Afaihia ˈtura Iesu, tei taamuhia to ˈna na rima mai te hoê taata ohipa ino, ia Ana. E tahuˈa rahi oia i to Iesu apîraa, i te maereraa te mau orometua ia ˈna i te hiero. (Luka 2:42, 47) I muri aˈe na vetahi o ta ˈna mau tamaiti i mono ia ˈna, e i tera taime o ta ˈna hunoa o Kaiapha te tahuˈa rahi.

A vai ai Iesu i ǒ Ana, ua nehenehe Kaiapha e haaputuputu i te Sunederi, te tiripuna e 71 mero, to roto atoa te tahuˈa rahi e te tahi atu tei amo na i taua hopoia ra.

Uiui maira Ana ia Iesu “no nia i ta ˈna mau pǐpǐ e ta ˈna haapiiraa.” Pahono noa ˈtura Iesu: “Ua paraparau vau i mua i te taata atoa. I haapii noa na vau ia vetahi ê i roto i te sunago e te hiero, i reira hoi te ati Iuda atoa e ruru ai, e aita vau i parau huna noa ˈˈe i te tahi parau. No te aha ïa oe e uiui mai ai ia ˈu? A uiui i te feia o tei faaroo i ta ˈu i parau ia ratou.”—Ioane 18:19-21.

Poara maira te hoê tiai e tia ra na reira ia Iesu e tamaˈi maira: “Mea na ô oe ia pahono i te tahuˈa tiaau?” Pahono atura râ Iesu, tei ite e aita oia i rave i te tahi ohipa ino: “Ua hape ta ˈu parau, a faaite mai ïa eaha ta ˈu hape. Teie râ, ua tano ta ˈu parau, no te aha ïa oe i poara ˈi ia ˈu?” (Ioane 18:22, 23) Faaue ihora Ana ia afaihia Iesu i ta ˈna hunoa o Kaiapha.

Ua ruru ê na te Sunederi taatoa, oia hoi te tahuˈa  rahi, te mau aratai ati Iuda e papai parau, i ǒ Kaiapha. Ia au i te ture, eita e tano ia faatupu i tera huru haavaraa i te po o te Pasa. Aita râ te reira i tapea ia ratou ia faatae i ta ratou opuaraa ino i te hopea.

Eita iho â te Sunederi e haava ia Iesu ma te parau-tia. I faaoti na hoi ratou e haapohe ia ˈna i muri iho i to ˈna faatiaraa mai ia Lazaro. (Ioane 11:47-53) Tau mahana aˈenei, ua opua te mau aratai haapaoraa e haru e e haapohe ia Iesu. (Mataio 26:3, 4) Mai te huru ra ïa ua faautua-ê-hia na Iesu i te pohe hou a haavahia ˈi.

Hau atu i teie haavaraa tano ore ia au i te ture, ua imi te mau tahuˈa tiaau e te tahi atu mau mero o te Sunederi i te tahi mau ite no te pari haavare ia Iesu. Mea rahi tei itehia mai, aita râ ta ratou pariraa e tuea ra. Haere maira e piti ite e na ô maira: “Ua faaroo matou ia ˈna i te parauraa: ‘E vavahi au i teie hiero hamanihia e te rima taata e e patu vau e toru mahana i te tahi atu e ere na te rima taata i hamani.’” (Mareko 14:58) Aita atoa ta raua pariraa e tuea ra.

Ui maira Kaiapha ia Iesu: “Eita oe e pahono? Aita oe e faaroo ra i ta teie mau taata e pari nei ia oe?” (Mareko 14:60) Mamû noa ihora Iesu i mua i teie pariraa haavare a te mau ite aita ta ratou parau e tuea ra. Taui ihora ïa Kaiapha i te raveraa.

Ua ite Kaiapha e e riri hanoa te mau ati Iuda i te taata e parau e e Tamaiti oia na te Atua. I to Iesu faahitiraa na mua ˈtu i te Atua mai to ˈna Metua, ua hinaaro te mau ati Iuda e haapohe ia ˈna, i ta ratou hoi parauraa te faafaito ra oia ia ˈna i te Atua. (Ioane 5:17, 18; 10:31-39) Na ô maira Kaiapha ia Iesu no te râmâ ia ˈna: “Te faaue nei au ia oe i te iˈoa o te Atua ora, ia parau mai e o te Mesia anei oe, te Tamaiti a te Atua!” (Mataio 26:63) Ua parau aˈena Iesu e e Tamaiti oia na te Atua. (Ioane 3:18; 5:25; 11:4) Ia mamû noa oia i teie taime, e nehenehe e manaˈohia e ere oia i te Tamaiti na te Atua e te Mesia. Na ô atura oia: “E o vau, e ite atoa outou i te Tamaiti a te taata nei i te parahiraa i te rima atau o te Manahope e te haereraa mai na nia i te mau ata o te raˈi.”—Mareko 14:62.

Hahae ihora Kaiapha i to ˈna ahu ma te haapeu, a na ô ai: “Ua faaino oia i te Atua! Eaha ïa te faufaa ia imi â i te ite? Inaha, ua faaroo outou ia ˈna i te faainoraa i te Atua. Eaha to outou manaˈo?” Rave aˈera te Sunederi i ta ratou faaotiraa tano ore: “Ia pohe iho â oia.”—Mataio 26:65, 66.

Faaooo e moto maira ratou ia Iesu. Poara maira te tahi atu ia ˈna e tutuha maira i nia i to ˈna mata. I muri iho i te tapoˈiraa i to ˈna mata e te poararaa ia ˈna, parau faaooo maira ratou: “E peropheta oe, faaite mai ïa na vai i tupai ia oe.” (Luka 22:64) Mai tera ïa te rave-ino-raahia te Tamaiti a te Atua i te hoê po haavaraa tano ore ia au i te ture!