Exodo 1:1-22
1 Teie te iˈoa o te mau tamaiti a Iseraela tei haere mai i Aiphiti e o Iakoba, te tane tataitahi o tei haere mai e to ˈna utuafare:+
2 Reubena, Simeona, Levi e Iuda,+
3 Isakara, Zebuluna e Beniamina,
4 Dana e Naphatali, Gada e Asera.+
5 E 70 taata ratou pauroa tei fanauhia mai na* Iakoba. O Iosepha râ, tei Aiphiti+ ê na ïa.
6 I muri aˈe, pohe atura Iosepha,+ oia atoa to ˈna mau taeae atoa e pauroa taua uˈi ra.
7 E tamariihia aˈera te ati* Iseraela e rahi roa maira ratou, e oioi noa ˈtura ratou i te rahi mai e i te puai mai, a î atu ai te fenua ia ratou.+
8 I muri aˈe, tia maira i Aiphiti te hoê arii apî, aita i matau ia Iosepha.
9 Parau maira ïa oia i to ˈna nunaa: “A hiˈo na! Mea rahi aˈe e mea puai aˈe te nunaa o Iseraela ia tatou.+
10 E rave anaˈe i te tahi mea i nia ia ratou. Aita anaˈe, e rahi noa mai ratou, e ia tupu te hoê tamaˈi, e amui ratou i to tatou mau enemi, a aro mai ai ia tatou e a faarue mai ai i to tatou fenua.”
11 Faatoroa aˈera ïa ratou i te mau raatira ohipa faahepohia* no te haavî ia ratou i te ohipa teimaha,+ e patu aˈera ratou i te mau oire vairaa taoˈa no Pharao, oia hoi Pitoma e Ramese.+
12 Tera râ, rahi atu â ratou i te haavîraahia, rahi atu â ïa ratou i te maraaraa e rahi atu â ratou i te parare-noa-raa, pohe ihora ïa ratou i te riaria no te ati Iseraela.+
13 Faatîtî+ e faahepo aˈera ïa to Aiphiti i te ati Iseraela ia rave i te ohipa teimaha.
14 Faariro aˈera ratou i te oraraa o te ati Iseraela ei mea mauiui roa i te ohipa rohirohi mau i te hamaniraa i te tapiri araea e te ofai araea, e i te mau huru faatîtîraa atoa i rapae i te oire. Oia mau, ua faaravehia ratou i te ohipa i roto i te mau huru tupuraa fifi mau i te mau huru faatîtîraa atoa.+
15 I muri iho, paraparau atura te arii o Aiphiti i na vahine faafanau Hebera, o Siphera e o Pua te iˈoa,
16 e na ô atura ia raua: “E tauturu orua i te mau vahine Hebera ia fanau+ e ia ite orua ia ratou i nia i te parahiraa fanauraa, e haapohe orua i te tamarii mai te peu e tamaroa, mai te peu râ e tamahine, a vaiiho ïa ia ˈna ia ora.”
17 Tera râ, te mǎtaˈu ra na vahine faafanau i te Atua mau, e aita raua i rave i ta te arii no Aiphiti i parau ia raua. Ua vaiiho râ raua i te mau tamarii tamaroa ia ora.+
18 I muri aˈe, titau maira te arii no Aiphiti i na vahine faafanau e parau atura: “Eaha orua i vaiiho ai i te mau tamarii tamaroa ia ora?”
19 Na ô maira na vahine faafanau ia Pharao: “E ere te mau vahine Hebera mai te mau vahine no Aiphiti. Mea itoito ratou e ua fanau ê na ratou hou te vahine faafanau a tomo atu ai i ǒ ratou.”
20 Hamani maitai maira te Atua i na vahine faafanau, e rahi noa ˈtura te ati Iseraela e riro atura ei mea puai roa.
21 E no te mea ua mǎtaˈu na vahine faafanau i te Atua mau, horoa maira oia i muri aˈe no raua i te utuafare.
22 E faaue atura Pharao i to ˈna nunaa taatoa: “Ia taora outou pauroa te tamaiti fanau-apî-hia a te mau Hebera i roto i te anavai Nile, ia vaiiho râ outou pauroa te tamahine ia ora.”+
Nota i raro i te api
^ Heb: “no roto mai i te huha o.”
^ Heb: “te mau tamarii a.”
^ Aore ra “tiaau ohipa.”
