Tumi a Owusɔre Anidaso no Wɔ
Ti 9
Tumi a Owusɔre Anidaso no Wɔ
1. Anidaso ahorow a ɛyɛ anigye bɛn na owusɔre no ama yɛatumi anya?
SƐ ƐNYƐ owusɔre no a, anka daakye nkwa ho anidaso biara nni hɔ mma nnipa a wɔawuwu no. Nanso Yehowa nam ɔdom so ama hokwan a ɛso nni abue ama nnipa ɔpepepem pii a wɔawuwu no sɛnea ɛbɛyɛ a wobenya daa nkwa. Esiane eyi nti, yɛn nso yɛwɔ anidaso a ɛne adɔfo a wɔadeda wɔ owu mu no a yɛbɛsan ne wɔn aka abom no.—Fa toto Marko 5:35, 41, 42; Asomafo no Nnwuma 9:36-41 ho.
2. (a) Akwan horow bɛn so na owusɔre no ada adi sɛ ɛho hia wɔ Yehowa atirimpɔw ho dwumadi mu? (b) Bere titiriw bɛn na owusɔre anidaso yɛ ahoɔden fibea a ɛho hia ma yɛn?
2 Esiane owusɔre no nti, Yehowa betumi ama Satan ayɛ nea obetumi nyinaa de abɔ mmɔden akyerɛ sɛ sobo a ɔbɔ sɛ “Nea onipa wɔ nyinaa, ɔde ma pere ne kra” no yɛ nokware a ɛrempira ne nkoa anokwafo daa. (Hiob 2:4) Esiane sɛ wonyan Yesu fii awufo mu nti, otumi de ne ɔdesani afɔre no bo kɔmae wɔ n’Agya soro Ahengua no anim a mfaso a ɛyɛ nkwagye ma yɛn no ka ho. Wɔnam owusɔre so aka wɔn a wɔne Kristo yɛ yɔnko adedifo no abom wɔ ɔsoro Ahenni no mu. Na wɔ yɛn a yɛwɔ gyidi no nyinaa fam no, owusɔre no yɛ ahoɔden a ɛtra so fibea ma yɛn bere a yɛrehyia sɔhwɛ ahorow a ebetumi ama yɛawu no.
Nea Enti A Ɛyɛ Kristofo Gyidi Mfitiasede
3. (a) Ɔkwan bɛn so na owusɔre yɛ “mfiase asɛm”? (b) Owusɔre kyerɛ dɛn ma wiase no nyinaa?
3 Sɛnea wɔaka wɔ Hebrifo 6:1, 2 no, owusɔre yɛ “mfiase asɛm,” gyidi fapem no fã a ɛno nni hɔ a yɛrentumi mmɛyɛ Kristofo a wɔn ho akokwaw da. Nanso ɛne wiase no adwene bɔ abira. Esiane sɛ nnipa pii nni honhom mu nneɛma ho nimdeɛ nti, wodi anigyede akyi. Eyi nkutoo na wohu no sɛ ɛyɛ asetra ankasa. (1 Korintofo 15:32) Wɔn a wodi tete ɔsom ahorow akyi, nea ɛwɔ Kristoman mu ne akyi no nyinaa susuw sɛ wɔwɔ ɔkra bi a enwu a ɛma owusɔre yɛ nea ɛho nhia. Obiara a ɔbɔ mmɔden sɛ ɔbɛka nsusuwii abien yi abom ayɛ no biako no hu sɛ ɛma obi adwene tu fra mmom sen sɛ ɛbɛma wanya anidaso. Yɛbɛyɛ dɛn atumi aboa wɔn a wɔpɛ sɛ wotie no?—Asomafo no Nnwuma 17:32.
4. (a) Ansa na obi betumi akyerɛ owusɔre no ho anisɔ no, dɛn na ebia ɛho behia sɛ yɛne no susuw ho? (b) Kyerɛw nsɛm ahorow bɛn na wode bɛkyerɛ dekode a ɔkra yɛ no mu? (d) Na sɛ obi de Bible nkyerɛase bi a ɛte sɛ nea ɛmma nokware a ɛwɔ kyerɛw nsɛm ahorow no mu no nna adi di dwuma nso ɛ?
4 Ansa na wɔn a wɔte saa no betumi akyerɛ anisɔ ama nsiesiei pa a owusɔre no yɛ no, ɛho hia sɛ wɔte nea ɔkra no yɛ ne tebea a awufo wom no ase. Mpɛn pii no kyerɛw nsɛm kakraa bi yɛ nea ɛdɔɔso a ɛbɛma nsɛm yi mu ada hɔ ama obi a nokware no ho kɔm de no no. (Genesis 2:7; Hesekiel 18:4; Dwom 146:3, 4) Nanso nnɛyi nkyerɛase ahorow bi ne Bible afoforo bi a nkyerɛasefo no de wɔn ankasa nsɛm akyerɛkyerɛ mu mma nokware ahorow yi nna adi. Enti ebia ɛho behia sɛ wobesusuw nsɛm a wɔde adi dwuma wɔ kasa ahorow a wodii kan de kyerɛw Bible no mu no ho.
5. Ɔkwan bɛn so na wobɛboa onipa a ɔte saa no ma wate nea ɔkra no yɛ no ase?
5 New World Translation no titiriw ho wɔ mfaso kɛse wɔ eyi a wobɛyɛ no mu efisɛ ɛkyerɛ Hebri asɛmfua neʹphesh ne Hela asɛmfua psy·kheʹ a ɛkyerɛ ade koro no ase bere nyinaa sɛ “ɔkra,” na wɔakyerɛw kyerɛw nsɛm ahorow a wobehu nsɛmfua yi wom wɔ nsɛm a wɔahyehyɛ wom no mu. Ebia nnɛyi nkyerɛase renkyerɛ saa asɛmfua no ase sɛ “ɔkra” nko, na mmom sɛ “abɔde,” “onipa” ne “nkwa”; ebia wɔbɛkyerɛ “me neʹphesh” ase sɛ “me,” ne “wo neʹphesh” ase sɛ “wo.” Sɛ osuani komapafo bi de Bible ahorow yi toto nkyerɛase ahorow bi anaasɛ New World Translation no ho a, ɛbɛboa no ma wahu sɛ mfitiase kasa no mu nsɛmfua a wɔakyerɛ ase “ɔkra” no gyina hɔ ma (1) nnipa (2) mmoa ne (3) nkwa a wɔwɔ no. Ɛmma obi nnya adwene a ɛkyerɛ sɛ ɔkra yɛ biribi a wontumi nso mu a eguan fi nipadua no mu wɔ owu mu na ɛkɔ so tra ase wɔ baabi daa.
6. (a) Dɛn nti na nnɛyi nkyerɛase horow binom ma akenkanfo adwene tu fra wɔ nea Sheol, Hades ne Gehenna kyerɛ no ho? (b) Ɔkwan bɛn so na wubefi Bible no mu akyerɛkyerɛ tebea a nnipa a wɔwɔ Sheol anaa Hades wom no mu? Wɔ Gehenna?
6 Saa ara nso na New World Translation de Hebri asɛmfua sheōlʹ a ɛkyerɛ ase Sheol ne Hela asɛmfua haʹdes a ɛkyerɛ ase Hades ne geʹen·na a ɛkyerɛ ase Gehenna no di dwuma bere nyinaa. Nanso nnɛyi nkyerɛase horow bi ne Bible no mu nsɛm a wɔakyerɛkyerɛ mu a wɔakyerɛ haʹdes ne geʹen·na ABIEN no nyinaa ase sɛ “hell” de aka “adamoa” ne “asaman” ho de adi dwuma sɛ nkyerɛase foforo ama sheōlʹ ne haʹdes no ma ɔkenkanfo no adwene mu yɛ no basaa. Ɛdenam nkyerɛase ahorow a wɔde bɛtoto ho wɔ faako a ɛho hia no so no, wobetumi akyerɛ sɛ Sheol ne Hades yɛ ade koro. (Dwom 16:10; Asomafo no Nnwuma 2:27) Bible no da no adi pefee sɛ Sheol anaasɛ Hades a ɛne adesamma ɔdamoa no yɛ nea wɔde toto owu ho na ɛnyɛ nkwa. (Dwom 89:48; Adiyisɛm 20:13) Ɛkyerɛ anidaso a ɛne sɛ wobetumi afi hɔ aba denam owusɔre so nso. (Hiob 14:13; Asomafo no Nnwuma 2:31) Nea ɛne eyi bɔ abira no, daakye nkwa ho anidaso biara nni hɔ ma wɔn a wɔkɔ Gehenna na nokwarem no, ɛnka ɔkra no ho asɛm sɛ etumi tra nkwa mu wɔ hɔ.—Mateo 18:9; 10:28.
7. Sɛ obi te owusɔre no ase yiye a, ɔkwan bɛn so na ebetumi anya ne su ne ne nneyɛe so nkɛntɛnso?
7 Bere a wɔama saa nsɛm no mu ada hɔ no, Kristo wu ne ne wusɔre no bɛyɛ nea ɛkyerɛ biribi ankasa. Afei wobetumi aboa obi ma wate ase na obetumi afi ase akyerɛ anisɔ ama ɔdɔ a Yehowa wɔ denam nsiesiei pa a ɛte sɛɛ a wayɛ so no. Afei wɔn a wɔn adɔfo awuwu no betumi de ka a wɔbɛsan aka wɔn abom wɔ Onyankopɔn Nhyehyɛe Foforo no mu ho akwanhwɛ a ɛyɛ anigye asi awerɛhow nka a wɔte no ananmu. Afeha a edi kan Kristofo no hui sɛ Yesu Kristo wusɔre no yɛ Kristofo gyidi no fapem. Wɔde nnamyɛ dii ɛno ne anidaso a ɛma wonya no ho adanse kyerɛɛ afoforo. Saa ara nso na wɔn a wɔkyerɛ ho anisɔ nnɛ no pɛ sɛ wɔbɛka nokware a ɛsom bo yi ho asɛm akyerɛ afoforo.—Asomafo no Nnwuma 5:30-32; 10:40-43; 13:32-39; 17:31.
‘[Hades] Safe’ A Wɔde Di Dwuma
8. Dɛn na dwuma a Yesu de “owu ne [Hades] nsafe” di no kyerɛ ma n’akyidifo a wɔde honhom asra wɔn no?
8 Awiei koraa no, ɛsɛ sɛ wɔn a wɔbɛka Kristo ho wɔ ne soro Ahenni no mu no nyinaa wuwu. Nanso wonim bɔ a ɔhyɛ wɔn bere a ɔkaa eyi kyerɛɛ ɔsomafo Yohane no: “Miwui, na hwɛ, mete ase daadaa, na mikura owu ne [Hades] nsafe.” (Adiyisɛm 1:18) Na ɔkyerɛ dɛn? Na ɔretwe adwene asi n’ankasa osuahu so. Ɔno nso wui. Nanso, Onyankopɔn annyaw no wɔ Hades. Da a ɛto so abiɛsa no, Yehowa ankasa nyan no kɔɔ honhom mu asetra mu na ɔmaa no nkwa a owu nnim. Ɛnyɛ ɛno nko na Onyankopɔn de maa no, na mmom ɔmaa no “owu ne [Hades] nsafe” a ɔde begye afoforo afi adesamma ɔdamoa ne nea efii Adam bɔne no mu bae no mu. Esiane sɛ Yesu kura saa nsafe no nti, otumi nyan n’akyidifo anokwafo fi owu mu. Bere a ɔyɛ saa no, ɔde ɔsoro asetra a owu nnim akyɛde a ɛsom bo ma n’asafo no mufo a wɔde honhom asra wɔn no sɛnea n’Agya yɛ maa no no.—Romafo 6:5; Filipifo 3:20, 21.
9. Bere bɛn na Kristofo anokwafo a wɔasra wɔn no wusɔre no ba?
9 Bere bɛn na Kristofo anokwafo a wɔasra wɔn no benya owusɔre no? Afi ase dedaw. Ɔsomafo Paulo kyerɛkyerɛ mu sɛ wobenyan wɔn ‘bere a Kristo aba’ no, na ne ba yi fii ase wɔ 1914 Y.B. mu. (1 Korintofo 15:23) Afei sɛ wowie wɔn asase so asetra a, ɛnsɛ sɛ wɔtwɛn wɔ owu mu ma wɔn wura no san ba. Sɛ wowu ara pɛ a, wonyan wɔn honhom mu na wɔsakra wɔn “afrɛ so, amonom.” Hwɛ anigye ara a wonya esiane sɛ “wɔn nnwuma di wɔn akyi” nti!—1 Korintofo 15:51, 52; Adiyisɛm 14:13.
10. Owusɔre foforo bɛn na ɛbɛwɔ hɔ na bere bɛn na ebefi ase?
10 Nanso ɛnyɛ wɔn de no nkutoo ne owusɔre a ɛwɔ hɔ. Nokwasɛm a ɛyɛ sɛ wɔfrɛ no “ɔsɔre a edi kan” no kyerɛ sɛ ɛsɛ sɛ foforo di akyi ba. (Adiyisɛm 20:6) Wɔn a wonya owusɔre a edi akyiri yi mu mfaso no benya daa nkwa wɔ Paradise asase so ho akwanhwɛ a ɛyɛ anigye. Bere bɛn na ɛbɛba? Adiyisɛm nhoma no kyerɛ sɛ ɛbɛba bere a wɔayi mprempren nneɛma nhyehyɛe bɔne no “asase ne soro” no afi hɔ no akyi. Saa nhyehyɛe dedaw yi awiei abɛn pɛɛ. Enti asase so owusɔre no befi ase wɔ Onyankopɔn bere a wahyɛ mu.—Adiyisɛm 20:11, 12.
11. Henanom na wɔbɛka anokwafo a wobenyan wɔn aba nkwa mu wɔ asase so no ho, na dɛn nti na ɛyɛ akwanhwɛ a ɛyɛ anigye?
11 Henanom na wɔka ho? Yehowa tete asomfo anokwafo. Wɔn a wɔka ho nso ne nnipa a esiane gyidi a ɛyɛ den a na wɔwɔ wɔ owusɔre no mu nti “wɔampɛ ogye” no—wɔn mudi ma Onyankopɔn mu a wobegyae sɛnea ɛbɛyɛ a wɔrenwu owu yayaw. (Hebrifo 11:35) Hwɛ anigye ara a ɛbɛyɛ sɛ w’ankasa wubehu wɔn na woate nsɛm a esisii a wɔaka ho asɛm tiawa wɔ Bible no mu no mu nkyerɛkyerɛmu afi wɔn ankasa anom. Wɔn a wɔka ho nso ne Habel a na ɔyɛ Yehowa ɔdansefo nokwafo a odi kan no. Henok ne Noa a na wɔyɛ Onyankopɔn nsɛm a ɔde bɔɔ kɔkɔ ansa na Nsuyiri no reba no ho adawurubɔfo akokodurufo no. Abraham a ogyee abɔfo ani no. Mose a wɔnam no so de Mmara no mae wɔ Bepɔw Sinai so no. Adiyifo akokodurufo te sɛ Yeremia a ohuu Yerusalem sɛe wɔ 607 A.Y.B. mu no. Ne osuboni Yohane a ɔtee sɛ Onyankopɔn ankasa di Yesu ho adanse sɛ Ne Ba nen no. Ɛbɛyɛ nea anokwafo a wowuwui wɔ mprempren nhyehyɛe yi nna a edi akyiri yi mu no nso ka ho.—Hebrifo 11:4-38; Mateo 11:11.
12. (a) Awufo a wɔwɔ Hades no mu baahe na wobenyan wɔn? (b) Enti henanom na wɔbɛka ho na dɛn ntia?
12 Akyiri yi wobenyan afoforo nso. Wɔakyerɛ baabi a Yesu de ‘[Hades] safe’ no bedi dwuma wɔ adesamma fam akodu wɔ anisoadehu bi a wɔde maa ɔsomafo Yohane a ohui sɛ wɔatow Hades akyene ‘ogya tare no mu’ wom no mu. Ɛno kyerɛ dɛn? Ɛkyerɛ sɛ wɔasɛe no; enni hɔ bio esiane sɛ wɔayiyi mu nneɛma nyinaa nti. Enti, nea ɛka asomfo anokwafo a wobenyan wɔn no ho no, Yesu nam mmɔborohunu so de wɔn a wɔnteɛ mpo befi Hades, anaa Sheol asan aba. Eyinom mu biara nni hɔ a wobenyan wɔn na wɔabu wɔn atɛn sɛ wɔfata owu bio. Wɔbɛboa wɔn ma wɔama wɔn asetra ne Yehowa akwan horow ahyia wɔ trenee tebea mu wɔ Onyankopɔn Ahenni no ase. Anisoadehu no kyerɛe sɛ wobuee “nkwa nhoma” mu na wobenya hokwan a ɛbɛma wɔakyerɛw wɔn din wom. Wobebu wɔn “atɛn sɛnea wɔn nnwuma” a wɔyɛe wɔ owusɔre no akyi “te.” (Adiyisɛm 20:12-14; Asomafo no Nnwuma 24:15) Ne saa nti, sɛ wogyina nea awiei koraa no ebefi mu aba no so susuw ho a, wɔn owusɔre no betumi ada adi sɛ ɛyɛ “nkwa sɔre” na ɛnyɛ “[afobu] atemmu sɔre” a wɔrentumi nkwati.—Yohane 5:28, 29.
13. (a) Henanom na wɔrennyan wɔn? (b) Ɛsɛ sɛ nokware a ɛfa owusɔre ho no ho nimdeɛ ka yɛn asetra dɛn?
13 Ɛwom, ɛnyɛ wɔn a wɔatra ase pɛn no nyinaa na wobenyan wɔn. Ebinom yɛɛ bɔne ahorow a wɔrentumi mfa mfiri wɔn. Wɔn a wobekum wɔn wɔ ‘ahohiahia kɛse” a mprempren abɛn no mu no bɛka wɔn a wobenya daa ɔsɛe no ho. (Mateo 12:31, 32; 23:33; 24:21, 22; 25:41-46; 2 Tesalonikafo 1:6-9) Enti, bere a woyi mmɔborohunu kɛse adi wɔ wɔn a wɔwɔ Hades no nyinaa a wogye wɔn no mu no, ɛnyɛ nea owusɔre no ma yenya biribi a yebegyina so de ayɛ anibiannaso wɔ sɛnea yɛtra ase nnɛ no ho. Mmom no, ɛsɛ sɛ ɛkanyan yɛn ma yɛkyerɛ sɛnea yɛwɔ anisɔ kɛse ma Onyankopɔn dom ampa no.
Owusɔre Ho Anidaso No Hyɛ Yɛn Den
14. Ɔkwan bɛn so na owusɔre no betumi ayɛ ahoɔden kɛse fibea ama onipa a ɔrebɛn ne mprempren asetra awiei no?
14 Wɔn a wɔde owusɔre anidaso no ayɛ wɔn ankasa de no nya ahoɔden kɛse fi mu. Sɛ wɔbɛn wɔn nkwa nna awiei a, wonim sɛ wɔrentumi ntu owu nhyɛ da nkosi daa ɛmfa ho sɛ ɔkwan bɛn so na wɔfa sa wɔn yare no. (Ɔsɛnkafo 8:8) Sɛ wɔyɛ nnipa a wɔmaa wɔn ani beree Awurade adwuma no mu na wɔne n’ahyehyɛde no somee wɔ nokwaredi mu a, wobetumi de ahotoso kɛse ahwɛ daakye kwan. Wonim sɛ wɔnam owusɔre so benya nkwa bio wɔ Onyankopɔn bere a ɛsɛ mu. Na nkwa bɛn ara na ɛbɛyɛ sɛɛ yi! Sɛnea ɔsomafo Paulo frɛɛ no no, ɛyɛ “nkwa ankasa.”—1 Timoteo 6:19, NW; 1 Korintofo 15:58; Hebrifo 6:10-12.
15. Sɛ ataafo atirimɔdenfo hunahuna yɛn a, dɛn na ebetumi aboa yɛn ma yɛakura yɛn mudi mu ama Yehowa?
15 Ɛnyɛ owusɔre a yenim sɛ ɛwɔ hɔ no ara kwa na ɛma yɛyɛ den na mmom nim a yenim Onii a ɔne saa nsiesiei no Fibea no. Sɛ ataafo atirimɔdenfo hunahuna yɛn mpo a, eyi hyɛ yɛn den ma yedi Onyankopɔn nokware. Satan fi tete de ɔpatuwu ho hu adi dwuma sɛ nea ɔnam so de nkurɔfo yɛ nkoa. Nanso Yesu amma ehu a ɛte saa no ho kwan; odii Yehowa nokware koduu owu mu tɔnn. Ɔnam nea ne wu no tumi yɛe no so de nea wɔnam so begye afoforo afi ehu a ɛte saa no mu mae. (Hebrifo 2:14, 15) Esiane gyidi a n’akyidifo anokwafo wɔ wɔ saa nsiesiei no mu nti, wɔanya kyerɛwtohɔ bi a ɛso nni sɛ mudi mu kurafo. Bere a wɔhyɛ wɔn so no, wɔada no adi sɛ ‘wɔnnɔ wɔn ankasa kra’ nsen sɛnea wɔdɔ Yehowa no. (Adiyisɛm 12:11) Wɔ nyansam no, wɔmmɔ mmɔden sɛ wɔbɛkora wɔn nkwa a wɔwɔ mprempren no so denam Kristofo nnyinasosɛm ahorow a wɔbɛpow no so na amma daa nkwa ho anidaso no amfi wɔn nsa. (Luka 9:24, 25) Wowɔ gyidi a ɛte saa? Sɛ wodɔ Yehowa ampa na wode nea owusɔre ho anidaso no kyerɛ ma wo hyɛ wo komam a, wubenya bi.
Asɛm No Mu Nti̇̃mu
● Dɛn nti na ɛho hia sɛ obi te nea ɔkra no yɛ ne awufo tebea no ase ansa na watumi akyerɛ owusɔre no ho anisɔ?
● Henanom na wɔbɛsan afi awufo mu aba? Ɛsɛ sɛ nimdeɛ yi ka yɛn dɛn?
● Ɔkwan bɛn so na owusɔre anidaso no hyɛ yɛn den?
[Adesua no ho Nsɛmmisa]
