Yehowa Atirimpɔw Di Nkonim Anuonyam Mu
Ti 24
Yehowa Atirimpɔw Di Nkonim Anuonyam Mu
1, 2. (a) Dɛn ne Yehowa atirimpɔw a ɛfa n’abɔde a wonim nyansa no ho? (b) Ná henanom na wɔka Onyankopɔn asomfo abusua a wɔyɛ biako no ho? (d) Ɛdefa eyi ho no, asemmisa a ɛfa obi ankasa ho bɛn na ɛfata sɛ wosusuw ho?
ABƆDE a wonim nyansa nyinaa ayɛ biako wɔ nokware som mu na wɔn nyinaa renya Onyankopɔn mma anuonyam adehyedi—ɛno ne Yehowa atirimpɔw a nyansa ne ɔdɔ wom. Ɛno nso ne nea trenee adɔfo nyinaa de mmɔdenbɔ hwehwɛ.
2 Yehowa fii ase maa saa atirimpɔw kɛse yi baa mu bere a ofii n’adebɔ nnwuma ase no. Ná n’abɔde a odi kan no yɛ Ɔba bi a ɔdaa ne ho adi sɛ ɔyɛ “n’anuonyam no haran ne ne su sɛso.” (Hebrifo 1:1-3) Ná oyi yɛ soronko, esiane sɛ Onyankopɔn nkutoo na ɔbɔɔ no no nti. Wɔnam no so de mma afoforo bae—nea edi kan, abɔfo a wɔwɔ ɔsoro, afei onipa wɔ asase so. (Hiob 38:7; Luka 3:38) Saa mma yi nyinaa boom yɛɛ amansan abusua biako. Ná Yehowa ne wɔn nyinaa Nyankopɔn, obiako pɛ a ná ɛsɛ sɛ wɔsom no. Ná ɔno ne Amansan Hene. Ná ɔyɛ wɔn Agya a ɔdɔ wɔn nso. So saa ara na ɔyɛ w’agya, na so woyɛ ne mma no mu biako? Abusuabɔ a ɛsom bo bɛn ara na ɛno betumi ayɛ sɛɛ yi!
3. (a) Dɛn nti na efi awo mu no yɛn mu biara nyɛ Onyankopɔn ba? (b) Nanso ɔdɔ nsiesiei bɛn na Yehowa yɛ maa Adam mma?
3 Nanso ɛsɛ sɛ yegye nokwasɛm no tom sɛ bere a wobuu yɛn adesamma awofo a wodi kan no kumfɔ sɛ wɔn a wɔboapa yɛɛ bɔne no, wɔpam wɔn fii Eden na Onyankopɔn pow wɔn. Wɔankɔ so anyɛ Yehowa amansan abusua no fã bio. (Genesis 3:22-24; fa toto Deuteronomium 32:4, 5 ho.) Esiane sɛ yɛn nyinaa yɛ ɔbɔnefo Adam asefo nti, wɔde bɔne su ahorow awo yɛn. Esiane sɛ yɛyɛ awofo a wɔapam wɔn afi Onyankopɔn abusua no mu mma nti, yɛrentumi nnyina ɔdesani awo ara kwa so nkyerɛ sɛ yɛyɛ Onyankopɔn mma. Nanso ná Yehowa nim sɛ ebinom a wofi Adam asefo mu bɛdɔ trenee, na Ɔyɛɛ ɔdɔ nsiesiei a eyinom nam so betumi anya Onyankopɔn mma anuonyam adehyedi.—Romafo 8:20, 21.
Israel Gyinabea A Na Ɔdom Wom
4. (a) Dɛn so na Israelfo gyina yɛɛ Onyankopɔn “mma”? (b) Ná eyi nkyerɛ dɛn?
4 Wɔbɔɔ Adam akyi bɛyɛ mfirihyia 2,500 no, Yehowa de hokwan a wɔnam so benya abusuabɔ sɛ ne mma san maa adesamma bi bio. Nea ɛne n’apam a ɔne Abraham yɛe no hyia no, Yehowa paw Israel sɛ wɔnyɛ ne man. Enti ɔkaa Israel ho asɛm kyerɛɛ Misraim Farao sɛ “me ba.” (Exodus 4:22, 23; Genesis 12:1, 2) Akyiri yi ɔde ne mmara maa Israel wɔ Bepɔw Sinai ho, ɔhyehyɛɛ nkurɔfo no yɛɛ wɔn ɔman na ɔde wɔn dii n’atirimpɔw ho dwuma. Sɛ́ ɔman no, esiane sɛ na wɔyɛ Yehowa “ahode titiriw” nti, wɔkaa wɔn ho asɛm sɛ Nyankopɔn “mma.” (Deuteronomium 14:1, 2; Yesaia 43:1) Afei nso, esiane Yehowa ne saa ɔman no mu nnipa nkorɛnkorɛ binom nsɛnnii titiriw bi nti, ɔkaa wɔn ho asɛm sɛ mma. (1 Beresosɛm 22:9, 10) Ná saa gyinabea yi gyina wɔne Onyankopɔn ntam apam so. Nanso ɛno ankyerɛ sɛ wonyaa anuonyam adehyedi a ná Adam wɔ sɛ Onyankopɔn ba no. Ná wɔda so ara wɔ bɔne ne owu nkoayɛ mu.
5. Ɔkwan bɛn so na Israel hweree ne gyinabea titiriw wɔ Onyankopɔn anim no?
5 Nanso, sɛ mma no, wonyaa Onyankopɔn anim dom. Ná asɛyɛde da wɔn so nso sɛ wɔde obu bɛma wɔn Agya na wɔayɛ adwuma ma ɛne n’atirimpɔw ahyia. Yesu sii hia a saa ahyɛde no ho dwuma a wobedi no ho hia no so dua—ɛnyɛ sɛ wɔbɛkyerɛ sɛ Onyankopɔn yɛ wɔn Agya nko, na mmom sɛ ‘wɔbɛda wɔn ho adi’ sɛ wɔyɛ ne mma. (Mateo 5:43-48; Malaki 1:6) Nanso, sɛ́ ɔman no, Yudafo no antumi anyɛ eyi. Enti wɔ Yesu asase so som adwuma no afe a edi akyiri no mu bere a Yudafo a ná wɔrehwehwɛ Yesu akum no no kae sɛ “Agya biako na yɛwɔ, ɔne Onyankopɔn” no, Yesu kyerɛe pefee sɛ wɔn nneyɛe ne honhom a woyii adi kyerɛe no kyerɛ sɛ saa a wɔkae no yɛ atoro. (Yohane 8:41, 44, 47) Wɔ 33 Y.B. mu no, Onyankopɔn de Mmara apam no baa awiei, na nea Israel gyinaa so nyaa abusuabɔ soronko no nso baa awiei. Nanso wɔn a Yehowa begye wɔn atom sɛ mma wɔ adesamma mu no amma awiei.
Yehowa Ka Ne Nkurɔfo Bom
6. “Afisiesie” bɛn ho asɛm na Paulo kae wɔ Efesofo 1:9, 10 no, na na ne botae ne dɛn?
6 Ɔsomafo Paulo kyerɛw kɔmaa Kristofo a na wɔwɔ Efeso no faa Yehowa nhyehyɛe a wɔde reka ne nkurɔfo abom—Onyankopɔn nhyehyɛe a wɔn a wonya gyidi betumi afa so abɛyɛ Ne fifo a ɔdɔ wɔn no mufo no ho sɛ: “[Onyankopɔn] ma yehuu n’ahintasɛm, sɛnea n’anisɔ a ɔbɔɔ ne tirim no te a ɔde hwɛɛ bere a awie du no afisiesie [ofie nhyehyɛe] a wɔbɛpata nneɛma nyinaa abom bio Kristo mu, nea ɛwɔ ɔsoro ne nea ɛwɔ asase so no ɔno mu.” (Efesofo 1:9, 10) Saa “afisiesie” yi gyina Yesu Kristo so. Ɛnam ne so na wɔde adesamma ba tebea a mpeneso wom mu wɔ Onyankopɔn anim—ebinom benya hokwan akɔ ɔsoro; afoforo wɔ asase so—ma wɔne Onyankopɔn mma a wɔyɛ abɔfo a wɔadi Yehowa nokware no asom wɔ biakoyɛ mu.
7. Dɛn ne “nea ɛwɔ ɔsoro” no, na wɔn ano a wɔboaboa no kyerɛ dɛn ma wɔn?
7 Nea edi kan no, efi Pentekoste 33 Y.B. no, wɔde adwene sii “nea ɛwɔ ɔsoro,” kyerɛ sɛ wɔn a wɔne Kristo bɛyɛ yɔnko adedifo wɔ ɔsoro Ahenni mu no so. Esiane gyidi a wɔwɔ wɔ ɛbo a Yesu afɔrebɔ no som no mu nti, Onyankopɔn buu wɔn atreneefo. (Romafo 5:1, 2) Afei ‘wɔwoo wɔn foforo,’ anaasɛ wɔwoo wɔn sɛ Onyankopɔn mma a wɔwɔ ɔsoro asetra ho akwanhwɛ. (Yohane 3:3; 1:12, 13) Onyankopɔn ne eyinom yɛɛ apam foforo sɛ honhom mu ɔman bi. Akyiri yi, na wɔde Yudafo ne Amanaman mufo nyinaa bɛba mu, na eyinom dodow bɛyɛ 144,000.—Galatifo 3:26-29; Adiyisɛm 14:1.
8. Sɛ wɔde Ahenni adedifo no ne Agya no ntam abusuabɔ toto Yudafo de a na ɛwɔ Mose Mmara no ase no ho a, na ɛte dɛn?
8 Ɛwom sɛ wɔda so ara nyɛ pɛ ɔhonam mu de, nanso ɔsoro Ahenni no adedifo a wɔte saa no nkaefo no ne Agya no wɔ abusuabɔ a emu yɛ den. Ɛdefa eyi ho no, Paulo kyerɛwee sɛ: “Na sɛ moyɛ mma nti, Onyankopɔn asoma ne ba honhom aba mo koma mu a ɔteɛm sɛ: Abba, Agya! Enti wonyɛ akoa bio na mmom ɔba; na sɛ woyɛ ɔba a, wonam Onyankopɔn so yɛ ɔdedifo nso bi.” (Galatifo 4:6, 7) Saa Aram kasa mu asɛm “Abba” no ase ne “Agya,” nanso ɛyɛ asɛm a ɔdɔ wom a wɔde frɛ obi—nea abofra kumaa bi de frɛ n’agya. Esiane kyɛn a Yesu afɔrebɔ no kyɛn so ne Onyankopɔn ankasa dom a ɛnsɛ yɛn no nti, Kristofo a wɔde honhom asra wɔn yi ne Onyankopɔn wɔ abusuabɔ a emu yɛ den sen biara a adesamma a wɔnyɛ pɛ betumi anya wɔ Mmara no ase. Nanso, nea ɛda wɔn anim no yɛ nwonwa mmoroso koraa.
9. Gye a wobegye wɔn atom koraa sɛ mma no kyerɛ dɛn?
9 Sɛ wodi nokware kodu owu mu a, wogye wɔn tom koraa sɛ mma denam nyan a wonyan wɔn kɔ nkwa a owu nnim mu wɔ ɔsoro no so. Ɛhɔ na wobenya hokwan asom biakoyɛ mu wɔ Yehowa Nyankopɔn anim ankasa. Onyankopɔn mma yi mu kakraa bi pɛ na wɔda so ara wɔ asase so.—Romafo 8:14, 23; 1 Yohane 3:1, 2.
“Nea Ɛwɔ Asase So” No Anoboaboa
10. (a) Dɛn ne “nea ɛwɔ asase so” no, na efi bere bɛn na wɔaboaboa wɔn ano akɔ ɔsom mu biakoyɛ mu? (b) Abusuabɔ bɛn na wɔne Yehowa wɔ?
10 “Afisiesie” koro no ara a ɛma wotumi boaboa adesamma ano kɔ Onyankopɔn fifo mu a ɔsoro asetra na ɛda wɔn anim no nso dan adwene kɔ “nea ɛwɔ asase so” no so. Efi 1935 Y.B. reba no titiriw no, wɔaboaboa nnipa a wɔwɔ Kristo afɔrebɔ no mu gyidi a wɔwɔ asase so daa nkwa asetra ho akwanhwɛ no ano. Wɔne kuw a wɔasra wɔn no mufo de mmati koro kamfo Yehowa din na wɔama ne som so. (Sefania 3:9; Yesaia 2:2, 3) Eyinom nso de obu kɛse frɛ Yehowa sɛ “Agya,” na wohu no sɛ nkwa Fibea na wɔbɔ mmɔden kɛse sɛ wɔbɛda ne su ahorow no adi sɛnea ɔhwɛ kwan sɛ ne mma bɛyɛ no. Wogyina Yesu mogya a ohwie gui no mu gyidi a wɔwɔ no so nya gyinabea a mpeneso wom wɔ n’anim. (Mateo 6:9; Adiyisɛm 7:9, 14) Nanso wonim sɛ anigye a wobenya sɛ Onyankopɔn agye wɔn atom koraa sɛ ne mma no yɛ nea ɛwɔ hɔ ma wɔn daakye.
11. (a) Bɔhyɛ bɛn na Romafo 8:19-21 de ma adesamma? (b) Dɛn ne “Onyankopɔn mma ahoyi” a wɔde ahopere twɛn no?
11 Sɛnea wɔakyerɛ wɔ Romafo 8:19-21 no, wɔde ahopere retwɛn “Onyankopɔn mma ahoyi” no, efisɛ saa bere no na bere a abɔde a wɔyɛ adesamma yi “bɛfa ne ho adi afi ɔsom a ɛsom porɔwee no mu” no bɛba. Saa “ahoyi” no bɛba bere a adesamma a wɔwɔ asase so no hu adanse a ɛkyerɛ sɛ Onyankopɔn mma a wɔde honhom asra wɔn a wɔn nsa aka wɔn ɔsoro akatua no adi dwuma sɛ wɔn Awurade a wɔahyɛ no anuonyam, Yesu Kristo, no ahokafo no. Eyi bɛda adi wɔ nneɛma nhyehyɛe bɔne no nyinaa sɛe a Kristo Mfirihyia Apem Ahenni a “Onyankopɔn mma” yi ne no benya mu kyɛfa sɛ ahene ne asɔfo no mu nhyira horow bedi akyiri aba no mu.—Adiyisɛm 2:26, 27; 20:6.
12. Wɔ ahohiahia kɛse no akyi no, ayeyi dwom bɛn na Onyankopɔn mma nkonimdifo a wɔde honhom asra wɔn no bɛto bi, na ɛno kyerɛ dɛn?
12 Anigye bɛn ara na ɛbɛyɛ sɛɛ yi bere a ahohiahia kɛse no twam na saa Onyankopɔn mma a wɔne Kristo aka abom no de nne biako yi Onyankopɔn ayɛ na wɔde ahosɛpɛw pae mu ka sɛ: “[Yehowa] Nyankopɔn ade nyinaa so tumfoɔ, wo nnwuma yɛ akɛse na ɛyɛ nwonwa. Amanaman hene, w’akwan teɛ na ɛyɛ nokware. [Yehowa], hena na ɔrensuro wo na ɔnhyɛ wo din anuonyam? Efisɛ wo nko na woyɛ kronkron, na amanaman nyinaa bɛba abɛkotow w’anim, efisɛ w’asɛntrenee ada adi”! (Adiyisɛm 15:3, 4) Yiw, adesamma nyinaa a wɔyɛ nnipa a wofi amanaman a na anka wɔwɔ hɔ no nyinaa mu no bɛyɛ biako wɔ nokware Nyankopɔn no som mu. Wobenyan wɔn a wɔwɔ nkae ada mu no mpo na wɔama wɔanya hokwan de nne biako ayi Yehowa ayɛ.
13. Ahofadi a ɛyɛ nwonwa bɛn na wɔn a wofi ahohiahia kɛse no mu ka no benya ntɛm ara?
13 Satan Ɔbonsam renyɛ “wi yi ase nyame” bio. Yehowa asomfo a wɔwɔ asase so ha no ne nkɛntɛnso bɔne renni asi bio. (2 Korintofo 4:4; Adiyisɛm 20:1-3) Atoro som renka yɛn Nyankopɔn a ɔdɔ yɛn no ho atosɛm na ɛrenyɛ nkɛntɛnso a ɛpaapae adesamma abusua no mu bio. Nokware Nyankopɔn no nkoa renhyia ntɛnkyea ne nsisi a sodifo de ba wɔn so no bio. Ahofadi a ɛyɛ nwonwa bɛn ara na ɛno bɛkyerɛ ama wɔn a wofi ahohiahia kɛse no mu aka no sɛɛ yi!
14. Ɛdenam dɛn so na wɔbɛma wɔade wɔn ho afi bɔne ne nea ɛde ba nyinaa mu?
14 Sɛ “Onyankopɔn guammaa a oyi wiase bɔne kɔ no,” Yesu Kristo de n’afɔrebɔ no bo a ɛsom no bedi dwuma ma wɔde apopa adesamma bɔne a atwam no nyinaa afi hɔ. (Yohane 1:29) Bere a Yesu wɔ asase so a ɔkae sɛ wɔde onipa bi bɔne afiri no no, ɔsaa nea wɔde bɔne afiri no no yare nso de dii ho adanse. (Mateo 9:1-7) Saa ara nso na ofi soro bɛsa anifuraefo, asotifo, mum, wɔn a wɔadi dɛm wɔ nipadua mu, adwenemyarefo ne wɔn a nyarewa afoforo aka wɔn no yare wɔ anwonwa kwan so. Ɛdenam wɔn ankasa ho a wɔbɛyɛn wɔ nokwaredi mu ma ɛne Onyankopɔn trenee akwan horow ahyia so no, wɔde nkakrankakra beyi “bɔne mmara” afi wɔn a wɔwɔ ɔpɛ na wɔyɛ osetie nyinaa no mu ma enti wɔn nneyɛe, wɔn nsusuwii ne wɔn komam akɔnnɔ horow nyinaa bɛyɛ nea ɛsɔ wɔn ankasa ne Onyankopɔn ani. (Romafo 7:21-23; fa toto Yesaia 25:7, 8 ne Adiyisɛm 21:3, 4 ho.) Ansa na Mfirihyia Apem no bɛba awiei no, na wɔaboa wɔn ma wɔaba ɔdesani pɛyɛ mu koraa. Wɔbɛde wɔn ho koraa afi bɔne ne nea efi mu ba a ɛyɛ awerɛhow no nyinaa mu. Wɔbɛda ‘Onyankopɔn suban ne ne sɛso’ adi yiye wɔ asase so Paradise a ɛwɔ asase no so nyinaa no mu.—Genesis 1:26.
15. Wɔ Mfirihyia Apem no awiei no, dɛn na Kristo bɛyɛ, na ne botae ne dɛn?
15 Bere a Kristo de adesamma aba pɛyɛ mu no, afei ɔbɛdan tumi a Agya no de maa no ma ɔde yɛɛ saa adwuma yi no ama no. Sɛnea wɔka siei wɔ 1 Korintofo 15:28 no: “Na sɛ onya de nneɛma nyinaa gu [Ɔba] no nan ase a, ɛno na ɔba no ankasa nso de ne ho bɛhyɛ nea ɔde nneɛma nyinaa guu ne nan ase no ase na Onyankopɔn ayɛ de nyinaa mu ade nyinaa.”
16. Dɛn na wɔbɛma aba adesamma a wɔayɛ pɛ no nyinaa so afei, na dɛn ntia?
16 Afei wɔde hokwan bɛma adesamma a wɔayɛ pɛ no ma wɔde akyerɛ sɛ nea wɔapaw a ɛrensakra da no ne sɛ wɔbɛsom nokware Nyankopɔn teasefo no daa. Enti, ansa na Yehowa nam Yesu Kristo so begye wɔn sɛ ne mma no, ɔbɛma wɔasɔ saa adesamma a wɔayɛ pɛ no nyinaa ahwɛ fefeefe nea etwa to. Wobegyae Satan ne n’adaemone afi bun no mu. Eyi renyɛ daa ɔhaw mma wɔn a wɔdɔ Yehowa nokware mu no. Nanso wɔbɛsɛe wɔn a wɔrenni nokware na wɔma kwan ma wɔdaadaa wɔn ma wɔyɛ Yehowa so asoɔden no aka mfiase otuatewfo no ne n’adaemone no ho korakora.—Adiyisɛm 20:7-10.
17. Wɔ Yehowa atirimpɔw mmamu mu no, tebea bɛn na ɛbɛba n’abɔde a wonim nyansa no nyinaa mu bio?
17 Afei Yehowa nam Kristo so begye adesamma a wɔayɛ pɛ a wogyinaa sɔhwɛ a edi akyiri no ano no sɛ ne mma. Afei, wobenya “Onyankopɔn mma anuonyam adehyedi no” mu kyɛfa de akosi ase. (Romafo 8:21) Awiei no, wɔbɛyɛ Onyankopɔn amansan abusua a wɔaka abom a Yehowa bɛyɛ wɔn nyinaa Nyankopɔn koro, Amansan Hene ne wɔn Agya a wɔdɔ no daa no fã. Ɛno na afei Yehowa abɔde a wonim nyansa a wɔwɔ ɔsoro ne asase so nyinaa bɛsan ayɛ biako bio wɔ nokware Nyankopɔn koro no som mu.
Asɛm No Mu Nti̇̃mu
● Ansa na Eden atuatew no reba no, ná abusuabɔ bɛn Yehowa asomfo nyinaa ne no wɔ?
● Asɛyɛde bɛn na ɛda wɔn a wɔyɛ Onyankopɔn mma no so?
● Henanom ne Onyankopɔn mma nnɛ? Henanom na afei na wɔabɛyɛ Onyankopɔn mma, na eyi fa Yehowa atirimpɔw a ɛfa ɔsom mu biakoyɛ ho no ho dɛn?
[Adesua no ho Nsɛmmisa]
