Te bantito ya yichʼ ilel spisil te aʼtelil kuʼunkotike, jaʼ ta Estados Unidos. Jaʼukmeto maba joʼonkotik jun secta yuʼun Estados Unidos. Ay chaʼoxchajp te bin yuʼun jich ya kalkotike:

•   Ay chaʼoxtul te ya yalik ta swenta te secta jaʼlaj jtsojb ants winiketik te lokʼemik tal ta jun relijion te chiknajemnanix-ae. Te testigoonkotik yuʼun Jehová maba lokʼemonkotik tal te jun relijion. Yakonkotik ta spasel tulan ta stʼunel te bintik la spasik te jchʼuunjeletik ta sbabial siglo.

•   Te stestigoonkotik yuʼun Jehová yakonkotik ta aʼtel ta doscientos treinta nacionetik sok ta lumetik. Chikan te bayuk nainemonkotike, jaʼnax stukel jun koʼtankotik ta stojol te Jehová sok te Jesucristo, ma jaʼuk te ajwalil yuʼun te Estados Unidos sok yantikxan ajwaliletik (Juan 15:19; 17:15, 16).

•   Jaʼ ya jchʼuuntik te bintik ya yakʼ ta nopel te Bibliae, ma jaʼuk te bintik tsʼibaybil yuʼun jtul jwolwanej relijion ta Estados Unidos (1 Tesalonisense 2:13).

•   Jaʼ jtsʼaklinwanejonkotik yuʼun te Jesucristo, maba ya tsʼaklinkotik jtul winik (Mateo 23:8-10).