Livokʼ ta Uganda, ta yosilal Gomba. Jutuk mu skotoluk li jnaklejetik tee, povreik. Li ta akʼobaltike jaʼ noʼox ta jtuneskutik kantil ta skoj ti chʼabal lus li ta jlumalkutike.

 Li jtot jmeʼe, lek toʼox stsʼunik chonbolometik. Te toʼox nakalik ta Ruanda, laje batik ta Uganda. Jech xtok, ta toʼox stsʼun kafe xchiʼuk lobol, li lobole ta stunesik sventa smeltsanik jtos pox ti waragi sbie. Li jtot jmeʼe tstsʼunik toʼox alakʼ, tentsun, chitom xchiʼuk vakax. Ta skoj ti kʼu yelan laj kichʼ tsʼitesel xchiʼuk li kʼusi nopem xaʼiik tspas ta xkuxlejalik li jnaklejetik tee, la jnop ti jaʼ noʼox skʼan xchʼunbe smantal smalal li ajnilale xchiʼuk ti mu stakʼ xal li kʼusi tsnope.

 Kʼalal 23 toʼox jabilale libat ta naklej ta Ruanda, tee ta jkʼupin toʼox xibat ta akʼot xchiʼuk li yan kerem tsebetik ti koʼol jabilalkutike. Ta skoj ti nopolik noʼox chibat ta discotecae, laj yalbeikun ti xuʼ xa ta moton xi˗oche. Jech xtok, ta jkʼupin skʼelel pelikulaetik ti bu tsmaj sbaik xchiʼuk ti tsmil sbaike. Ta skoj li buchʼutik ta jchiʼinane xchiʼuk li kʼusi ta jchʼay-o koʼontone, sok li jtalelale, yuʼun lek jsaʼ kʼop, chiyakub xchiʼuk chimulivaj.

 Li ta sjabilal 2000, jmoj linaki xchiʼuk jun tseb ti jaʼ sbi Skolastique Kabagwira xchiʼuk ayan oxib jkʼoxkutik. Ta skoj ti kʼu yelan laj kichʼ chanubtasel ta jbikʼtale, la jnop ti skʼan xkeji ta jtojolal li Skolastique kʼalal ta skʼoponune o kʼalal oy kʼusi ta skʼanbune. Jech xtok, la jnop ti skotol li kʼusi x-ayan kuʼunkutike jaʼ noʼox kuʼun xchiʼuk xuʼ jpas li kʼusi skʼan xal koʼontone. Ep ta velta chilokʼ batel ta akʼobaltik, vaʼun las 3 ta sob chisut talel, jutukuk mu skotoluk veltae yakubem chisut tal.

 Kʼalal chikʼote, tsots ta jmaj li tiʼ nae xchiʼuk ta jmaj li Skolastique mi muʼyuk la sjambun ta anile. Li vaʼ kʼakʼale, jaʼ toʼox jbainoj skʼelel jun empresa sventa seguridad privada, ep toʼox ta jpas kanal. Li Skolastique la stijbun koʼonton sventa xikʼot ta stemplo jpentecotés ti jaʼ toʼox te chkʼot eke, yuʼun la snop ti jaʼ tskoltaun sventa xijele. Pe mi jsetʼuk oy ta koʼonton, li voʼone kʼajomal noʼox lik jsaʼ yan ants. Ta tsʼakale, ta skoj ti lek jsaʼ kʼop xchiʼuk chimulivaje, li Skolastique bat ta naklej xchiʼuk stot smeʼ xchiʼuk laj yikʼ batel li oxvoʼ jkʼoxkutike.

 Pe oy jun kamigo ti oy xa sjabilale la xchiʼinun ta loʼil ta skoj ti kʼu yelan li jkuxlejale. Laj yalbun ti jchapan jkʼopkutik xchiʼuk li Skolastique. Jech xtok, laj yalbun ti kʼupil sba li kuni kʼoxtakutike xchiʼuk ti la mu sta-o ti muʼyuk xchiʼuk stot xchʼiike. Li ta 2005, laj kikta li yuchʼel poxe, laj kikta li yan antse, vaʼun laj kikʼ yan velta li Skolastique. Li ta 2006, linupunkutik, pe akʼo mi jech lek jsaʼ-o kʼop xchiʼuk jech-o chkilbajin li kajnile.

 Li ta 2008, li Joel ti jaʼ stestigo Jeovae kʼot ta jna sventa xcholbun mantal xchiʼuk la jchikintabe. Oy jayibuk u la svulaʼanikun li Joel xchiʼuk li Bonaventure ti jaʼ yan stestigo Jeova eke jal chiloʼilajkutik ta sventa li Vivliae. Ep kʼusitik la jakʼbeik li ta slivroal Apokalipsise. Ti jech la jakʼbeike jaʼ sventa xkakʼbe yilik ti chʼayemik li testigoetike. Jech kʼuchaʼal liʼe, la jakʼbeik kʼu yuʼun chalik ti liʼ chnakiik ta balumil li «epal krixchanoetik» ti chalbe skʼoplal Apokalipsis 7:9, yuʼun li ta versikuloe chal «ti te vaʼajtik ta yeloval li chotlebal sventa [ajvalilal yuʼun Diose] xchiʼuk li ta yeloval Chʼiom Chije». Oy smalael yuʼun li Joele xchiʼuk la stakʼbun li kʼusitik la jakʼbee. La skʼelbun Isaias 66:1 ti bu chal ti «jaʼ skajleb [yakan Dios] li balumile». Jech oxal, li «epal krixchanoetik» chal ta Apokalipsise te onoʼox vaʼajtik ta melel ta yeloval xchotleb li Ajvalilal yuʼun Diose. Jech xtok, la jkʼel li Salmo 37:29 ti bu chal ti liʼ chkuxiik ta balumil li buchʼutik tukʼike.

 Ta tsʼakale, lik jchʼam jun chanubtasel ta Vivlia. Li Bonaventure jaʼ lik xchanubtasunkutik ta Vivlia xchiʼuk li kajnile. Ta kʼunkʼun lik sjelbun bal jkuxlejal li Vivliae. La jchan ti skʼan xkichʼ ta mukʼ li kajnile. Muʼyuk xa ta jkʼan ti skejan sba ta jtojolal kʼalal tskʼoponune o kʼalal oy kʼusi tskʼanbune. Xchiʼuk muʼyuk xa ta jnop ti jaʼ kuʼun skotol li kʼusitik x-ayan kuʼunkutike. Jech xtok, laj kikta skʼelel li pelikulaetik ti bu chakʼ ta ilel majbail xchiʼuk milbaile. Vokol tajek laj kaʼi sjelel li jkuxlejale, skʼan bikʼituk xkakʼ jba xchiʼuk ti jnaʼuk jpajtsan jbae.

 Mas toʼox olon talel li jbankilal kerem ti Christian sbie laj toʼox jtak batel ta Uganda sventa xbat xchiʼin ta naklej yan kutsʼ kalal. Kʼalal la jchan li Deuteronomio 6:4-7, laj kakʼ venta ti jaʼ yakʼoj jbainkutik Dios xchiʼuk kajnil sventa jchanubtaskutik ta Vivlia li kalab jnichʼnabkutike. ¡Ximuyubajkutik tajek kʼalal sut talel li jkeremkutike! ¡Jaʼ jech xmuyubaj ek!

 La jchan ti ep xkʼuxul yoʼonton li Jeovae, ti yakʼojun xa ta pertone xchiʼuk muʼyuk xa te ta sjol skotol li kʼusi la toʼox jpas ta voʼnee. Ximuyubaj tajek ti lik xchan Vivlia ek li Skolastique. Laj kakʼ jbakutik ta stojolal Jeova xchiʼuk jmoj la kichʼkutik voʼ ta 4 yuʼun disiembre ta 2010. Avie mas xa lek xkil jbakutik xchiʼuk li kajnile xchiʼuk ta jkʼupinkutik yakʼel ta jkuxlejalkutik li beiltaseletik ta Vivlia li ta kutsʼ kalalkutike. Li kajnile lek chaʼi ti tukʼ chikʼot ta jna kʼalal chilokʼ ta kabtele xchiʼuk tskʼupin ti mas xa lek jtalelal, ti kichʼoj ta mukʼe xchiʼuk ti laj kakʼ ta koʼonton ti muʼyuk xa chkuchʼ jsetʼuk li poxe. Xmuyubaj tajek kajnil kʼalal chil ti muʼyuk xa jpʼel tajek xkale. Li ta 2015, la sbiiltasikun kʼuchaʼal mol ta tsobobbail sventa jchabi li ermanoetik ta jtsobobbaile. Li ta voʼob kalab jnichʼnabkutike oy xa oxvoʼ ti laj xa yichʼik voʼe.

 Kʼalal lik jchan Vivlia xchiʼuk li stestigotak Jeovae, mu jecheʼuk noʼox la jvovil chʼun ta anil li kʼusi laj yakʼik jchane. Pe li kʼusi labal sba laj kile jaʼ ti tstunesik Vivlia sventa stakʼbeikun li kʼusitik ta jakʼbeike. Li Skolastique xchiʼuk voʼone laj kakʼkutik venta ti skʼan xkakʼ ta jkuxlejaltik li smantaltak Dios mi chijtun ta stojolale. Ta jtojbe tajek ta vokol Jeova ti laj yikʼun talel ta stojolale xchiʼuk ti te xa kapal jkʼoplal li ta yutsʼ yalal ta mantale. Jchʼunoj lek xchiʼuk kiloj ta jkuxlejal ti xuʼ xkoltaat yuʼun Dios buchʼuuk noʼox krixchanoal sventa sjel li xkuxlejale xchiʼuk ti xtun ta stojolale.