¿TA SVENTA kʼusi melelal taje? Jaʼ ta sventa jlom kʼusitik mas tsotsik skʼoplal sjakʼojbe sbaik li krixchanoetike. Xuʼ van jech ajakʼojbe aba junuk velta ek:

• ¿Mi oyutik ta yoʼonton li Diose?

• ¿Mi ta van xlaj jun kʼakʼal li paskʼopetike xchiʼuk li vokolile?

• ¿Kʼusi chkʼot ta jtojolaltik kʼalal chijchamutike?

• ¿Mi oy van spatobil yoʼontonik li buchʼutik chamemike?

• ¿Kʼu yelan skʼan ta jkʼopontik sventa xaʼibutik li Diose?

• ¿Kʼuxi ta tael li muyubajele?

¿Bu van chasabe stakʼobil li kʼusitik la jakʼtik taje? Ta smilal noʼox livroetik ti xtakʼ yuʼun chalike. Akʼo mi jech, ep skontrainoj sba li kʼusi chalike. Oy yantike te noʼox kʼu sjalil sbalil li kʼusi chalike, vaʼun mu xa xtun ta tsʼakal o chichʼ tukʼibtasel o mi moʼoje chichʼ-o jelel.

Pe oy jlik livro ti xuʼ jpat-o koʼontontik xchiʼuk ti melelik li stakʼobiltak chakʼe. Xi laj yalbe ta orasion Dios li Jesucristoe: «Li acʼope jaʼ melel», xut (Juan 17:17). Li avie li Kʼop taje ojtikinbil kʼuchaʼal Xchʼul Kʼop Dios. Li kʼusi ta jkʼeltik batel avie jaʼ chal ta jaypʼeluk noʼox kʼop li stakʼobil ti lek jamal skʼoplal xchiʼuk ti xuʼ jpat-o koʼontontik chakʼ Vivlia ta sventa li kʼusitik laj xa jakʼtike.

¿KʼU YUʼUN JECH CHICHʼ JAKʼEL? Kuxulutik ta jun balumil ti noj ta choplejal xchiʼuk ta kʼusitik muʼyuk tukʼe. Epal relijionetike chakʼik ta chanel ti yuʼun la jech tskʼan Dios ti chkil jvokoltike.

LI KʼUSI CHCHANUBTASVAN LI VIVLIAE. Mu bakʼinuk kʼusi chopol tspas li Diose. Ta Job 34:10 xi chale: «Li Diose mu snop cʼusi chopol; li Bochʼo echʼem svuʼele mu spas cʼusi muʼyuc lec», xi. Ta skoj ti chkʼanvan li Diose, oy kʼusi alakʼ sba snopoj tspas ta stojolal li krixchanoetike, jaʼ yuʼun xi la xchanubtasutik ta skʼanel ta orasion li Jesuse: «Jtotic Dios, te oyot ta vinajel [...]. Acʼo sta yorail chapas mantal, acʼo pasuc cʼusi tscʼan avoʼnton liʼ ta banamil jech chac cʼu chaʼal te ta vinajele», xi (Mateo 6:​9, 10). Ta melel oyutik tajmek ta yoʼonton li Diose, yuʼun toj toyol la stoj sventa chkʼot ta pasel yuʼun ta melel li kʼusi tskʼane (Juan 3:16).

Kʼelo xtok Génesis 1:​26-28; Santiago 1:​13, xchiʼuk 1 Pedro 5:​6, 7.

¿KʼU YUʼUN JECH CHICHʼ JAKʼEL? Mu noʼox albajuk yepal krixchanoetik chlajik ta paskʼop. Xchiʼuk jkotoltik chkil jvokoltik ta kʼusiuk noʼox srasonal.

LI KʼUSI CHCHANUBTASVAN LI VIVLIAE. Li Diose yaloj ta melel ti chakʼ lekilal ta spʼejel Balumile. Ta stojolal li Ajvalilal yuʼun ta vinajele, li krixchanoetike muʼyuk xa «chchapan sba[ik] lec ta xchanel pleito», jech noxtok ta «scʼatajesic ta locub banamil li yespadaique» (Isaías 2:⁠4). Jech xtok, li Diose chakʼbe slajeb li kʼusi muʼyuk tukʼe xchiʼuk li vokolile. Ta sventa li krixchanoetike, xi chal ta melel li Vivliae: «Li Diose ta scusbe loqʼuel scotol yaʼlel satic, jech muʼyuc xa bochʼo chcham, muʼyuc xa bochʼo chat yoʼnton, muʼyuc xa bochʼo ch-ocʼ, muʼyuc xa bochʼo cʼusi cʼux chaʼay. Yuʼun ilaj xa scʼoplal scotol [jech kʼuchaʼal li kʼusitik muʼyuk tukʼ xchiʼuk li vokolile] ti jech toʼox oy ta baʼyuque», xi (Apocalipsis 21:​3, 4).

Kʼelo xtok Salmo 37:​10, 11; 46:​9, xchiʼuk Miqueas 4:​1-4.

¿KʼU YUʼUN JECH CHICHʼ JAKʼEL? Jutuk mu skotoluk li relijionetike chakʼik ta chanel ti oy to la kʼusi kuxul chkom kʼalal chcham jun krixchanoe. Oy buchʼutik chalik ti animaetike xuʼ la chakʼbe svokol li buchʼutik kuxulike, o ti Diose ta la xakʼbe yil svokolik ta kʼokʼ sbatel osil li buchʼutik chopolike.

LI KʼUSI CHCHANUBTASVAN LI VIVLIAE. Chlaj-o jkʼoplaltik kʼalal chijchame. Ta Eclesiastés 9:5 chal ti «bochʼotic chamenic xae mu xa cʼusi snaʼic o». Mu kʼusi snaʼik, mu xaʼiik, mi jaʼuk kʼusi spasik, jaʼ yuʼun mi jaʼuk xuʼ xakʼbe svokolik li buchʼutik kuxulike, mi jaʼuk xuʼ skoltaan ta jyalel (Salmo 146:​3, 4).

Kʼelo xtok Génesis 3:19 xchiʼuk Eclesiastés 9:​6, 10.

¿KʼU YUʼUN JECH CHICHʼ JAKʼEL? Jkotoltik ta jkʼan chijkuxiutik xchiʼuk ti jmoj jkʼupin jkuxlejaltik xchiʼuk li buchʼutik jkʼanojtike. Jech oxal chaʼa, stalel onoʼox ti ta jkʼan ta jkʼeltik yan velta li buchʼutik chamem kuʼuntike.

LI KʼUSI CHCHANUBTASVAN LI VIVLIAE. Jutuk mu skotoluk ta xchaʼkuxiik li krixchanoetik ti chamemike. Jech ta melel, xi laj yal li Jesuse: «Ta xaʼibicun jcʼopojel scotol li bochʼotic oyic ta smuquinalique [...] ta xchaʼcuxiic loqʼuel», xi (Juan 5:​28, 29). Li krixchanoetik ti chchaʼkuxiik liʼ ta Balumile xuʼ ta xkuxiik te xchiʼuk chilik ti kʼatajem xa ta jun paraisoe, jech onoʼox kʼuchaʼal la skʼan ta slikebal li Diose (Isaías 65:21-25). Jech ta melel, li ta alakʼ sba balumil chtal ta tsʼakale, li krixchanoetik ti tukʼik ta stojolal Diose te tskʼupinik kuxlejal sbatel osil xchiʼuk muʼyuk xa ch-ipajik. Li Vivliae xi chale: «Li bochʼo tucʼ yoʼntonique jaʼ chuʼuninic o li yosilique, jech jun yoʼnton te chnaquiic o», xi (Salmo 37:29).

Kʼelo xtok Job 14:​14, 15; Lucas 7:​11-17, xchiʼuk Hechos 24:⁠15.

¿KʼU YUʼUN JECH CHICHʼ JAKʼEL? Skotol li relijionetike nopem xaʼiik tspasik orasion. Akʼo mi jech, ep buchʼutik tsnopik ti muʼyuk bu chtakʼbat li s-orasionike.

LI KʼUSI CHCHANUBTASVAN LI VIVLIAE. Li Jesuse laj yal ti skʼan mu jaʼuk ta jchaʼalilan ta j-orasiontik li kʼusitik laj xa kaltike. Xi laj yale: «Cʼalal ta xataic ta cʼoponel ti Diose, maʼuc noʼox ta xachaʼalolanic ti cʼusi laj xa avalique», xi (Mateo 6:⁠7, Ti Achʼ Rextomento yuʼun ti Jesucristoe, ta skʼop Chamula). Mi ta jkʼan chaʼibutik li Diose, skʼan me ta jkʼopontik jech kʼuchaʼal tskʼan stuke. Sventa jech ta jpastike, skʼan me ta jchantik li kʼusi tskʼan yoʼontone xchiʼuk ti jechuk jkʼopontike. «Cʼalal oy cʼusi ta jcʼanbetic jech chac cʼu chaʼal tscʼan stuque, ta jnaʼtic ti ta xaʼay jcʼoptique», xi chalbutik ta melel 1 Juan 5:⁠14.

Kʼelo xtok Salmo 65:2; Juan 14:​6, 14, xchiʼuk 1 Juan 3:⁠22.

¿KʼU YUʼUN JECH CHICHʼ JAKʼEL? Ta skoj ti xchʼunojik ti jaʼ tsta smuyubajelik ta takʼin, ti lek ojtikinbilik o ti kʼupil sbaike, epal krixchanoetike jaʼ snutsojik batel taje. Manchuk mi jech, muʼyuk bu xmuyubajik.

LI KʼUSI CHCHANUBTASVAN LI VIVLIAE. Li Jesuse laj yakʼ kiltik kʼusi jaʼ ti chakʼ jmuyubajeltik kʼalal xi laj yale: «Toj xcuxet yoʼntonic ta melel li bochʼotic chaʼyic li scʼop Diose, ti ta xchʼunique», xi (Lucas 11:28). Jaʼ noʼox me xuʼ xi jmuyubaj ta melel mi chkakʼbetik yipal ta saʼel li kʼusi mas chtun kuʼuntike: snaʼel li kʼusi melel ta sventa Diose xchiʼuk li kʼusi snopoj tspas ta jtojolaltike. Te ta jtatik ta Vivlia li kʼusi melel taje, vaʼun ti xkojtikintike jaʼ tskoltautik ta snaʼel li kʼusi tsots skʼoplale xchiʼuk li kʼusi muʼyuke. Kʼalal chkakʼtik ti jaʼuk Vivlia akʼo sbeiltas kʼusitik ta jnoptik xchiʼuk kʼusitik ta jpastike, ta sta-o mas smelolal li jkuxlejaltike.

Kʼelo xtok Proverbios 3:​5, 6, 13-18 xchiʼuk 1 Timoteo 6:​9, 10.

 Laj noʼox kani kʼeltik li stakʼobil chakʼ Vivlia ta sventa li vaktos kʼusi laj yichʼ jakʼele. ¿Mi chakʼan to chachan mas? Mi te oyot ta stojolal li buchʼutik yakal tsaʼik kʼusi melele, ta melel chlokʼ ta avoʼonton xchanel mas. Oyikʼal van chajakʼbe aba kʼu yuʼun yakʼoj to oyuk epal choplejal Dios xchiʼuk vokolil mi ta melel oyutik ta yoʼontone. O xuʼ van chakʼan chanaʼ kʼuxi xuʼ xlekub li akuxlejal ta avutsʼ avalale. Li Vivliae lek tstakʼ li sjakʼobiltak taje xchiʼuk yantik sjakʼobiltak.

Akʼo mi jech, oy ep krixchanoetik ti mu xal yoʼontonik xchanel li kʼusi chal Vivliae. Toj pim la chalik xchiʼuk toj vokol la ta aʼibel smelolal. ¿Mi chakʼan koltael sventa chatabe li stakʼobil ti chakʼ li Vivliae? Ta sventa taje, li stestigotak Jeovae oy chaʼtos koltael xuʼ chayakʼbot.

Li baʼyele jaʼ li livro ¿Kʼusi chchanubtasvan ta melel li Vivliae?, ti pasbil sventa chichʼ koltael li krixchanoetik —mas to sventa li buchʼutik mu noʼox xokobike⁠— ta xchanel li stakʼobiltak chakʼ Vivlia ta sventa li kʼusitik mas tsotsik skʼoplal ta jakʼtike. Li xchibale jaʼ jun chanubtasel ta Vivlia ta ana ti muʼyuk tojbile. Mu sujbiluk xavaʼi aba, pe xuʼ jun stestigo Jeova ti lek xtojob chchanubtasvan ta Vivliae chbat svulaʼanot ta ana, o jaʼ ti bu mas lek chavaʼie, sventa xachʼak jutuk akʼa­kʼal jujun xemana sventa xachan xchiʼuk li Vivliae. Ta smiyonal noʼox krixchanoetik staojbeik sbalil li chanubtasel taje, vaʼun ep buchʼutik xmuyubajik noʼox laj yalik ti jaʼ to la staik li kʼusi melele.

Li voʼote xuʼ xapas preva ek ti mu kʼusi xkoʼo­laj-o li kʼusi melel ta Vivliae. Maʼuk noʼox tspojutik lokʼel ta stojolal labtael o metsʼtael, ti te xijnaʼet yuʼun o li xiʼel chakʼ jlom chanubtaseletike, yuʼun chakʼ spatobil koʼontontik, smelolal xchiʼuk smuyubajel li jkuxlejaltike. Xi laj yal stuk li Jesuse: «Chavotquinic o li cʼusi melele. Ta sventa li cʼusi melele chaloqʼuic o ta mozoil», xi (Juan 8:32).