Mea nafea te Bibilia i te taeraa mai ia tatou?

A 1 900 matahiti i teie nei te otiraa te Bibilia i te papaihia. E semeio mau i tae roa mai ai te Bibilia ia tatou nei i teie mahana. E rave rahi hoi enemi tei imi i te faaore roa i teie buka, te mau tia faatere anei aore ra te mau aratai haapaoraa. Ua papai-atoa-hia te reira na roto i te reo ta te rahiraa o tatou e ore e taa ra, e i nia i te mau taoˈa o te pê, mai te môˈu e te iri animara.

MEA nafea teie buka tei papaihia i tahito roa ra i tae mai ai ia tatou e i riro ai o te buka matau-roa-hia? Teie e piti aˈe manaˈo.

Ua papai-rahi-hia te Bibilia

I tahito ra, tei te mau Iseraela ra te mau otaro tumu o te Bibilia, na ratou te hopoia e faaherehere i te reira. Ei hiˈoraa, i faauehia na i te mau arii no Iseraela ia “papai . . . i roto i te hoê buka i teie Ture, e vai ra i te tahuˈa ati Levi.” (Deuteronomi 17:18) Ta ratou iho â i rave, ua faaherehere maite te ati Iseraela i te mau otaro tumu o te Bibilia e ua papai-faahou-hia te reira e rave rahi taime.

Mea au na te ati Iseraela e taio i te mau Papai no to ratou fariiraa o te Parau a te Atua te reira. No reira, na te mau papai parau tei matau maitai i to ratou toroa e papai faahou i te reira ma te haapao maitai. O Ezera hoê o ratou. E taata mǎtaˈu i te Atua oia, e te parauhia ra no ˈna “e papai parau ite i te ture a Mose i ho-mai-hia mai e te Atua o Iseraela e Iehova.” (Ezera 7:6) Na te hoê pǔpǔ taata, parauhia Masoreta, i papai faahou i te mau Papai Hebera, aore ra “Faufaa Tahito,” mai te senekele pae e tae atu i te senekele ahuru. No te haapapu e aita ratou i hape a papai ai i te reira, e taio ratou i te rahiraa reta. Maoti ïa teie ravea i ore ai i noaa i te enemi ia faaore i te Parau a te Atua.

Ei hiˈoraa, i te matahiti 168, ua tamata te faatere no Suria o Antiochus IV i te faaore i te mau otaro atoa o te mau Papai Hebera ta ˈna e ite mai na te fenua Paretetina. Te na ô ra te hoê taata tuatapapa ati Iuda: “E pahaehia e e taninahia te mau otaro atoa o te ture.” E te na ô ra te hoê buka maiti: “Ua haapao maitai te mau tia faehau i teie faaueraa . . . E faautua-pohe-hia . . . te taata e buka moˈa ta ˈna.” (The Jewish Encyclopedia) Aita râ te mau papai o te Bibilia i faaore-roa-hia i rotopu i te ati Iuda i Paretetina e te tahi atu mau fenua.

I te otiraa iho â te papairaahia te mau Papai Heleni Kerisetiano, aore ra “Faufaa Apî,” ua papai-faahou-hia te reira a parare atu ai. Ei hiˈoraa, ua papai o Ioane i ta ˈna faatiaraa o te Evanelia i Ephesia aore ra na pihai iho. Ua itehia mai râ te hoê papai e faatia ra i te Evanelia a Ioane i te fenua Aiphiti, e hanere ïa kilometera i te atea ia Ephesia. Ua haapapu te mau aivanaa e ua papaihia te reira e 50 noa matahiti i muri aˈe i te Evanelia a Ioane. Te auraa, ua fanaˈo oioi te mau Kerisetiano o te mau fenua atea i te mau papai arataihia e te Atua i te otiraa iho â te reira i te papaihia.

E 200 hanere matahiti i muri aˈe, i te 23 no Fepuare 303, ua hinaaro te Emepera Roma o Dioclétien e faaore i te haapiiraa a te mau Kerisetiano ma te faaore i ta ratou mau papai moˈa. Tono atura ïa oia i ta ˈna mau faehau e vavahi i te uputa o te hoê fare pure a tomo atu ai i roto no te tanina i te mau papai o te Bibilia. I te poipoi aˈe, ua faaue oia ia taninahia te mau Bibilia atoa e itehia na te hau Roma i mua i te taata. Aita râ i noaa ia ˈna ia faaore i te mau papai atoa, e ua papai-faahou-hia te mau papai o te Bibilia. Inaha, e piti Bibilia reo Heleni no te tau o Dioclétien tei tae roa mai ia tatou i teie mahana. Te vai ra hoê i Roma, e te tahi atu, i te British Library i Lonedona i te fenua Beretane.

Aita hoê otaro tumu o te Bibilia i tae roa mai ia tatou, e tuhaa noa râ o te Bibilia tei papai-faahou-hia aore ra te taatoaraa. Mea tahito roa vetahi. E ui ïa tatou: Tei papaihia i roto ra, tera atoa anei tei papaihia i roto i te mau otaro tumu? Te faataa ra te aivanaa ra o William Green no nia i te mau Papai Hebera: “E nehenehe e haapapu e aita ˈtu e buka no tahito ra tei tae roa mai ia tatou ra ma te tano maitai.” Ua papai Frederic Kenyon no nia i te mau Papai Heleni Kerisetiano, e aivanaa tuiroo i te pae o te mau papai Bibilia: “Te mau otaro tumu e te mau papai o te Bibilia tei tae roa mai ia tatou, fatata roa ua papaihia i te hoê â taime, aore ra tau matahiti noa i muri aˈe. No reira, eita tatou e nehenehe e feaa no nia i te tanoraa o te Bibilia e tera iho â anei tei papaihia i roto i te mau otaro tumu. Papu roa ïa ia tatou e mea mau ta tatou e nehenehe e taio i roto i te Faufaa Apî e ua tae pauroa mai ia tatou ra, aita hoê tuhaa i moˈe.” Ua parau atoa oia: “E nehenehe e haapapu maitai e aita te poroi tumu o te Bibilia i faahuru-ê-hia. . . . E ere ïa mai te tahi atu mau buka no tahito ra.”

Te huriraa i te Bibilia

Te piti o te tumu i riro ai te Bibilia o te buka matau-roa-hia e te taata, oia hoi ua hurihia te reira na roto e rave rahi reo. Ua tupu ïa te opuaraa a te Atua ia matau te taata o te mau nunaa e reo atoa ia ˈna e ia haamori ia ˈna “ma te varua e te parau mau.”—Ioane 4:23, 24; Mika 4:2.

O te Septante te huriraa matamua o te Bibilia. E huriraa Heleni no te mau ati Iuda reo Heleni e ora ra i rapae i Paretetina. Ua ineine teie huriraa e piti matahiti hou Iesu a haere mai ai i te fenua nei. I te otiraa te Bibilia i te papaihia, ua hurihia te reira, oia atoa te mau Papai Heleni Kerisetiano tau hanere noa matahiti i muri aˈe. I te tanoraa, na te arii e te mau tahuˈa e imi i te ravea ia fanaˈo te nunaa i te Bibilia. Aita râ, ua tamata ratou i te tapea i huriraa o te Bibilia na roto i te mau reo ta te taata e paraparau ia vai noa ratou i roto i te poiri pae varua.

E rave rahi taata itoito tei faaruru i te pohe no te huri i te Bibilia na roto i te reo ta te taata e paraparau ra no te mea aita ratou i auraro i te faaueraa a te Ekalesia e a te hau. Ei hiˈoraa, i te matahiti 1530, ua huri te taata Beretane ra o William Tyndale, tei haapiihia i Oxford, i na buka matamua e pae o te Papai Hebera. Noa ˈtu te patoiraa, o ˈna te taata matamua tei huri i te Bibilia na roto i te reo Beretane ma te faaohipa i te papai reo Hebera. O Tyndale te taata huri matamua tei faahiti i te iˈoa Iehova na roto i te reo Beretane. I imi na te mau Katolika e haapohe ia Casiodoro de Reina, te hoê aivanaa Bibilia Paniora, tei huri hoê o te mau Bibilia Paniora matamua. No te faaoti i ta ˈna huriraa, ua tere oia i te fenua Beretane, Heremani, Farani, Holane e Helevetia eiaha o ˈna ia noaahia. *

I teie atoa mahana, te huri-noa-hia nei te Bibilia na roto e rave rahi atu â reo e te neneihia ra e mirioni Bibilia. No te mea no tahito roa mai teie buka i te taeraa mai ia tatou, te haapapu ra te reira i ta te aposetolo Petero i parau a arataihia ˈi oia e te varua o te Atua: “E mǎrô te aihere, e e topa te tiare, area te parau a Iehova, e vai ïa e a muri noa ˈtu.”—Petero 1, 1:24, 25.

[Nota i raro i te api]

 [Tumu parau tarenihia/Hohoˈa]

TEIHEA HURIRAA TA ˈU E TAIO?

I roto i te tahi mau reo, mea rahi ta ratou mau huriraa Bibilia. Te vai ra vetahi e mea fifi roa ia taa, no te mau taˈo tahito paha te faaohipahia ra i roto. I roto i te tahi mau Bibilia, ua hurihia tera e tera taˈo no roto mai i te reo tumu, area te tahi atu ra, ua huri-noa-hia te manaˈo ma te faataa roa i te auraa, e ere faahou ïa te mau manaˈo e vai ra i roto i te reo tumu.

No te faaineine i te Huriraa o te ao apî o te mau Papai moˈa na roto i te reo Beretane, tei piahia e te mau Ite no Iehova, ua haamauhia te hoê tomite huriraa, te hoê pǔpǔ taata tei ore i faaite i to ratou mau iˈoa. Ua faaohipa ratou i te mau papai na roto i te reo tumu no te huri i te reira na roto i te reo Beretane. Tera ˈtura ïa te huriraa tei faaohipahia no te huri i te Bibilia na roto hau i te 60 reo ê atu. Tera râ, ia papu i te feia huri e ua tano ta ratou huriraa, pinepine ratou i te faaau i ta ratou mau huriraa i tei papaihia na roto i te reo tumu. Ua hurihia te Huriraa o te ao apî tera e tera taˈo ia nehenehe, mai te peu aita te reira e haapoiri ra i te auraa. Ta ratou fa, ia taa-maitai-hia ta ratou huriraa mai tei taahia na i te tau a papaihia ˈi te Bibilia.

Ua hiˈopoa te tahi mau aivanaa i te tahi mau huriraa Bibilia o teie tau, oia atoa te Huriraa o te ao apî, ia ite mai ia ratou te tahi mau huriraa aita e tano roa ra, oia hoi tei faahuru-ê-hia te auraa. O Jason David BeDuhn hoê o ratou, e aivanaa i te pae o te mau haapaoraa e e orometua haapii i te hoê fare haapiiraa teitei i Marite. I te matahiti 2003, ua pia oia i te hoê buka o to ˈna hiˈopoaraa i “na iva huriraa Bibilia faaohipa-roa-hia na roto i te reo Beretane.” * I roto i taua buka ra, te hiˈopoa ra oia i te mau vahi mârô-roa-hia, ia au i ta ˈna parau, “i reira e itehia ˈi te mau manaˈo ua faahuru-ê-hia te huriraa.” Ua faaau oia i te mau huriraa tataitahi i te mau papai na roto i te reo tumu, a itehia mai ai ia ˈna te mau vahi i faahuru-ê-hia ˈi te auraa. Eaha ta ˈna i ite mai?

Te parau ra BeDuhn e te parau ra te taata atoa, oia atoa te mau aivanaa Bibilia, ia taa ê te Huriraa o te ao apî, na te feia huri ïa i faatano i ta ratou huriraa i ta ratou mau tiaturiraa. Te faataa nei râ oia: “Pinepine ia taa ê te Huriraa o te ao apî, ta ˈna te huriraa tano roa ˈˈe o te horoa ra i te manaˈo e vai ra i roto i te mau otaro tumu.” Parau mau, aita te manaˈo o BeDuhn e tu ra i te tahi mau tuhaa o te Huriraa o te ao apî, te parau nei râ oia “o te huriraa tano roa ˈˈe teie ia faaauhia i te tahi atu.” Ua parau oia “e huriraa maitai roa” te Huriraa o te ao apî.

Tera atoa te manaˈo o Benjamin Kedar, e aivanaa Hebera i Iseraela, no te Huriraa o te ao apî. I te matahiti 1989, ua parau oia: “Te itehia ra i roto i teie Bibilia e ua tutava te feia huri i te huri i te manaˈo e vai ra na roto i te reo tumu. . . . Aita vau i ite aˈenei i roto i te Huriraa o te ao apî i te tahi mau tuhaa tei faahuru-ê-hia te auraa.”

A ui ia oe iho: ‘Ia taio vau i te Bibilia, eaha ta ˈu e hinaaro? Te hinaaro ra anei au ia ohie te taioraa noa ˈtu aita e tano roa ra te huriraa? Aore ra te hinaaro ra vau e taio i te mau manaˈo e vai ra na roto i te reo tumu?’ (Petero 2, 1:20, 21) I reira oe e nehenehe ai e maiti i te hoê huriraa e tano no oe.

[Nota i raro i te api]

[Hohoˈa]

Te vai ra te “Huriraa o te ao apî o te mau Papai moˈa” na roto e rave rahi reo

[Hohoˈa]

 Otaro a te mau Masoreta

[Hohoˈa]

E tuhaa ua papaihia te Luka 12:7 i nia iho, “. . . Eiaha e mǎtaˈu. Mea faufaa aˈe outou i te manu rii e rave rahi”

[Faaiteraa i te fatu o te hohoʼa]

Hohoˈa: National Library of Russia, St. Petersburg; muri: Bibelmuseum, Münster; mua: © The Trustees of the Chester Beatty Library, Dublin