Uiraa a te feia taio

No te aha eita te mau Ite no Iehova e pate i te hapaina, aita hoi te Bibilia e faahiti ra no nia i te reira?

E peu tahito te pateraa i te hapaina uaina (aore ra te tahi atu ava) o tei parare, noa ˈtu mea taa ê te huru raveraa i tera e tera vahi. I te tahi mau taime, e pate amui te taata i te hapaina ia inu ratou. Ia pate te hoê taata i te hapaina, e ani aore ra e hinaaro o ˈna te oaoa, te ea maitai o te tahi taata, ia roaa ˈtu â to ˈna oraraa e te vai atu â. Area vetahi, e parau ratou ma te reo puai e ua farii ratou aore ra e amo ratou i te hapaina uaina, a inu atu ai. No e rave rahi, e au ra e ere teie peu i te mea ino aore ra e faaite te reira i te peu maitai, tera râ, te vai ra te tumu papu eita te mau Ite no Iehova e pate i te hapaina.

E ere ra te auraa eita mau Kerisetiano e hinaaro ia oaoa te hoê taata e ia fanaˈo i te hoê ea maitai. I roto i te hoê rata no te mau amuiraa, ua faaoti te tino aratai o te senekele matamua ma teie parau “ia maitai noa outou!” (Ohipa 15:29) Ua parau te tahi feia haamori mau i te mau arii: “Ia ora to ˈu fatu . . . e a muri noa ˈtu!” aore ra “ia ora maoro te arii.”—Te mau arii 1, 1:31; Nehemia 2:3.

Tera râ, nohea mai te peu e pate i te hapaina? I roto i Te Pare Tiairaa o te 1 no Tenuare 1968, ua faahiti ra The Encyclopædia Britannica (1910), buka 13, api 121: “No roto mai te peu tumu e inu no te ora o te hoê taata i te mau peu tahito a te mau haapaoraa, ia inu no te mau atua e te feia pohe. Ia tamaa to Heleni e to Roma, e ninii ratou i te tusia uaina no ta ratou mau atua, e i roto i te mau oroa, e inu ratou no tera mau atua e no te feia pohe.” Te parau faahou ra The Encyclopædia: “Ua faaauhia teie peu inuraa no te ora o te hoê taata i te hoê tusia.”

Mea mau anei teie mau faahitiraa? Te parau ra te International Handbook on Alcohol and Culture no 1995: “Peneiaˈe e toetoea te [pateraa i te hapaina] o te mau tusia uaina i tahito ra, i reira e maniihia ˈi te tahi mea moˈa no te mau atua: te toto aore ra te uaina ia faaroohia mai te hoê euhe, te hoê pure haapotohia ma te mau parau ‘ia roa to oe oraraa!’ aore ra ‘ia maitai to oe ea!’”

Hau atu â, e ere no te mea te vai ra te mau taoˈa, te mau hohoˈa papaihia o ta te haapaoraa hape i tahito i faaohipa, mea ino ïa te reira no te hoê taata haamori mau. E rave na tatou i te hiˈoraa o te remuna. Te parau ra te hoê buka ite rahi Bibilia: “E au ra ua faaohipahia te remuna ei taipe moˈa na te mau haapaoraa hape.” Tera râ, ua ani te Atua ia hamanihia te remuna i te taura ati aˈe te hiti o te ahu o te tahuˈa rahi, e te remuna ati aˈe i te mau pou veo o te hiero o Solomona. (Exodo 28:33; Te mau arii 2, 25:17) Hau atu â, e auraa atoa to te tapea rima i tera tau ra no te haapaoraa. I teie râ mahana, aita te rahiraa o te taata e taa ra i te auraa, no ratou e tapao noa te reira e ua faaipoipo te hoê taata.

Eaha te auraa ia faaohipahia te uaina i roto i te mau peu a te haapaoraa? Ei hiˈoraa, i te hoê mahana, ua haere te mau taata o Sekema o te haamori ra ia Baala “i roto i te fare o to ratou atua e tamaa aˈera e inu aˈera e faatae aˈera i te ino i nia ia Abimeleka,” te tamaiti a Gideona. (Te mau tavana 9:22-28) I to oe manaˈo, e inu anei ra te hoê tavini taiva ore a Iehova e o ratou, ma te ani i te mana no ô mai i te hoê atua hape no te faatae i te ino i nia ia Abimeleka? Ma te faataa i te taime a orure hau ai e rave rahi Iseraela ia Iehova, ua parau Amosa: “I pihai iho i te mau fata atoa, te tarava nei ratou i nia i te mau ahu ta ratou i haru ei haapapuraa no te hoê tarahu. E te uaina ta ratou e inu ra i roto i te hiero o to ratou mau atua.” (Amosa 2:8) E apiti anei ra te feia haamori mau e o ratou no te ninii i te tusia uaina no te mau atua aore ra no te inu i roto i tera mau tupuraa? (Ieremia 7:18) Aore ra e amo anei te hoê taata haamori mau i te hapaina uaina ma te ani i te hoê atua ia ohipa i nia i te a muri aˈe o te hoê taata aore ra ia haamaitai i to ˈna a muri aˈe?

Mea anaanatae ia tapao e i te tahi mau taime ua amo te tahi feia haamori a Iehova i te rima i nia no te ani i te hoê faahopearaa maitai. Ua faateitei ratou i te rima i nia i te Atua mau ra. Te taio ra tatou: “Tia aˈera Solomona i mua i te fata a Iehova . . . faateitei aˈera oia i to ˈna rima i nia i te raˈi, e na ô aˈera oia: “E Iehova te Atua o Iseraela, aita ˈtu e Atua mai ia oe . . . ia faaroo oe mai te vahi e parahi ai oe i te raˈi. Ia faaroo e ia faaore oe i te hara.” (Te mau arii 1, 8:22, 23, 30) Hoê â huru, “arue atura Ezera ia Iehova . . . Pahono maira te nunaa taatoa: ‘Amene! Amene!’ a amo ai i to ratou rima i nia. Tuturi ihora ratou e tipapa ihora i mua ia Iehova.” (Nehemia 8:6; Timoteo 1, 2:8) Te mea papu, aita te feia taiva ore i faateitei i to ratou rima i te ra’i no te fana’o i te hoê haamaitairaa no te tahi atua o te manuïa.—Isaia 65:11.

I teie mahana, te pate ra e rave rahi taata i te hapaina ma te ore e manaˈo e te ani ra ratou i te tahi pahonoraa aore ra i te haamaitairaa a te tahi atua, tera râ, aita ta ratou e nehenehe e faataa no te aha ratou e amo ai i te hapaina uaina i te raˈi. E ere no te mea aita ratou e feruri i te auraa o te reira e tumu ïa no te mau Kerisetiano ia rave i teie peu.

Mai tei matauhia e te taata e i roto atoa i te tahi mau tupuraa, eita te mau Ite no Iehova e rave i te tahi mau peu o ta te taata e rave rahi e rave ra. Ei hiˈoraa, e rave rahi taata o te faahanahana ra i te mau taipe a te nunaa, aore ra te mau reva. Ma te ore e feruri e mau ohipa haamoriraa tera. Eita te mau Kerisetiano mau e imi hara ia ratou, tera râ, eita ratou e apiti roa ˈtu i roto i tera mau oroa. Ma te ite e tupu te hoê oroa, e haa te mau Ite no Iehova ma te feruri maitai eiaha vetahi ia inoino. I roto i te tahi mau tupuraa, ua faaoti ratou ma te papu eiaha e faaô i roto i tera mau ohipa here aiˈa, aita e tuati ra e te Bibilia. (Exodo 20:4, 5; Ioane 1, 5:21) No e rave rahi i teie mahana, aita te pateraa i te hapaina i riro ei peu a te haapaoraa. Tera râ, e tumu papu no te aha eita te mau Kerisetiano e pate i te hapaina, no roto mai hoi te reira i te peu a te haapaoraa, e nehenehe atoa te reira e riro i teie nei ei aniraa i te raˈi i te hoê haamaitairaa, mai te imiraa i te tauturu no ǒ mai i te hoê puai hau ê i to te taata.—Exodo 23:2.