Ta pajel chaʼbej ya xbajt ayinuk lamalkʼinal liʼ ta Balumilal, pero ma jaʼuk ta swenta te ants winiketik, jaʼ ta swenta te Wentainel yuʼun te Dios, jun wentainel te ay ta chʼulchan sok jaʼ ajwalil te Jesucristo. Ilawil bin-utʼil te Biblia jamal ya yal te ya xkʼot ta pasel spisil ini.

1.   Te Dios «jcʼaxel ya yacʼ quehchajuc guerrahetic cʼalal ta stiʼil bahlumilal», jich ya xkʼot ta pasel te skʼanojel yoʼtan te «ay lamal quinal ta bahlumilal, [...] ta stojol te ants winiquetique» (Salmo 46:9; Lucas 2:14).

2.   Te Wentainel yuʼun Dios ya swentain swolol te Balumilal sok ya xbajt slajin te bitʼil xatoj sba te lumetik o te nacionetik te yakʼojik bayal wokolil (Daniel 7:14).

3.   Te Jesús, te Ajwalil yuʼun te Wentainel yuʼun te Dios, jaʼ te «ajwalil yuʼun lamal qʼuinal». Jaʼ ay ta swenta yilel te maʼyuk bin-ora ya xlaj te lamalkʼinal (Isaías 9:6, 7).

4.   Kʼalal ya xwentainwan te Dios, spisil te machʼatik yato smulan spasel te bin ma lek, ya yichʼik lajinel, melel te Dios ya spʼaj te machʼa ya smulan utsʼinwanej (Salmo 11:5; Proverbios 2:22).

5.   Te Dios ya snojptesotik yuʼun ya xkuxinotik ta lamalkʼinal. Jaʼ yuʼun te Biblia, jich ya yal: «Ya scʼatpʼunic ta arado te espada yuʼunic, soc te slanzahic ya scʼatpʼunic ta hoz. Mayuc nación ya shach espada ta scontrahinel yan nación, soc ma ba ya schahpanix sbahic ta yaqʼuel guerra» (Isaías 2:3, 4).

 Bayal millón ta tul testigoetik yuʼun Jehová ta swolol balumilal, yakik ta snopel te yakuk yakʼik ta ilel slamalil yoʼtanik (Mateo 5:9). Yanyantik-a te jtsʼumbaltik sok kuxinemotik ta kʼaxem ta 230 nacionetik sok territorioetik sok maʼyuk machʼa ya kutsʼintik.