Te piti o te rata i to Tesalonia 3:1-18
3 Taeae ma, e teie nei, a tamau i te pure no matou+ ia atutu noa te parau a Iehova*+ e ia faahanahana-noa-hia, mai te ravehia ra i ǒ outou,
2 e ia paruruhia matou i te feia totoa e te ino,+ aita hoi te faaroo i noaa i te taata atoa.+
3 Tera râ, e tapea te Fatu i ta ˈna parau, e e faaitoito oia ia outou e e paruru atu i te varua ino.
4 E te tiaturi nei matou ia outou i te Fatu e te haapao nei outou e e haapao noa â outou i ta matou mau faaueraa.
5 Ia aratai noa te Fatu i to outou aau a here atu ai outou i te Atua+ e a faaoromai tamau atu ai+ ma te pee i te Mesia.
6 Taeae ma, te faaue nei matou ia outou i te iˈoa o to tatou Fatu ra o Iesu Mesia, ia atea ê mai outou i te mau taeae atoa e haerea tano ore to ratou,+ o te ore hoi e tu ra i te mau parau* ta matou i tuu atu ia outou.*+
7 Ua ite hoi outou e nafea ia pee i to matou haerea e tia ˈi,+ no te mea e ere to matou i te haerea tano ore a parahi ai i rotopu ia outou,
8 e aita atoa matou i amu noa i ta vetahi ê ra maa.*+ Tera râ, ma te rohi e te tautoo, ua rave noa matou i te ohipa i te po e te ao, eiaha matou ia faateimaha i te hoê o outou i te moni rahi.+
9 E ere hoi aita to matou e tiaraa e na reira,+ ua faaite râ matou i te hiˈoraa maitai na outou ia pee mai.+
10 A parahi ai hoi matou i ǒ outou, teie hoi ta matou i faaue na: “Ia ore te tahi ia hinaaro e rave i te ohipa, eiaha atoa ïa e tamaa.”+
11 Ua faaroo hoi matou e e haerea tano ore to vetahi i rotopu ia outou,+ aita roa e rave ra i te ohipa, e faaô noa râ ia ratou i roto i ta vera ma ohipa.+
12 O tera mau taata ta matou e faaue nei e e aˈo atu nei na roto i te Fatu ra o Iesu Mesia, ia ora hau ma te rave i ta ratou iho ohipa e ia amu i te maa i noaa ia ratou.+
13 Outou râ, taeae ma, eiaha e fiu i te rave i te mea maitai.
14 Ia ore râ te tahi ia faaroo i ta matou parau i roto i teie rata, a tapao ia ˈna e eiaha faahou e amuimui atu,+ ia haama oia.
15 Eiaha râ e hiˈo ia ˈna mai te enemi ra, e tamau noa râ i te aˈo ia ˈna+ mai te taeae ra te huru.
16 E teie nei, na roto i te mau ravea atoa, ia horoa-noa-hia ˈtu te hau no outou e te Fatu iho o te hau.+ Ei ia outou paatoa te Fatu.
17 Te faatae atu nei au, o Paulo, i to ˈu aroha ta ˈu i papai i to ˈu iho rima,+ o ta ˈu ïa tapao i roto i ta ˈu mau rata atoa.
18 Ei ia outou paatoa te hamani maitai rahi o to tatou Fatu ra o Iesu Mesia.
Nota i raro i te api
^ Hiˈo i te tuhaa hau A5.
^ Aore ra “faaueraa.”
^ Huri-atoa-hia “ratou.”
^ Aore ra “i amu i ta vetahi ê ra maa ma te ore e aufau.”
