Ta jbikʼtal onoʼox jkatolikounkutik li ta Rochester (Nueva York). Li jtot jmeʼe la xchʼak sbaik kʼalal vaxakib toʼox jabilale. Jaʼ yuʼun, li ta xokol kʼakʼale te jchiʼuk jmeʼ xchiʼuk li jchiʼiltak ta vokʼel ti bu abol noʼox sbaik li jnaklejetike, yan li ta savado xchiʼuk ta domingoe, te jchiʼuk jtot ti mas oy jutuk stakʼinike. Kʼalal chkil ti ep tajek kʼusi tspas jmeʼ sventa tstsʼites li vakib yalabtake, oy tajek ta koʼonton ti xipas ta jkʼulej sventa jkolta li jmeʼe.

 Li jtote oy tajek ta yoʼonton ti lekuk xbat li jkuxlejale. Jaʼ yuʼun, oy kʼusi la spas sventa xkojtikin jun universidad, lek tajek laj kil xchiʼuk la jtsak jbi. Jkʼanojbe xa onoʼox Dios ti akʼo skoltaun ta spasel kanal takʼine xchiʼuk ti ximuyubajuke, vaʼun la jnop ti jaʼ stakʼobil j-orasion taje. Voʼob jabil la jchan administración hotelera, derecho mercantil xchiʼuk economía empresarial. Jech xtok, chi-abtej xa onoʼox ta jun otel xchiʼuk ta jun kasino ta Las Vegas (Nevada).

 Kʼalal 22 xa ox jabilale, jaʼun xa ox yajkoltaobba jun bankilal (vicepresidente) ti jaʼ sbainoj skʼelel jun otel xchiʼuk jun kasinoe. Jkʼulejun xa onoʼox chilikun li yantike. Naka lekil veʼlil ta jlajesan, lekil vinoetik xchiʼuk poxetik ti toyol tajek stojole. Li jchiʼiltak ta abtele xi chalbeikune: «Teuk me ta anopben ti jaʼ noʼox lek chbat jkuxlejaltik kʼalal oy ep jtakʼintike». Yuʼun li stukike tsnopik ti jaʼ noʼox la xijmuyubaj mi jkʼulejotike.

 Li ta kabtele chkakʼbe kʼusi chtun yuʼunik li viniketik xchiʼuk antsetik ti batsʼi jkʼulejik tajek ti chtalik liʼ ta Las Vegas sventa xtajinik ta takʼine. Jkʼulejetik tajek, pe muʼyuk xmuyubajik. Ti melel xkaltike, muʼyuk ximuyubaj ek. Kʼalal mas ta jpas kanal takʼine, mas lubemun chkaʼi jba xchiʼuk vokol xa ch-och jvayel. Lik jakʼbe jba mi oy to sbalil li jkuxlejale, jaʼ yuʼun la jkʼanbe Dios ti akʼo skoltaun ta stael li melel muyubajele.

 Li vaʼ kʼakʼale, li chaʼvoʼ jtsebaltake jaʼik xa ox stestigotak Jeova xchiʼuk te xa ox nakajtik ta Las Vegas. Mu toʼox jkʼan jchan lek li livroetik, foyetoetik xchiʼuk li revistaetik yuʼunike, pe laj kalbeik ti xuʼ jchankutik li Jvivliae, akʼo mi ta onoʼox jchan jtuk. Li ta Jvivliae te chvinaj ti bonajtik ta tsoj li kʼusi laj yal komel li Kajvaltik Jesukristoe. Ta skoj ti snaʼojik ti chkichʼ ta mukʼ li Jesuse, jaʼ laj yakʼ ta yoʼontonik yalbel skʼoplal li kʼusi laj yal komele.

 Ep tajek kʼusitik la jchan ti toj labalik sba laj kaʼie, jech kʼuchaʼal liʼe, jun velta li Jesuse xi laj yale: «Kʼalal chapas orasione, mu me xachaʼalilan li kʼusi avaloj xa jech kʼuchaʼal tspas li jyanlumetike, yuʼun tsnopik ti jaʼ to jech ch-aʼibat skʼopik kʼalal ep ta velta chalike» (Mateo 6:7). Li palee yakʼojbun xa onoʼox jun slokʼol Jesus xchiʼuk yalojbun ti mi ta xkal lajunebuk velta li padrenuestro xchiʼuk lajunebuk velta li avemariae, li Diose ta la xakʼbun epal takʼin jaʼ ti kʼu yepal ta jkʼane. Pe mi ta jchaʼalilane, ¿mi mu yakaluk ta jpas li kʼusi laj yal Jesus ti mu stakʼ pasele? Jech xtok, la jchan li kʼusi laj yal Jesus liʼe: «Mu me buchʼu ‹tot› xavutik liʼ ta sba balumile, yuʼun jun noʼox li Totil avuʼunike, jaʼ li buchʼu te oy ta vinajele» (Mateo 23:9). Jaʼ yuʼun, xi laj jakʼbe jbae: «¿Kʼu yuʼun li jkatolikoetike ‹padre› chalbeik li palee?».

 Kʼalal la jchan li skarta Santiagoe la jnopbe skʼoplal kʼusi ta jpas li ta jkuxlejale, li ta kapitulo 4 ta versikulo 4, xi chale: «¿Mi mu xanaʼik ti chakʼotik ta yajkontra Dios kʼalal chavamigoinik li balumile? Jaʼ yuʼun, li buchʼu tskʼan chkʼot ta yamigo li balumile chkʼot ta yajkontra Dios». Pe mas to kʼot ta koʼonton li kʼusi chal li versikulo 17 ti xi chale: «Jaʼ yuʼun, mi oy buchʼu snaʼ spasel li kʼusi tukʼe, pe mi muʼyuk bu tspase, jaʼ mulil chkʼot ta stojolal». La jkʼopon batel li chaʼvoʼ jtsebaltake xchiʼuk laj kalbe ti chkikta li kabtele, yuʼun muʼyuk xa lek laj kaʼi ti te kapal jkʼoplal ta spasel li kʼusi muʼyuk leke, ti te tsakal skʼoplal li pichʼetel oʼontonal xchiʼuk li tajimol ta takʼine.

 Oy tajek ta koʼonton ti xinopaj ta stojolal Dios, jtot jmeʼ xchiʼuk li jchiʼiltak ta vokʼele. Pe mu kʼunuk ta pasel laj kaʼi, jaʼ yuʼun oy kʼusitik la jpas sventa jel li jkuxlejale. Muʼyuk xa la jchʼam li abteletik laj yakʼbeikun li oteletik xchiʼuk kasinoetike, akʼo mi laj yalbeikun ti mas to ep ta jpas kanale, yuʼun la oxib to velta x-echʼ ti kʼu yepal ta jpas toʼox kanale. Sventa oy kʼusi lek xkʼot ta nopel kuʼune, ep la jkʼopon Dios ta orasion xchiʼuk kʼot ta nopel kuʼun ti maʼuk jventa-oe. Laj kikta komel li kabtele, vaʼun bat jmeltsanbe lek li skotleb skarro jmeʼe xchiʼuk jaʼ te bat naklikun. Jech xtok, la jlikes jun kabtel ti jaʼ sventa smeltsanbel svunal veʼliletik li ta restauranteetike.

 Skoltaojun tajek Vivlia sventa lek kʼusi xkʼot ta nopel kuʼune. Pe mu toʼox jkʼan xibat li ta stsobajel stestigotak Jeovae. Jun veltae, li jtsebaltake la sjakʼbeikun mi oy kʼusi chopol chkil ta stojolal li ermanoetike. Jaʼ yuʼun, xi laj kalbeike: «Muʼyuk, pe li Adiosik ti jaʼ li Jeovae ta xchʼak li utsʼ alaliletike. Yuʼun li voʼone jaʼ noʼox oy yorail kuʼun sventa jkʼel kutsʼ kalal li ta Svokʼel Ninyo (Navidad) xchiʼuk li ta kumpleañoetike. Pe li voʼoxuke muʼyuk chapasik taje». Jun li ta jtsebaltake lik okʼuk xchiʼuk xi laj yalbune: «Pe ¿bu oyot li ta yantik kʼakʼale? Li voʼonkutike jmalaojotkutik, pe li voʼote jaʼ noʼox chakʼan chakʼelunkutik li ta skʼakʼalil kʼine xchiʼuk maʼuk ta sjunul avoʼonton». Li kʼusi laj yalbune kʼot tajek ta koʼonton xchiʼuk jmoj li okʼkutik.

 Te laj kakʼ venta ti skʼanojik tajek yutsʼ yalalik li stestigotak Jeovae, taje jaʼ la stij koʼonton sventa xibat li ta tsobajele. Te laj kojtikin Kevin ti jaʼ laj yakʼbun chanubtasel ta Vivliae.

 Li Kevin xchiʼuk li yajnile lek noʼox sba li xkuxlejalike, yuʼun tskʼanik ti masuk oy yorail yuʼunik sventa xchanubtasik ta Vivlia li yantike. Jech xtok, tstsob stakʼinik sventa xbatik ta África xchiʼuk Centroamérica sventa xkoltavanik ta svaʼanel li Beteletike. Solel xvinaj ti skʼanoj sbaike xchiʼuk xmuyubajik tajek, ¡jaʼ jech ta jkʼan li jkuxlejal eke!

 Jun veltae li Kevine laj yakʼ kil jun video ti bu xvinaj ti xmuyubajik noʼox li misioneroetike, vaʼun la jnop ti jaʼ li kʼusi ta jkʼan ta jpas ta jkuxlejale. Jaʼ yuʼun, li ta 1995 laj kichʼ voʼ kʼalal vakib xa ox u chkichʼ j-estudioe. Jaʼ jech li kʼot ta stestigo Jeova. Muʼyuk xa bu ta jkʼanbe jkʼulejal li Diose, avie xi xa noʼox chkalbee: «Mu xapasun ta povre mi jaʼuk ta jkʼulej» (Proverbios 30:8).

 Jkʼulejun xa ta melel li avie, pe jaʼ li ta mantale. Li kajnil ti Nuria sbie, te laj kojtikin ta Honduras. Jmoj tunemunkutik tal ta misioneroal ta Panamá xchiʼuk ta México. Kiloj ta jkuxlejal ti melel li kʼusi chal Vivliae: «Jaʼ tspasvan ta jkʼulej li sbendision Jeovae, pe muʼyuk koʼol chakʼ tal xchiʼuk vokolil» (Proverbios 10:22).