Li ta teʼtikaltik Amazona ta Sudamericae, ti nom xil li mukʼta jteklume, te nakal krixchanoetik ti jelajtik snitilulalik, slumalik xchiʼuk skʼopike. Li ta julio ta 2017, 13 stestigotak Jeova batik ta cholmantal ta stiʼiltak ukʼum Maroní xchiʼuk ti bu to chkʼot li yoktak ukʼum ta slokʼeb kʼakʼal ti te xkom ta Guayana Francesae. Taje jaʼ ta skoj ti oy ta yoʼontonik yalbel krixchanoetik li spatobil oʼontonal chakʼ Vivlia li buchʼutik te nakalik ta stiʼiltak ukʼume.

Kʼalal skʼan toʼox jun u xbatik li ta stiʼiltak ukʼum Maroní ti chjalij 12 kʼakʼale, li buchʼutik batike la stsob sbaik sventa xchapan sbaik. Jun ti buchʼu bat ek ti Winsley sbie, xi chvul ta sjole: «La jkʼelkutik lek bu xkom, la jchanbekutik sloʼilal ti bu chibatkutike. Jech xtok, te laj kilkutik kʼusi skʼan xkichʼkutik batel». Laj yichʼik batel s-amakaik xchiʼuk spabeyonik xchiʼuk la sabeik lek yavil sventa mu xtʼuxij. Sventa xkʼotike, chaʼkot to avion la stsakik batel xchiʼuk epal ora batik ta kanova.

¿Kʼu van yelan laj yaʼi sbaik li buchʼutik albatik ti xuʼ xbatike? Li Claude xchiʼuk Lisette ti te xa van ta 60 sjabilalike lek tajek laj yaʼiik ti albat ti xuʼ xbatike. Xi chal li Claudee: «Ximuyubaj tajek, pe chixiʼ jutuk xtok. Yuʼun yalojbeikun ti lek tsots yok li ukʼume xchiʼuk ti oy tonetik ta yut li ukʼume». Yan li Lisette yan-o kʼusi tsvul yoʼonton, xi chale: «Mu jnaʼ kʼuxi ta jcholbe mantal li buchʼutik yan-o kʼopike, yuʼun mu jnaʼ xikʼopoj li ta kʼopetik taje».

Jaʼ jechtik laj yaʼi sba li Mickaël ti bat eke. Xi chale: «Jutuk tajek kʼusi jnaʼkutik ta stojolal li jwayanaetike. Jaʼ yuʼun, la jsabe skʼoplal ta Internet. La jchan jpʼelantik kʼop xchiʼuk ti kʼuxi xuʼ jkʼopon kʼotel ta skʼopik li krixchanoetike».

Li Shirley ti bat xchiʼuk smalal ti Johann sbie, la stsak ta jun lista li jeltos kʼopetik chkʼopojik li ta stiʼiltak ukʼume. Xi chal li Shirley: «Jutuk mu la jyaleskutik skotol videoetik ta jw.org li ta kʼopetik taje xchiʼuk la jtakutik jlik livro ti chal jpʼelantik kʼopetik ta wayanae».

Li ta martes 4 yuʼun julioe, li jtsop ermanoetike lokʼik batel ta avion ta Saint-Laurent, laje te kʼotik ta Maripasoula ti jaʼ jun bikʼit jteklum ta yutil Guayana Francesa.

Laje, chanib kʼakʼal xanavik ta kanova ti ta motor ch-abteje ti piraguas sbi xtoke. Te la xcholik batel mantal ta stiʼiltak ukʼum Maroní. Li Roland eke laj yal ti la staik junantik krixchanoetik ti oy sbatsʼi kʼopik ti lek laj yaʼiik li kʼusi chal Vivliae. Xi to chale. «Ep tajek kʼusi la sjakʼbunkutik xchiʼuk junantike tskʼan chchanik Vivlia xchiʼuk voʼonkutik».

Ta jun jteklume, li Johann xchiʼuk Shirley te laj yojtikinik jun nupultsʼakal ti jaʼtik toʼox la smil sba jun sprima li antse. Li Johanne laj yal ti laj yakʼbeik yil li video Un indio americano encuentra a su Creador ti te lokʼ ta JW Broadcastine. Xi to chal batele: «Solel kʼot ta yoʼontonik xchiʼuk laj yakʼbunkutik skorreo elektronikoik sventa jkʼopon jbakutik».

Laje, kʼotik ta Antecume-Pata ti bu mas to nome. Li bankilal yuʼunik li ta bikʼit jteklum taje laj yakʼ ti xuʼ te xkux yoʼontonik li stestigotak Jeova ti bu oy sjokʼanoj s-amakaike. Te atinik xtok li ta ukʼum jech kʼuchaʼal nopem xaʼiik spasel tee.

Laje, li uni jtsop stestigotak Jeovae batik ta Twenké. Kʼalal kʼotike, chat tajek yoʼontonik li krixchanoetik tee, yuʼun cham jun yutsʼ yalalik. Li Éric ti jaʼ la xchapan li cholmantale, xi chale: «‹Li mukʼta vinik› ti jaʼ jech chalbeik li bankilal yuʼunik li ta jteklum taje laj yal ti xuʼ xi xanavkutik li ta uni bikʼit lume xchiʼuk ti jpatbekutik yoʼonton li buchʼu tskʼanike. Li bankilal yuʼunik xchiʼuk li yutsʼ yalale la stojik ta vokol ti la jkʼelbekutik tekstoetik ta Vivlia ta wayana kʼope. Laj kakʼbekutik yilik xtok videoetik ti chalbe skʼoplal li chaʼkuxesele».

Laje, te batik ta Grand-Santi. Mi ta avion chbatike, te van oʼlol ora xil Maripasoula li uni bikʼit jteklum taje ti bu chanav batel li yokʼ ukʼume. Li ta martes xchiʼuk ta mierkolese, li jtsop jcholmantaletike laj yalbeik krixchanoetik li kʼusi chal Vivliae. Li ta juevese, batik ta Maroní jaʼ to ti kʼuxi kʼotik ta Apatou. Te van voʼob ora xchiʼuk oʼlol xanavik batel li ta ukʼume.

Li ta viernes ti jaʼ xa slajeb kʼakʼal te oyike, li jtsop jcholmantaletike ay svulaʼanik li jteklumetik ta maroone. Li buchʼutik te nakajtike te likemik tal ta África ti la toʼox yichʼik ikʼel batel ta mosoil ta Sudamérica kʼalal pasbilik toʼox ta mantal li Surinam ti jaʼ jun jteklum ti nopol xilike. Li stestigotak Jeovae te la svaʼanik epal karpanaetik xchiʼuk la staik ta ikʼel buchʼuuk noʼox ta jun tsobajel ti la spasike. Xi chal li Claudee: «Kʼalal laj kilkutik ti talik epal krixchanoetike, limuyubajkutik tajek. ¡Yuʼun jaʼ toʼox la jtakkutik ta ikʼel li ta sobe!». Li Karsten ti jaʼ to bat ta sba velta li ta teʼtikaltik Amazonae, te laj yal jun mantal ta aucano kʼop ti xi sbi li mantale: «¿Mi jaʼ noʼox van te chpaj-o li kuxlejal liʼe?». Li ta tsobajel taje, kʼotik 91 krixchanoetik ti likemik talel ta jeltos bikʼtal jteklumetike.

Vaʼun, kʼot yorail ti sutik batel ta Saint-Laurent li jtsop jcholmantaletike. Ta skoj ti lek la xchʼamik mantal li krixchanoetike, solel xmuyubajik noʼox. Laj yiktaik epal vunetik xchiʼuk laj yakʼik ta ilel epal videoetik ti jaʼ spasojik li stestigotak Jeovae.

Xi chal li Lisette: «Mu x-al kuʼun kʼu to yepal ximuyubaj ti li-ay li ta cholmantale». Jaʼ jech chaʼi sba li Cindy eke: «Mi laj yalbeikun yan velta mi ta jkʼan chibate, muʼyuk ta jnop chib velta. Sventa xanaʼ kʼu yelane, ¡skʼan xabat!».

Ti kʼusi la snuptanike, tijbat-o yoʼonton junantik sventa sutik batele. Xi chal Mickaël: «¡Chapalunkutik xa sventa xisutkutik batel!». Li Winsleye te bat ta naklej ta Saint-Laurent. Yan li Claude xchiʼuk Lisette te batik ta naklej ta Apatou.