Exodo 17:1-16
17 Reva ˈtura te amuiraa taatoa o te ati Iseraela mai te medebara o Sini+ no te puhapa i tera e tera vahi ia au i te faaueraa a Iehova,+ e puhapa ihora ratou i Rephidima.+ Tera râ, aita e pape ia inu te nunaa.
2 Tamaˈi maira ïa te nunaa ia Mose+ e parau maira: “A horoa mai i te pape na matou.” Parau atura râ Mose ia ratou: “Eaha outou e tamaˈi mai ai ia ˈu? Eaha outou e aa noa ˈi ia Iehova?”+
3 E poihâ rahi râ to te nunaa i reira, e tamau atura ratou i te amuamu ia Mose,+ a na ô ai: “Eaha oe i aratai ai ia matou i rapae i Aiphiti ia pohe matou, ta matou mau tamarii e ta matou mau nǎnǎ animara no te poihâ?”
4 Tiaoro ihora ïa Mose ia Iehova: “E nafea vau i teie nunaa? Maa taime iti â, e pehi ratou ia ˈu i te ofai!”
5 Na ô maira ïa Iehova ia Mose: “A haere na mua i te nunaa, e a rave na muri ia oe i te tahi mau matahiapo o Iseraela e ta oe raau ta oe i tairi i te anavai Nile.+ A rave i te reira i to rima e a haere.
6 Inaha, e tia vau i mua ia oe i reira i nia iho i te mato i Horeba. A tairi i te mato, e e pihaa mai te pape no roto mai i te mato, e e inu te nunaa i taua pape ra.”+ Na reira ihora ïa Mose i mua i te mata o te mau matahiapo o Iseraela.
7 Parau ihora oia i taua vahi ra o Mâsa*+ e o Meriba*+ no te tamaˈiraa mai te ati Iseraela e no to ratou aaraa ia Iehova+ a parau ai: “Tei rotopu anei Iehova ia tatou aore ra aita?”
8 Haere maira te ati Amaleka+ e aro maira ia Iseraela i Rephidima.+
9 Parau atura Mose ia Iosua:+ “A maiti i te tahi mau tane no tatou e a haere e aro i te ati Amaleka. Ananahi, e tia vau i nia i te aivi e te raau a te Atua mau i roto i to ˈu rima.”
10 Rave ihora ïa Iosua mai ta Mose iho â i parau ia ˈna,+ e aro atura oia i te ati Amaleka. Pauma aˈera Mose, Aarona e Hura+ i nia i te tupuai aivi.
11 A amo noa ˈi Mose i to ˈna rima i nia, ua pau te ati Amaleka, ua tuu anaˈe râ oia i to ˈna rima i raro, o te ati Iseraela tei pau.
12 I te paruparuraa te rima o Mose, rave maira raua i te hoê ofai e tuu ihora i raro aˈe ia ˈna, e parahi ihora oia i nia iho. Turu aˈera Aarona e Hura, o te tia ra i te tahi e te tahi pae o Mose, i to ˈna rima, ia etaeta noa to ˈna rima e topa noa ˈtu te mahana.
13 Pau atura ïa Amaleka e to ˈna nunaa ia Iosua i te ˈoˈe.+
14 E na ô maira Iehova ia Mose: “A papai i te reira ei haamanaˈoraa i roto i te buka, e a faatia ˈtu ia Iosua: ‘E faaore roa vau i te parau o Amaleka i raro aˈe i te raˈi.’”+
15 Hamani ihora Mose i te hoê fata e mairi ihora i te reira i te iˈoa o Iehova-nisi,*
16 a na ô ai: “No te mea te amo ra oia i to ˈna rima i te terono o Ia,+ e aro Iehova ia Amaleka i te tamaˈi i tera e tera uˈi.”+
Nota i raro i te api
^ “Aaraa” te auraa.
^ “Tamaˈiraa” te auraa.
^ “O Iehova to ˈu pou tapao” te auraa.
