LI YAJTSʼAKLOMTAK Kristo ta baʼyel sigloe, laj yakʼik tajek persa ti bu kʼalal xuʼ yuʼunik sventa xcholbeik ‹lekil aʼyejetik sventa Ajvalilal› li krixchanoetike (Mat. 24:14). Yantik xtoke, batik ta yantik lum sventa xcholik li aʼyej taje. Jech kʼuchaʼal liʼe, kʼalal jaʼo chtun ta misionero li jtakbol Pabloe, la xchol mantal ta jteklumetik ti jaʼ xa yosilal Turquía li avie. * Kʼalal echʼ xa ox te van chaʼmiluk jabile, jaʼ xkaltik li ta 2014, laj yichʼ pasel jun kampanya sventa cholmantal ti stuk noʼox jeche. Pe, ¿buchʼutik ayik xchiʼuk kʼu yuʼun la spasik li kampanya taje?

Li ta Turquiae oy mas ta 2,800 jcholmantaletik, pe oy jutuk mu 79 miyon li jnaklejetik tee. Jaʼ yuʼun, oy jun jcholmantal li ta 28 mil jnaklejetike. Ta skoj ti jutebik noʼox li jcholmantaletike, muʼyuk to ep xcholojbeik mantal li krixchanoetike. Jaʼ yuʼun, li kʼusi oy ta yoʼonton tspasik li ta kampanya ti stuk noʼox jeche, jaʼ ti ta aniluk noʼox xcholbeik mantal krixchanoetik ti bu kʼalal xuʼ yuʼunike. Li ta kampanyae ayik ermanoetik ti likemik tal ta yantik lum xchiʼuk ti snaʼik li turco kʼope, ta skotole kʼotik 550 ermanoetik ti jmoj la xcholik mantal xchiʼuk li ermanoetik ta Turquiae. ¿Kʼusitik lek kʼot ta pasel li ta kampanyae?

La xcholbeik mantal epal krixchanoetik. Xi laj yalik li jun tsobobbail ta Estambule: «Ta skoj ti buyuk noʼox chilik ti oy stestigotak Jeova li krixchanoetike, lik sjakʼbunkutik mi yuʼun ch-echʼ jun asamblea ti toj tsots skʼoplale». Xi laj yalik ek li yan tsobobbail ta jteklum Izmire: «Oy jun vinik ti ch-abtej ta skotleb taksietike, nopaj tal ta stojolal jun mol ta tsobobbail, vaʼun ta skoj ti labal tajek sba chile, xi la sjakʼe: ‹¿Kʼusi chapasik chaʼa? ¿Mi yuʼun lanop chavakʼbeik tajek yipal?›». Kʼuchaʼal chkakʼtik ventae, li krixchanoetike labal sba laj yilik li kampanyae.

Li ermanoetik ti likemik batel ta yantik lume, la skʼupinik tajek li cholmantale. Xi laj yal li Steffen ti likem ta Dinamarcae: «Jujun kʼakʼal ta jcholbe mantal krixchanoetik ti muʼyuk bu yabinojbeik-o skʼoplal li Jeovae. ¡Jaʼ to chkakʼ ta chanel laj kaʼi ta melel li sbi Jeovae!». Xi laj yal ek li ermano Jean-David ti likem ta Franciae: «Ch-echʼ jayibuk ora kuʼunkutik ti ta jun noʼox kaye ta jcholkutik mantale. ¡Toj echʼ xa noʼox lek! Jutuk mu skotoluk li krixchanoetike, mu xojtikinik li stestigotak Jeovae. Ta jutuk mu skotoluk naetike jal ta jchiʼinkutik ta loʼil li yajval nae, chkakʼbekutik yil junuk video xchiʼuk chkiktabekutik jlikuk vun».

 Ta chib noʼox xemanae, li 550 ermanoetike, ¡la spukik komel 60 mil vunetik! Koliyal li kampanyae, ep tajek la xcholbeik mantal li krixchanoetike.

Mas to ayan ta yoʼontonik li cholmantale. Oy to lek kʼusi kʼot ta pasel yuʼun li kampanya ti stuk noʼox jeche, yuʼun jaʼ tijbat-o yoʼontonik sventa masuk to xcholik mantal li ermanoetik ta Turquiae. Jech oxal, ep buchʼutik lik snop chtunik li ta tsʼakal orae. Jaʼ yuʼun, kʼalal naka toʼox jun jabil yechʼel li kampanyae, epaj 24% li prekursoretike.

Li ermanoetik ti likemik batel ta yan lume, ep tajek kʼusi la xchanik ta sventa cholmantal li ta kampanyae xchiʼuk jech-o la stabeik sbalil akʼo mi sutemik xa ox batel li ta slumalike. Xi chal kaʼitik li ermana Sirin ti likem ta Alemaniae: «Li ermanoetik ta Turquiae, buyuk noʼox chcholik mantal, kʼun noʼox chaʼiik yilel. Pe li voʼone vokol tajek chkaʼi ta xchiʼinel ta loʼil li krixchanoetike, yuʼun xitsʼijet noʼox. Pe jaʼ la skoltaun li kampanyae, li stalelal ermanoetike xchiʼuk ti la jpas tajek orasione. Avi une, ta xa jchol mantal ta metro, ¡jun veltae laj kikta komel epal tratadoetik! Mu xa jechukun ti xitsʼijet toʼoxe».

Xi laj yal ek li ermano Yojanes ti likem ta Alemaniae: «Ep kʼusitik la jchan ta sventa li cholmantale. Li ermanoetik ta Turquiae, yakʼoj tajek ta yoʼontonik xcholbel mantal skotol li krixchanoetike, yuʼun chcholbeik mantal buyuk noʼox staik li krixchanoetike. Jaʼ jech ayan ta koʼonton spasel ek kʼalal lisut batel ta Alemaniae. Jech oxal, mas xa ep ta jcholbe mantal li krixchanoetik avie».

Xi chal kaʼitik ek li ermana Zeynep ti likem ta Franciae: «Ep kʼuxi la skoltaun ta cholmantal li kampanyae. Yuʼun la stsatsubtas koʼonton yoʼ mu xixiʼ xchiʼuk ti mas to jpat koʼonton ta stojolal li Jeovae».

Mas to jmoj tsobol laj yaʼi sbaik li ermanoetike. Mu xchʼay-o ta sjolik ti kʼu yelan laj yakʼik ta ilel ti skʼanoj sbaik xchiʼuk ti jmoj oyik li ermanoetike, akʼo mi ta yantik lum likemik batel. Xi chal li Jean-David ti laj kalbetik skʼoplal jlikel toe: «Laj kilkutik kʼu yelan lek la xchʼamunkutik li ermanoetike. Yamigounkutik xchiʼuk yutsʼ yalalunkutik laj yaʼiik. Lek la xchʼamunkutik li ta snaʼike. Jnaʼoj onoʼox ti kermano jbatik ta spʼejel Balumile, yuʼun ep ta velta jchanoj li ta jvuntike. Pe li avi une, laj kil ta jsat jtuk ti jaʼ jeche. Jaʼ yuʼun, mas to  limuyubaj ti jaʼ stestigoun Jeovae. Ta jtojbe tajek ta vokol ti yakʼojbun li matanal taje».

Xi chal li ermana Claire ti likem ta Franciae: «Akʼo mi ta jeltos lum likemunkutik tal, jech kʼuchaʼal ta Alemania, ta Dinamarca, ta Francia o liʼ noʼox ta Turquiae, kutsʼ kalal laj kaʼi jba jkotolkutik. Xkoʼolaj kʼuchaʼal la stupʼ Dios ta jun mukʼta borador li stsʼakil jujun lume».

Xi to chal li Stefani ti te likem ta Francia eke: «Li kampanya ti stuk noʼox jeche, oy kʼusi laj yakʼ jchan. Yuʼun li kʼusi tspasutik ta june, maʼuk li kʼusi nopem xkaʼitik spasele o li jkʼoptike, moʼoj, jaʼ ta skoj ti jkʼanojtik li Jeovae».

Li epal ermanoetik ti ay koltavanikuk li ta kampanyae, lik snopik ti chbat tunikuk li ta Turquiae. Yuʼun ep to tajek skʼan cholel li mantal tee. Junantike te xa batemik. Jaʼ yuʼun, sta-o tajek ti jtojbetik ta vokole.

Kalbetik avaʼi skʼoplal ti bu chtun tajek jkoltavanejetike. Ta jun grupoe oy 25 jcholmantaletik te, pe kʼajomal noʼox jun mol ta tsobobbail te chtun. Jal tajek ti jech-o stuk te oye. Jaʼ to li ta 2015, kʼotik vakvoʼ ermanoetik ti likemik batel ta Alemania xchiʼuk ta Países Bajose. ¡Muyubajik tajek li jcholmantaletike!

Pe, ¿kʼu van yelan chaʼi sbaik li ermanoetik ti oy xa kʼuuk sjalil te chtunik ta Turquiae? Veno, jech kʼuchaʼal stalel onoʼox chkʼot ta pasele, oy kʼusitik vokol chaʼiik. Pe staojik epal bendisionetik xtok. Jkʼeltik avil kʼusi chalik li junantik ermanoetike.

Li ermano Federico ti te van 40 sjabilale xchiʼuk ti nupunem xae, ta España to likik batel sventa xbat koltavanikuk li ta Turquiae, xi chale: «Avi ti muʼyuk xa mas kʼusi oy kuʼune, mas xa xokolun chkaʼi xchiʼuk jaʼ xa mas chkakʼ ta koʼonton li kʼusi mas tsots skʼoplale». ¿Mi mas van lek ti jech xijtun ta stojolal li Jeova eke? Xi chal kaʼitike: «¡Toj lek ti jech jpastike! Yuʼun kʼalal chbat tunkutik ta yan lum sventa jkoltatik ti akʼo xojtikinik Jeova li krixchanoetike, jaʼ skʼan xal ti chkakʼ jbatik ta skʼobe. Vaʼun, jaʼ te chkaʼitik kʼu to yelan chchabiutik».

Xi chal kaʼitik yan ermano ti Rudi sbie, ti nupunem xae, ti te xa van 60 sjabilale xchiʼuk ti ta Países Bajos  likeme: «Solel ximuyubajkutik ti liʼ chitunkutik ti bu skʼan tajek jcholmantaletike xchiʼuk ti ta jcholbekutik mantal epal krixchanoetik ti muʼyuk bu yaʼiojik-o li mantale. Chakʼ tajek muyubajel kʼalal chkilkutik ti xkuxet tajek yoʼontonik kʼalal chchʼamik li kʼusitik melele».

Xi chal kaʼitik ek li ermano Sascha ti nupunem xae, ti mas xa jutuk ta 40 sjabilale xchiʼuk ti ta Alemania likeme: «Kʼalal chilokʼ ta cholmantale, oy onoʼox buchʼutik ta jta ti jaʼ to ta sba velta chaʼiik-o li mantale. Ximuyubaj tajek ti chkakʼbe yojtikinik li Jeovae».

Li ermana Atsuko ti oy xa snup xchiʼile, ti te xa van 35 sjabilale xchiʼuk ti ta Japón likem batele, xi chalbutik smelolale: «Voʼne toʼoxe, ta jkʼan ti xtal xa noʼox li Armajedone. Pe avi ti liʼ xa oyun ta Turquiae, ta xa jtojbe tajek ta vokol Jeova ti jech to oy smalael yuʼune. Jech oxal, kʼalal chkakʼ venta kʼuxi chbeiltasvan li Jeovae, mas to ta jkʼan chinopaj ta stojolal».

Xi chal yan ermana ta Rusia ti Alisa sbie xchiʼuk ti mas xa jutuk ta 30 sjabilale: «Ti jaʼ jech chitun ta stojolal li Jeovae, jaʼ skoltaojun sventa xkil ti toj lek yoʼontone» (Sal. 34:8). Xi to chal xtoke: «Li Jeovae maʼuk noʼox ti jaʼ Jtote, yuʼun jaʼ jun jlekil Amigo ti mas to chkojtikin kʼalal ep ta tos kʼusitik ta jnuptane. Jech xtok, ep kʼusitik chakʼ jmuyubajel, ep kʼusitik chkʼot ta pasel ta jkuxlejal ti labalik tajek sbae xchiʼuk jtaoj epal bendisionetik».

Koliyal li kampanya ti stuk noʼox jech laj yichʼ pasel ta Turquiae, li lekil aʼyej ta sventa li Ajvalilale kʼot xa ta stojolal epal krixchanoetik. Akʼo mi jech, ep to tajek skʼan cholel mantal. Li ermanoetik ti te xa chtunik ta Turquiae, jujun kʼakʼal tstaik krixchanoetik ti muʼyuk bu yaʼiojbeik-o skʼoplal li Jeovae. ¿Mi chakʼan chbat tunan ta junuk yosilal cholmantal jech kʼuchaʼal li ta Turquiae? Mi jaʼ jeche, vuleso ta ajol li kʼusi chal Juan 4:35 ti xi chale: «Toyo muyel asatik xchiʼuk kʼelo avilik li osiltike, yuʼun sakubem xa ta takijel li kʼusitik tsʼunbile, yorail xa chichʼ tsobbel sat». ¿Mi xuʼ van xakoltavan ta junuk lum ti bu «sakubem xa ta takijel li kʼusitik tsʼunbile»? Mi oy ta avoʼontone, jaʼ me yorail avi ti xlik avakʼbe yipal staele. Pato avoʼonton ti chata epal bendisionetik mi la akolta aba sventa xkʼot «kʼalal to ta namal balumil» li lekil aʼyeje (Ech. 1:8).