onyankopɔn Asɛm yɛ no? (b) Dɛn nti na ɛno yɛ biribi a yɛn ani gye ho?

“MUNHU mo koma nyinaa mu ne mo kra nyinaa mu sɛ, asɛm biako pɛ ntɔɔ fam, nsɛmpa a [Yehowa] mo Nyankopɔn kae wɔ mo ho no nyinaa aba mu ama mo.” Eyi ne nea Yosua kaee Israel mpanyimfo no wɔ ho bere a woduu Bɔhyɛ Asase no so akyi no. Nanso wɔ mfe a edii akyi bae no mu no wɔankɔ so amfa Onyankopɔn Asɛm anto wɔn koma so na wɔamfa anni dwuma nso. Dɛn na efii mu bae? Bible no da no adi pefee sɛ sɛnea Yehowa nhyira ho bɔhyɛ ahorow daa adi sɛ ɛyɛ nokware no saa ara nso na ɔmaa nea ɔkae wɔ nea ebefi asoɔdenyɛ mu aba no baam. (Yosua 23:14-16) Wɔakora saa kyerɛwtohɔ no ne Bible no fã a aka no nyinaa so ama yɛn kyerɛkyerɛ—sɛnea ɛbɛyɛ a ‘yebenya anidaso’ na amma yɛanyɛ biribi a ɛbɛma saa anidaso no abɔ yɛn.—Romafo 15:4.

2. (a) Ɔkwan bɛn so na Bible no “fi Onyankopɔn home mu”? (b) Yɛahu eyi nti, asɛyɛde bɛn na yɛwɔ?

² Ɛwom sɛ nnipa “akyerɛwfo” bɛyɛ 40 na wɔma wɔkyerɛw Bible no de, nanso Yehowa ankasa ne ne Kyerɛwfo. So ɛno kyerɛ sɛ ɔno ankasa na ɔkyerɛɛ biribiara a wɔkyerɛw wom no kwan? Yiw. Sɛnea ɔsomafo Paulo kae wɔ nokwarem no, “Kyerɛw nyinaa fi Nyankopɔn home mu.” Esiane sɛ yegye ɛno di nti yɛka kyerɛ nnipa a wɔwɔ baabiara sɛ wontie  nea ɛka no na wɔntra ase sɛnea emu nsɛm kyerɛ no te sɛ nea yɛn nso yɛbɔ mmɔden sɛ yɛbɛyɛ no.—2 Timoteo 3:16; 1 Tesalonikafo 2:13.

Dɛn Na Ɛbɛboa Afoforo Ma Wɔahu?

3. Dɛn ne ɔkwan a eye sen biara a wobɛfa so aboa wɔn a wonnye nni sɛ Bible no yɛ Onyankopɔn Asɛm no mu pii?

³ Ɛwom, nnipa a yɛne wɔn kasa no mu pii ne yɛn nyɛ adwene sɛ Bible no yɛ Onyankopɔn Asɛm ankasa. Ɔkwan bɛn so na yebetumi aboa wɔn? Mpɛn pii ɔkwan a eye sen biara a wobɛfa so ne sɛ wubebue Bible no na woakyerɛ wɔn nea ɛwom. “Onyankopɔn asɛm wɔ nkwa, na ahoɔden wɔ mu, na ano yɛ nnam sen nkrante anofanu biara, . . . na ɛyɛ koma nsusuwii ne adwene temmufo.” (Hebrifo 4:12) “Onyankopɔn asɛm” no yɛ ne bɔhyɛ a wɔakyerɛw ato hɔ wɔ Bible mu. Ɛnyɛ abakɔsɛm bi a awu na mmom ɛwɔ nkwa na ɛrenya mmamu wɔ ɔkwan a wontumi nsiw ano so. Bere a ɛyɛ saa no, nnipa a wɔma wohu no komam nkate ankasa da adi ma wohu sɛ ebia edu tebea horow no ho. Tumi a ɛwɔ no ano yɛ den sen biribiara a yɛn ankasa bɛka.

4. Bible mu nokware ahorow no ho nkyerɛkyerɛmu ntiantia bɛn na ama nnipa binom su wɔ Bible no ho asakra? Dɛn ntia?

⁴ Onyankopɔn din no ara kwa a wohu wɔ Bible no mu ama nnipa pii ayɛ nsakrae. Afoforo nso asi gyinae sɛ wobesua Bible no bere a wɔkyerɛɛ wɔn nea ɛka wɔ asetra mu atirimpɔw, nea enti a Onyankopɔn ama nsɛmmɔnedi ho kwan, nea mprempren nsɛm a esisi no kyerɛ anaasɛ anidaso a edi mũ a egyina Onyankopɔn Ahenni no so no. Wɔ nsase a ɔsom mu nneyɛe ahorow ama ahonhommɔne anya hokwan ahaw nkurɔfo no so no, nea eyi fi ho nkyerɛkyerɛmu a Bible no de ma ne ɔkwan a wɔbɛfa so anya ahotɔ no yɛ nea nkurɔfo ani gye ho. Dɛn nti na wɔn ani gye nsɛm yi ho saa? Efisɛ Bible  no ne nsɛm fibea koro pɛ a wobetumi de ho ato so wɔ nsɛm a ɛho hia yi mu.—Dwom 119:130.

5. Sɛ obi ka sɛ onnye Bible no nni a, ebia ɛbɛyɛ sɛ dɛn ntia? Ɔkwan bɛn so na yebetumi aboa no?

⁵ Na sɛ obi ka kyerɛ yɛn pen sɛ onnye Bible no nni nso ɛ? So ɛsɛ sɛ ɛno ma nkɔmmɔbɔ no ba awiei? Sɛ ɔwɔ ɔpɛ sɛ ɔne yɛn besusuw nsɛm ho de a, ɛnsɛ sɛ yɛma ɛba awiei. Ɛsɛ sɛ yɛte nka sɛ ɛyɛ yɛn asɛyɛde sɛ yɛde gyidi bɛkasa ama Onyankopɔn Asɛm no. Ebia na obu Bible no sɛ Kristoman nhoma. Ebia Kristoman nyaatwom ne ne ho a ɔde hyehyɛ amammuisɛm mu ho kyerɛwtohɔ, ne afei sika a ɔsrɛ bere nyinaa no ka ho na ama wanya Bible no ho adwene a ɛnteɛ no. Dɛn nti na wummisa no sɛ saa na asɛm no te? Ebia kasa a Bible no kasa tia wiase no akwan a Kristoman nam so no ne nsonsonoe a ɛda Kristoman ne nokware Kristosom ntam no bɛkanyan n’anigye.—Fa toto Mateo 15:7-9; Yakobo 4:4; Mika 3:11, 12 ho.

6. (a) Dɛn na ɛma w’ankasa wugye di sɛ Bible no yɛ Onyankopɔn Asɛm? (b) Nsusuwii afoforo bɛn na wubetumi de adi dwuma de aboa nkurɔfo ma wɔahu sɛ Bible no fi Onyankopɔn hɔ ampa?

⁶ Wɔ afoforo fam no, adanse a ɛkyerɛ sɛ efi honhom mu no ho a mubesusuw tẽẽ no bɛboa. Dɛn na edi adanse ma wo sɛ Bible no fi Onyankopɔn? So ɛyɛ nea Bible no ankasa ka wɔ ne fibea ho no? (2 Timoteo 3:16, 17; Adiyisɛm 1:1) Anaa so ɛyɛ nokwasɛm a ɛyɛ sɛ Bible no kura nkɔmhyɛ ahorow pii a ɛda daakye ho nsɛm a ɛkɔ akyiri adi a ɛyɛ nkɔmhyɛ ahorow a efi tumi a ɛboro onipa de so no ntia? (2 Petro 1:20, 21; Yesaia 42:9) So ebia ɛyɛ Bible no mu nsɛm a ɛne ne ho hyia a ɛmfa ho sɛ nnipa pii na wɔkyerɛwee wɔ mfe 1,610 mu no? Anaasɛ so ɛyɛ nokware a ɛyɛ wɔ nyansahu mu a ɛbɔ nhoma afoforo a wɔkyerɛwee saa bere no mu abira  no? Anaasɛ n’akyerɛwfo nokwaredi no? Anaasɛ ɛyɛ kora a wɔakora so wɔ mmɔden ahorow a wɔabɔ sɛ wɔbɛsɛe no nyinaa akyi no? Nea woahu sɛ ɛyɛ anigye wɔ ho biara no, wubetumi de aboa afoforo nso.

Yɛn Ankasa Bible Akenkan

7, 8. (a) Dɛn na ɛsɛ sɛ yɛyɛ wɔ Bible no ho sɛ ankorankoro? (b) Wɔ kokoam Bible akenkan akyi no, dɛn bio na yehia, na ɔkwan bɛn so na Bible no ankasa kyerɛ eyi? (d) Ɔkwan bɛn so na w’ankasa woanya Yehowa atirimpɔw ahorow ho ntease?

⁷ Nea ɛka afoforo a yɛbɛboa wɔn ma wɔagye Bible no adi ho ne hia a ɛho hia sɛ yɛn ankasa begye bere akenkan daa no. So woreyɛ saa? Wɔ nhoma ahorow a wɔakyerɛw nyinaa mu no, eyi na ɛho hia sen biara. Ɛwom, ɛno nkyerɛ sɛ sɛ yɛkenkan a yenhia biribiara bio. Kyerɛwnsɛm no bɔ kɔkɔ wɔ tew a yɛbɛtew yɛn ho asusuw sɛ yɛn nkutoo betumi ayɛ nhwehwɛmu ahu biribiara mu no ho. Sɛ yɛbɛyɛ Kristofo a wɔkari pɛ a, kokoam adesua ne nhyiam a yɛbɛkɔ ho hia.—Mmebusɛm 18:1; Hebrifo 10:24, 25.

⁸ Sɛnea ɛbɛyɛ a ɛho bɛba yɛn mfaso no, Bible no ka Etiopiani panyin bi a ɔbɔfo kyerɛɛ Kristoni sɛnkafo Filipo kwan kɔɔ ne nkyɛn bere a na ɔrekenkan Yesaia nkɔmhyɛ no ho asɛm. Filipo bisaa ɔbarima no sɛ: “So wote nea wokan yi ase anaa?” Ɔka kyerɛɛ Filipo sɛ ɔnkyerɛkyerɛ Kyerɛwnsɛm no mu nkyerɛ no. Ná Filipo nyɛ Bible ɔkenkanfo a watew ne ho a ɔkyerɛɛ n’adwene wɔ Kyerɛwnsɛm no ho wɔ hɔ ara kwa. Dabi; kyerɛwtohɔ no kyerɛ sɛ na wakɔ so ne asomafo a wɔwɔ Yerusalem asafo no mu no abɔ kɛse na na ɔyɛ Yehowa ahyehyɛde a aniwa hu no muni. Enti na obetumi aboa Etiopiani no ma wanya nkyerɛkyerɛ a na Yehowa nam saa ahyehyɛde no so de rema no mu mfaso. (Asomafo  no Nnwuma 6:5, 6; 8:5, 14, 15, 26-35) Ɛnnɛ nso yɛn mu hena na n’ankasa nkutoo nyaa Yehowa atirimpɔw ahorow ho ntease a emu da hɔ a ɛteɛ? Nea ɛne eyi bɔ abira no, ná yehia, na yɛda so ara hia, mmoa a Yehowa fi ɔdɔ mu nam n’ahyehyɛde a aniwa hu no so de ma no.

9. Bible akenkan ho nhyehyɛe ahorow bɛn na ɛho betumi aba yɛn nyinaa mfaso?

⁹ Sɛnea ɛbɛboa yɛn ma yɛde Bible no adi dwuma na yɛate ase no, Yehowa ahyehyɛde no ma yɛn nsa ka Kyerɛwnsɛm mu nsɛm a eye wɔ Ɔwɛn-Aban no ne nhoma afoforo a ɛtete saa mu. Bio nso, wɔayɛ daa Bible akenkan ho nhyehyɛe ama yɛn wɔ Teokrase Ɔsom Sukuu no mu wɔ Yehowa Adansefo asafo ahorow no mu. Yehowa Adansefo no bi kenkan Bible no wɔ fie de ka eyi ho. Mfaso kɛse betumi afi bere a wɔde hwehwɛ Kyerɛw Kronkron no mu yi mu aba. (Dwom 1:1-3; 19:7, 8) So woakenkan Bible mũ no nyinaa? Sɛ wonyɛɛ saa a, ɛnde hyɛ da bɔ mmɔden sɛ wobɛyɛ saa. Ɛwom sɛ worente biribiara ase nwie de, nanso emu nsɛm nyinaa ho adwene a wubenya no bɛboa wo kɛse. Sɛ wokenkan nkratafa anan anaa anum pɛ da biara a, wubewie Bible no wɔ afe biako ntam.

10. (a) Bere bɛn na wokenkan Bible no? (b) Dɛn nti na saa a wobɛyɛ bere nyinaa ho hia?

¹⁰ Bere bɛn na wubetumi ayɛ nhyehyɛe akenkan Bible no sɛɛ? Sɛ wutumi yi simma 10 anaa 15 si hɔ da biara a, hwɛ mfaso ara a wubenya wom! Sɛ anyɛ yiye saa a, ɛnde yɛ ho nhyehyɛe dapɛn biara, na afei di saa nhyehyɛe no so. Ɛsɛ sɛ Bible akenkan yɛ obi nkwa nna nyinaa mu su, te sɛ aduan a odi. Sɛnea wunim no, sɛ obi ntumi nnidi yiye a, ɛbɛma n’ahoɔden so atew. Saa ara na ɛte wɔ yɛn honhom mu yiyedi ho. Yɛn nkwa gyina “asɛm biara a efi Onyankopɔn anom” a yɛde bɛhyɛ yɛn ho den daa no so.—Mateo 4:4.

11. Dɛn na ɛsɛ sɛ ɛyɛ yɛn botae nti a yɛkenkan Bible no?

 ¹¹ Dɛn na ɛsɛ sɛ ɛyɛ yɛn botae a yɛde kenkan Bible no? Ɛbɛyɛ mfomso sɛ yɛde bɛyɛ yɛn botae sɛ yɛbɛkenkan nkratafa dodow bi ara kwa anaasɛ esiane daa nkwa a yebenya nkutoo nti. Sɛ yebenya mu mfaso daa a, ɛsɛ sɛ yenya ho adwene a ɛkorɔn—ɔdɔ ma Onyankopɔn, ɔpɛ a yɛwɔ sɛ yebehu no yiye, yɛbɛte n’apɛde ase na yɛasom no wɔ ɔkwan a ɛsɔ n’ani so. (Yohane 5:39-42) Ɛsɛ sɛ yɛn su yɛ te sɛ Bible ɔkyerɛwfo a ɔkaa eyi de no, sɛ: “[Yehowa], kyerɛ me w’akwan, na fa me fa w’atempɔn so.”—Dwom 25:4.

12. (a) Dɛn nti na “nokware nimdeɛ” a wubenya ho hia, na mmɔdenbɔ bɛn na ɛho behia bere a worekenkan no na ama woanya eyi? (b) Sɛnea wɔakyerɛ wɔ kratafa 27 no, akwan horow bɛn so na yebetumi asusuw nea yɛkenkan wɔ Bible mu no ho ma ɛho aba yɛn mfaso? (d) Yɛ nsɛntitiriw anum yi ho nhwɛso mmiako mmiako denam nsemmisa a ɛwɔ nkyekyem yi ase no a wubebua no so. Hwɛ sɛ wode wo Bible no bedi dwuma.

¹² Bere a yenya saa nkyerɛkyerɛ no, ɛsɛ sɛ ɛyɛ yɛn pɛ sɛ yebenya “nokware nimdeɛ.” Sɛ ɛnte saa a, ɔkwan bɛn so na yebetumi de Onyankopɔn Asɛm no adi dwuma yiye wɔ yɛn asetra mu anaasɛ yɛbɛkyerɛkyerɛ mu wɔ ɔkwan a ɛteɛ so akyerɛ afoforo? (Kolosefo 3:10, NW; 2 Timoteo 2:15) Nokware nimdeɛ a yebenya no hwehwɛ sɛ yɛbɛkenkan no yiye, na sɛ ɔfã bi yɛ nea emu dɔ a, ebia ɛho behia sɛ yɛkenkan boro pɛnkoro na ama yɛate ase. Sɛ yegye bere susuw asɛm no ho na yedwen ho wɔ akwan horow so a, ɛbɛboa yɛn nso. Wɔada nsɛntitiriw anum a ɛsɛ sɛ wususuw ho adi wɔ nhoma yi kratafa 27. Wubetumi asusuw Kyerɛwnsɛm bi afã pii ho ma ɛho aba wo mfaso denam eyinom mu biako anaa nea ɛboro saa a wode bedi dwuma no so. Bere a wubua nsemmisa a ɛwɔ nkratafa a edi hɔ no so no, wubehu sɛnea ɛno te saa.

 (1) Kyerɛwnsɛm no fã a worekenkan no taa ma wuhu nneɛma ahorow bi a ɛkyerɛ onipa ko a Yehowa yɛ.

Sɛ yefi anisɔ mu susuw nea Bible no ka kyerɛ yɛn wɔ Yehowa adebɔ nnwuma ho no ho a, ɔkwan bɛn so na ɛno ka yɛn su wɔ ne ho? (Dwom 139:13, 14; efi Hiob atiri 38-42 no, hyɛ 38:1, 2 ne 40:2, 8, ne afei 42:1-6 nsow titiriw.)

Esiane nea Yesu kae wɔ Yohane 14:9, 10 no nti, dɛn na yebetumi aka wɔ Yehowa ho wɔ nsɛm te sɛ nea esii a wɔakyerɛw wɔ Luka 5:12, 13 no mu?

(2) Susuw sɛnea asɛm no boa ma wonya Bible no asɛmti a ɛne Yehowa din a wɔnam Ahenni no so bɛtew ho wɔ Yesu Kristo a ɔyɛ Bɔhyɛ Aseni no ase no ho.

Ɔkwan bɛn so na ɔhaw ahorow a ɛbaa Misraim so no fa asɛmti yi ho? (Hwɛ Exodus 5:2; 9:16; Rut 4:13-17; Mateo 1:1, 5)

Na kyerɛwtohɔ a ɛka koma a ɛfa Moabni bea Rut ho no nso ɛ?

Ɔkwan bɛn so na amanneɛ a Gabriel kɔbɔɔ Maria wɔ Yesu awo a ɛreba ho no nso ba asɛm no mu? (Luka 1:26-33)

Dɛn nti na honhom kronkron a wɔde sraa Yesu asuafo no wɔ Pentekoste no kyerɛ biribi? (Asomafo no Nnwuma 2:1-4; 1 Petro 2:4, 5, 9; 2 Petro 1:10, 11)

(3) Emu asɛm no fa ntease a ɛwɔ nkyekyem ahorow pɔtee bi mu ho.

Henanom na wɔkaa nsɛm a ɛwɔ Romafo 5:1 ne 8:16 no kyerɛɛ wɔn? (Hwɛ Romafo 1:7.)

So emu asɛm no kyerɛ sɛ 1 Korintofo 2:9 reka asetra wɔ asase so wɔ Onyankopɔn Nhyehyɛe Foforo mu ho asɛm? Sɛnea wɔakyerɛ wɔ nkyekyem 6-8 no henanom ani ne wɔn aso na na enhu na ɛnte nneɛma a Paulo kyerɛw ho ade no ase no?

(4) Bisa wo ho sɛnea w’ankasa wubetumi de nea worekenkan no adi dwuma.

So kyerɛwtohɔ a ɛfa kum a Kain kum Habel ho no yɛ abakɔsɛm mu asɛm a yɛn ani gye ho ara kwa anaasɛ afotu bi wom ma yɛn? (Genesis 4:3-12; 1 Yohane 3:10-15; Hebrifo 11:4)

 Sɛ yɛkenkan (wɔ Exodus kosi Deuteronomium) osuahu ahorow a Israel nyae wɔ sare so no ho asɛm a, ɛsɛ sɛ yɛma ɛfa yɛn ho dɛn? (1 Korintofo 10:6-11)

So afotu a ɛfa abrabɔ ho a wɔkyerɛw kɔmaa Kristofo a wɔasra wɔn no fa nnipa a wɔwɔ daa nkwa wɔ asase so ho anidaso no ho? (Fa toto Numeri 15:16; Yohane 10:16 ho.)

Ɛwom sɛ ebia yɛwɔ gyinabea pa wɔ Kristofo asafo no mu de, nanso so ɛho hia sɛ yebesusuw akwan a yebetumi afa so de Bible afotu a yenim dedaw no adi dwuma kɛse ho? (2 Korintofo 13:5; 1 Tesalonikafo 4:1)

(5) Susuw sɛnea wubetumi de nea worekenkan no aboa afoforo ho.

Hena na wubetumi de kyerɛwtohɔ a ɛfa Yairo babea wusɔre ho no aboa no? (Luka 8:41, 42, 49-56)

13. Yebetumi ahwɛ kwan sɛ dɛn na ebefi Bible akenkan nhyehyɛe a ɛkɔ so daa ne ade a wɔne Yehowa ahyehyɛde no sua mu aba?

¹³ Hwɛ sɛnea Bible akenkan ba bɛyɛ nea mfaso kɛse wɔ so bere a wɔyɛ saa wɔ saa kwan yi so no! Nokwarem no, Bible akenkan yɛ biribi a egye mmɔdenbɔ—adwuma a yebetumi ayɛ anya mu mfaso yɛn nkwa nna nyinaa. Nanso bere a yɛyɛ saa no yɛn ho yɛ den wɔ honhom mu. Ɛbɛtwe yɛn abɛn yɛn Agya a ɔwɔ ɔdɔ, Yehowa, ne yɛn nuanom Kristofo. Ɛbɛboa yɛn ma yɛatie afotu a ese ‘yenkura nkwa asɛm no mu [denneennen]’ no.—Filipifo 2:16.

Asɛm No Mu Nti̇̃mu

● Dɛn nti na wɔkyerɛw Bible no na wɔakora so abesi yɛn bere yi so no?

● Ɔkwan bɛn so na yebetumi aboa afoforo ma wɔanya anisɔ ama?

● Dɛn nti na kokoam Bible a wɔkenkan no daa ho wɔ mfaso? Akwan anum bɛn so na yebetumi asusuw nea yɛkenkan no ho ma ɛho aba yɛn mfaso?

[Adesua no ho nsɛmmisa]

 [Kratafa 27 adaka/mfonini]

Sɛ Wokenkan Bible No A Susuw Eyi Ho—

Nea ɔfã biara ka kyerɛ wo wɔ Yehowa ho sɛ onipa

Sɛnea ɛfa Bible no nyinaa asɛmti no ho

Sɛnea emu asɛm no kã ntease a ɛwom no

Sɛnea ɛsɛ sɛ ɛkã w’ankasa asetra

Sɛnea wubetumi de aboa afoforo