SBA to velta chetʼes sparte ta Chanob vun sventa Kabteltik yuʼun Dios li Kingsleye. Kʼalal chaʼi chtijbat snekebe, jaʼo chlik skʼel li Svivliae. Laj yakʼ persa sventa lek xcholet la skʼel. Pe oy kʼusi toj labal sba: ¡muʼyuk tskʼel li Svivliae! ¿Kʼu van yuʼun?

Li Kingsleye te toʼox nakal ta Sri Lanka, maʼsat, mu xaʼi lek xchiʼuk ta siya de rueda chanav. ¿Kʼuxi laj yojtikin Jeova xchiʼuk la stsak sbi li ta Chanob vun sventa Kabteltik yuʼun Diose? Ta jchapbot avaʼi.

Kʼalal laj kil ta sba velta li Kingsleye, labal to sba laj kil ti kʼu yelan oy tajek ta yoʼonton xchanel li kʼusitik melel chchanubtasvan li Skʼop Diose. Oy xa onoʼox akʼbil chanubtasel ta Vivlia yuʼun yantik ermanoetik, pe muʼyuk xchʼi ta mantal. Li slivro ti tstunes ti El conocimiento que lleva a vida eterna sbi ti ta braile kʼop oye, mol xaʼox tajek. * (Kʼelo li tsʼib ta yok vune.) Laj kalbe mi tskʼan chchan Vivlia xchiʼuk voʼon, laj yal ti tanae, pe oy chaʼtos kʼusi vokol.

Li kʼusi vokole jaʼ ti oy noʼox vochlajetel ti bu nakale, yuʼun te nakal ta snailal mol meʼeletik xchiʼuk li buchʼutik oy yantik svokolike. Sventa xaʼi li kʼusi chkalbee jutuk xa mu chi-avan. ¡Ta skoj ti solel tsots chikʼopojkutike, chaʼiik skotolik li buchʼutik te nakalike!

Li yan kʼusi vokol xtoke jaʼ ti mu masuk ep ta jchankutik jujukoj xchiʼuk li Kingsleye, yuʼun  tsots chaʼi skʼelel vun xchiʼuk vokol chaʼibe smelolal li kʼusi ta jchankutike. Sventa masuk ep jchankutike lek chchapan sba. ¿Kʼuxi chut? Ep ta velta tskʼel li slivroe, tsaʼ li tekstoetik ta Svivlia ti ta braile kʼop oye xchiʼuk baʼyel tsnopbe smelolal li kʼusi tstakʼe. Ti kʼu yelan chchapan sbae lek kʼusi kʼot ta pasel. Kʼalal chkakʼbe chanubtasele, chchaʼkuchan li yok kʼalal chchoti ta yuni chotleb ta lumtike, vaʼun, tsmaj li lumtike xchiʼuk xmuyubaj noʼox tsots yechʼomal ye chalbe smelolal li kʼusi yakal chchane. Ta tsʼakal jutuke lik jvulaʼan chib velta ta xemana xchiʼuk chijalijkutik chib ora jujukoj.

Li Kingsleye oy tajek ta yoʼonton chbat li ta tsobajeletike, pe mu kʼunuk maʼ taje, yuʼun skʼan oy buchʼu xkoltaat sventa xmuy li ta siya de ruedae, ti xmuyesat ta karoe xchiʼuk sventa x-ochesat li ta Salon sventa Tsobobbaile. Akʼo mi jech, li ermanoetike ta sjelilan sbaik yoʼ skoltaik li ermanoe; jaʼ jun matanal chaʼiik ti jech tspasike. Kʼalal chbat ta tsobajel li Kingsleye tstijan ta xchikin jpʼej vosina, vaʼun chchikinta lek li mantale, pe maʼuk noʼox taje, yuʼun chakʼ sloʼil xtok.

Kʼalal echʼem xaʼox kʼuk sjaliluk chchan Vivlia xchiʼuk voʼone, la snop tstsak sbi li ta Chanob vun sventa Kabteltik yuʼun Diose. Kʼalal skʼan toʼox chib xemana yoʼ x-echʼ ta sba veltae, la jakʼbe mi yakal chchanilan li spartee. Vaʼun xi anil la stakʼbune: «Jech, ermano, te xa van treintauk ta velta la jchanilan». La jkʼupil kʼopta ti chakʼ yipale xchiʼuk la jkʼanbe ti akʼo skʼelbun talele. La sjam li Svivliae, laj yakʼ sniʼ skʼobtak ta sba li tekstoe, vaʼun, lik yapta talel. Pe oy kʼusi labal laj kil, yuʼun muʼyuk mas tsbakʼes sniʼ skʼobtak jech kʼuchaʼal nopem xaʼi tspasik li yan maʼsatetike. ¡Skomesoj ta sjol skotol li spartee!

Labal tajek la jkil. Kʼalal te jkʼeloj chchanilanbun talel li spartee solel chbein li yaʼlel jsate. Kʼalal laj yoʼontone, la jakʼbe kʼuxi laj yut ti komem ta sjol skotol li tekstoetik taje ti kʼajomal noʼox treinta ta velta xchanoje. Xi la stakʼbune: «Moʼoj, ermano, yuʼun treinta ta velta ta kʼakʼal ta jchanilan». Jun xa u te chchoti ta yuni chotleb ta lumtik sventa tskʼelilan li spartee jaʼ to ti kʼuxi kom ta sjole.

Kʼot me skʼakʼalil un ti laj yetʼes li spartee. Kʼalal tsuts sparte li Kingsleye tsots lik xtʼax skʼobik li ermanoetike, jech xtok, ep buchʼutik okʼik kʼalal laj yilik ti ep laj yakʼ yip li achʼ jchanune. Jun ermana ti muʼyuk xa bu ch-echʼ yakʼ sparte li ta Chanob vun sventa Kabteltik yuʼun Dios ta skoj ti chaʼi toʼox xiʼele, la stsak sbi yan velta xtok. ¿Kʼusi tijbat yoʼonton? Xi chal stuke: «Mi pas yuʼun li Kingsleye, tspas kuʼun ek».

Kʼalal oxib xaʼox jabil chchan talel Vivlia li Kingsleye, laj yichʼ voʼ ta 6 yuʼun septiembre ta 2008 sventa xakʼ ta ilel ti laj xa yakʼ sba ta stojolal Diose. Tukʼ tun ta stojolal Jeova jaʼ to ti kʼalal cham li ta 13 yuʼun mayo ta 2014, smalaoj chchaʼkuxi tal sventa xtun-o batel ta stojolal Jeova li ta Paraisoe, ti bu muʼyuk xa ch-ipaje (Isaías 35:5, 6). (Jaʼ la sloʼilta Paul McManus.)