E. E mirioni vahine Ite no Iehova na te ao nei o te haapii atu i te Bibilia. E horoa rahi ratou i to ratou taime no te poro i te parau apî oaoa o te Faatereraa arii a te Atua. Teie ta te Salamo 68:11 i tohu no nia ia ratou: “Ua tuu mai te Fatu i te parau, e e pǔpǔ rahi te feia i faaite ra.”

Eita ratou e haapii i te Bibilia mai ta te mau vahine aratai haapaoraa e rave ra. Mea rahi te taa-ê-raa e itehia. E hiˈo mai ïa tatou eaha tera mau taa-ê-raa.

Mea taa ê te feia ta teie mau vahine e haapii atu. E haapii te mau vahine e tiaraa to ratou i roto i te haapaoraa i te feia iho o ta ratou amuiraa. Area te feia ta te mau vahine Ite no Iehova e haapii atu, o te feia ïa no rapae o ta ratou e poro ra i tera e tera fare.

Te tahi atu taa-ê-raa, o te ohipa taviniraa a te mau vahine Ite no Iehova i roto i ta ratou amuiraa. I roto i te tahi atu mau haapaoraa, e faatere e e haapii te mau vahine i to ratou iho mau taata. Area te mau vahine Ite no Iehova, eita ratou e haapii i roto i te amuiraa, mai te peu te vai ra te mau tane bapetizohia i reira. O te mau tane anaˈe tei faatoroahia te horoa i te haapiiraa.—Timoteo 1, 3:2; Iakobo 3:1.

Te faataa ra te Bibilia e o te mau tane anaˈe o te horoahia te hopoia e tiaau i te amuiraa. A tapao na i ta te aposetolo Paulo i papai ia Tito to ˈna hoa ohipa: “Ua vaiiho vau ia oe i Kereta . . . ia faatoroa oe i te tahi mau matahiapo i tera e tera oire.” Ua parau faahou o Paulo no te mau tane e faatoroahia, “eiaha ta te tiaau e hapa ia itehia, ei tane faaipoipo i te vahine hoê râ.” (Tito 1:5, 6) I roto i te hoê rata, ua horoa Paulo i te hoê â faaueraa ia Timoteo: “Ia titau te hoê tane i te hopoia tiaau, te hinaaro ra oia i te hoê ohipa maitai. Eiaha ta te tiaau e hapa ia itehia, ei tane faaipoipo i te vahine hoê râ, te haerea au noa, te manaˈo paari, te haerea afaro, . . . te ite i te haapii.”—Timoteo 1, 3:1, 2.

No te aha na te mau tane teie mau hopoia e tiaau i te amuiraa? Teie ta Paulo e faataa ra: “Eita vau e faatia i te hoê vahine ia haapii aore ra ia faatere i te hoê tane, ia vai mamû noa râ oia e tia ˈi. O Adamu hoi tei hamanihia na mua, i muri aˈe o Eva ïa.” (Timoteo 1, 2:12, 13) Ia hiˈohia i te poieteraa, ua poiete Iehova te tane na mua te vahine. Te faaite ra te reira e ua horoa Iehova i te hopoia ia ratou no te haapii e no te tiaau.

Te pee ra te mau Ite no Iehova i to ratou Aratai ra, o Iesu Mesia. Teie ta Luka i papai no nia i ta Iesu taviniraa: “Haere atura Iesu na te mau oire e oire rii e poro e e faaite haere i te parau apî oaoa o te Faatereraa arii a te Atua.” I muri iho ua ani Iesu i ta ˈna mau pǐpǐ ia na reira atoa: “Haere atura ratou na te mau oire rii atoa e faaite haere i te parau apî oaoa.”—Luka 8:1; 9:2-6.

I teie mahana, i ǒ te mau Ite no Iehova, e ohipa te mau tane e te mau vahine i roto i ta Iesu i tohu: “E porohia te parau apî oaoa o te Faatereraa arii e ati aˈe te fenua ia ite te mau nunaa atoa, i reira ïa te hopea e tae mai ai.”—Mataio 24:14.