Te stestigotak te Jehová maba ya spasik kʼin te kʼalal ya xlokʼ yaʼbilalike, melel kʼoem ta yoʼtanik te ma skʼan Dios te jich ya spasike. Manchukme maba ya yal ta Biblia te ma lekuk te kʼin ini, jaʼukmeto ay chaʼoxchajp te bin ya skoltayotik ta snaʼel te bin yilel ya yil Dios te kʼin yuʼun te ya xlokʼ kaʼbilaltike. Akʼa kiltik chanchajp swentail sok te bin ya yakʼ ta nopel te Bibliae.

1.   Te kʼin yuʼun te machʼa ya xlokʼ yaʼbilalik lokʼem tal ta lotil relijionetik. Jun diccionario enciclopédico ya yalbey skʼoplal ta swenta te kʼin ini te lokʼemlaj tal ta bintik chʼuunbil te kʼalal ya xlokʼ yaʼbilalike, «te espirituetik sok te yuʼel te bintik chopole yalaj x-utsʼinotik yuʼun te machʼatik ya spasik te kʼin ini» jaʼ yuʼun yalaj «xkanantayotik te kʼalal ya xkʼotik yamigotakik sok te ya yichʼik albeyel kʼopiletik te ya x-akʼbotik lek suerte yuʼunike» (Funk & Wagnalls Standard Dictionary of Folklore, Mythology, and Legend). Ay yan libro ya yal ta swenta te bintik ya yichʼ pasel ta namey kʼinal te yalaj yakʼik ta jun te bin-kʼajkʼalil ya x-ayinike, melel «bayal skʼoplal yuʼun jichlaj ya schajpanik te horóscopo» te slokʼesbil «ta bintik ya yichʼ nopel yuʼun astrologia». Te libro ini jich ya yalxan: «Te bintik schʼuunejik ta swenta te vela yuʼun te kʼin te machʼa ya xlokʼ yaʼbilale yichʼoj magia yuʼun jich ya x-akʼbotik te bintik ya skʼanbeyike» (The Lore of Birthdays).

    Jaʼukmeto te Biblia ma lekuk ya yil te magia, te naʼojel sok te machʼatik ya skʼoponik chopol espirituetik o yantikxan te pajal sok ini (Deuteronomio 18:4; Gálatas 5:19-21). Ta melel, te bin yuʼun la yichʼ akʼbeyel castigo yuʼun Dios te antiguo lum Babilonia, jaʼ ta skaj te la snopik te astrologia te jaʼnix smakojbey skʼoplal-euk te naʼojele (Isaías 47:11-15). Manchukme te stestigotak te Jehová maʼyuk bayal skʼoplal ta yoʼtanik te banti chiknajem tal ta jujunchajp te costumbreetike o te kʼinetike, jaʼukmeto ma xjuʼ ta kʼaxuntayel te mantaliletik te jamal ya yal ta Biblia ta swenta te yaʼtel te chopol espirituetike.

2.   Te sbabial jchʼuunjeletik yuʼun Cristo ma la spasik-euk te kʼin yuʼun te ya xlokʼ yaʼbilalike. Jun enciclopedia ya yal ta swenta te sbabial jchʼuunjeletik yuʼun Cristo te «jich la yilik te biluk kʼin yuʼun te ya xlokʼ yaʼbilalike jaʼ jun costumbre te lokʼem tal ta lotil relijionetike» (The World Book Encyclopedia).Te Biblia ya yal ta swenta te jpuk-kʼopetik soknix te machʼatik la snojptes te Jesús te kʼalal ay ta Balumilal-ae la yakʼik ta naʼel te bin talelil ya skʼan ya stʼunik spisil te jchʼuunjeletik yuʼun te Cristoe (2 Tesalonicenses 3:6).

3.   Te jun mantalil la yichʼik albeyel te ya skʼan spasbeyik snaʼojibal te jchʼuunjeletik yuʼun te Cristoe, jaʼ te slajel te Jesuse ma jaʼuk te kʼalal ayine (Lucas 22:17-20). Jaʼ ini ma chajpuknax ya kaʼiytik melel te Biblia jich ya yal: «Ha lec xan a te bin cʼahcʼalil ya xcham te bin utʼil te bin cʼahcʼalil ayine» (Eclesiastés 7:1). Kʼalal ta slajibal skuxlejal te Jesús liʼ ta Balumilal lek skʼoplal kʼot ta stojol Dios, ta swenta-abi jaʼ bayalxan skʼoplal te bin kʼajkʼalil laje ma jaʼuk te kʼalal ayine (Hebreos 1:4).

4.   Maʼyuk jtuluk j-abat yuʼun Dios te ya yichʼ tael ta Biblia te la spas kʼin te kʼalal lokʼ yaʼbilale. Ma yuʼunuk malaj yichʼ tsʼibayel, melel te Biblia ya yalbey skʼoplal chaʼtul te machʼatik la spasik kʼin te kʼalal lokʼ yaʼbilalike, jaʼukmeto ma jaʼuk j-abatetik yuʼun Dios. Te Biblia ma lekuk ya yalbey skʼoplal te cheb kʼinetik ini, melel ay bin ma lekuk la spasik tey-a (Génesis 40:20-22; Marcos 6:21-29).

 Jich bitʼil jtul lekil tatil, te stestigotak te Jehová kʼux ta yoʼtanik te yal snichʼnabike. Jaʼ yuʼun ta biluk ajtalil ya yakʼbeyik smajtʼan sok ya schajpanik kʼin sok yantikxan bintik ya spasik yuʼun bujtsʼan kʼinal ya yaʼiyik-a. Ya spasik tulan ta skʼayinbeyel stalel te Diose te ya yakʼbey spisil-ora te bintik lek te j-abatetik yuʼune (Mateo 7:11). Ta swenta-abi te yal snichʼnabik te stestigotak te Jehovae maba jich ya yaʼiy sbaik te ay bin lek maba ya staik yuʼune. Ay bintik yalojik te jich ya yakʼ ta ilele:

•   «Jaʼ kʼax lekxan te ya kichʼtik akʼbeyel majtʼanil te kʼalal maba jnaʼojtike» Jich la yal te (Tammy, te lajchayeb yaʼbilale.)

•   «Te jmeʼ jtate ma xyakʼbonik jmajtʼan te kʼalal ya xlokʼ kaʼbilale, jaʼukmeto ya yakʼbonik ta yantik kʼajkʼal. Jaʼ ya jmulan te ma xyalbonik te bin kʼajkʼalil ya yakʼbonik te jmajtʼane» Jich la yal te (Gregory, te bulucheb yaʼbilale.)

•   «Te alaletike jaʼnax ya sweʼik pastel sok ya xkʼayojinik. Te kʼin ini ma jmulan, jaʼ kʼax lekxan te kʼin te ya jpas ta jnae» Jich la yal te (Eric, te wakeb yaʼbilale.)