Li stestigotak Jeova ta Bulgariae yakʼoj tajek ta yoʼontonik xchanubtasel li krixchanoetik ta sventa Dios xchiʼuk ta Skʼope, li Vivliae. Sventa xkoltaatike, lik kʼotikuk ta sienal xa noʼox ermanoetik ti yan-o slumalik li ta Bulgariae ti lik tal ta sjabilal 2000. ¿Kʼusi vokolil snuptanojik li buchʼutik bat xcholik mantal ta yan lume? ¿Mi oy sbalil ti te bat tunikuke? Liʼe chal sloʼil junantik ermanoetik ti te bat tunikuk ta Bulgariae.

 Xi chal Darren ti te toʼox nakal ta Inglaterrae: «Oy onoʼox ta koʼontonkutik ti xbat koltavankunkutik ta yan lume. Kʼalal linupun xchiʼuk li Dawne, libatkutik ta naklej ta Londres sventa jcholbekutik mantal li krixchanoetik ti chkʼopojik ta rusoe. Oy jaykojuke laj kalkutik ti chbat naklikunkutik ta yan lume, pe oy kʼusi la smakilanunkutik, jaʼ yuʼun muʼyuk xa xibatkutik, lichibajkutik xa ox. Oy jun kamigokutik la skoltaunkutik sventa xkakʼkutik venta ti jelem xa li jkuxlejalkutike xchiʼuk ti xuʼ xa xbat tunkunkutik ta yan lume». Li Darren xchiʼuk Dawne lik saʼik bu lumal ti chtun mas jcholmantaletike xchiʼuk ti xuʼuk te xbatike. Li ta 2011 te bat tunikuk ta Bulgaria.

 Ti kʼu yelan xmuyubajik li ermanoetik ti te batemik ta yantik lum sventa xcholik mantale, jaʼ skoltaoj yantik ti muʼyuk toʼox jech ayanem ta yoʼonton chkoltavanike. Xi chal Giada ti te toʼox nakal ta Italia xchiʼuk smalal ti Luca sbie: «Laj kojtikin ermanoetik ti baxbolik ta cholmantal ti te chtunik ta Sudamérica xchiʼuk ta África ti xmuyubajik tajeke. Li sloʼil xkuxlejal chchapike xchiʼuk ti kʼu yelan xmuyubajike, kʼot ta koʼonton xchiʼuk jaʼ la stijbun koʼonton sventa xitun mas ta stojolal Jeova».

 Li Tomasz xchiʼuk Veronika ti te toʼox nakalik ta República Checa xchiʼuk li chaʼvoʼ yalabik ti jaʼ Klara xchiʼuk Mathiase, batik ta naklej ta Bulgaria li ta 2015. ¿Kʼu yuʼun te batik ta naklej? Xi stakʼ li Tomasze: «La jchanbekutik skʼoplal li buchʼu jech xa spasojike xchiʼuk oy junantik kutsʼ kalalkutik ti jech xa spasojik eke, jech xtok la jnopbekutik skʼoplal sloʼil xkuxlejal junantik ermanoetik. Labal tajek chkilkutik ti xmuyubajik noʼoxe xchiʼuk jaʼ ta jloʼiltakutik xchiʼuk li kutsʼ kalalkutike». Li Tomasz xchiʼuk yutsʼ yalale xmuyubaj chcholik mantal li ta achʼ slumalike, jaʼ li jteklum Montana ta Bulgariae.

 Li Lindae jaʼ yan stestigo Jeova ti bat tunuk ta Bulgariae. Xi chale: «Oy xa sjayibaluk jabile li-ay ta Ecuador, te laj kojtikin stestigotak Jeova ti te batemik ta cholmantale, taje laj yakʼ jnop ti xuʼ xbat tunkun ti bu mas tskʼanik koltaele». Jun nupultsʼakal ti Petteri xchiʼuk Nadja sbiik ti te nakalik ta Finlandiae, chal ti jaʼ koltaatik ti kʼu yelan xkuxlejalik li ermanoetik ti chkoltavanik ta yan lume, xi chal sloʼilike: «Li ta jtsobobbailkutike oy jcholmantaletik ti jal xa tunemik tale xchiʼuk ti ayemik ta yan lum sventa skoltaik li krixchanoetik yoʼ xchanik li Vivliae. Xmuyubajik tajek kʼalal tsloʼiltaik ti kʼu yelan echʼem talel xkuxlejalike xchiʼuk chalik ti jaʼ li kʼusi mas lek spasoj ta xkuxlejalike».

 Toj tsots skʼoplal ti snopik lek li buchʼu tskʼan chbat tunikuk ta yan lume (Lukas 14:28-30). Xi chal Nele ta Bélgica: «Kʼalal jpʼel xa ox ta koʼonton bat tunkun ta yan lume, laj kalbe Jeova xchiʼuk la jsaʼ vunetik ti jaʼ chalbe skʼoplale. La jchan xchiʼuk la jkʼel kʼusi xuʼ jpas sventa xbat koltavankune».

 Li Kristian xchiʼuk li Irminae likemik ta Polonia, pe oy xa ta baluneb jabil te nakalik ta Bulgaria. Koltaatik tajek ti tunik ta jun grupo ti búlgara skʼopik li ta Polonia kʼalal skʼan toʼox xbat tunikuk ta Bulgariae. Ti te tunik ta grupoe tijbat yoʼontonik xchiʼuk jaʼ koltaatik sventa xchanik li búlgara kʼope, xi chalike: «Kʼalal oy ta avoʼonton bat koltavanan ta yan lume, jamal chkiltik kʼu yelan chchabiutik li Jeovae xchiʼuk chakʼbutik li kʼusi jtunel kuʼuntike. Kʼalal ta jkuxlebintik taje, stuk xa noʼox jech. Kʼalal xi chkalbetik li Jeovae: ‹¡Liʼ oyun voʼone! ¡Takun batel!›, xuʼ ep kʼusitik xapas ti muʼyuk bu jech anopoje» (Isaias 6:8).

 Li Reto xchiʼuk Corneliae likemik ta Suiza, kʼot ta nopel yuʼunik ti lekuk noʼox sba li xkuxlejalik sventa stsob stakʼinik xchiʼuk chapalikuk sventa xbat tunikuk ta yan lume, xi chalike: «Kʼalal skʼan toʼox jun jabil xibatkutike, li batkutik jun xemana ta Bulgaria sventa xkilkutik kʼu yelan li lume. Tee la xchiʼinunkutik ta loʼil jun nupultsʼakal ti jaʼik misioneroetike xchiʼuk laj yakʼbunkutik lekil tojobtaseletik». Li Reto xchiʼuk Corneliae laj yakʼ ta xkuxlejalik li tojobtaseletik akʼbatike, avie mas xa ta 20 jabil ti te chkoltavanik ta Bulgariae.

 Li buchʼutik bat tunikuk ta yan lume skʼan sjelik li kʼusi nopem xaʼiik spasel ti mu skotoluk velta kʼun ta pasele (Echos 16:9, 10; 1 Korintios 9:19-23). Jtos ti kʼusi vokol chaʼiik ta spasele jaʼ ti xchanik yan kʼope, xi chal li Luca ti laj kalbetik xa onoʼox skʼoplale: «Ta onoʼox jkʼupinkutik yakʼel jloʼil ta jkʼop jtukkutik li ta tsobajeletike, pe kʼalal ta jchapan kuni loʼilkutik li ta búlgaro kʼope, vokol tajek chkaʼikutik. Xikoʼolajkutik ta uni ololetik. Akʼo mi jech, ti melel xkaltike, li ololetike mas to lek li sloʼil chakʼik ta tsobajeletike».

 Xi chal Ravil ta Alemaniae: «Li xchanel yan kʼope vokol tajek laj kaʼi, pe xi chkalilanbe jbae: ‹Mu xavakʼ ta avoʼonton, tseʼinan noʼox mi jelel li kʼusi bat ta alel avuʼune›. Muʼyuk laj kakʼ ti akʼo smakun li kʼusi vokol laj kaʼie, yuʼun jaʼ xchʼul abtel laj kil li Jeovae».

 Xi chal Linda ti laj xa kalbetik skʼoplale: «Vokol chkaʼi tajek xchanel li yan kʼopetike, li bulgaroe vokol tajek chkaʼi. Ep ta velta ti lichibaj xa oxe, jtuk tajek laj kaʼi jba kʼalal mu stakʼ jchiʼin ta loʼil li yantike xchiʼuk ti mu xkaʼi li kʼusi chalbeikune. Pe sventa lekuk-o xkil jba xchiʼuk li Jeovae, ta jchan ta jkʼop jtuk li vunetike ti jaʼ li ta sueco kʼope. Koliyal ti la skoltaikun li ermanoetike, laj onoʼox jchan li búlgaro kʼope».

 Li yan vokolile xuʼ van jaʼ ti ta jnaʼtik li kutsʼ kalaltike xchiʼuk li kamigotaktike, li buchʼu chbat tunikuk ta yan lume chikta yutsʼ yalalik xchiʼuk yamigotakik. Xi chal Eva ti bat tunikuk ta Bulgaria xchiʼuk smalal ti Yianis sbie: «Ta slikebale jtuk tajek laj kaʼi jba, pe laj kakʼkutik persa ti nopajtikuk noʼox jkʼoponkutik li kutsʼ kalalkutike xchiʼuk li kamigotakutike. Li avi une, oy xa yan kamigotakutik liʼe».

 Xi chal kaʼitik li Robert xchiʼuk Liana ti jaʼik jun nupultsʼakal ti likemik tal ta Suizae: «Li kʼusi vokol laj kaʼikutike jaʼ li stalel xkuxlejalike, li skʼopike xchiʼuk muʼyuk nopemunkutik li ta yuilal siktik liʼe». Akʼo mi jech, li nupultsʼakale jaʼ la skʼelbeik li kʼusi leke xchiʼuk ti xmuyubajik noʼoxe, taje jaʼ koltaatik sventa xtunik-o ta Bulgaria ti oy xa ta 14 jabile.

 Li Lillie chal ti kʼu yuʼun lek ti xbat koltavankutik ti bu chtun mas jcholmantaletike. Xi chale: «Kiloj kʼu yelan ta skoltaun Jeova ti xuʼ van muʼyuk bu chkil jechuk li ta jlumale. Liʼe ep kʼusi xuʼ jpas sventa jkolta li yantike, taje mas to chinopaj-o ta stojolal Jeova. Jech xtok, jun koʼonton chkaʼi jba xchiʼuk ximuyubaj noʼox». Jaʼ jech tsnop ek li smalal ti Ravil sbie, xi chale: «Muʼyuk yan kuxlejal jech kʼu chaʼal liʼe. Jaʼ noʼox xuʼ liʼ xkojtikin li ermanoetik ti baxbol ta xchanubtasvanik ta Vivlia ti jelajtik bu slumalike, ep kʼusi jchanojbeik».

 Ti jech oy ta yoʼonton chkoltavanik li ermanoetike jaʼ ti «li lekil aʼyejetik ta sventa li Ajvalilale ta xichʼ cholel ta spʼejel balumil» (Mateo 24:14). Li buchʼutik ayan ta yoʼontonik ti bat koltavanikuk ta Bulgariae, jamal xvinaj ti koltabilik yuʼun Jeova ta sventa li kʼusi tskʼan yoʼontonike xchiʼuk ti lek chbat ta pasel yuʼunik skotol li kʼusi snopoj tspasike (Salmo 20:1-4).