XI LAJ yalbun jun kʼakʼal li jmeʼe: «¿Kʼu xa noʼox chaʼal mu xakʼan xavichʼ ta mukʼ li anima jmoltot jyayatike? ¿Mi mu xavil ti jaʼ laj yakʼik jkuxlejaltike? ¡Batsʼi mi jaʼuk xanaʼ xatoj ta vokol li kʼusi spasojik ta jtojolaltike! ¿Mi muʼyuk xa noʼox chopol chavaʼi ti chavalopatin komel li jkostumbretike? Yakal me chachopol kʼopta jrelijiontik mi mu xakʼan xavichʼ ta mukʼe». Vaʼun lik ta okʼel li jmeʼe.

Kʼalal skʼan toʼox jayibuk u jech xalbun li jmeʼe, albat yuʼun stestigotak Jeova mi tskʼan chchan Vivlia. Ta skoj ti lek x-ichʼvan ta mukʼe, lek noʼox smelolal laj yal ti mu skʼan xchan Vivliae, ti jaʼ lek xchanubtasikun li voʼone. Vaʼun chaʼa, ¿kʼu yuʼun ti ch-ilin tajek ta jtojolal li avie? Jaʼ ta skoj ti ta jkʼan ta jchʼunbe smantal li Jeovae xchiʼuk ti xmuyubajuk kuʼune. Jech oxal, oy kʼusitik chalbun jmeʼ ti mu xa xal jol koʼonton jpase. Melel onoʼox ti mu kʼunuk laj kaʼie, pe jaʼ laj yakʼ kipal li Jeovae.

Jbudistaunkutik toʼox xchiʼuk li kutsʼ kalale, jech kʼuchaʼal li epal krixchanoetik ta Japone. Pe kʼalal xchibal xaʼox yual lik jchan Vivlia xchiʼuk li stestigotak Jeovae, te laj kakʼ venta ti melel li kʼusi chal Vivliae. Kʼalal laj kaʼibe smelolal ti oy Jtotik ta vinajele, ayan tajek ta koʼonton ta yojtikinel. Ta slikebale, lek toʼox tajek chkaʼikutik sloʼiltael xchiʼuk jmeʼ li kʼusi yakal ta jchane. Jech xtok, lik batkun ta tsobajeletik ta jujun domingo. Ta skoj li kʼusi yakal ta jchane, laj kalbe jmeʼ ti chkikta spasel li skostumbre jbudistaetike. Pe ta anil noʼox xi laj yalbune: «Batsʼi toj kʼexlal xa noʼox sba ti oy buchʼu kuʼuntik ti mu skʼan xichʼ ta mukʼ li anima jmoltot jyayatike». Muʼyuk xa la skoltaun batel ta tsobajel xchiʼuk muʼyuk xa laj yakʼ jchan li Vivliae. Muʼyuk bu jnopoj ti jech tspase, yuʼun muʼyuk onoʼox bu jech spasojbun.

La spas ta jmoj sjol xchiʼuk jmeʼ li jtote. La jchan ta Efesios 6 ti skʼan jchʼunbeik smantalike. Ta skoj ti ta jkʼan junuk noʼox koʼonton xchiʼuk li jtot jmeʼe, la jnop ti mi ta jchikinta li kʼusi chalike, ta xchikintaik ek li kʼusi chkale. Li vaʼ kʼakʼale, jaʼo ep skʼan xichanunaj ta skoj ti poʼot xaʼox j-eksamene. Jaʼ yuʼun la jchʼun ti muʼyuk xa chibat ta tsobajel oxibuk ue. Laj kalbe ta jamal Jeova ti chlik batkun ta tsobajel yan velta mi echʼ li oxib u taje.

Pe muʼyuk lek li kʼusi kʼot ta nopel kuʼune. ¿Kʼu yuʼun? Oy chib srasonal, june jaʼ ti kaloj mi  jech-o oy ta koʼonton chitun ta stojolal Jeova mi lokʼ li oxib u taje. Pe bu chata, sok ta anil ti kʼu toʼox yelan lek xkil jba xchiʼuk li Jeovae. Ta xchibale, yuʼun mas to laj yalbeikun jtot jmeʼ ti akʼo xkikta jba ta spasbel yabtel li Jeovae.

Ep buchʼutik laj kojtikin ta salon ti jaʼ jech tsnuptanik eke. Laj yalbeikun ti ta onoʼox xakʼbun kipal Jeova xchiʼuk ti xuʼ xlik xchanik Vivlia ek li kutsʼ kalal mi tsʼik kuʼune (Mateo 10:34-37). Ta skoj ti ta jkʼan ta jpat koʼonton ta stojolal Jeovae, lik jpas orasion ta sjunul koʼonton.

Toj ep kʼutik yelan tskʼan chchibajesikun ta mantal li jtot jmeʼe. Jech kʼuchaʼal liʼe, sventa mu xa xilokʼ yuʼunik ta jnae, mas xa ep kabtel laj yakʼbeikun. Bakʼintik xtoke, mu xakʼik xi-och o muʼyuk bu chakʼbeikun jveʼel. Solel mu xlubtsaj ti chalbun jmeʼ ti akʼo xkikta jba ta xchanel li Vivliae. Kʼalal jech chalbune, muʼyuk kʼusi mas ta jtakʼbe. Yuʼun mi la jtakʼbee, jaʼ chlik-o jkʼopkutik ta skoj ti oy jrason kaloj jchaʼvoʼalkutike. Jaʼ to chkakʼ venta avi ti skʼan ox jtsak mas ta mukʼ li kʼusitik tsnop o xchʼunoj li jmeʼe, yuʼun muʼyuk xlik mas jkʼopkutik ti jechuke.

Lik skʼan koltael ta stojolal yan krixchanoetik li jmeʼe. Bat xchiʼin ta loʼil jmaestro, pe muʼyuk la skʼan la stikʼ sba ta jkʼopkutik. Laje laj yikʼun batel ti bu ch-abteje, vaʼun la skʼanbe vokol spatron yoʼ xchiʼinun ta loʼil sventa xakʼ jchʼun ti jaʼ noʼox la lekil relijion li budismoe. Jech xtok, x-okʼolet la skʼopon batel jayvoʼuk kutsʼ kalalkutik sventa skʼanbe koltael. ¡Toj chopol laj kaʼi jba yuʼun skotol taje! Pe kʼalal chikʼot ta tsobajele, te chalbeikun moletik ti yakal chchol batel mantal kʼalal jech tspas li jmeʼe.

 Tskʼanik ox jtot jmeʼ ti akʼo xibat ta universidade xchiʼuk ti jta lek kabtele. Ta skoj taje jaʼ chlik-o jkʼopkutik. Jaʼ yuʼun lik jtsʼibabeik karta sventa xkalbeik li kʼusi oy ta koʼonton ta jtae. Jun kʼakʼale kap tajek sjol li jtote, xi laj yalbune: «Mi yuʼun chanop ti ta anil chata avabtele, jkʼeltik mi xata noʼox okʼom. Pe mi muʼyuk xatae, ta me xa jnuts lokʼel». Laj kʼanbe tajek vokol Jeova ti akʼo skoltaune. Ta yokʼomale lilokʼ ta cholmantal, vaʼun laj yalbun abtel chaʼvoʼ ermanaetik, tskʼanik ti akʼo la jchanubtasbeik stsebetik ta sventa eskuelae. Pe muʼyuk bu xmuyubaj xa li jtote, muʼyuk xa bu stsakojun ta venta, xkoʼolaj xa kʼuchaʼal chamemun chaʼi yilel. Laj yalbun jmeʼ ti jaʼ la lek ti xipas ta jpaschoplejale, jaʼ la mu stakʼ chaʼi ti xikʼot ta stestigo Jeovae.

Bakʼintike ta jnop mi lek van chil Jeova ti mu jchʼunbeik li kʼusi chal jtot jmeʼe. Jaʼ yuʼun la jpas orasion xchiʼuk la jnopbe lek skʼoplal jayibuk tekstoetik ti chakʼ ta ilel ti skʼanojutik li Diose. Taje jaʼ la skoltaun sventa ximuyubaj noʼox jtsal li jvokole xchiʼuk laj kakʼ venta ti jaʼ jech tspas jtot jmeʼ ta skoj ti tskʼanik ti lekuk xbat jkuxlejale. Jaʼ la skoltaun ta stukʼibtasel jtalelal li Jeovae xchiʼuk ti lekuk kʼusi xkʼot ta nopel kuʼune. Mas to ta jkʼupin yalbel batel skʼoplal Dios kʼalal mas chkakʼbe yipal li cholmantale. Ta jkʼan chi-och kaʼi ta prekursora.

Kʼalal laj yaʼiik jlom ermanaetik ti chi-och kaʼi ta prekursorae, laj yalbeikun ti akʼo jmala echʼuk skapemal sjol li jtot jmeʼe. La jkʼanbe vokol Jeova ti akʼo skoltaune, la jchan lek li jvuntike xchiʼuk la jnop ti kʼu yuʼun chi-och kaʼi ta prekursorae. Jech xtok, la jakʼbe kʼusi stakʼ jpas li ermanaetik xchiʼuk ermanoetik ti lek xa chanemike. Vaʼun kʼot ta nopel kuʼun ti jaʼ mas tsots skʼoplal ti xmuyubajuk noʼox kuʼun li Jeovae. Laj kaʼibe smelolal ti mi muʼyuk xi-och noʼox ta prekursorae maʼuk chjel-o stalelal li jtot jmeʼe.

Lik tunkun ta prekursora kʼalal jun xaʼox jabil skʼan stsuts li jsekundariae. Kʼalal echʼ xaʼox kʼuk sjalil une, lik ayanuk ta koʼonton ti chbat tunkun ti bu chtun mas jcholmantaletike. Pe li jtot jmeʼe mi jaʼuk skʼanik ti xibate. Jech oxal, jaʼ to libat kʼalal la jtsak jtob jabile. La jakʼ batel ta Betel mi xuʼ stakikun batel ta sural Japón, ti jaʼ te nakal jayvoʼ kutsʼ kalalkutike. Yuʼun mi te libate muʼyuk xa mas chat yoʼonton li jmeʼe.

Ximuyubaj noʼox ta skoj ti ep buchʼutik la jkolta sventa xkʼotik ta stestigo Jeova li ta jteklum taje. Sventa masuk xitun ta stojolal li Jeovae la jchan inglés xtok. Oy chaʼvoʼ prekursor espesialetik li ta jtsobobbaile. Toj labal sba chkil ti yakʼojbeik tajek yipal chtunik ta stojolal li Jeovae xchiʼuk ti tskoltaik yantike. Ta skoj taje ayan ta koʼonton ti chlik tunkun ta prekursora espesial eke. Pe li vaʼ kʼakʼale chib to velta tsots ipaj li jmeʼe. Muʼyuk spatoj yoʼonton chbat jchabi, pe ay jchabi xchibal velta. Jaʼ to te lik lekubuk yoʼonton jutuk ta jtojolal.

Kʼalal echʼ xaʼox vukub jabile, li chaʼvoʼ prekursor laj kalbe skʼoplal jlikel toe, oy jun la stakbun tal jlik karta, Atsushi sbi li ermano taje. Te laj yalbun ti snopoj chnupune xchiʼuk la sjakʼbun mi lek chkil. Ti melel xkaltike muʼyuk toʼox bu lek chkil xchiʼuk la jnop ti muʼyuk lek chilun eke. Pe kʼalal lokʼ xaʼox jun ue, laj kalbe batel ti xuʼ jkʼopon jbakutike. Laj kakʼkutik venta ti koʼol li kʼusi oy ta koʼontonkutik staele. Jmoj ta jkʼan chitunkutik ta tsʼakal ora ta buyuk noʼox. Jech oxal linupunkutik. Kʼalal linupunkutike ayik li jtot jmeʼe xchiʼuk li yan kutsʼ kalaltake. Batsʼi ximuyubaj tajek.

Kʼalal jaʼo yakal chitunkutik ta prekursor regulare, li Betele la sbiiltas ta xkʼexol jkʼelvanej ta sirkuito li jmalale. Laj une laj kichʼkutik biiltasel ta  prekursor espesial, ta mas tsʼakale laj yichʼ biiltasel ta jkʼelvanej ta sirkuito li jmalale. Vaʼun kʼalal laj koʼontonkutik ta svulaʼanel skotol li tsobobbailetik ti bu kʼalal jmakojkutike, laj yalbunkutik Betel mi xuʼ xbat jvulaʼankutik li tsobobbailetik ta Nepale.

La jnop ti xuʼ van chopol xaʼi jtot jmeʼ mi laj yaʼiik ti nom bu chibate. Pe kʼalal la jkʼoponik batele, xi laj yalbun li jtote: «Toj kʼupil sba ti bu chabate». Yuʼun kʼalal skʼan toʼox jun xemana jkʼoponike, kʼelanbat jlik livro yuʼun jun yamigo ti jaʼ chalbe skʼoplal Nepale. Jech oxal kʼalal laj yoʼonton skʼelele, la snop ti toj kʼupil sba ti te xbat xkux yoʼontonike.

Ximuyubajkutik noʼox li ta Nepale, yuʼun lek snaʼ xkʼopoj li krixchanoetik tee. Ta mas tsʼakale, laj yalbunkutik Betel ti akʼo xbat jvulaʼankutik li tsobobbailetik ta jun lum ti Bangladesh sbie. Akʼo mi nopol xil sbaik li chib lum taje, jelel tajek stalelal li krixchanoetike. Jaʼ yuʼun jelajtik ti kʼu yelan ta jcholkutik mantale. Pe kʼalal lokʼ xaʼox voʼob jabile, litakatkutik sutel tal ta Japón. Jaʼ yuʼun li avie, liʼ xa ta jkʼupinkutik svulaʼanel li tsobobbailetike.

Toj ep kʼusi yakʼoj jchan ta sventa Jeova ti butik tunemune. Yuʼun jelel tajek stalel xkuxlejal li krixchanoetik ta Japón, Nepal xchiʼuk li ta Bangladesh lume. Jech oxal laj xa kakʼ venta ti buchʼuuk noʼox tskolta, chchabi xchiʼuk lek chil li Jeovae.

Toj ep kʼusitik ta jtojbe ta vokol li Jeovae. Yuʼun laj yakʼ ti akʼo xkojtikine, ti xitun ta stojolale xchiʼuk ti toj lek yoʼonton li jnup jchiʼil laj yakʼbune. Jech xtok, la xchanubtasun kʼuxi xuʼ lekuk xkʼot ta nopel kuʼun li kʼusi ta jpase. Koliyal Jeova, kamiga xa tajek jbakutik yan velta xchiʼuk li jmeʼe. Lek jkʼopon jbakutik xtok xchiʼuk li yan kutsʼ kalale. Ta melel, muʼyuk bu chilubtsaj ta stojel ta vokol ti jun koʼonton xchiʼuk Dios xchiʼuk li jmeʼe.