Maʼyuk jich jpasojkotik-abi. Melel ay jelojkotik te bintik jchʼuunejkotik te kʼalal ya jtatik ta ilel te ay ma stsak sba sok te bintik ya yakʼ ta nopel te Bibliae.

 Spisil te bintik jchʼuunejkotike lokʼem ta sKʼop te Diose. Manchukme ta yaʼbilal 1950 kaj jpuktik te Traducción del Nuevo Mundo, jaʼukmeto te kʼalal mato staojuk te jaʼbil-abi yakotikix ta snopel ta lek-a te Bibliae. Jich yuʼun jaʼ la jtuunteskotik-a te yantik versión yuʼun te Biblia te lokʼemikix-ae. Akʼa kiltik chaʼoxchajp te bin jchʼuunejkotikix-a te kʼalal mato ayuk-a te Traducción del Nuevo Mundo. Jaʼatnix ya xjuʼ ya awil teme ya stsak sba sok te bin ya yal te Bibliae.

1.   Te bin jchʼuunejkotik: Te Diose ma jaʼuk oxeb dios te junax ayike Ta julio yuʼun 1882 te revista Zionʼs Watch Tower (ta kʼajkʼal ini ya sbiilin ta español La Atalaya) jich la yal: «Te machʼatik ya skʼoponik te revista ini ya snaʼik te manchukme jchʼuunejkotik te Jehová Dios, te Jesús sok te chʼul espiritue, ya jpʼajtik te nojptesel te ay oxeb dios te junax ayike, o te ay chaʼoxtul ya yalik te ay junax Dios te oxeb lokʼem-ae, melel ma jichuk ya yakʼ ta nopel ta jkʼaxel te Bibliae».

     Te bin yal te Bibliae: «Te Jehová te Dios cuʼuntic, jtuhl nax te Jehová». (Deuteronomio 6:4, Scʼop Dios Tzeltal yuʼun Bachajón). «Jun nax Dios ay cuʼuntic, jaʼ te Tatile. Jaʼ la spas spisil te bitic aye soc jaʼ yuʼunotic uuc. Soc jun nax te machʼa cajwalinejtique, jaʼ te Jesucristoe.» (1 Corintios 8:6, Xchʼul Cʼop Dios ta Tzeltal yuʼun Oxchuc soc Tenejapa). Jaʼnix te Jesús la yal «jaʼ kajal kuʼun te Tatile» (Juan 14:28, Achʼ Testamento).

2.   Te bin jchʼuunejkotik: Te machʼatik chopolik maba ya xwoklajik ta chikʼel ta infierno sbajtʼel kʼinal. Te revista Zionʼs Watch Tower ta junio yuʼun 1882 yichʼoj jun artículo te la sbiilin: «Te stojol te mulil, ha te lajele». Te kʼopiletik ini lokʼesbil ta Romanos 6:23, te artículo la yal: «¡Jamal chikan ta aʼiyel sok maba wokol ya xkʼot ta koʼtantik te kʼopiletik ini. Ma xkʼot ta koʼtantik bin yuʼun te bayal ants winiketik te ya yalik te jaʼ sKʼop Dios te Biblia sok te ya skontrainik te bin ya yal te versículo ini, ya schʼuunik sok yalik te jich ya yakʼ ta nopel te Biblia, te stojol te mulil jaʼlaj te chikʼel ta infierno ta sbajtʼel kʼinal».

     Te bin ya yal te Bibliae: Te castigo ya staik te skontratak te Diose ma jaʼuk te ya xwoklajik ta chikʼel ta sbajtʼel kʼinale, jaʼnax «chʼayel [o lajel] sbajtʼel qʼuinal» 2 Tesalonicenses 1:9, Xchʼul Cʼop Dios ta Tzeltal yuʼun Oxchuc soc Tenejapa).

3.   Te bin jchʼuunejkotik: Te Ajwalinel yuʼun te Diose jaʼ te bitʼil ya kichʼtik wentainel yuʼune, ma jaʼuk te ay ta yutil koʼtantike. Te revista Zionʼs Watch Tower ta diciembre yuʼun 1881 jich la yal ta swenta te Ajwalinel yuʼun te Diose: «Te kʼalal ya xjajch ta pasaw ta mantal te Ajwalinel yuʼun te Diose, jaʼme ya slajin spisil ta chajp te bitʼil ya xmantalaj te ajwaliletik ta Balumilale».

     Te bin ya yal te Bibliae: «Te cʼalal ay yaʼtelic ta mucʼul ajwalil ahe, te Dios ta chʼulchan ya me yotses jun jmandarteswanej te sbahtel qʼuinal ma ba ya xlaje, soc te mayuc bin ora ya xʼuuntayot yuʼun yan nación. Haʼ me ya slajinlan ta jyahlel te yantic ajwaliletique, ha nax me mucʼul ajwalil ya xhil ta sbahtel qʼuinal stuquel» (Daniel 2: 44, Antiguo Testamento Tzeltal yuʼun Bachajón).

 Maʼuk, te joʼonkotike ya jtuunteskotik bayal versión yuʼun Bibliaetik ta swenta yakʼel ta naʼel te bintik jchʼuunejkotike. Melelnix-a te kʼalal ya kakʼkotik te nojptesel yuʼun Biblia te maba tojbile, ya japkotik jpajkuk te Traducción del Nuevo Mundo te ma tojbiluke. Jaʼukmeto teme ay machʼa ya skʼan ya snop te Biblia ta yan versión maʼyuk bin ya kalkotik yuʼun.