Li Marta ti jaʼ jun stestigo Jeova ta Guatemalae, yakal chchan kekchí kʼop sventa xcholbe mantal li buchʼutik jech skʼopike. Jun kʼakʼale laj yil lokʼtal ta ospital jun vinik. Xvinaj ti te likem tal ta vitstikaltik yuʼun li jteklum kekchíe, ti bu muʼyuk to mas yichʼoj cholel mantale. Vaʼun, li Martae nopaj batel xchiʼuk la skʼopon ta kekchí akʼo mi jutuk tajek snaʼ.

Laj yalbe mi tskʼan chchan Vivlia li vinike. Ta sjunul yoʼonton la xchʼam, pe laj yal ti muʼyuk stakʼin sventa xichʼ chanubtasele. Li Martae laj yalbe ti ta moton chchanubtasvanik li stestigotak Jeovae. Laj yalbe xtok ti xuʼ chchanik Vivlia ta telefono xchiʼuk li yutsʼ yalale. Lek laj yaʼi li vinike. Li Martae laj yakʼbe li livro ¿Kʼusi chchanubtasvan ta melel li Vivliae? Ta kekchí kʼop. Ta skoj ti snaʼ español li vinike, laj yakʼbe xtok jlik Vivlia ta español, li Xchʼul Kʼop Dios sventa Achʼ Balumil. Kʼalal echʼ xa ox jun xemanae, li vinik xchiʼuk yajnil xchiʼuk li chaʼvoʼ xnichʼnabtake lik xchanik Vivlia ta telefono. Chib to velta ta xemana chchanik. Xi chal li Martae: «Ta skoj ti mu jnaʼ lek kekchíe, ta español ta jchankutik, yuʼun li xnichʼnabtake snaʼik español xchiʼuk li vinike ta sjelubtasbe li yajnile».

Li vinik taje jaʼ pastor li ta srelijione xchiʼuk jaʼ xa chakʼ ta chanel li kʼusi yakal chchan ta Vivliae. Li buchʼutik te chkʼot ta srelijione la skʼupinik tajek, jaʼ yuʼun la sjakʼik bu sta li achʼ chanubtasele. Kʼalal laj yalanbee, kʼunkʼun lik xchiʼinik kʼalal chichʼ chanubtasel li vinike. Ta tsʼakale, 15 xa krixchanoetik tstsob sbaik jujun xemana sventa xchanik Vivlia ta telefono xchiʼuk li Martae. Jaʼ yuʼun, sventa xaʼiik li kʼusi chal Martae laj yakʼik jun mikrofono li ta selulare.

Kʼalal laj yalbe moletik ta stsobobbail li Martae, bat skʼelik li krixchanoetik taje. Laj yalbe ti xbat yaʼiik jun mantal ti lokʼem ta Vivlia ti jaʼ tsjelubtas jun jkʼelvanej ta sirkuito a ti te yan jteklume. Sventa xkʼotik li ta jteklum taje, skʼan xanavik jun ora ta karro xchiʼuk chib ora ta yokik. 17 ta voʼ batik sventa xaʼiik li mantale.

Kʼalal echʼ jayibuk xemanae, li jkʼelvanej ta sirkuito xchiʼuk yan stestigotak Jeovae batik chanib kʼalal ti bu nakalik li buchʼutik yakal chichʼik chanubtasel ta Vivliae. Li ta jujun sobe tskʼelik li videoetik ta jw. org ta kekchí kʼop xchiʼuk chchanik li foyeto ¿Buchʼutik tspasik li kʼusi tskʼan yoʼonton Jeova avie? Li ta mal kʼakʼale tskʼelik li kanal JW Broadcasting. li jkʼelvanej ta sirkuitoe laj yal ti akʼo xichʼik chanubtasel ta jujuntale.

Li chanib kʼakʼal taje, li stestigotak Jeovae la xcholik mantal li ta spat xokon jteklum ti ta kekchí chkʼopojike xchiʼuk la stakik ta ikʼel li krixchanoetik ta jun tsobajel ti tsots skʼoplale. Kʼotik 47 ta voʼ krixchanoetik xchiʼuk laj yichʼik albel mi tskʼanik chanubtasel ta Vivlia. 11 ta chop utsʼ alalil la skʼanik.

Echʼ jayibuk ue, li moletik ta tsobobbaile la xchapanik ti teuk x-echʼ tsobajeletik ta jujun xemana li ta jteklum taje. Li avie 40 xa krixchanoetik tstsob sbaik. Labal sba tajek ti la stsob sbaik 91 li ta Snaʼobil slajel Kristoe.

Xi chal Marta ta sventa ti kʼuxi lik talel xchiʼuk ti kʼusi kʼot ta pasele: «Ta jtojbe ta vokol Jeova. Yuʼun bakʼintike mu epuk kʼusi tspas kuʼun chkaʼi, pe jaʼ tstunesutik li Diose. Snaʼoj li kʼusi oy ta yoʼonton li krixchanoetik taje xchiʼuk laj yikʼan tal ta steklumal. Jamal xvinaj ti skʼanojan tajek li Jeovae».