• MATAHITI FANAURAA: 1963

• FENUA: BERETANE

• AAMU: OHIPA MAITAI TA ˈU

NA MUA ˈˈE:

Ua fanauhia vau i Croydon, Lonedona apatoa, e iva tamarii matou e o vau te ono. No ǒ mai to ˈu na metua no te motu no Saint Vincent no Caraïbe. Ua apiti to ˈu mama i te haapaoraa Méthodiste. Aita vau e anaanatae i te haapii no nia i te Atua, noa ˈtu e hinaaro puai to ˈu no te haapii. I te mau taime faafaaearaa haapiiraa, e pinepine au i te haere i te roto no te taio e rave rahi buka ta ˈu i rave mai i roto i te fare haapueraa buka.

Tau matahiti i muri aˈe i to ˈu faaearaa i te haapiiraa, ua hinaaro vau e tauturu i te mau taata e fifi to ratou. Ua haamata vau i te ohipa e te feia aita e nohoraa to ratou, te huma e te mau taata e fifi to ratou no te haapii. I muri iho, ua haere au i te haapiiraa teitei no te haapii i te ihi rapaauraa. I muri aˈe i te faatuiteraa, ua noaa mai ia ˈu te mau tiaraa teitei e te mau ohipa faahiahia e ua taui te reira i to ˈu huru oraraa. E taata aˈo vau no nia i te faatereraa i te hoê taiete e e taata maimi vau no nia i te oraraa o te taata. Ta ˈu noa i hinaaro no te rave i ta ˈu ohipa, te hoê matini roro uira afaifai e te internet. E revareva pinepine au e piti hebedoma na te ara e e faaea vau i te hoê hotera ta ˈu e au roa, e mataitai i te nehenehe o te natura, haere i te Spa e i te faaetaetaraa tino. Ua manaˈo vau e oraraa oaoa to ˈu. Tera râ, aita i moˈehia ia ˈu te feia e hepohepo ra.

UA TAUI TE BIBILIA I TO ˈU ORARAA:

Ehia matahiti to ˈu uiuiraa, ‘No te aha tatou i hamanihia ˈi e eaha te auraa o te oraraa? Tera râ, aita roa vau i tamata i te imi i te pahonoraa i roto i te Bibilia. I te hoê mahana i 1999, ua haere mai to ˈu tuahine apî aˈe ia ˈu o Margaret, tei riro mai ei Ite no Iehova e farerei ia ˈu e to ˈna hoa e Ite atoa, tei faaite i te anaanatae ia ˈu. Ua farii au i te hoê haapiiraa Bibilia e te hoa o to ˈu tuahine, tera râ, aita ta ˈu haapiiraa Bibilia i haere i mua, no te mea ua rahi aˈe to ˈu taime no ta ˈu ohipa e to ˈu huru oraraa.

I te tau veavea no 2002, ua haere au e ora i Beretane i te pae apatoa tooa o te râ. I ǒ, ua haamata e ua haere faahou vau i te haapiiraa teitei ia noaa mai te parau tuite teitei roa ˈˈe no nia i te ihi rapaauraa. Ua haamata vau i te haere pinepine i te Piha a te Basileia e ta ˈu tamaiti. Noa ˈtu mea au roa na ˈu te haapiiraa teitei, ua horoa mai ta ˈu haapiiraa Bibilia i te maramarama rahi no nia i te fifi o te oraraa e te mau ravea. Ua taa ia ˈu i te parau mau o te Mataio 6:24, o te parau ra, eita oe e nehenehe e tavini e piti fatu, o te Atua anei aore ra te moni. Titauhia ia ˈu ia faaoti eaha te mea faufaa roa ˈˈe i roto i to ˈu oraraa.

I te matahiti i mairi aˈenei, ua apiti pinepine au e te hoê pǔpǔ Ite no Iehova o tei haapii i te buka Y a-t-il un Créateur qui se soucie de vous? a Ua papu ia ˈu, tei to tatou Poiete anaˈe Iehova te ravea no te mau fifi o te huitaata. Teie nei, ua haapiihia mai ia ˈu i te haapiiraa teitei, aita te auraa o te ora e tuea ra i te tiaturiraa i te hoê Poiete. Ua riri roa vau. Piti avaˈe i muri iho, ua faarue au i te haapiiraa teitei e ua faaoti au e rave hau atu â i te pae varua.

Te irava Bibilia tei turai ia ˈu ia rave i te mau tauiraa i roto i to ˈu nei oraraa o te Maseli 3:5, 6: “A tiaturi ia Iehova ma to aau atoa, e eiaha e turui i nia i to oe iho maramarama. A haapao i to ˈna manaˈo i roto i ta oe mau ohipa atoa e rave, e na ˈna e faatitiaifaro i to oe mau eˈa.” Ua horoa rahi mai te haapiiraa no nia i to tatou Atua here, i te mau taoˈa materia e te tiaraa ta te hoê parau tuite teitei roa ˈˈe e horoa mai. Hau atu â vau i te haapii no nia i te opuaraa a Iehova no te fenua e te tiaraa ta Iesu i rave ma te horoa i to ˈna ora no tatou, hau atu â vau i te hinaaro e pûpû i to ˈu ora no to tatou Poiete. Ua bapetizohia vau i Eperera 2003. E i muri iho, ua faaohie riirii au i to ˈu oraraa.

TO ˈU FAUFAARAAHIA:

Aita e taotiaraa to to ˈu auhoaraa e o Iehova. Ua noaa ia ˈu te hau o te feruriraa e te oaoa mau i te iteraa no nia ia ˈna. Ua ite atoa vau i te oaoa i te apitiraa e te tahi atu mau tavini mau a te Atua.

Ua mâha maitai to ˈu hinaaro rahi i te ite maoti ta ˈu i haapii i roto i te Bibilia e i te mau putuputuraa Kerisetiano. Ua oaoa vau i te faaite i to ˈu faaroo ia vetahi. Ua riro te reira ei tuhaa faufaa no ˈu, i te tautururaa i te taata, ia ite i te hoê oraraa maitai i teie nei â e ia faatupu i te tiaturiraa e ora i roto i te ao apî. Mai Tiunu 2008, ua rave au i te taviniraa taime taatoa e ua oaoa roa vau. No ˈu, ua ite au te auraa mau o te oraraa e e mauruuru rahi to ˈu ia Iehova.

• MATAHITI FANAURAA: 1963

• FENUA: AUTETERIA

• AAMU: TAATA HAUTI PERE MONI

NA MUA ˈˈE:

Ua paari au i roto i te hoê oire iti no Braunau, i Auteteria. I roto hoê tuhaa oire mea maitai te oraraa e mea varavara te ohipa ino. E Katolika to ˈu utuafare e ua paari au i roto i tera haapaoraa.

I to ˈu apîraa, ua ohipa puai te hoê tupuraa i nia ia ˈu. Te haamanaˈo ra vau i 1984, i te 11raa o to ˈu matahiti, ua hauti au i te tueraa popo e te tahi o to ˈu mau hoa piri. I tera noa â avatea, ua pohe oia i roto i te hoê ati purumu. Ua huru ê roa vau i te poheraa to ˈu hoa. E rave rahi matahiti i muri aˈe i tera ati purumu, ua uiui au, eaha te tupu ia pohe tatou.

I to ˈu faaearaa i te haapiiraa, ua ohipa vau ei taata tamaumau i te uira. Noa ˈtu ua riro mai au ei taata hauti pere moni e hauti au no te hoê tino moni rahi, aita to ˈu e fifi i te pae moni. Ua horoa rahi atoa vau i te taime no te tuaro e ua haamata vau i te au i te Heavy Metal e te Punk Rock. Tera ïa to ˈu oraraa, haere i roto i te mau fare oriraa e te mau fare arearearaa. Ua imi au i te mau mea navenave, e oraraa tia ore to ˈu, tera râ, aita e auraa to ˈu oraraa.

UA TAUI TE BIBILIA I TO ˈU ORARAA:

I 1995, ua patoto mai te hoê Ite no Iehova mea paari i to ˈu opani e ua horoa mai oia i te hoê buka e itehia te pahonoraa o te Bibilia no nia i te uiraa, Eaha te tupu ia pohe tatou? No te mea te huru ê noa ra vau i te ati pohe o to ˈu hoa, no reira vau i rave ai i teie buka. Aita noa vau i taio i te pene no nia i te pohe, te taatoaraa râ o te buka!

Ua pahono mai teie buka i ta ˈu mau uiraa no nia i te pohe. Tera râ, ua haapii atu â vau i te tahi mau mea. No te mea, ua paari au i roto i te haapaoraa Katolika, ua tiatonu vau na mua roa to ˈu faaroo ia Iesu. Tera râ, ua tauturu mai ta ˈu haapiiraa Bibilia ia faatupu i te hoê auhoaraa piri e to Iesu Metua, te Atua ra o Iehova. Ua faahiahia roa vau i te haapiiraa e te haapeapea mai ra Iehova no tatou e te faaitoito ra o ˈna ia tatou ia haapii no nia ia ˈna. (Mataio 7:7-11) Ua haapii au e huru aau to Iehova. Ua haapii atoa vau te tapea noa ra o ˈna i ta ˈna parau. Ua aratai te reira ia ˈu ia anaanatae atu â i te mau parau tohu Bibilia e ia rave te maimiraa nafea te reira i te tupuraa. Ua haapuai ta ˈu i haapii i to ˈu faaroo i te Atua.

Ua taa oioi ia ˈu o te mau Ite no Iehova anaˈe ta ˈu i ite tei hinaaro mau e tauturu i te taata ia taa i te Bibilia. Ua tapao vau te mau irava faahitihia i roto i ta ratou mau papai e a hiˈo atu ai i roto i ta ˈu Bibilia Katolika. Hau atu â vau i te rave i te mau maimiraa, rahi atu â vau i te taa ua itehia mai ia ˈu te parau mau.

Ua faataa mai ta ˈu haapiiraa Bibilia e te hinaaro ra Iehova ia ora vau ia au i ta ˈna mau ture aveia. To ˈu taioraa i te Ephesia 4:22-24, mea titauhia ia ˈu ia haapae i to ˈu “huru taata tahito” i ta to ˈu “haerea na mua ˈˈe” i faatupu e ia “ahu mai i te huru taata apî tei poietehia ia au i te hinaaro o te Atua.” No reira, ua faarue au i to ˈu huru oraraa tia ore. Ua faarue atoa vau i te hauti pere moni, o tei turai ra i roto i te ohipa materia e te nounou. Ua taa ia ˈu e ia rave au i teie mau tauiraa, titauhia ia ˈu ia faaea i te apiti e to ˈu mau hoa tahito e ia faahoa i te feia hoê â ta ratou ture aveia e ta ˈu.

E ere i te mea ohie ia rave i teie mau tauiraa. Tera râ, ua haamata vau e apiti i te mau putuputuraa a te mau Ite no Iehova i te Piha a te Basileia e i te faahoa i te mau mero o te amuiraa. Ua tamau atoa vau i te rave maite i ta ˈu iho haapiiraa. Ua aratai teie mau taahiraa ia ˈu ia taui i te huru o te mau pehe ta ˈu i faaroo, ta ˈu mau fa e to ˈu huru rapaeau. I 1995, ua bapetizohia vau ei Ite no Iehova.

TO ˈU FAUFAARAAHIA:

I teie nei, e manaˈo tano to ˈu i nia i te moni e te mau taoˈa materia. Ua matau vau i te iria, teie nei râ, e haavî au ia ˈu. Aita atoa vau e haapeapea faahou no te a muri aˈe.

E oaoa rahi to ˈu i te ôraa i roto i te hoê pǔpǔ nunaa rau o te tavini ra ia Iehova. Ua ite au, te vai ra rotopu ia ratou te faaruru nei i te fifi, tera râ, te tavini noa ra ratou i te Atua ma te taiva ore. Te oaoa rahi nei au i te horoa i to ˈu taime e puai atoa, eiaha ra no te haamâha i to ˈu iho hinaaro, no te tavini râ ia Iehova e no te rave i te mea maitai no vetahi.

• MATAHITI FANAURAA: 1963

• FENUA: BERETANE

• AAMU: INOINO I TE ORARAA

NA MUA ˈˈE:

Ua fanauhia vau i Beretane. I te hituraa o to ˈu matahiti, ua haere to ˈu utuafare i Auteralia. Ua ora matou i Côte D’or, i te hoê vahi mea au roa na te mau ratere i Queensland, Auteralia. Noa ˈtu aita i rahi ta matou moni, aita râ matou i ere i te tahi noa ˈˈe mea.

Noa ˈtu mea maitai te haapiiraa tei horoahia mai e to ˈu metua, aita roa ˈtu vau e oaoa ra. Ua haamata vau i te inoino i te oraraa. E taata inu ava roa to ˈu papa. E ere roa vau i te mea here ia ˈna, no te rahiraa o te taime, no ta ˈna ohipa inu e ta ˈna huru raveraa i nia i to ˈu mama. I muri roa ˈˈe to ˈu iteraa ta ˈna i ora ei faehau i Malaisie, i taa ˈi ia ˈu i te tumu o to ˈna huru.

Ua haamata vau i te inu i te ava a haere noa ˈi au i te haapiiraa tuarua. I te 16raa o to ˈu matahiti, ua faarue au i te haapiiraa e ua haere au i roto i te nuu moana. Ua haamata vau i te tamata i te raau taero e ua riro te reira ei peu matau na ˈu te puhipuhiraa i te avaava. Ua rahi roa ˈtu â ta ˈu ohipa inu, i te haamataraa, pauroa te hopea hebedoma e te faahopearaa, pauroa te mahana.

I te 20raa o to ˈu matahiti, ua haamata vau i te uiui ia ˈu e te vai mau ra anei te Atua. Ua manaˈo vau, ‘Mai te peu te vai mau ra te hoê Atua, no te aha ïa oia i vaiiho ai ia mauiui e ia pohe te taata?’ Ua papai atoa vau te mau pehepehe pariraa o te Atua te tumu o te ino ati aˈe te ao nei.

I te 23raa o to ˈu matahiti ua faarue au i te nuu moana. I muri iho, e rave rahi ta ˈu ohipa i rave e ua ora atoa vau na te ara hoê matahiti. Tera râ aita e ravea, te vai noa ra te ahoaho. Aita ta ˈu e fa e opuaraa. Aita roa vau e anaanatae i te imi i te hoê fare e te hoê ohipa maitai. Pauroa teie mau mea, mea faufaa ore no ˈu. Te mea noa o tei tamahanahana ia ˈu, te inuraa i te ava e te faarooraa i te mau pehe.

Te haamanaˈo ra vau i te taime a hinaaro ai au e ite i te auraa mau o te ora. Tei Poronia vau, te mataitai ra vau te aua haavîraa no Auschwitz. Ua taio vau no nia i te hamani-ino-raa tei ravehia i reira. Tera râ, to ˈu taeraa ˈtu i ǒ e to ˈu iteraa te rahi o te aua, ua horuhoru roa to ˈu aau. Aita vau i taa, no te aha te taata i ino ai i nia ia vetahi. Te haamanaˈo ra vau a haere noa ˈi na roto i te aua ma te taˈi, a ui ai ia ˈu iho, ‘No te aha?’

UA TAUI TE BIBILIA I TO ˈU ORARAA:

I 1993, i to ˈu hoˈiraa mai na te ara, ua haamata vau i te taio i te Bibilia no te imi i te mau pahonoraa. Te taime i muri iho, ua patoto mai e piti Ite no Iehova i to ˈu opani e ua titau manihini mai raua ia ˈu i te hoê tairururaa tei tupu i te tahi tahua tuaro i pihaiiho noa mai. Ua faaoti au e haere.

Tau avaˈe na mua ˈtu, tei roto vau i teie tuhaa tuaro no te mataitai i te hoê tuaro, tera râ, mea taa ê roa teie tairururaa. Mea ite te mau Ite no Iehova i te peu maitai, mea tura to ratou faaahuraa e e haerea maitai to ta ratou tamarii. Ua maere roa ˈtu vau i te taime tamaaraa. Hanere Ite no Iehova te tamaa ra i nia te aihere, tera râ, to ratou hoˈiraa i to ratou parahiraa, aita hoê aˈe pehu i nia te aihere! Te mea faufaa roa ˈtu â, e au ra mea oaoa e e itehia te hau i nia ia ratou, tera ta ˈu e imi noa ra. Aita vau i haamanaˈo i te mau oreroraa parau i faahitihia i tera mahana, tera râ, ua faahiahia roa vau i te haerea o te mau Ite no Iehova.

I tera râ po, ua manaˈo vau i to ˈu taeae fetii, o tei taio mai i te Bibilia e tei haapii i nia i te mau haapaoraa. Tau matahiti na mua ˈtu, ua faataa mai oia, ia au i ta Iesu i parau, e nehenehe oe e ite i te haapaoraa mau i ta ratou mau hotu. (Mataio 7:15-20) Titauhia ia ˈu ia imi no te aha mea taa ê te mau Ite no Iehova. No te taime matamua i roto i to ˈu oraraa, ua maitai rii mai to ˈu huru aau.

I te hebedoma i muri iho, ua hoˈi mai na Ite no Iehova e piti o tei titau manihini ia ˈu i te tairururaa. Ua ani mai raua ia haapii i te Bibilia, ta ˈu ïa i farii. Ua haamata atoa vau i te apiti i te mau putuputuraa na muri ia raua.

I to ˈu haapiiraa i te Bibilia, ua taui roa ta ˈu hiˈoraa i nia i te Atua. Ua haapii au e ere o ˈna te tumu o te ino e te mauiui e e oto o ˈna ia rave te taata i te ino. (Genese 6:6; Salamo 78:40, 41) Ua faaoti au, eiaha roa ˈtu vau e faaoto ia Iehova. Ua hinaaro vau e faaoaoa i to ˈna aau. (Maseli 27:11) Ua faaea vau i te inu rahi i te ava, puhipuhi i te avaava e i te rave i te peu tia ore. I Mati 1994, ua bapetizohia vau ei Ite no Iehova.

TO ˈU FAUFAARAAHIA:

Ua oaoa roa vau. Aita vau e inu faahou no te tamata i te faaafaro i to ˈu mau fifi. Ua haapii ra vau i te huri i ta ˈu hopoia i nia ia Iehova.—Salamo 55:22.

Ahuru matahiti i teie nei to ˈu faaipoiporaa e te hoê Ite no Iehova nehenehe mau, o Karen te iˈoa e e tamahine atoa ta Karen, o Nella te iˈoa. Mea au roa na matou e toru e tavini i roto i te pororaa. E tauturu matou ia vetahi ia haapii i te parau mau no nia i te Atua. Teie nei, e auraa mau to to ˈu oraraa.