Ua itehia mai ia ˈu te pahonoraa no nia i te parau-tia ore

Faatiahia e Ursula Menne

Mai te tau mai â i ta ˈu e nehenehe e haamanaˈo, ua hinaaro noa na vau ia faaitehia te tia e te parau-tia ore i te mau taata atoa. No teie hinaaro ua mau roa vau i te fare tapearaa i Heremani hitia o te râ Communiste. I ǒ vau i te iteraa i te pahonoraa no nia i te parau-tia ore. Teie to ˈu aamu.

UA FANAUHIA vau i 1922 i Heremani i te oire no Halle, ua hau atu i te 1 200 matahiti te aamu o teie oire. I reira te turu-maite-raahia te haapaoraa Porotetani i apatoa tooa o te râ i Berlin, fatata 200 kilometera te atea. O Käthe to ˈu tuahine tei fanauhia i 1923. Ua ohipa papa i roto i te nuu faehau. Ua himene mama i roto i te fare hautiraa teata.

No ǒ mai ia papa ra to ˈu hinaaro e aro i te parau-tia ore. I to ˈna vaiihoraa i te nuu faehau, ua hoo mai papa i te tahi fare toa. No te mea e mea veve te rahiraa o ta ˈna mau hoani, e horoa tarahu o ˈna na ratou no to ˈna aroha hamani maitai. Ua aratai râ teie huru raveraa ia ˈna i te topatariraa. Ahani au i haapii i te tupuraa o papa, e ite ïa vau e ere i te mea ohie e e mea fifi roa ia feruri anaˈe i te reira, no te aro no nia i te aifaito-ore-raa e te parau-tia ore. Te feruriraa râ i te apîraa e au ïa i te auahi puai o te ore e pohe hanoa.

Mai to ˈu mama vau no te pae himeneraa e oriraa, e ua turai oia ia Käthe e o vau nei i roto i te himene e te ori. E oraraa oaoa to ˈu i to ˈu tamariiriiraa, e oraraa faahiahia mau to maua Käthe tae roa i te matahiti 1939.

Haamataraa te ino-rahi-raa

I te otiraa ta ˈu tau haapiiraa, ua ô vau i roto i te hoê fare haapiiraa ori, i reira vau i te haapiiraa i te ori Ausdruckstanz, haapiihia e Mary Wigman. O ˈna te taata matamua no teie ori, e titauhia i te taata ori ia faaite i to ˈna mau huru aau na roto i te ori. Ua haamata atoa vau e peni i te hohoˈa. Ua ora mai ïa vau i te hoê oraraa oaoa i to ˈu taurearearaa. Tera râ, i 1939 ua haamata te Piti o te tamaˈi rahi. E i 1941 ua pohe papa i te maˈi tutoo.

Mea riaria roa te tamaˈi. Noa ˈtu 17 noa to ˈu matahiti a haamata ˈi te tamaˈi, ua manaˈo vau ua maamaa roa te mau taata. Ua ite au e ua taui roa te feruriraa o te rahiraa o te huiraatira no te tupuraa Nazi. E ua haamata atoa te maa i te iti mai, te pohe e te vavahiraa. Ua ino roa to matou fare i te tupita-raa-hia, e i roto i teie tamaˈi ua pohe e rave rahi mero o to ˈu utuafare.

I te otiraa te tamaˈi i 1945, te ora noa ra mama, Käthe e o vau nei i Halle. I taua taime ua faaipoipohia vau e e tamahine ta ˈu, tera râ, te vai ra te fifi i roto i to ˈu faaipoiporaa. Ua faataa ê maua e no te aupuru ia ˈu iho e ta ˈu tamahine, ua ohipa vau ei taata ori e ei taata peni hohoˈa.

I muri iho i te tamaˈi, ua tatuhaahia Heremani e maha tuhaa, tei roto to matou oire i te tuhaa o te faatereraa Rusia tahito. No reira, ua haamatau matou e ora i raro aˈe i te faatereraa Communiste. I 1949, ua riro to matou tuhaa i Heremani, te tuhaa fenua hitia o te râ o Heremani.

Te oraraa i raro aˈe i te faatereraa Communiste

I taua mau matahiti ra, ua maˈihia mama e ua haapao vau ia ˈna. Ua farii au i te tahi ohipa i roto i te hoê pu faatere hau. I te hoê â taime, ua haamatau vau i te mau piahi haapiiraa orure hau tei tamata i te faaite i te mau tupuraa tano ore. Ei hiˈoraa, ua opanihia i te tahi taurearea ia haapii i te haapiiraa teitei no te mea e mero to ˈna papa no te pǔpǔ Nazi na mua ˈˈe. Ua matau maitai au ia ˈna, no te mea ua hauti pinepine maua i te upaupa. Ua manaˈo vau, ‘No te aha o ˈna e mauiui ai no te mau faaotiraa ta to ˈna papa i rave?’ Ua rahi mai to ˈu hinaaro e ohipa e o ratou, e ua faaoti au e apiti i roto i te taahiraa. I te hoê taime ua tapiri au i te mau api parau i nia i te eˈa paumaraa i rapae o te tiripuna.

Ua uˈana atu â to ˈu hinaaro no te parau-tia na roto i te tahi o te mau rata ta ˈu i papai ei taata papai parau no te tomite no te hau o te tuhaa fenua. I te tahi atu taime, no te mau tumu poritita, ua opua te tomite e hapono i te tahi mau papai no nia i te mau parau haavare Communiste i te tahi taata paari tei ora na i Heremani tooa o te râ no te haafifi ia ˈna. Ua inoino roa vau i teie huru raveraa tano ore no teie taata, i huna ˈi au i te reira i roto i te piha ohiparaa. I te pae hopea, aita taua mau papai ra i haponohia.

Ua horoahia mai na ˈu i te tiaturiraa na “te taata ino i roto i te piha”

I Tiunu 1951, ua haere mai e piti tane i roto i ta ˈu piha ohiparaa e ua parau mai: “E tapeahia oe.” Ua afai raua ia ˈu i te fare tapearaa piihia Roter Ochse aore ra Puaatoro oni ura. Hoê matahiti i muri iho ua faautuahia vau i te orure hau i te Hau. Ua tuu te tahi piahi ia ˈu i te Stasi, te mutoi huna, ma te faaite ia ratou i ta ˈu i rave na mua ˈtu e te mau api parau. E haavaraa tano ore no te mea aita hoê aˈe taata i tâua i ta ˈu i parau. Ua faautuahia vau e ono matahiti i te fare tapearaa. I tera roaraa taime, ua maˈihia vau e ua tuuhia vau i te vahi taotoraa i te fare maˈi o te fare tapearaa e e 40 vahine. I to ˈu iteraa i te feia e mea rahi to ratou hepohepo, ua haamata vau i te mǎtaˈu. Afaro roa vau i nia i te opani e tupaipai atura vau.

Parau maira te tiai: “Eaha ta oe e hinaaro ra?”

Tuô ihora vau: “A tuu ia ˈu i rapae, a tuu ia ˈu i te tahi atu piha pirihao mai te peu e nehenehe, a tuu râ ia ˈu i rapae!” Mea papu, aita oia i tâua mai ia ˈu. Aita i maoro, ua ite au i te tahi vahine mea taa ê to ˈna huru i te tahi atu. Ua tapao vau te vai hau noa ra oia. Parahi atura vau i pihaiiho ia ˈna.

Maere roa vau i to ˈna parauraa mai: “Ia parahi oe i pihaiiho ia ˈu, mea au aˈe ia haapao maitai oe.” Parau faahou atura o ˈna: “Te manaˈo ra te tahi atu i roto i te piha, e taata ino vau no te mea e Ite no Iehova vau.”

I tera tau, aita vau i ite e ua faarirohia te mau Ite no Iehova ei enemi no te Hau Communiste. Te mea râ ta ˈu i ite no nia ia ratou, e piti Feia haapii Bibilia (te iˈoa faaohipahia no te pii i te mau Ite) tei tamau i te haere mai e farerei ia papa i to ˈu tamariiriiraa. Oia mau, te haamanaˈo ra vau i to to ˈu papa parauraa: “E parau te mau piahi Bibilia i te parau mau!”

Ua taˈi roa vau i to ˈu farereiraa i teie vahine o Berta Brüggemeier to ˈna iˈoa. Ani atura vau: “E e, parau mai na no nia ia Iehova.” Mai reira mai, o maua noa e e paraparau pinepine maua no nia i te Bibilia. I rotopu i te tahi atu mau mea, ua haapii au e Atua here, tia e te hau te Atua mau ra o Iehova. Ua haapii atoa vau e faaore oia i te mauiui atoa o te faatupuhia e te mau taata ino. Te tohu ra te Salamo 37:10, 11: “Tau taime â, e aita faahou te feia ino . . . E fatu râ te feia mǎrû i te fenua, e e au roa ratou i te rahi o te hau.”

To ˈu tuuraahia e haereraa i tooa o te râ

Ua tuuhia vau i 1956, i muri hau atu pae matahiti i te fare tapearaa. Pae mahana i muri i to ˈu tuuraahia, ua horo ê au i te tuhaa fenua i Heremani hitia o te râ no te ora i Heremani tooa o te râ. E piti tamahine ta ˈu o Hannelore raua Sabine, ta ˈu atoa i afai na muri ia ˈu. I ǒ, ua faataa vau e ta ˈu tane e ua farerei faahou vau i te mau Ite. A haapii ai au i te Bibilia, ua taa ia ˈu e rave rahi tauiraa e titauhia ia ˈu ia rave no te ora ia au i te mau ture aveia a Iehova. Ua rave au i teie mau tauiraa e ua bapetizohia vau i 1958.

Ua faaipoipo faahou vau, i te hoê râ Ite no Iehova o Klaus Menne to ˈna iˈoa. E faaipoiporaa faahiahia to maua Klaus e e piti tamarii ta maua o Benjamin raua Tabia. Ua pohe râ o Klaus i roto i te hoê ati purumu e 20 matahiti i teie nei, e faaea taa noa ihora vau tae roa i teie nei. E tamahanahana rahi râ no ˈu te tiaturiraa o te tia-faahou-raa, te iteraa e faahoˈihia mai tei pohe i te ora i roto i te paradaiso i te fenua nei. (Luka 23:43; Ohipa 24:15) Ua tamahanahana-rahi-atoa-hia vau i te iteraa te tavini ra ta ˈu na tamarii e maha ia Iehova.

Maoti ta ˈu haapiiraa Bibilia, ua taa ia ˈu o Iehova anaˈe te nehenehe e horoa mai i te parau-tia mau. Taa ê atu i te taata, e haapao o ˈna i to tatou mau tupuraa atoa, oia atoa i to tatou oraraa e te tahi mau tupuraa aita e itehia e te mau taata. Te horoa mai ra teie haapiiraa faufaa roa ia ˈu i te hau, ia ite iho â ra vau aore ra ia roohia vau i te parau-tia ore. Te parau ra te Koheleta 5:8: “Ia ite oe e te haavîhia ra te veve e te ofatihia ra te mea afaro e te parau-tia i to oe tuhaa fenua, eiaha e maere. Te hiˈopoahia ra hoi taua taata mana ra e te tahi tei hau aˈe ia ˈna, e te vai ra ˈtu â tei hau aˈe ia raua.” Oia mau, te mana tei hau aˈe, o to tatou ïa Poiete. Te parau ra te Hebera 4:13: “Aita e mea i poietehia tei hunahia i te aro o te Atua, e mea mahora te mau mea atoa e te ite-maitai-hia e ana, ia ˈna hoi tatou e faˈi ai i ta tatou i rave.”

Haapotoraa no na 90 matahiti

E ui pinepine mai te mau taata ia ˈu mai te aha te oraraa i raro aˈe i te faatereraa Nazi e Communiste. E ere i te mea ohie te oraraa i raro aˈe i na faatereraa e piti. Ua haapapu na faatereraa e piti, e te mau huru faatereraa atoa a te mau taata, eita te mau taata e nehenehe e faatere ia ratou iho. Te haapapu ra te Bibilia e: “faatere . . . te taata i te taata no to ˈna iho ati.”—Koheleta 8:9.

I to ˈu apîraa, ua imi au i te mau taata e mana faatere tia ta ratou. Ua ite râ vau i teie nei. O to tatou Poiete noa te hopoi mai i te hoê ao tia mau, e rave o ˈna i te reira ma te haamou i te mau taata ino e ma te tuu i te mana faatere o te fenua i roto i te rima o ta ˈna Tamaiti ra o Iesu Mesia tei tuu noa i te mau hinaaro o te tahi atu na mua roa i to ˈna iho. Te parau ra te Bibilia no nia ia Iesu: “Mea au roa na oe te parau-tia e mea au ore roa na oe te ohipa ino.” (Hebera 1:9) Te mauruuru nei au i to te Atua faafatataraa mai ia ˈu i raro aˈe i te mana faatere o teie Arii faahiahia, ta ˈu e tiaturi nei e a muri noa ˈtu!

 [Hohoˈa i te api]

E ta ˈu na tamahine Hannelore raua Sabine i muri i to matou taeraa ˈtu i Heremani tooa o te râ

[Hohoˈa i te api]

I teie mahana, e ta ˈu tamaiti Benjamin e ta ˈna vahine o Sandra