XUʼ VAN xavojtikin ermanoetik ti batemik ta yan lum ti bu chtun mas jcholmantaletike xchiʼuk xuʼ van xi chanope: «Pe ¿kʼu van yuʼun ti jech tspasike? ¿Kʼuxi chchapan sbaik yoʼ xbat tunikuk li ta yan lume? ¿Mi xuʼ van kuʼun spasel jech ek?». Veno, sventa jnaʼtik skotol taje, jaʼ mas lek jakʼbetik stukik. Jkʼeltikik kʼusi chalbutik.

¿Kʼu xa noʼox xi ti lokʼ ta avoʼonton chabat ta yan lum ti bu chtun mas jcholmantaletike? Xi chal kaʼitik jun tseb ta Estados Unidos ti Ami sbie, ti te van 35 sjabilale: «Oy jayibuk jabil la jnop ti chbat tunkun kaʼi ta yan lume, pe la jnop ti muʼyuk onoʼox chkʼot ta pasel kuʼune». ¿Kʼusi van jelbat-o snopben? Xi to chale: «Li ta 2004 laj yikʼikun batel ta Belice jun nupultsʼakal ti te chtunike, sventa te xitun ta prekursora jun u xchiʼukik. Libat onoʼox un, jaʼ to laj kaʼie, la jkʼupin tajek. Vaʼun kʼalal echʼ jun jabile, bat tunkun ta prekursora ta Ghana».

Jun tseb ti jutuk mu 30 sjabilal ti Stefani sbie, ti te likem ta Estados Unidos eke, baʼyuk la skʼel kʼu yelan li xkuxlejale xchiʼuk xi la snope: «Mu jnaʼ mas xi-ipaj xchiʼuk chʼabal kʼusi jbainoj li ta kutsʼ kalale. Ta melel, xuʼ ep kʼusi jpas ta stojolal li Jeovae». Koliyal ti jech kʼot ta nopel yuʼune, bat tunuk ta Ghana sventa masuk xchol mantal. Li Ida xchiʼuk Filipe jaʼ jun nupultsʼakal ta Dinamarca ti te van 60 sjabilalike. Li nupultsʼakal taje oy onoʼox tajek ta yoʼonton chbatik ti bu chtun mas jcholmantaletike, vaʼun la skʼelik lek kʼusi xuʼ spasik sventa staik li kʼusi oy ta yoʼontonike. Xi chal li Filipe: «Kʼalal laj kichʼkutik albel ti xibatkutike, xkoʼolaj kʼuchaʼal ti xi laj yalbunkutik li Jeovae: ‹¡Batanik!›». Vaʼun li ta sjabilal 2008 bat tunikuk ta Ghana, te tunik mas ta oxib jabil.

 Li Jans xchiʼuk Bruke jaʼ jun nupultsʼakal ti te chtunik ta prekursor ta Estados Unidos ti mas ta 30 sjabilalike. Li ta sjabilal 2005 la skoltaik ermanoetik ta skoj li ikʼaloʼ Katrinae. Ta mas jelavele, la snojesik jlik solisitud sventa xkoltavanik ta svaʼanel Salonetik ta epal mukʼta lumetik, pe muʼyuk laj yichʼik ikʼel li ta abtelal taje. Xi tsvules ta sjol li Janse: «Ta jun asambleae echʼ jun mantal ti laj yalbe skʼoplal ti ta sjunul yoʼonton la xchʼam David ti muʼyuk x-akʼbat svaʼan li stemplo Jeovae, jaʼ yuʼun laj yakʼ ta yoʼonton spasel yan abtelal. Taje jaʼ la skoltaunkutik sventa xkakʼ ta koʼontonkutik spasel yan abtelaletik ta mantal» (1 Crón. 17:1-4, 11, 12; 22:5-11). Xi chal li Bruk eke: «Li Jeovae tskʼan ti akʼo xkakʼ ta koʼontonkutik stael yan kʼusitik ta mantale».

Kʼalal laj yaʼibeik sloʼil yamigotakik ti toj lek kʼusi kʼotem ta stojolalik ta skoj ti bat tunikuk ta yan lume, jaʼ tijbat yoʼontonik sventa xbat tunikuk ta prekursor ta yan lum ek. Li ta sjabilal 2012 batik ta Ghana, te tunik chanib u ta jun tsobobbail ta senya kʼop. Akʼo mi sutik batel li ta Estados Unidose, ti kʼu sjalil ayike jaʼ tijbat-o mas yoʼontonik sventa jaʼ baʼyel xakʼ ta xkuxlejalik li Ajvalilal yuʼun Diose. Ta tsʼakale, tunik ta svaʼanel Betel ta Micronesia.

¿Kʼuxi la achapan aba sventa xabat ti bu chtun mas jcholmantaletike? Xi chal li Stefanie: «La jsaʼ mantaletik ti jaʼ chalbe skʼoplal li ta revista Li Jkʼel osil ta toyole. * Jech xtok, laj kalbe moletik ta jtsobobbail xchiʼuk jkʼelvanej ta sirkuito xchiʼuk yajnil li kʼusi oy ta koʼonton ta jpase. Pe li kʼusi mas tsots skʼoplale, jaʼ ti nopolik noʼox laj kalbe ta orasion li Jeovae». Jech xtok, la sjutukajes kʼusitik oy yuʼun yoʼ stsʼin yuni takʼin li Stefanie sventa xuʼuk smakʼlin sba ti bu chbat tunuke.

Xi chal li Janse: «Laj kalbekutik Jeova ti akʼo sbeiltasunkutike, yuʼun oy ta koʼontonkutik ti jaʼuk skʼel stuk ti  bu tskʼan chbat tunkunkutike. Laj kalbekutik xtok bakʼin ta jkʼan ta jlikeskutik spasel li kʼusi oy ta koʼontonkutike». Li nupultsʼakal taje tsʼibaj batel ta chanib Betel. Vaʼun jaʼ takʼbatik yuʼun li Betel ta Ghanae. Jaʼ yuʼun batik li ta lum taje sventa xbat tunikuk chibuk u. Xi chal li Janse: «Batsʼi la jkʼupinkutik tajek ti te chitunkutik li ta tsobobbaile, jaʼ yuʼun mas to jal te likomkutik».

Li George xchiʼuk Adriae jaʼ jun nupultsʼakal ta Canadá ti jutuk mu 40 sjabilalike. Snaʼojik lek ti jaʼ chakʼbe sbendision Jeova li kʼusitik lek chkʼot ta nopel kuʼuntike, maʼuk li kʼusi oy ta koʼontontik spasele. Jaʼ yuʼun, muʼyuk bu jecheʼ te smeyoj skʼobik sventa staik li kʼusi oy ta yoʼontonike. La xchiʼinik ta loʼil jun ermana ti te chtun ta Ghana ti bu chtun mas jcholmantaletike xchiʼuk ep kʼusitik la sjakʼbeik. Jech xtok, tsʼibajik batel ta Betel ta Canadá xchiʼuk ta Ghana. Xi chal li Adriae: «Jech xtok, la jkʼelkutik lek kʼuxi xuʼ jutukajeskutik li kʼusitik oy kuʼunkutike». Ta skoj ti jech la spasike, batik onoʼox ta sjabilal 2004 li ta Ghanae.

¿Kʼusi vokolil la anuptan ti bu bat tunane, xchiʼuk kʼuxi tsal avuʼun? Li kʼusi vokol laj yaʼi Amie jaʼ ti tsnaʼ yutsʼ yalale. Xi chale: «Jelel tajek ti bu likʼote». Pe ¿kʼusi koltaat-o un? Xi chale: «Tskʼoponikun onoʼox talel li kutsʼ kalale, chalbeikun ti toj ep sbalil chilik li kʼusi ta jpase. Taje jaʼ tsvules ta jol ti kʼu yuʼun bat tunkun tee. Ta tsʼakale lik jkʼopon jbakutik ta videoconferencia. Ta skoj ti chkilbe jba jsatkutik xchiʼuk li kutsʼ kalale, nopol xa noʼox oyik chkaʼi». Li Amie lik yamigain sbaik xchiʼuk jun ermana ti jal xa yochel ta mantale. Ta skoj ti jaʼ te likem li ermanae jaʼ koltae  sventa xnop xaʼi ti kʼu yelan li kuxlejal tee. Xi to chal li Amie: «Li ermanae jaʼ la skoltaun sventa xkaʼibe smelolal ti kʼu yuʼun jech stalelal li krixchanoetik tee. Jaʼ la skoltaun sventa jnaʼ li kʼusi stakʼ o mu stakʼ jpase xchiʼuk sventa ta muyubajeluk jpasbe yabtel li Jeovae».

Li George xchiʼuk Adriae chalik ti xkoʼolaj la kʼuchaʼal sut laj yaʼiik li jabiletike. ¿Kʼu yuʼun ti jech laj yaʼiike? Xi chal li Adriae: «Ta skoj ti chʼabal jlavadorakutike, ta jtsʼajkutik ta kuveta sventa jchukʼ li jkʼuʼ jpokʼkutike. Jech xtok, batsʼi jal tajek ta jpaskutik li jveʼelkutike. Akʼo mi tsots jutuk laj kaʼikutik li vokoliletik taje, laj kakʼkutik venta ti jaʼ sventa oyuk kʼusi achʼ jchankutik li ta jkuxlejalkutike». Xi chal li Bruk eke: «Akʼo mi ep kʼusitik ta jnuptankutik li prekursorunkutike, xkuxet noʼox koʼontonkutik. Skotol li kʼusitik lekik tajek la jnuptankutike te oy-o ta jnopbenkutik, jnaʼojkutik ti muʼyuk chchʼay-o ta jolkutike».

¿Kʼu yuʼun ta sjunul avoʼonton chaval ti lek tajek ti jechuk xijtun ta stojolal Jeovae? Xi chal li Stefanie: «Chakʼbun tajek muyubajel ti ta jchol mantal ti bu oy tajek ta yoʼontonik li kʼusi melele, yuʼun tskʼan chchanik jujun kʼakʼal li Vivliae. Kʼalal libat ti bu chtun tajek jcholmantaletike jaʼ jtos ti kʼusi lek kʼot ta nopel kuʼune». Li ta sjabilal 2014 nupun xchiʼuk Aaron, li avie jmoj xa te chtunik ta Betel ta Ghana.

Jun prekursora ta Alemania ti Kristin sbi xchiʼuk ti mas xa jutuk ta 30 sjabilale, xi chale: «Jaʼ li kʼusi toj kʼupil sba la jchan ta jkuxlejale». Kʼalaluk skʼan toʼox xbat ta Ghanae te toʼox chtun ta Bolivia. Xi to chal li Kristine: «Ti nom oyun ta stojolal li kutsʼ kalale jaʼ mas linopaj-o ta stojolal Jeova xchiʼuk jaʼ ta jkʼanbe koltael. Jech xtok, kakʼoj lek venta ti kʼupil sba kʼu yelan lek tsobol oyik li slumal Jeovae. Ti jech chitun ta stojolale, jaʼ yakʼoj ti lekuk tajek li jkuxlejale». Achʼtik toe nupun xchiʼuk Gideon li Kristine, te chtunik-o li ta Ghanae.

Li Ida xchiʼuk Filipe chalik kaʼitik kʼuxi laj yutik sventa xchʼiik ta mantal li buchʼutik chakʼbeik estudioe, xi chalike: «Ta baʼyele, mas toʼox ta voʼlajuneb j-estudiokutik, pe ta tsʼakale jaʼ xa noʼox lajuneb. Jaʼ yuʼun mas xa lek ta jchanubtaskutik». ¿Mi oy van sbalil staojbeik li buchʼutik chichʼik chanubtasel ta Vivliae? Xi chal li Filipe: «Laj kakʼbe estudio jun kerem ti Michael sbie xchiʼuk jujun kʼakʼal ta jchanubtas. Ta skoj ti lek chchapan sbae, ta jun noʼox u tsuts kuʼunkutik xchanel li livro Chchanubtasvan[e]. Ta tsʼakale, kʼot ta jcholmantal ti muʼyuk to yichʼoj voʼe. Kʼalal lokʼ ta cholmantal ta sba veltae, xi la sjakʼbune: ‹¿Mi xuʼ xbat akoltaun ta yakʼel junchibuk j-estudio?›. ¡Chʼayal to kʼot koʼonton yuʼun! Laj yalbun ti oy xa oxib s-estudioe, jaʼ yuʼun tskʼan ti jkolta ta yakʼele». Chtun tajek jchanubtasvanejetik ta Vivlia liʼe, yuʼun li buchʼutik chichʼik chanubtasele, ¡chchanubtasvanik xa ek!

Li Amie laj yakʼ venta ta anil ti chtun tajek jcholmantaletik tee, xi chale: «Kʼalal muʼyuk toʼox jal jkʼotel ta Ghanae, la jcholkutik mantal ta jun uni bikʼit lum xchiʼuk lik jsaʼkutik krixchanoetik ti makal xchikinike. Li ta uni bikʼit lum taje mu junuk noʼox la jtakutik, moʼoj, vaxakvoʼ to la jtakutik». Li vaʼ orae, jaʼo nupun xchiʼuk Eric li Amie. Li avie, jmoj te chtunik ta prekursor espesial ta jun tsobobbail ta senya kʼop. Li ta sjunul lum Ghanae, oy mas ta oxib sien krixchanoetik ti makal xchikinike xchiʼuk ti oy ta yoʼontonik mantale o ti jcholmantaletik xae. Ta skoj ti te chtunik ta Ghana li George xchiʼuk Adriae snaʼojik xa kʼu yelan li misioneroale. Jaʼ yuʼun, xmuyubajik ti laj yichʼik takel ta ikʼel li ta Chanob vun ta Galaad numero 126. Li avie te xa chtunik ta misioneroal ta Mozambique.

Tspat tajek koʼontontik ti tsots chakʼbeik yipal kʼajoj ta mantal li ermanoetik ti nom likemik tale. Jmoj ch-abtejik xchiʼuk li ermanoetik ti te noʼox nopol nakalike (Juan 4:35). Li ta Ghanae te van 120 krixchanoetik chichʼik voʼ jujun xemana. Oy vuklajunvoʼ ermanoetik ti te bat tunikuk ta skoj ti skʼanojik tajek li Jeovae. Jaʼ jech ta sjunul yoʼonton spasojik ta smilal xa noʼox ermanoetik ta spʼejel Balumil, yuʼun batemik ta yantik lum ti bu chtun mas jcholmantaletike. Ta melel, li baxbol j-abteletik taje tsmuyubtabeik yoʼonton li Jeovae (Sal. 110:3; Prov. 27:11).