Teie te hoê o te mau irava tei faahiti-roa ˈˈe-hia e tei matau-maitai-hia i roto i te Bibilia. Ua parauhia e aita ˈtu irava “o te faataa maitai i te mau taairaa i rotopu i te Atua e te huitaata e te ravea no te ora mai.” I roto i te tahi mau fenua, e pinepine te taata i te faahiti i te irava “Ioane 3:16” i ta ratou mau farereiraa. E tapiripiri atoa vetahi i te tahi hohoˈa e faaite ra i tera irava i nia i te pereoo, e peni-atoa-hia i nia i te patu e i te tahi atu mau vahi.

Ua tiaturi hoi te feia e faaiteite ra i tera irava e maoti te here o te Atua e noaa ˈi ia ratou i te ora mure ore. E no oe? Eaha te auraa no oe te here o te Atua? E eaha to oe manaˈo no ta te Atua i rave no te faaite i to ˈna here ia oe?

E rave rahi te tiaturi ra e na te Atua i hamani ia ratou, te ao nui e te natura. Ua tano iho â, e mea taa ê mau hoi te hamaniraa o te mau animara, raau e taata. Mea rahi te haamauruuru ra i te Atua no te ora ta ˈna e horoa ˈtu i te mau mahana atoa. Te farii atoa ra e maoti te Atua e fanaˈo ai ratou i te aho, te pape, te maa e te tahi atu mau maitai o te natura a nehenehe atu ai e ora noa ma te oaoa.

Mea maitai ia haamauruuru i to tatou Atua poiete no te mau mea atoa ta ˈna e horoa noa maira ia ora te taata. (Salamo 104:10-28; 145:15, 16; Ohipa 4:24) E faahiahia tatou i te here o te Atua ma te feruri i te mau mea ta ˈna i poiete. Teie ta te aposetolo Paulo i parau: “Oia iho hoi [te Atua] tei horoa mai i te ora, e te aho, e te mau mea atoa, i te mau mea atoa nei; no ˈna hoi to tatou ora, e i hahaere ai, e i parahi ai hoi.”—Ohipa 17:25, 28.

 Teie nei râ, aita te Atua i faaite i to ˈna here ma te aupuru noa ia tatou i te pae tino. Ua hamani atoa râ i te taata ia taa ê i te animara a hinaaro atu ai tatou e ite o vai o ˈna. Ua horoa mai ïa te Atua i te ravea no te faatupu i te taairaa e o ˈna. (Ioane 17:3) E nehenehe atura ïa te taata e auraro ia ˈna e riro ei melo o to ˈna utuafare, ta ˈna ïa mau “tamarii.”—Roma 8:19-21.

Mai tei faahitihia i roto i te Ioane 3:16, ua faaite te Atua i to ˈna here ma te tono mai i ta ˈna Tamaiti Iesu i te fenua nei no te haapii o vai ta ˈna e haamori ra, o vai to ˈna Metua e no te aha oia e pohe ai no tatou. E rave rahi râ tei ore i taa no te aha e titauhia ˈi ia pohe Iesu no te huitaata e no te aha atoa e e haapapuraa te reira i te here o te Atua. E hiˈo anaˈe i te faataaraa a te Bibilia ia ite tatou i te faufaaraa o to ˈna pohe.

No to tatou huru tia ore, e roohia te taata i te maˈi, te ruhiruhiaraa e te pohe. E ere râ te reira te hinaaro o te Atua. Ua horoa o ˈna i na taata matamua i te tiaturiraa e ora e a muri noa ˈtu i roto i te hoê paradaiso i te fenua nei. Te vai ra râ te hoê titauraa, e tia ia raua ia faaroo i te Atua. Ia ore, ua parau te Atua e e pohe raua. (Genese 2:17) Ua orure hau na taata matamua i to te Atua mana, e ua roohia raua e to raua huaai i te pohe. Teie ta te aposetolo Paulo e faataa ra: “No te taata hoê ra i ô mai ai te ino i te ao nei, e no te ino hoi te pohe; e ua taea-atoa-hia te taata atoa e te pohe i te mea ua hara paatoa.”—Roma 5:12.

“Mea au hoi na te Atua te parau-tia.” (Salamo 37:28) Noa ˈtu e ua ite te Atua e ua hara na taata matamua, aita o ˈna i faautua i te huitaata atoa ia mauiui e ia pohe e a muri noa ˈtu no te hara o te taata hoê. Ma te faaohipa i teie faaueraa tumu tia “te pohe ra, ei pohe ïa te utua,” ua horoa mai te Atua i te nehenehe e faatupu i te parau-tia a nehenehe atu ai te taata e auraro i te Atua e fanaˈo faahou i te ora mure ore. (Exodo 21:23) Teie ïa te uiraa: nafea e noaa faahou ai i te hoê ora taata tia mai tei erehia e Adamu? Teie te pahonoraa: ia pûpûhia ïa te hoê ora tei tuea i to Adamu, te hoê taata tia.

Aita hoê noa ˈˈe huaai tia ore o Adamu e nehenehe e pûpû i taua hoo ra, o Iesu anaˈe râ. (Salamo 49:6, 7) Ua fanauhia hoi oia ei taata tia mai ia Adamu. Ma te pûpû i to ˈna ora, ua hoo mai Iesu i te huitaata i te faatîtîraa a te hara a nehenehe atu ai ratou e ora mai ia Adamu e Eva i te haamataraa. (Roma 3:23, 24; 6:23) E nafea tatou e faufaahia ˈi i tera faaiteraa faahiahia roa o te here?

Te na ô nei â te Ioane 3:16, “ia ore ia pohe te faaroo ia ˈna [Iesu] ra, ia roaa râ te ora mure ore.”  No te ora e a muri noa ˈtu, e titauhia ïa ia faatupu i te faaroo ia Iesu e ia auraro ia ˈna.

E uiui paha oe: ‘Eaha te auraro? Aita anei Iesu i parau e o “te faaroo ia ˈna” e roaa ïa te ora mure ore?’ Mea faufaa ïa te faaroo. Teie nei râ, ia au i te Bibilia, eaha mau na te faaroo? Ia au i te hoê titionare no nia i te mau papai o te faufaa tahito e apî, teie te auraa o te parau i faaohipahia e Ioane na roto i te reo tumu, “e ere te faaroo i te tiaturi-noa-raa.” (Vine’s Expository Dictionary of Old and New Testament Words) No te fanaˈo i te farii maitai a te Atua, eita e navai ia tiaturi e o Iesu te Faaora. E mea tia ia tutava atoa i te faaohipa i ta ˈna i haapii. Aita anaˈe e ohipa e mea faufaa ore te faaroo, te na ô ra hoi te Bibilia: “Te faaroo aore e ohipa ra, e mea pohe atoa ïa.” (Iakobo 2:26) Te auraa, e titauhia ia faatupu i te faaroo ia Iesu ma te ora ia au i ta tatou e tiaturi ra.

Teie ta Paulo i parau no te faataa i te reira: “Te riro nei hoi matou i te aroha o te Mesia ra, no te mea te parau nei matou e, i pohe te hoê [Iesu] no te taata atoa . . . e i pohe hoi oia no te taata atoa, ia ore te feia e ora ra ia haapao faahou ia ratou iho i te oraraa nei, ia haapao râ ia ˈna, tei pohe e tei tia faahou no ratou ra.” (Korinetia 2, 5:14, 15) E turai mai te mauruuru haavare ore no te tusia o Iesu ia taui e ia ora no ˈna, oia hoi tei pohe no tatou. E haapao na mua anaˈe i ta ˈna i haapii eiaha râ i to tatou hinaaro. E taui roa ïa te mea o ta tatou e haafaufaa, e maiti e e rave. Eaha te haamaitairaa e noaa i te feia e tiaturi e e faatupu i te faaroo ia Iesu?

Te faahiti ra te tuhaa hopea o te Ioane 3:16 i te parau fafau a te Atua no te feia e faatupu i te faaroo i te hoo e tei ora ia au i ta ˈna mau faaueraa tumu. Ua hinaaro te Atua ia noaa i te feia taiva ore ‘te ora mure ore eiaha râ ia pohe.’ E piti râ tiaturiraa to te feia e fanaˈo i te here o te Atua.

Ua fafau Iesu i te ora mure ore i nia i te raˈi no te hoê pǔpǔ. Ua faaite papu Iesu i ta ˈna mau pǐpǐ taiva ore e e haere oia e faaineine i te hoê parahiraa no ratou e e faatere atu ai e o ˈna ma te hanahana. (Ioane 14:2, 3; Philipi 3:20, 21) E riro te feia e faatiahia no te ora i nia i te raˈi “ei tahuˈa na te Atua e na te Mesia, e e hau to ratou ia ˈna ra e ia hoê tausani i te matahiti.”—Apokalupo 20:6.

No te hoê noa pǔpǔ iti o te mau pǐpǐ a te Mesia tera haamaitairaa. Ua parau hoi Iesu: “Eiaha e mǎtaˈu, e tau nǎnǎ iti e; e mea hinaaro na to outou Metua i te horoa mai i te basileia no outou.” (Luka 12:32) Ehia rahiraa e vai ra i roto i teie “nǎnǎ iti?” Te parau ra te Apokalupo 14:1, 4 e: “Hiˈo atura vau, e inaha, te tia noa ra te Arenio [Iesu Mesia tei faatiahia] i nia iho i te mouˈa ra o Siona [i te raˈi], ma te taata atoa hoi i pihai iho ia ˈna, hoê hanere e maha ahuru ma maha i te tausani, ma te iˈoa o to ˈna Metua i te papairaahia i nia iho i to ratou mau rae. . . . I tauihia teie nei feia no roto i te taata nei, ei oho matamua na te Atua e na te Arenio ra.” Ia faaauhia i te mau miria taata eita e pau ia taio tei ora aˈenei e “nǎnǎ iti” noa teie 144 000 taata. E riro ratou ei arii, e faatere ïa ratou ia vai?

Ua parau Iesu e e fanaˈo te piti o te pǔpǔ o te feia taiva ore i te mau haamaitairaa no ǒ mai i te Basileia i te raˈi. Mai tei itehia i roto i te Ioane 10:16, ua na ô Iesu: “E mamoe ê atu â ta ˈu, e ere i to teie nei aua, e aratai atoa mai au ia ratou e tia ˈi, e faaroo mai hoi ratou i to ˈu reo, ia hoê aˈe nǎnǎ, e hoê hoi tiai.” Te tiai ru nei tera mau “mamoe” e ora e a muri noa ˈtu i te fenua nei mai tei opuahia na no Adamu raua Eva. E nafea te taata e ite ai e e ora o ˈna i te fenua nei a muri aˈe?

E rave rahi taime to te Bibilia faahitiraa i te oraraa i roto i te paradaiso i nia i te fenua. No te hiˈopoa i te reira e hinaaro paha oe e taio roa i roto i ta oe Bibilia i te mau irava i muri nei: Salamo 37:9-11; 46:8, 9; 72:7, 8, 16; Isaia 35:5, 6; 65:21-23; Mataio 5:5; Ioane 5:28, 29; Apokalupo 21:4. Ua faaite tera mau irava e e ore te tamaˈi, te oˈe, te maˈi e te pohe. Te faataa atoa ra i te taime e  hamani ai te feia maitatai i to ratou iho fare, e faaapu ai i nia i to ratou iho tâpû fenua e e ora ai e ta ratou mau tamarii ma te hau. * Te hinaaro ra anei oe e ora mai tera? Te vai ra te mau tumu papu no te tiaturi e e fatata roa teie parau fafau i te tupu.

A feruri ai i ta te Atua i rave no oe e no te huitaata, e ite oe e mea rahi aˈenei te ohipa ta ˈna i rave. Te vai ra ia tatou te ora, te maramarama, te tahi ea maitai, e i te hinaarohia no te ora noa. O te hoo râ te ô rahi roa ˈˈe a te Atua na roto ia Iesu tei pohe no tatou. E rave rahi â haamaitairaa ta tatou e fanaˈo, mai tei haapiihia i roto i te Ioane 3:16.

E tupu te hau, aita faahou te fifi, te maˈi, te tamaˈi, te oˈe e te pohe. E nehenehe ïa te taata e ora e a muri noa ˈtu ma te oaoa. E hinaaro anei oe e fanaˈo i tera oraraa? Na oe e faaoti. Na mua râ, a pahono i teie uiraa, eaha ta oe e rave ra no te Atua?