Exodo 7:1-25
7 Na ô maira ïa Iehova ia Mose: “Inaha, ua faariro vau ia oe mai te Atua* ia Pharao, e e riro Aarona to tuaana ei peropheta na oe.+
2 Ia parau oe pauroa ta ˈu e faaue ia oe i to tuaana Aarona, e na ˈna e parau atu ia Pharao, e e tuu oia i te ati Iseraela ia haere i rapae i to ˈna fenua.
3 O vau râ, e vaiiho ïa vau i te aau o Pharao ia etaeta,+ e e faarahi au i ta ˈu mau tapao e ta ˈu mau semeio i te fenua o Aiphiti.+
4 Eita râ Pharao e faaroo ia orua, e e tuu vau i to ˈu rima i nia ia Aiphiti, a aratai atu ai i to ˈu mau taata e rave rahi,* to ˈu nunaa, te ati Iseraela, i rapae i te fenua o Aiphiti ma te faautuaraa rahi.+
5 E ite iho â to Aiphiti e o vau o Iehova+ ia toro vau i to ˈu rima no te tairi ia Aiphiti e ia aratai ê mai au i te ati Iseraela mai rotopu mai ia ratou.”
6 Rave aˈera Mose raua Aarona i ta Iehova i faaue ia raua. Ua na reira iho â raua.
7 E 80 matahiti to Mose e e 83 matahiti to Aarona i to raua paraparauraa ia Pharao.+
8 Na ô maira Iehova ia Mose raua Aarona:
9 “Ia parau mai Pharao ia orua: ‘A faatupu i te hoê semeio,’ a na ô atu ia Aarona: ‘A rave i to raau e a taue i raro i mua ia Pharao.’ E riro mai te raau ei ophi rahi.”+
10 Tomo aˈera ïa Mose raua Aarona i ǒ Pharao e rave atura mai ta Iehova i faaue. Taue ihora Aarona i ta ˈna raau i raro i mua ia Pharao e ta ˈna mau tavini, e riro maira te raau ei ophi rahi.
11 Tera râ, titau ihora Pharao i te feia paari e te feia tahutahu, e na reira atoa aˈera taua mau tahuˈa manamana ra no Aiphiti+ ma ta ratou mau peu.+
12 Taue ihora ratou tataitahi i ta ratou raau i raro, e riro maira te reira ei ophi rahi. Horomii ihora râ ta Aarona raau i ta ratou mau raau.
13 Noa ˈtu râ, etaeta ihora to Pharao aau,+ e aita ˈtura oia i faaroo ia raua, mai ta Iehova iho â i parau.
14 Na ô maira ïa Iehova ia Mose: “Aita to Pharao aau i mǎrû mai.+ Aita oia i tuu i te nunaa ia haere.
15 A haere ia Pharao ra ananahi poipoi. Inaha, e haere oia i te pape ra! E tia oe no te farerei ia ˈna i te hiti o te anavai Nile. A rave i roto i to rima i te raau tei riro na ei ophi.+
16 E ia parau oe ia ˈna: ‘Na Iehova te Atua o te mau Hebera i tono mai ia ˈu ia oe nei,+ e te na ô mai ra oia: “A tuu i to ˈu nunaa ia haere, ia tavini hoi ratou ia ˈu i te medebara,” aita râ oe i faaroo tae roa mai i teie nei.
17 Teie ta Iehova e parau mai ra: “I ta ˈu e rave e ite ai oe e o vau o Iehova.+ Teie au e tairi nei i te pape i roto i te anavai Nile i te raau i roto i to ˈu rima, a taui atu ai te pape ei toto.
18 E pohe te iˈa i roto i te anavai Nile, e e hauˈa neoneo te pape o Nile, a ore atu ai to Aiphiti e nehenehe e inu i te pape o Nile.”’”
19 Na ô maira ïa Iehova ia Mose: “A parau ia Aarona: ‘A rave i to raau e a toro i to rima na nia i te mau pape o Aiphiti,+ na nia i to reira mau anavai, na nia i to reira mau taheraa pape rahi,* na nia i to reira mau pape hopuna,+ e na nia i to reira mau farii atoa, a taui atu ai te pape ei toto.’ Ei toto anaˈe na te fenua taatoa o Aiphiti, tae noa ˈtu i roto i te mau farii raau e te mau farii ofai.”
20 I reira iho, rave aˈera Mose raua Aarona mai ta Iehova i faaue. Toro aˈera Aarona i te raau e tairi ihora i te pape i roto i te anavai Nile i mua i te mata o Pharao e o ta ˈna mau tavini, e taui ihora pauroa te pape i roto i te anavai ei toto.+
21 Pohe aˈera te iˈa i roto i te anavai,+ e haamata ihora te anavai i te hauˈa neoneo, e aita ˈtura to Aiphiti i nehenehe e inu i te pape o Nile,+ e e toto anaˈe na te fenua taatoa o Aiphiti.
22 Tera râ, na reira atoa aˈera te mau tahuˈa manamana o Aiphiti ma ta ratou mau peu huna,+ a etaeta noa ˈtu ai to Pharao aau, e aita ˈtura oia i faaroo ia raua, mai ta Iehova iho â i parau.+
23 Hoˈi atura Pharao i to ˈna aorai, e aita atoa to ˈna aau i tâuˈa i te reira.
24 Ô ihora ïa to Aiphiti taatoa i te apoo ati aˈe i te anavai Nile ia noaa mai te pape e inu, no te mea eita ta ratou e nehenehe e inu i te pape o Nile.
25 E mairi ihora e hitu mahana mai to Iehova tairiraa i te anavai Nile.
Nota i raro i te api
^ Heb: “ei Atua.”
^ Heb: “ta ˈu mau nuu.”
^ Oia hoi te taheraa pape rahi no roto mai i te anavai Nile.
