Isaia 3:1-26
3 Inaha hoi, te faaore nei te Fatu mau ra o Iehova o te mau nuu*Mai Ierusalema e mai Iuda mai i te tauturu e te maa ua rau te huru,Pauroa te faraoa e te pape,+
2 Te taata puai e te aito,Te haava e te peropheta,+ te taata peu hiˈohiˈo e te matahiapo,
3 Te raatira 50,+ te taata faaturahia e te taata aˈo,Te taata peu manamana aravihi e te taata faarata ophi aravihi.+
4 E faariro vau i te mau tamaroa ei huiarii no ratou,E na te taata manaˈo feaa* e faatere ia ratou.
5 E haavî te taata te tahi i te tahi,Te taata tataitahi i to ˈna taata tupu.+
E aro te tamaroa i te taata paari,E e aa te taata vahavahahia i te taata faaturahia.+
6 E haru te taata tataitahi i to ˈna taeae i roto i te fare o to ˈna metua tane e e na ô atu:
“E ahu tapoˈi to oe, a riro ei raatira no matou.
Na oe e haapao i teie vahi tei tuinohia.”
7 E patoi râ oia i tera mahana, a na ô ai:
“E ere na ˈu e rapaau i to outou pepe,Aita ta ˈu e maa e aita to ˈu e ahu i to ˈu fare.
Eiaha e faariro ia ˈu ei raatira o te nunaa.”
8 Ua hahi ê hoi Ierusalema,E ua topa Iuda,No te mea te patoi nei ratou ia Iehova i te parau e te ohipa.E haerea orure hau to ratou i mua i to ˈna mata* hanahana.+
9 Na to ratou hohoˈa mata e faahapa ia ratou,E e faahiti ratou i ta ratou hara mai ia Sodoma.+Eita ratou e tamata i te huna i te reira.
Ua ati ratou,* te faatae mai nei hoi ratou i te ati i nia ia ratou iho!
10 A parau i te feia parau-tia e maitai ratou.E haamaitaihia ratou no ta ratou e rave.*+
11 Ua ati te taata ino!
E roohia oia i te ati,Ta to ˈna hoi rima i rave, e ravehia i nia ia ˈna!
12 Area to ˈu nunaa, mea haavî roa to ratou mau tiaau ohipa ia ratou,E na te mau vahine e faatere ia ratou.
To ˈu nunaa, te faaovere ra to outou mau aratai ia outou,E te faahahi ê ra ratou i te aveia o to outou mau eˈa.+
13 Te faaineine nei Iehova i te faahapa.Te tia nei oia i nia no te faautua i te mau nunaa.
14 E faautua Iehova i te mau matahiapo e huiarii o to ˈna nunaa.
“Ua tanina outou i te faaapu vine,E tei roto i to outou mau fare te mau taoˈa ta outou i eiâ i te taata veve.+
15 Eaha outou i manaˈo ai e taataahi i to ˈu nunaaE e haavî i te feia veve?,”*+ te parau ra te Arii hau ê e Fatu ra o Iehova o te mau nuu.
16 Te parau ra Iehova: “No te mea mea teoteo te mau tamahine o Ziona,A haere ai ma te faateitei i te upoo,*A hiˈo ai ma te faahinaaro, a haere ai ma te haapeu,A faaatete ai i to ratou mau taamu poro avae,
17 E tairi atoa Iehova i te upoo o te mau tamahine o Ziona i te tutuˈa,E e haapahure Iehova i to ratou rae.+
18 I tera mahana, e faaore Iehova i te nehenehe o to ratou mau tapea poro avae,Te mau taamu upoo e faaunauna hohoˈa avaˈe apî,+
19 Te tapea tariˈa, te fifi rima e te puroˈu,
20 Te faanehenehe upoo, te fifi poro avae e te hatua ouma,Te vairaa monoˈi noˈanoˈa e te taoˈa haamanuïa,
21 Te tapea rima e te tapea ihu,
22 Te ahu roa no te oroa, te tiputa aano, te ahu tapoˈi e te pute moni,
23 Te hiˈo mea tapea+ e te ahu lino,*Te taamu upoo e te puroˈu.
24 E ere te monoˈi zuri,+ ei hauˈa ino râ.E ere te hatua, ei taura râ.E ere te faanahoraa rouru nehenehe, ei upoo pahure râ.+E ere te ahu unauna, ei ahu oto râ.+E e tapao auri vea, e ere te nehenehe.
25 E pohe to oe mau taata i te ˈoˈe,E to oe feia puai i te tamaˈi.+
26 E oto e e hepohepo te mau tomoraa o Ziona,+E e parahi oia i raro ma te oto.”+
Nota i raro i te api
^ Aore ra “sabaota.”
^ Aore ra “mea peu roa.”
^ Heb: “te mata o to ˈna.”
^ Heb: “E amu ratou i te hotu o ta ratou mau ohipa.”
^ Heb: “e oro i te hohoˈa mata o te feia veve i roto i te repo.”
^ Heb: “aˈî (arapoa).”
^ Aore ra “ahu na roto.”
