Черни херек кырында кым башкарып турарыл?

Дыка хөй кижилер бо айтырыгга чаңгыс сөс-биле — Бурган деп харыылаар боор. Ынчалза-даа Библияда кайда-даа Иисус Христос азы ооң Адазы бо делегейни башкарып турар деп чугаалавааны кайгамчык. Харын-даа: «Бо делегейниң чагырыкчызы ам үндүр сывыртадыр-дыр» — деп, Иисус чугаалаан. «Бо делегейниң чагырыкчызы чоокшулап кел чор. Ооң Мени баш билир эргези чок...» деп, ол база немээн (Иоанның 12:31; 14:30; 16:11).

Ынчап кээрге, бо делегейниң баштыңы Иисустуң удурланыкчызы бооп турар. Кымыл ол?

Айтырыгның харыызы — делегейниң байдалында

Шын сеткилдиг, эң-не эки күзелдиг кижилер күжениишкиннер кылза-даа, кижи төрелгеттени кайы-даа үеде дыка хөй хилинчектенип келген. Бодалдыг кижилер ооң чылдагаанының дугайында боданып турган, чижээлээрге, чогаалчы Дейвид Лоуренстиң чугаалааны ышкаш: «„Чер кырында тайбың“ — ону кижи бүрүзү күзеп турар. „Кижилер эки чүве күзээр“ — колдуунда кижилерниң бот-боттарынга хамаарылгазы эки. Ынчаарга берге айтырыгның чылдагааны чүде бооп турар? Кижилерниң чайгаар күзели турза-даа, чүге дайын айыылы барыл?»

Ол чүүл элдеп эвес-тир бе? Кижилерниң чайгаар күзели — тайбың болгаш дыштыг амыдыраары болза-даа, хөй кижилер өскелерни көөр хөңнү чок база оларны кээргел чокка өлүрүп турар. Бодап көрүңерем, эң коргунчуг кем-херек үүлгедиглери колдуунда кайы-хире каржы болуп турар-дыр? Кижилер эң-не коргунчуг аргаларны болгаш чепсекти, ооң санында газтыг камераларны, мөөңнээн кара-бажыңнарны, огнемёттарны, напалдыг бомбаларны боду ышкаш кижилерни өршээл чокка хилинчектеп, өлүреринге ажыглап турган.

Тайбың болгаш аас-кежиктиг болурун изии-биле күзеп турар кижилер боттары ындыг коргунчуг каржыны кылыптар бе?  Кижилерни ындыг бужар чүүлдер кылырынче идип, азы оларны кажары-биле ажыглавышаан, каржыны кылыр ужурга таварышкан болур байдалды кандыг күштер тургузуп турарыл? Көзүлбес каржы күштүң салдары кижилерни күчүлелче идип турар деп, кажан-бир боданган силер бе?

Делегейниң баштыңчылары тодараттынган

Ол айтырыгга хамаарыштыр даап бодап, тып чадаар чылдагаан бисте чок. Чүге дизе аңгы кижилерни азы чоннарны бүрүнү-биле медерелдиг көзүлбес хуу-бот башкарып турар. «Бүгү делегей эрликтиң чагыргазының адаанда» — деп, Библияда бижиттинген. Ында кымыл ол деп дорту-биле чугаалап турар: «Бүгү делегейни дуурайлаан, эрлик база удурланыкчы деп адаткан» (1 Иоанның 5:19; Ажыдыышкын 12:9).

Кажан Иисусту Аза азы Эрлик күткүп турда, Аза бо делегейни башкарып турар деп барымдаадан ол ойталавайн турган. Библия ооң дугайында мынчаар чугаалаан: «Эрлик ооң соонда Ону эң бедик дагже үндүре бергеш, бо делегейниң хамык күрүнелерин бүгү өндүр чаагайы-биле көргүскеш: ”Доңгая кээп дүжүп, меңээ мөгеер болзуңарза, бо бүгүнү Силерге бээр мен”— дээн. Иисус аңаа: “Ырап чор, эрлик...” — деп харыылаан» (Матфейниң 4:1, 8—10).

Ооң дугайында бодап көрүңерем. «Бо делегейниң хамык күрүнелерин [бээр мен]» — деп, Иисусту Аза күткүп турган. Бир эвес Аза херек кырында ол күрүнелерниң башкарыкчызы эвес турган болза, ооң саналы күткүл болур бе? Чок, болбайн. Эскерип көрүңерем: ол күрүнелер шупту Азага хамааржырын Иисус меге дивээн, бир эвес ол күрүнелер Азаның эргезинде турбаан болза, Иисус ыяап-ла ону буруу шавар турган. Ынчап кээрге, Аза шынап-ла делегейниң көзүлбес башкарыкчызы бооп турар! Библия ону «амгы бо делегейниң «бурганы» деп адап турар (2 Коринфичилерге 4:4). Ынчап кээрге, ындыг каржы хуу-бот ол-хире күчүлүг байдалга кандыг арга-биле четкени ол?

Ооң мурнунда Аза Бурганның чаяаганы ангели турган, ынчалза-даа ол соонда Бурганның эргезинге адааргап эгелээн. Бурганның башкарылгазын хоойлуга дүгжүп турарын чигзиниг кырынга салган. Чылан таварыштыр бир дугаар херээженни, Еваны, мегелээн. Адам биле Ева Бурганның эвес, а ооң күзелин күүседип  эгелээннер (Бытие 3:1—6; 2 Коринфичилерге 11:3). Адам биле Еваның төлдерин шуптузун Бургандан ырадып шыдаар мен деп, Аза чарлаан. Ынчангаш аңаа бодалының шынныын бадыткаар үени Бурган берген, ынчалза-даа Азаның күзели болдунмаан (Иов 1:6—12; 2:1—10).

Аза делегейни чааскаан эвес башкарып турар дээрзин демдеглээри чогуур. Бодунуң талазынче өске ангелдерни база көгүдүп шыдапкан. Ол ангелдер ооң сүлчээчилери, буктар апарган. Оларның дугайында чугаалап тура, Библия христианнарга шыңгыызы-биле сүмелеп турар: «Эрликтиң хамык кара сагыжынга удур туржу[ңар]. Чүге дээрге бис эът-бот биле хандан бүткен улуска удур эвес... каптагайның чагырыкчыларынга база дээрлерде  бузуттуң кара күштеринге удур демисежип турар-дыр бис» (Ефесчилерге 6:11, 12).

Каржы күштерге удурланыңар

Ол көзүлбес каржы баштыңчылар бүгү кижи төрелгеттенин Бурганга шын чүдүлгеден ырадып, оон-даа улаштыр мегелээр шиитпири долу. Бурганның Сөзү тодазы-биле өлген улус медерел чок байдалда деп көргүзүп турза-даа, оларның бир аргазы — өлүм соонда чуртталга бар деп бодалды деткиири бооп турар (Бытие 2:17; 3:19; Иезекииль 18:4; Псалом 145:3, 4; Екклесиаст 9:5, 10). Каржы шулбус өлген кижиниң үнүн өттүнүп, ооң төрелдери азы эш-өөрү-биле караң көрнүр кижи таварыштыр азы көзүлбес өртемчейден «үннер» дузазы-биле чугаалажып болур. Ол «үн» — өлген кижи мен деп шынзыдып болур, а херек кырында ол шулбус-тур!

Ынчангаш кажан-бир ындыг «үн» дыңнап кагзыңарза, мегеге алыспаңар. Чүнү-даа чугаалаар болза, дыңнаваңар, Иисустуң сөстерин катап-катап чугаалаңар: «Ырап чор, эрлик» деп (Матфейден 4:10; Иаковтан 4:7). Бодуңарның сонуургак чорууңардан каржы күштер-биле харылзааны болдурбаңар. Ындыг харылзааны спиритизм деп адаар, а Бурган бодунуң бараалгакчыларынга ооң шупту хевирлеринден чайлаарын баш бурунгаар сагындырып турар. Библия «өттүр көөр кижини, төлгечини... сүлде кыйгырыкчызын... база өлгеннер айтырыкчызын» шиидип турар (Второзаконие 18:10—12; Галатчыларга 5:19—21; Ажыдыышкын 21:8).

Спиритизм кылып турар кижи азаларның салдарынга алзы бээр болганда, ооң кандыг-даа илерээшкининден чеже-даа хөглүг азы дыка-даа солун ышкаш болза, ойталап чоруңар. Спиритизмге магиялыг кристалл дузазы-биле төлгелээри, алфавиттиг планшеткага төлгелээри, экстрасенсорика, хиромантия база астрология хамааржыр. Азалар шимээннерни болгаш оон-даа өске физиктиг болуушкуннарны бажыңнарның иштинде тывылдырып турар.

Оон-даа ыңай каржы азалар бистиң бачытче туралыывысты ажыглап, мөзү чок база эр-херээжен чорукка шын эвес алдынарын суртаалдап турар ном-дептерниң, кинофильмнерниң болгаш телепередачаларның тыптырын деткип турар. Бир эвес шын эвес бодалдар-биле демисешпес болза, олар кижиге дыка күштүг салдарлыг  болурун болгаш азаларның боттарынга дөмей мөзү чок чоруктарже идерин олар билир (Бытие 6:1, 2; 1 Фесалоникажыларга 4:3—8; Иуданың 6).

Делегейни каржы күштер чагырып турар деп бодалды чамдык кижилер кыжырыыр чадавас. Улустуң ындыг бүзүрел чогу кайгамчык эвес, чүге дизе: «...эрлик боду безин чырыткылыг дээрниң төлээзиниң хевирин ап, мегелеп көстүп турар» — деп, Библия чугаалап турар болгай (2 Коринфичилерге11:14). Ооң мегезиниң эң кажар аргазы — кижилерни чүве эскербес кылдыр, ол боду база ооң азалары чок деп чүүлге бүзүредип албадаары болур. Ынчалза-даа аңаа мегелеттирбеңер! Аза болгаш ооң шулбустары — шынап бар хуу-боттар, оларга үргүлчү-ле удурланырындан силерниң чуртталгаңар хамааржыр (1 Пётрнуң 5:8, 9).

өөрүшкүлүг чүүл, Аза болгаш ооң сүлчээчилери чок болур үе чоокшулап орар. «Бо делегей [ооң аза баштыңчылары-биле кады]... эстип хайлы бээр. А Бурганның күзел-соруун күүседип чоруур кижи мөңге амыдыраар» (1 Иоанның 2:17). Оларның каржы салдарындан адырлыры кайы-хире онза хосталыышкын болур-дур! Бурганның күзелин күүседип турар база ооң шынчы чаа чуртталгазынга мөңге өөрүп турар улустуң аразында болур кылдыр кызыдаалыңар (Псалом 36:9—11, 29; 2 Пётрнуң 3:13; Ажыдыышкын 21:3, 4).

Синодалдыг үндүрүлгеден очулдурган, а Христиан Грек Бижилгелер (Новый Завет) — «Чаа Дугуржу­лга-Чагыгдан» бердинген.

[4 дугаар арын, чурук]

Черде күрүнелер Эрликтиң эргезинде турбаан болза, ол оларны Иисуска бээр мен деп шыдаар турган бе?