Ачазы чеди харлыг оглу-биле чугаалажып орган. «Шаг-шаанда хүннү, айны, сылдыстарны, Черни база ында бар бүгү-ле чүүлдү Бурган чаяап каан» — деп, ачазы чугаалаан. Оглу кезек бодангаш: «Ачай, а Бурганны кым чаяаган?» —деп айтырган.

Ачазы аңаа: «Бурганны кым-даа чаяаваан, Ол кезээде турган» — деп тайылбырлап берген. Амдыызында аңаа ол бөдүүн тайылбыр чедер. Ынчалза-даа ол өзүп келгеш, ол айтырыгны катап салып эгелээр. Канчап бир-ле чүүлдүң эгези чок боор чүвел деп билип алыры аңаа берге болур. Октаргайның безин эгези бар болгай. «Бурган канчап тыптып келгенил?» деп, ол элдепсинер чадавас.

Библия ол айтырыгга канчаар харыылап турарыл? Кырында чижээвисте ачазының оглунга харыылааны ышкаш. Моисей мынчаар бижээн: «Дээрги... Даглар төрүттүнериниң-даа мурнунда, чер биле өртемчейни чаяап кааныңның-даа мурнунда, үе-дүптен бээр, кезээ мөңгеде Бурган-дыр сен!» (Ырлар 89:2, 3). А Исайя медээчи мынча дээн: «Таанда-ла билбес сен бе? Таанда-ла дыңнаваан сен бе? Дээрги-Чаяакчы — чер-делегейниң бүгү кыдыгларын чаяаган мөңге Бурган-дыр» (Исайя 40:28). Ол ышкаш, Иуданың чагаазында Бурганны «бүгү үелерден бээр» турган дээн (Иуда 24—25).

Бо библейжи шүлүктер Бурганны «Мөңге Хаан» деп көргүзүп турар (1 Тимофейге 1:17). Ол дээрге эрткен үени канчаар-даа хандыр шинчилээр болзувусса, Бурган черле турган база Ол кезээде турар дээни ол (Ажыдыышкын 1:8). Ынчап кээрге, Бурганның мөңгеде бар турары — Ооң Бодундан чарып болбас онзагай бот-шынары-дыр.

Ол барымдааны угаап бодаары биске чүге берге? Чүге дээрге бистиң чуртталгавыс кыска болгаш, үеже көрүжүвүс Бурганның көрүжүнден оранчок ылгалып турар. Бурган мөңге, ынчангаш Аңаа муң чыл бир хүн-биле дөмей болур (2 Пётр 3:8). Чижээ, 50 борбак хонук чурттаар шартылаа бистиң 70 азы 80 чыл чурттаар назынывыс дугайында сагыштаалап шыдаар бе? Чок, боор оң! Өндүр Улуг Чаяакчывыска деңнээрге, бистер шартылаалар дег бис деп Библияда тайылбырлап турар. Бистиң угаап, бодаар арга-шинээвис Бурганга көөрде, шуут-ла хензиг (Исайя 40:22; 55:8, 9). Ынчангаш Иегованың бүдүжүнүң кандыг-бир талаларын угаап шыдавазывыс кайгамчык эвес.

Бурган кезээде турган деп угаап билири биске берге-даа болза, ол чүүл ужур уткалыг бооп турар. Шынап-ла, Бурганны чаяап каан турган болза, Ооң чаяакчызы база Чаяакчы боор ужурлуг. Ынчалза-даа Библияда чүгле Иегова «бүгү чүвени чаяаган» дээн (Ажыдыышкын 4:11). Оон аңгыда, Октаргай чок турган деп база билир бис (Эге дөс 1:1, 2). Ынчаарга ол кайыын тыптып келген? Октаргайны тывылдырган Чаяакчы ону мурнай-ла турар ужурлуг. Оон ыңай Ол бир дугаар угаан-сарыылдыг чаяалгаларның, Иисус болгаш дээрниң төлээлериниң, тыптып кээриниң мурнунда-ла турар ужурлуг (Иов 38:4, 7; Колосчуларга 1:15). Моон алгаш көөрге, ол кандыг-бир үе дургузунда чааскаан турган. Ону кым-даа чаяаваан. Чүге дизе ону чаяар хире өске кым-даа турбаан болгай.

Бистиң бар болганывыс, эгээртинмес Октаргайның бар болганы — Бурганны мөңгеде турган деп херечилеп турар. Ол хире улуг Октаргайда чуртталганы тургускан база ооң хоойлуларын берген Хуу-бот мөңге боор ужурлуг. Шупту дириг чүүлдү чүгле Ол тынгарып шыдаар (Иов 33:4).