Zekaria 14:1-21
14 “Inaha, te fatata mai ra te mahana, na Iehova taua mahana ra, e operehia i rotopu ia oe te mau taoˈa i haruhia i ǒ oe.*
2 E haaputuputu vau i te mau nunaa atoa no te aro ia Ierusalema. E haruhia te oire, e eiâhia i roto i te mau fare e e maferahia te mau vahine. E hopoi-tîtî-hia te afaraa o te oire, eita râ te toea o te nunaa e iriti-ê-hia i te oire.
3 “E haere Iehova e aro i tera mau nunaa+ mai ia ˈna e aro i te mahana tamaˈi.+
4 I tera mahana, e tia to ˈna avae i nia i te mouˈa Oliveta+ i mua ia Ierusalema i te pae hitia o te râ. E vahihia te mouˈa Oliveta na ropu mai hitia o te râ* e tae atu i tooa o te râ* e i reira te hoê peho rahi roa e tia ˈi. E haere te hoê afaraa o te mouˈa i te pae apatoerau e te tahi atu afaraa i te pae apatoa.
5 E horo outou i te peho i ropu i to ˈu na mouˈa, e haere roa hoi te peho i ropu i taua na mouˈa ra i Azela. E titauhia ia horo outou, mai ia outou i horo na no te aueueraa fenua i te mau mahana o Uzia te arii o Iuda.+ E haere mai to ˈu Atua o Iehova, e ei pihai iho ia ˈna pauroa tei moˈa.+
6 “I tera mahana, aita e maramarama anaana e itehia,+ e mau* te mau mea atoa.
7 E riro tera mahana ei mahana na Iehova.+ Aita e ao e aita e po i tera mahana. E itehia te maramarama i te ahiahi.
8 I tera mahana, e tahe te pape ora+ na Ierusalema ˈtu,+ e tahe hoê afaraa i te miti i te pae hitia o te râ,*+ e te tahi atu afaraa i te miti i te pae tooa o te râ.*+ E tupu te reira i te tau veavea e te tau toˈetoˈe.
9 E e riro Iehova ei Arii i nia i te fenua taatoa.+ I tera mahana, ei hoê Iehova+ e ei hoê to ˈna iˈoa.+
10 “E riro teie fenua taatoa mai te Araba,+ mai Geba+ e tae atu i Rimona+ i te pae apatoa o Ierusalema. E tia mai Ierusalema i to ˈna iho â vahi+ e e parahihia oia e te taata, mai te Uputa o Beniamina+ e tae atu i te vahi o te Uputa matamua, tae atu i te Uputa i te poro, e mai te Pare o Hananela+ e tae atu i te vahi taataahiraa vine* a te arii.
11 E parahi te taata i Ierusalema, e eita oia e faautua-faahou-hia i te haamouraa.+ E parahi te taata i Ierusalema ma te hau.+
12 “Teie te ati e tairi ai Iehova i te mau nunaa atoa o te aro ia Ierusalema:+ E pê to ratou iˈo a tia noa ˈi ratou, e pê to ratou mata i roto i to ratou apu e e pê to ratou arero i roto i to ratou vaha.
13 “I tera mahana, e faatupu Iehova i te hoê arepurepuraa rahi i rotopu ia ratou. E haru te taata tataitahi i te rima o to ˈna hoa e e aro raua.+
14 E apiti atoa Iuda i roto i te tamaˈi i Ierusalema. E haaputuhia te faufaa a te mau nunaa atoa ati aˈe: te auro, te ario e te ahu e rave rahi roa.+
15 “E tae atoa mai te hoê ati mai teie i nia i te mau puaahorofenua, pheradi, kamela, asini e te mau nǎnǎ animara atoa i roto i te mau puhapa enemi.
16 “I te mau matahiti atoa, e pauma te toea o te mau nunaa atoa o tei haere mai e aro ia Ierusalema+ no te tipapa i mua* i te Arii ra o Iehova o te mau nuu,*+ e no te faatupu i te Oroa patiaraa tiahapa.*+
17 Ia ore râ hoê no roto i te mau nunaa o te fenua nei e pauma i Ierusalema no te tipapa i mua i te Arii ra o Iehova o te mau nuu, eita te ûa e topa i nia ia ˈna.+
18 E ia ore te nunaa o Aiphiti e pauma e e tomo i roto i te oire, eita te ûa e topa i ǒ ratou. E roohia râ ratou i te ati e tairi ai Iehova i te mau nunaa o te ore e haere mai e faatupu i te Oroa patiaraa tiahapa.
19 Tera te utua no te hara a Aiphiti e te hara a te mau nunaa atoa o te ore e haere mai e faatupu i te Oroa patiaraa tiahapa.
20 “I tera mahana, e papaihia te parau ‘Na Iehova te moˈaraa!’+ i nia i te mau ôe a te mau puaahorofenua. E riro te mau pani*+ i roto i te hiero o Iehova mai te mau auˈa+ i mua i te fata.
21 E moˈa te mau pani* atoa i Ierusalema e i Iuda, e e riro te reira na Iehova o te mau nuu. E haere mai te taata atoa o te pûpû i te tusia e e faaohipa ratou i te reira no te tunu i ta ratou tusia. I tera mahana, eita e ite-faahou-hia te ati Kanaana* i roto i te hiero o Iehova o te mau nuu.”+
Nota i raro i te api
^ Oia hoi te oire faahitihia i te irava 2.
^ Aore ra “te hitiraa mahana.”
^ Heb: “te miti.”
^ Aore ra “paari,” mai te mea ra ua paari i te toˈetoˈe.
^ Oia hoi Mediteranea.
^ Oia hoi te miti Pohe.
^ Aore ra “te mau tura.”
^ Aore ra “haamori.”
^ Aore ra “tamaru no tau mahana noa.”
^ Aore ra “sabaota.”
^ Aore ra “pani auvaha rahi.”
^ Aore ra “pani auvaha rahi.”
^ Huri-atoa-hia “taata tapihoo.”