Isaia 36:1-22
36 I te 14 o te matahiti faatereraa a te arii Hezekia, haere maira Senakeriba te arii o Asura+ e aro i te mau oire atoa o Iuda tei auahia i te patu e haru ihora i te reira.+
2 Tono ihora te arii o Asura i te Rabasake*+ e te hoê nuu rahi mai Lakisa+ mai i te arii Hezekia i Ierusalema. Haere aˈera ratou e tia aˈera i pihai iho i te faahororaa pape o te pape hopu i nia,+ i pihai iho i te purumu rahi o te vahi raveraa ohipa a te taata puˈa ahu.+
3 Haere maira Eliakima,+ te tamaiti a Hilikia, o te tiaau ra i te aorai,* Sebena+ te papai parau, e Ioa te tamaiti a Asapha te haaputu parau i rapaeau i te Rabasake ra.
4 Na ô atura ïa te Rabasake ia ratou: “A parau na ia Hezekia: ‘Teie ta te arii rahi, te arii o Asura, e parau ra: “O vai ta oe e tiaturi ra?+
5 Te manaˈo ra oe: ‘E ravea ta ˈu e e mana to ˈu no te aro i te tamaˈi.’ E parau faufaa ore râ tena. Ua tuu oe i to oe tiaturiraa ia vai, e tamata ˈi oe i te orure hau ia ˈu?+
6 Inaha, te tiaturi ra oe i te turu a tera aeho fati, o Aiphiti. Ia turui te hoê taata i nia i tera aeho, e puta pipiha roa to ˈna apu rima i te reira. Tera te huru o Pharao te arii o Aiphiti i nia i te feia atoa o te tiaturi ra ia ˈna.+
7 E ia parau mai outou ia ˈu: ‘Te tiaturi nei matou ia Iehova to matou Atua,’ e ere anei na ˈna te mau vahi teitei e te mau fata ta Hezekia i faaore+ a parau ai oia ia Iuda e Ierusalema: ‘E tipapa outou i mua i teie fata’?”’+
8 I teie nei ïa, a faaau na i te parau e to ˈu fatu te arii o Asura:+ E horoa ˈtu vau na oe 2 000 puaahorofenua mai te peu e itea mai ia oe te feia faahoro puaahorofenua e navai.
9 E nafea ïa oe e nehenehe ai e fariu ê i te hoê tavana o ˈna te tavini haihai roa ˈˈe a to ˈu fatu, a tuu ai oe i to oe tiaturiraa ia Aiphiti no te pereoo e te feia faahoro puaahorofenua?
10 I teie nei, ua haere mai anei au i teie fenua no te haamou ia ˈna aita e parau faatia no ǒ mai ia Iehova ra? Na Iehova iho i parau ia ˈu: ‘A haere e aro i tera fenua e a haamou atu.’”
11 Na ô maira ïa Eliakima, Sebena+ e Ioa i te Rabasake:+ “A paraparau mai na na roto i te reo Arama,*+ mea taa ia matou tera reo. Eiaha e paraparau ia matou na roto i te reo o te ati Iuda, te faaroo mai ra hoi te feia i nia i te patu.”+
12 Na ô atura râ te Rabasake: “No to outou fatu e no outou noa anei i tono ai to ˈu fatu ia ˈu no te faaite i teie mau parau? E ere atoa anei no te feia e parahi ra i nia i te patu, o te amu i to ratou iho tutae e o te inu i to ratou iho omaha e o outou?”
13 Tia noa ihora te Rabasake e tuô haapuai atura na roto i te reo o te ati Iuda:+ “A faaroo i te parau a te arii rahi, te arii o Asura.+
14 Teie ta te arii e parau ra: ‘Eiaha Hezekia ia haavare ia outou, eita hoi e haere ia ˈna ia faaora ia outou.+
15 E eiaha Hezekia ia turai ia outou ia tiaturi ia Iehova+ a parau ai: “E faaora mau â Iehova ia tatou, e eita teie oire e tuuhia i te rima o te arii o Asura.”
16 Eiaha e faaroo ia Hezekia, teie hoi ta te arii o Asura e parau ra: “A faatupu i te hau e o vau e a auraro ia ˈu,* e e amu outou tataitahi i te hotu o ta outou vine e ta outou tumu suke e e inu outou i te pape o ta outou apoo pape,
17 e ia tae roa mai au e ia hopoi ia outou i te tahi fenua mai to outou fenua,+ te tahi fenua o te huero maa e te uaina apî, te tahi fenua o te faraoa e te faaapu vine.
18 Eiaha Hezekia ia haavare ia outou a parau ai: ‘E faaora Iehova ia tatou.’ Ua faaora aˈena anei hoê o te mau atua o te mau nunaa i to ratou fenua i te rima o te arii o Asura?+
19 Teihea te mau atua o Hamata e o Arapada?+ Teihea te mau atua o Sepharavaima?+ E ua faaora anei ratou ia Samaria i to ˈu nei rima?+
20 O vai i rotopu i te mau atua atoa o teie mau fenua i faaora i to ratou fenua i to ˈu nei rima? E nafea ïa Iehova ia faaora ia Ierusalema i to ˈu nei rima?”’”+
21 Mamû noa aˈera râ ratou e aita i pahono ia ˈna no te faaueraa a te arii Hezekia: “Eiaha outou e pahono ia ˈna.”+
22 Haere maira râ Eliakima te tamaiti a Hilikia, o te tiaau ra i te aorai, Sebena+ te papai parau e Ioa te tamaiti a Asapha te haaputu parau ia Hezekia ra ma te ahu hahae e faaite maira ia ˈna i te mau parau a te Rabasake.
Nota i raro i te api
^ Aore ra “te raatira hopoi auˈa uaina.”
^ Heb: “fare.”
^ Aore ra “Suria.”
^ Heb: “A rave i te hoê haamaitairaa e o vau e a haere mai i rapae ia ˈu ra.”
