Li Clodeane jaʼ stestigo Jeova xchiʼuk te nakal ta Sudáfrica, och ta ospital ta skoj ti laj yichʼ operasione. Ep xa onoʼox ta tos poxtaeletik albat yuʼun doktoretik ta skoj ti ep xchameltake, vaʼun kʼot ta nopel yuʼun ti chichʼ operasione. Kʼalal skʼan toʼox xichʼ operasione, jech noʼox lubem chaʼi sba, kʼux chaʼi xchiʼuk mu xa aʼibaj kʼusi tspas, pe jech˗o chaʼi sba kʼalal yichʼoj xa ox operasione. Kʼalal tetik xa ox chib u xchiʼuk oʼlol slokʼel ta ospitale, mu xuʼ xchoti˗o xchiʼuk muʼyuk buchʼu xuʼ xkʼot vulaʼanatuk ta skoj li chamel COVID˗19.

 Li Clodeane mu skʼan stikʼ ta yoʼonton li svokole, jaʼ yuʼun la skʼanbe koltael Dios sventa xuʼuk spatbe yoʼonton li yantike. Kʼalal stakʼ xa ox xchotie, la skʼoponbe batel li smuk slakʼnae. Yuʼun li ta voʼnee laj toʼox yichʼ chanubtasel yuʼun li stestigotak Jeovae, pe laj toʼox yikta. La spatbe batel yoʼonton ta Vivlia, vaʼun la xchʼam yan velta li chanubtasele. Laj yalbe xtok ti tstabe sbalil mi och li ta tsobajeletike. Jaʼ yuʼun, la skolta sventa x˗och ta videoconferencia. Och ta tsobajel li antse xchiʼuk laj yakʼ sloʼil li ta parte ti bu oy sjakʼobiltake.

 Laje, li Clodeane la skʼoponbe batel smuk li ants ti chakʼbe estudioe, yuʼun oy tajek ta yoʼonton chchan Vivlia ek. Li smuk s˗estudioe laj yalbe Clodean ti oy yan buchʼutik tskʼan chchanik Vivlia eke. ¿Kʼusi kʼot ta pasel un? Li Clodeane lik yakʼbe estudio chanvoʼ antsetik. Pe oy to kʼusi yan kʼot ta pasel.

 Li Clodeane laj yakʼ ta yoʼonton skoltael li yantike. Jaʼ yuʼun, oy lajunvoʼ antsetik ti laj to xchanubtase. Ta skotole 16 chanubtasel ta Vivlia laj yakʼ akʼo mi jaʼo yakal li tsatsal chamele. Junantik li buchʼutik chchanubtase ch˗ochik ta tsobajel ta videoconferencia. Ta skoj ti jaʼ yakʼoj ta yoʼonton skoltael yantik yoʼ xojtikinik li Jeovae, jaʼ koltaatem˗o Clodean yoʼ mu xakʼ ta yoʼonton li svokole. Chpatbat yoʼonton yuʼun Jeova chaʼi kʼalal oy svokole, jaʼ yuʼun li avie jaʼ xa jech tspas ta stojolal li yantik eke (2 Korintios 1:3, 4).

 ¿Kʼu yelan chil s˗estudiantetak li kʼusi xchanojik xae? Xi chal june : «Jtaojbe tajek sbalil. Pe mas to la jkʼupin kʼalal laj kaʼi ti oy sbi Diose. Ta skoj taje, mas to nopol˗o chkaʼi jba ta stojolal Jeova». ¿Kʼusi kʼot ta stojolal li smuk slakʼna une? Oy xa tajek ta yoʼonton chichʼ voʼ. Xmuyubaj˗o tajek Clodean ta skoj li kʼusi kʼotem ta pasele xchiʼuk yantik xa xlekub xtok ta sventa li s˗operasione.