Livokʼ ta La Ceiba (Honduras). Laj yil voʼob yalab xnichʼnabik li jtot jmeʼe: chanvoʼ tsebetik xchiʼuk voʼon li xkʼoxilune. Jtuk noʼox ti makal jchikin livokʼe. Te toʼox nakalunkutik ta jun kolonia ti xibal sbae xchiʼuk povreunkutik tajek. Mas to laj kil jvokolkutik kʼalal cham ta yabtel li jtote. Chanib toʼox jabilal.

 Li jmeʼe laj yakʼ tajek yipal sventa xchabiunkutik xchiʼuk bakʼintik to oy stakʼin sventa sman jkʼuʼkutik. Ta skoj ti chʼabal mas jkʼuʼkutike, chilajkutik ta sik, mas to kʼalal chakʼ voʼe.

 Ta kʼunkʼun lik jchan li senya kʼop ta Honduras (LESHO), vaʼun jaʼ jech lik jchiʼinan li buchʼutik makal xchikinike. Pe mu snaʼik senya kʼop li jmeʼ xchiʼuk li jvixobtake. Jaʼ noʼox tskʼoponikun li ta senya ti kʼu yelan nopem xkaʼikutik ta jnae. Akʼo mi jech, lek tajek la xchabiun li jmeʼe. Akʼo mi mu snaʼ lek li senya kʼope, la spʼijubtasun sventa mu xlik sikʼolajkun o xlik kuchʼ pox. ¡Ta jtojbe ta vokol ti la skoltaun sventa mu jech jpase!

 Kʼalal kʼoxun toʼoxe, chikʼun batel ta chʼulna li jmeʼe. Pe mi jsetʼuk kʼusi chkaʼibe smelolal, yuʼun muʼyuk buchʼu chalbun li kʼusi yakal chalike. Kʼalal lajuneb xa ox jabilale, lichʼajub tajek, vaʼun muʼyuk xa libat li ta chʼulnae. Pe oy onoʼox ta koʼonton ti xkojtikin li Diose.

 Li ta 1999, kʼalal 23 toʼox jabilale, laj kojtikin jun ants ta Estados Unidos ti chkʼot ta jun relijione. La xchanubtasun ta Vivlia xchiʼuk ta senya kʼop ta Estados Unidos. La jkʼupin tajek li kʼusi la jchane, jaʼ yuʼun li-och ta pastor. Vaʼun, libat ta naklej ta Puerto Rico ti bu chichʼik chanubtasel ta jun relijion li pakʼchikinetike. Kʼalal lisut ta La Ceiba ta 2002, la jlikes jun relijion sventa pakʼchikinetik ti jaʼ la skoltaikun li kamigotake xchiʼuk li Patricia ti jaʼ linupun xchiʼuk ta tsʼakale.

 Ta skoj ti voʼonun pastor li ta jrelijione, chkal mantaletik ta senya kʼop ta LESHO xchiʼuk chkakʼ ta ilel lokʼoletik ti lokʼemik ta Vivliae. Jech xtok, bakʼintik chkakʼ ta ilel sventa xaʼiik li buchʼutik makal xchikinike. Bateltike chbat jvulaʼan li buchʼutik makal xchikinik ti te noʼox nopol nakalik sventa jpatbe yoʼontonik xchiʼuk jkoltaik kʼalal chil svokolike. Jech xtok, libat ta misioneroal ta Estados Unidos xchiʼuk ta Zambia. Ti melel xkaltike, mu masuk jnabe skʼoplal li Vivliae, jaʼ noʼox ta xkalilan li kʼusi yalojbeikune xchiʼuk li kʼusi kaʼiojbe smelolal ta lokʼoletike. Yuʼun ep kʼusi ta jakʼbe jba ek ti mu jnabe stakʼobile.

 Jun veltae, junantik antsetik ta jrelijione la sjutik jmul. Laj yalik ti chiyakube xchiʼuk ti ta jmukulsati li kajnile. ¡Toj kʼux laj kaʼi li kʼusi laj yalike! Ta tsʼakale, laj kiktakutik komel xchiʼuk Patricia li jrelijionkutike.

 Ep xa onoʼox ta velta la svulaʼanunkutik xchiʼuk Patricia li stestigotak Jeovae, pe muʼyuk la jchikintabekutik. Kʼalal kiktaojkutik xa ox kʼuk sjalil li jrelijionkutike, li Patriciae la xchʼam ti x-akʼbat chanubtasel ta Vivlia yuʼun jun nupultsʼakal ti Thomas xchiʼuk Liccy sbie. Toj labal sba laj kil ti snaʼik senya kʼop akʼo mi muʼyuk makal xchikinike. Ta stsʼakal jutuke lik jchan xchiʼukik.

 Te van jayibuk u la jkʼelkutik videoetik ta senya kʼop ti chkʼopojik ta Estados Unidose. Vaʼun, li junantik kamigakutike la sjutbeik smul li stestigotak Jeova ti jaʼ noʼox la jun vinik tstsʼakliike, jaʼ yuʼun laj kiktakutik xchanel li Vivlia xchiʼukike. Akʼo laj yakʼbun ta ilel sprevailtak Thomas ti maʼuk tstsʼakliik jun vinik li stestigotak Jeovae, pe muʼyuk la jchʼunbe.

 Kʼalal echʼ xa ox jayibuk ue, li Patriciae ipaj ta tsatsal at-oʼonton. Vaʼun, la skʼanbe Dios ti akʼo xvulaʼanat yan velta yuʼun li stestigotak Jeovae. Ta tsʼakal jutuke, ay kʼelatuk yuʼun jun jlakʼnakutik ti jaʼ stestigo Jeovae, vaʼun laj yal ti chalbe Liccy ti akʼo xtal kʼelatuk li Patriciae. Kʼot ta lekil amigail li Liccy, yuʼun jujun xemana chtal patbatuk yoʼonton xchiʼuk chtal chanubtasatuk ta Vivlia. Pe li voʼone mu jpat-o koʼonton ta stojolal li stestigotak Jeovae.

 Li ta 2012, li stestigotak Jeovae la spasik jun kampanya sventa xakʼik ta ilel li video ¿Mi chakʼan chanaʼ li kʼusi melele? ta senya kʼop. Laj yakʼbunkutik ta ilel video li Liccy, kʼalal laj kile, mu jchʼun laj kaʼi li kʼusi laj kile. Yuʼun ep tajek li chanubtaseletik chkakʼ toʼox ta chanele jech kʼuchaʼal li kʼatinbak o ti oy xchʼulel li animaetike, muʼyuk jech ta xal li Vivliae.

 Vaʼun, li ta yan xemanae libat li ta Salon sventa Tsobobbail sventa jchiʼin ta loʼil Thomas. Laj kalbe ti ta jkʼan ta jchanubtas buchʼutik makal xchikinik ta sventa li kʼusi chal li Vivliae, pe ti mu jkʼan xi-och ta stestigo Jeovae. Li kʼusi oy ox ta koʼontone jaʼ ti jlikes junuk relijion sventa li buchʼutik makal xchikinike. Li Thomase baʼyuk la skʼupil kʼoptaun ta sventa li kʼusi oy ta koʼonton spasele, laje laj yakʼbun kil kʼusi chal Efesios 4:5 ti bu chalbe skʼoplal ti skʼan tsobol oyik li melel yajtuneltak Diose.

 Li Thomase laj yakʼbun li video Los testigos de Jehová: una historia de fe viva. Parte 1: Salen de la oscuridad ta senya kʼop. Li video taje jaʼ chalbe skʼoplal jtsop viniketik ti la xchanbeik lek skʼoplal li kʼusi chakʼ ta chanel li Vivliae. Kʼalal yakal ta jkʼel li videoe, jech tajek laj kaʼi jba kʼuchaʼal li viniketike, yuʼun yakal ta jsaʼ li kʼusi melel eke. Li kʼusi laj kil ta videoe laj kil ti melel li kʼusi chakʼik ta chanel li stestigotak Jeovae, yuʼun skotol li kʼusi xchʼunojike ta Skʼop Dios lokʼem. Jaʼ yuʼun, lik jchankutik Vivlia yan velta xchiʼuk li Patriciae. Li ta 2014 laj kichʼkutik voʼ xchiʼuk likʼotkutik ta stestigo Jeova.

 Ta jkʼupin tajek li stsobobbail stestigotak Jeovae, yuʼun jaʼ chchʼunik li beiltaseletik chal Dios ta sventa li talelalile. Kʼupil ta kʼelel ti lek tajek xil sbaike xchiʼuk ti chichʼ sbaik ta mukʼ skotolike. Li stestigotak Jeovae mu snaʼ saʼik kʼop xchiʼuk jmoj tskolta sbaik. Jmoj tsobolik, koʼol kʼusi chalik li ta cholmantale, koʼol li kʼusi chchanik ta Vivliae, mu ventauk bu nakalik xchiʼuk kʼusi kʼopal chkʼopojik.

 Ta jkʼupin xchanel li kʼusi chal li Vivliae. La jchan ti jaʼ noʼox Jeova li Dios ti Skotol xuʼ yuʼune xchiʼuk ti jaʼ Ajvalil ta spʼejel balumile. Skʼanojan li buchʼutik makal xchikinik xchiʼuk li buchʼutik muʼyuke. Kʼalal jnaʼoj ti skʼanojune, ximuyubaj yuʼun. La jchan xtok ti jutuk xa skʼan xkʼataj ta jun kʼupil sba paraiso li balumile, ti bu muʼyuk xa chij-ipaje xchiʼuk ti chijkuxi sbatel osile. ¡Oy xa tajek ta koʼonton ti xkʼot ta pasele!

 Ta jkʼupinkutik xcholbel mantal li buchʼutik makal xchikinike. Jech xtok, ta jchanubtaskutik ta Vivlia junantik krixchanoetik ti te chkʼot ta jrelijionkutik toʼoxe. Pe jpʼel xa ta koʼonton li kʼusi chkakʼ ta chanele, mu xkoʼolaj kʼalal pastorun toʼoxe. Jaʼ to la jtabe stakʼobil li kʼusi mu toʼox jnaʼe. Jaʼ koliyal ti la jchan Vivlia xchiʼuk li stestigotak Jeovae.