Мен бичиимден тура бойдуска ынак мен. Төп Финляндияда Ювяскюля дээр төрээн хоорайымдан ырак эвесте кайгамчык хөлдерни, магаданчыг арга-арыгларны чарашсынып, өг-бүлевис бо-ла ынаар баар турган бис. Дириг амытаннарга дыка ынак мен. Бичии тургаш, көрүп кааным-на ытты азы диисти куспактаксаар турган мен! Өзүп келгеш, хөй улустуң дириг амытаннарны бак аажылап турарын көргеш, дыка хомудаар мен. Чоорту дириг амытаннар камгалаар ниитилелче кирип алгаш, кээргээчел улусту тып алган мен.

Бис дириг амытаннарның эргелери дээш туржуп турган бис. Ындыг темаларга информацияны тарадып, лабораторияларга дириг амытаннар-биле опыттар кылбас кылдыр база оларның кежин садыг-саарылгага ажыглаарынга удурланып кудумчуларже үнүп турган бис. Дириг амытаннар камгалаар организация безин тургузуп алган бис. Хөлүн эрттир шыңгыы удурланып турганывыстан чагырга черлери-биле чөрүлдээлер бо-ла тургустуна бээр турган. Ол дээш мени каш удаа тудуп, хоругдап турган.

Ынчалза-даа мен чүгле дириг амытаннар дээш эвес, а бүдүн делегейде бооп турар берге байдалдар дээш дүвүреп турган мен. Оон элээн каш организацияның, оларның санында «Делегей чергелиг амнистияның» болгаш «Гринпистиң» кежигүнү апарган мен. Оларның ажыл-чорудулгазын деткиир дээш бар-ла күжүмнү үндүрүп турган мен. Оон ыңай аштап-түрээн, ядыы база өске-даа берге байдалдыг кижилерни камгалаар дээш туржуп турган мен.

Ынчалза-даа бо делегейни өскертип шыдавазымны чоорту билип эгелээн мен. Ындыг организациялар бичии-бичии бергелерни шиитпирлеп турган-даа болза, нарын айтырыглар дорайтап-ла турган. Сактырга, бо делегейни каржы-бак шыва апкан, ону кым-даа херекке албайн турар ышкаш болган. Ынчан бодумнуң чүнү-даа кылып шыдавазымны билип каан мен.

Бодумнуң күш чогумну билип кааш, Бурганның дугайында база Библияның дугайында боданып эгелээн мен. Ооң мурнунда Иегованың Херечилери-биле өөренип турган мен. Олар меңээ чылыг-чымчак хамаарылганы көргүзүп, кичээнгей илередирге, меңээ аянныг турган. Ынчалза-даа ынчан чуртталгамга өскерлиишкиннер кылырынга белен эвес турган мен. Ам бо удаада байдал көңгүс өске болган.

Библиямны тып алгаш, катап номчуп эгелээн мен. Ол мээң балыгланган чүрээмге эм ышкаш болган. Библияда дириг амытаннарга эки хамаарылгалыг болурун өөредип турар. Чижээ, Чугаалар 12:10-да: «Чөптүг-шынныг кижи мал-маганынга-даа чүү херегин билир» — дээн. Ол ышкаш Бурган кижилерниң хинчектенип чоруурунга буруу чок деп база билип каан мен. Улустуң хөй кезии Бурганның удуртулгазын херекке албайн турарындан бергелери нарыыдап-ла турар. Оон аңгыда, Иегованың ынакшылын болгаш шыдамыын билип кааш, сагыш-сеткилим дыка өөрээн (Ырлар 102:8—14).

Ынчан «Библия чүү чүвеге өөредип турар?» деп номну чагыдар купон тып алгаш, чоргузупкан мен. Удатпаанда Иегованың Херечилери келгеш, Библияны өөренирин сүмелээрге, чөпшээрешкен мен. Оон Хурал залдарында болуп турар чыыштарже барып эгелээн мен. Ооң ачызында библейжи алыс шын чүрээмге дазылданып өзүп эгелээн.

Чуртталгамны өскертип алырынга Библия меңээ дузалаан. Мен арага, таакпыдан адырылгаш, овур-хевиримни эдип чазааш, бок сөстер этпес апарган мен. Оон ыңай эрге-чагыргага хамаарылгамны өскертип алган мен (Римчилерге 13:1). Ооң мурнунда меңээ хоруглуг чүү-даа турбаан-даа болза, ам мөзү-шынар чок чуртталгамны соксаткан мен.

Киржип турган организацияларымга хамаарылгамны өскертип алыры дыка берге болган. Аңаа үе херек турган. Баштай оларның ажыл-херээнге киришпейн баар болзумза, бодумну сатыныкчы апаар мен деп бодап турган мен. Ынчалза-даа бо делегейге идегелди чүгле Бурганның Чагыргазы бээр деп билип алган мен. Ынчангаш ооң дугайында хөй улус билип алыр кылдыр ону деткип, шупту күжүмнү ынаар үндүрүп турган мен (Матфей 6:33).

Активист чорааш, мен улусту эки-багай деп ылгаар чораан мен. Оон багай деп санаарым улуска удур туржурунга белен турган мен. Ынчалза-даа Библияны өөренип эгелээш, улус ылгап көрбестээр чоруктан адырылган мен. Ам шупту улуска ынакшылды көргүзерин кызып чоруур мен (Матфей 5:44). Ол ынакшылды илередир аргаларның бирээзи — Бурганның Чагыргазының дугайында буянныг медээни улус-биле үлежири-дир. Ындыг буянныг ажыл-херектиң кижилерге өөрүшкүнү, амыр-тайбыңны болгаш ёзулуг идегелди берип турарын көргеш, аас-кежикти миннир чордум.

Иеговага ынанып өөренип алганым соонда сагыш-сеткилим оожургай берген. Ол Чаяакчы болганда, дириг амытаннарның болгаш кижилерниң төнчү чок хинчектенирин база чараш планетавыстың узуткаттырарын чөпшээревес. Бурган Бодунуң Чагыргазының ачызында кижилерни-даа, черни-даа хилинчек-човалаңдан хостаар (Исайя 11:1—9). Меңээ ёзулуг аас-кежикти чүгле алыс шынны билири эвес, а өскелерниң бүзүрелин сайзырадырынга дузалажыры эккээр. Делегейни өскертир деп ам бодавайн турар мен.