Livokʼ ta Calgary ti jaʼ jun jteklum ti te xkom ta Alberta (Canadá). Kʼalal kʼoxun toʼoxe, la xchʼak sbaik li jtot jmeʼe. Jaʼ yuʼun, libatkutik ta naklej xchiʼuk jmeʼ ta sna jmoltotak o jmukʼtot. Skʼanojunkutik tajek xchiʼuk jun tajek koʼonton ti te linakikutike.

 Kʼalal vukub toʼox jabilale, jel li jkuxlejale. Nupunik yan velta li jtot jmeʼe, jaʼ yuʼun libatkutik ta naklej ta San Luis ti jaʼ jun jteklum ti te xkom ta Misuri (Estados Unidos). Anil laj kakʼ venta ti toj chopol stalelal li jtote. Jech kʼuchaʼal liʼe, kʼalal libat ta chanun ta sba kʼakʼale, la smajikun li yan kʼoxetike. Ilin tajek jtot kʼalal laj yil ti la smajikune xchiʼuk ti muʼyuk la jpak jkʼoplale, jaʼ yuʼun mas to tsots la smajun. Jaʼ te laj kakʼ venta ti skʼan jpak jkʼoplale.

 Tsok tajek sjol jmeʼ ta skoj li stalelal jtote xchiʼuk ep ta velta chut sbaik xchiʼuk tsmaj sbaik. Kʼalal kichʼoj xa ox 11 jabilale, lik jlajes droga xchiʼuk lik kuchʼ pox. Mas xa ox simaronun xchiʼuk buyuk noʼox chimajvan. Kʼalal tsuts kuʼun li sekundariae, chopol xa ox tajek li jtalelale.

 Li-och ta soltaroal ta Estados Unidos kʼalal kichʼoj xa ox 18 jabilale. Jchanoj xa ox majvanej, pe te la jchan milvanej. Kʼalal echʼ voʼob jabile, ta jkʼan xa ox chi-abtej xchiʼuk li FBI (Ofisina Federal de Investigación). Jaʼ yuʼun, laj kikta li soltaroale sventa jchan Psicología. Te lik chanunajkun ta Estados Unidos, ta tsʼakale ta Canadá.

 Li kʼusi la jchan ta Universidade maʼuk jaʼ li kʼusi jnopoj oxe. Te laj kil ti jaʼ noʼox tsaʼ kʼusi oy ta yoʼonton stuk li krixchanoe. Chʼabal xa sbalil skotol chkil xchiʼuk mu xchapaj chkil li vokoliletike. Jaʼ yuʼun, la jnop ti mu kʼusi spas yuʼun li krixchano sventa xlekub li kuxlejale.

 Muʼyuk xa sbalil laj kaʼi li jkuxlejale, jaʼ yuʼun bat ta koʼonton slajesel droga, yuchʼel pox, saʼel takʼin, mulivajel xchiʼuk chibat ta kʼinetik. Ta skoj ti soltaroun toʼoxe, muʼyuk buchʼu xuʼ stsalun chkaʼi. Jaʼ yuʼun, buyuk noʼox ta jtikʼba ta majvanej. Mi chkil ti oy buchʼu chakʼbeik svokole, ta jpakbe skʼoplalik. Ti melel xkaltike, jaʼ xa noʼox batem ta koʼonton li majvaneje.

 Jun velta kʼalal yakal ta jlatskutik mariuana sventa jchonkutike, ep tajek la jlajeskutik droga xchiʼuk li kamigo ta jun kuarto ta jna ti ta yut balumil oye. Li kamigoe la sjakʼbun mi jchʼunoj ta stojolal Dios. Xi laj kalbee: «Mi jaʼ ta smul Dios ti oy vokolile, mu jkʼan jnabe skʼoplal». Ta yokʼomale, kʼalal libat ta kabtel ta sba kʼakʼale, xi la sjakʼbun jun jchiʼil ta abtel ti jaʼ stestigo Jeovae: «¿Mi jaʼ ta smul Dios xanaʼ ti chkil jvokoltike?». ¡Labal sba laj kaʼi ti oy buchʼu jech la sjakʼbun ta yokʼomal noʼoxe! Ta jkʼan ta jnabe li stakʼobile, jaʼ yuʼun vakib u ep kʼusi la jloʼiltabekutik talel skʼoplal xchiʼuk la stakʼbun ta Vivlia junantik li kʼusitik ta jakʼbe jbae.

 Li tseb ti jaʼ toʼox te jchiʼuk ta nakleje mu skʼan snabe skʼoplal li kʼusitik yakal ta jchane. Jun domingoe, laj kalbe ti la jtak ta ikʼel stestigotak Jeova sventa xchanubtasunkutik ta Vivliae. Kʼalal lisut talel ta kabtel ta yokʼomale, chʼabal xa ox te la jta xchiʼuk yichʼoj xa ox batel skotol li kʼusitik oy yuʼune. Lilokʼ batel ta kaye xchiʼuk li-och ta okʼel. Jech xtok, la jkʼanbe vokol Dios ti akʼo skoltaune xchiʼuk jaʼ to te la jtʼabbe ta sba velta li sbie ti jaʼ Jeovae (Salmo 83:18).

 Kʼalal echʼ xa ox chib kʼakʼale, lik yakʼbeikun estudio jun nupultsʼakal ti jaʼ stestigotak Jeovae. Kʼalal sutik batele, lik jchan li livro Usted puede vivir para siempre en el paraíso en la Tierra ti jaʼ tstunesik sventa xakʼbeikun-o estudioe. La jchan sliklej ta jun noʼox akʼobal. a Kʼot ta koʼonton li kʼusi la jchan ta stojolal Jeova xchiʼuk Xnichʼone. Laj kaʼibe smelolal ti oy xkʼuxul yoʼonton li Jeovae xchiʼuk kʼux chaʼi kʼalal chil ti chkil jvokoltike (Isaias 63:9). Li kʼusi mas kʼot ta koʼontone jaʼ ti laj kaʼi ti skʼanojun li Diose xchiʼuk ti cham ta jtojolal li Jesuse (1 Juan 4:10). Laj kakʼ venta xtok ti ep tajek smalaobil yuʼun Jeova ta jtojolale, yuʼun «mu skʼan ti oy buchʼu xbat ta lajelal junuke; moʼoj, li kʼusi tskʼane jaʼ ti [sutes yoʼonton skotolike]» (2 Pedro 3:9). Laj kaʼi ti oy ta yoʼonton Jeova ti xinopaj ta stojolale (Juan 6:44).

 Li xemana taje jaʼo lik batkun li ta tsobajeletike. Natik toʼox tajek jol, oy karete xchiʼuk chiʼik-o li buchʼutik chilikune. Pe jaʼuk li stestigotak Jeovae xkoʼolaj kʼuchaʼal yutsʼ yalalik laj yilikun. Toj lek laj yakʼ ta ilel stalelalik. Jun tajek koʼonton laj kaʼi jba, xkoʼolaj kʼalal te toʼox nakalun xchiʼuk jmoltotake, pe mas to la jkʼupin.

 Lik noʼox kakʼ ta jkuxlejal li kʼusitik la jchan ta Vivliae. La jtuchʼ li jole, laj kikta li mulivajele, li uchʼ poxe xchiʼuk li slajesel drogae (1 Korintios 6:9, 10; 11:14). Ta jkʼan ti xmuyubajuk kuʼun li Jeovae. Jaʼ yuʼun, kʼalal chkil ti chopol li kʼusi ta jpase, muʼyuk ta jpak jkʼoplal. Chopol tajek chkaʼi xchiʼuk xi ta jnope: «Muʼyuk xa jech ta jpas». Vaʼun, chkakʼ persa ti jel jnopbene xchiʼuk ti jel jtalelale. Koliyal taje, lik jtabe sbalil kʼalaluk jaʼ la jpas li kʼusi lek chil Jeovae. Kʼalal vakib xa ox u ti lik kichʼ estudioe, laj kichʼ voʼ xchiʼuk likʼot ta stestigo Jeova li ta 29 yuʼun julio ta 1989.

 Jaʼ la skoltaun Vivlia sventa jel li jtalelale. Olon tale, kʼalal oy buchʼu tsabun jole, ta anil chikap. Pe avie, chkakʼ persa ti junuk koʼonton xchiʼuk skotol krixchanoetike (Romanos 12:18). Ta jtojbe tajek ta vokol Jeova ti la jel jtalelale xchiʼuk ti la stunes li Skʼope xchiʼuk li xchʼul espiritue (Galatas 5:22, 23; Ebreos 4:12).

 Maʼuk xa jaʼ batem ta koʼonton li slajesel drogae, li majvaneje xchiʼuk li mulivajele. Avie, chkakʼ persa ti jmuyubtabe yoʼonton li Jeovae xchiʼuk ti jpas li kʼusi tskʼan yoʼontone. Ta jkolta yantik sventa xojtikinik. Kʼalal muʼyuk toʼox jal ti laj kichʼ voʼe, libat ta yan lum sventa jchol mantal ti bu chtun mas jcholmantaletike. Ximuyubaj tajek ti ep buchʼutik jchanubtasoj ta Vivlia xchiʼuk ti kiloj kʼu yelan sjeloj xkuxlejalike. Ximuyubaj-o xtok ti jaʼ xa stestigo Jeova li jmeʼe, taje jaʼ koltaat jlomuk ti laj yil kʼu yelan jel li jtalelale.

 Li ta 1999, tsuts kuʼun jun chanun li ta El Salvador. Li avie, jaʼ xa sbi Chanob vun sventa j-al lekil aʼyejetik yuʼun Ajvalilal yuʼun Dios. Te la jchan kʼuxi xuʼ lek jchol mantal, ti lekuk xichanubtasvan li ta tsobobbaile xchiʼuk ti jchabi lek li ermanoetike. Li jabil taje, linupun xchiʼuk li kuni Eugeniae. Avie, jmoj xa ta jcholkutik mantal ta tsʼakal ora ta Guatemala.

 Oy xa sbalil chkaʼi li jkuxlejale xchiʼuk ximuyubaj tajek. Koliyal li kʼusitik jchanoj ta Vivliae maʼuk xa batem ta koʼonton li majvaneje xchiʼuk li mulivajele. Ta skoj taje, jun noʼox koʼonton, jnaʼ xa xikʼanvan xchiʼuk kʼanbil chkaʼi jba.