Likemun ta Texcoco. Kʼalal livokʼe, jaʼ toʼox jun jteklum ti lumtik skayealtake. Xvul ta jol ti tskajan tal ta svuroik kʼusitik chchonik li krixchanoetik te noʼox nopol nakalike. Vaxakib li jchiʼiltak ta vokʼele, voʼon li svukvoʼalune, pe toj abol sba li jtot jmeʼe. Li jtote tsmeltsan toʼox varach, pe kʼalal vukub xaʼox jabilale jaʼo cham. Laj yil tajek svokol sventa la stsʼitesunkutik li jmeʼe.

Li jmukʼtote tstij violín xchiʼuk jaʼ toʼox direktor yuʼun jtijsonetik sventa relijion. Jutuk mu skotoluk kutsʼ kalale tstijik toʼox jtosuk abtejebal sventa son; li jmeʼe chkʼejin toʼox ta chʼulna xchiʼuk li juntote jkʼejimol ta ópera xchiʼuk jtijpiano toʼox. Lek tikʼilunkutik li ta relijione. Li voʼon eke chbat jkolta pale ta chʼulna xchiʼuk ta jkʼan ox chikʼot ta misionero yuʼun jkatolikoetik. Pe lek toʼox xkaʼi skʼelel pelikulaetik ta karate, kʼalal mas ta jkʼele mas anil chikap.

Li-och ta jun chanob vun ta Puebla sventa xikʼot ta paleal. Yuʼun ta jkʼan ox chikʼot ta paleal, pe kʼalal jun xaʼox jabil skʼan xnel kuʼun li chanune chibaj koʼonton yuʼun li jrelijione. Yuʼun oy jun monja tseb ti tskʼan tsloʼlabun jole, akʼo mi tsal kuʼun taje, och ta koʼonton ti ta jkʼan chinupune. Jech xtok, laj kakʼ venta ti chaʼtos xkuxlejal jlom paleetike. Echʼ kʼuk sjaliluke, muʼyuk xa ta koʼonton chikʼot ta paleal.

La jnop ti chbat jchan mas sventa son ta Conservatorio Nacional de Música te ta México. Kʼalal tsuts kuʼun li chanune, linupun, vaʼun laj kilkutik chanib kalab jnichʼnabkutik. Li kabtele jaʼ ti chikʼejin ta mixae.

 Kʼalal jaʼ toʼox linupunkutike lik xa onoʼox jkʼopkutik. Mu lekuk xkil jba xchiʼuk li kajnile, mas to ti toj lek xi-itʼixaj jchaʼvoʼalkutike. Ta baʼyuke, jaʼ noʼox ta xkut jbakutik, pe ta tsʼakale lik majbail. Kʼalal oxlajuneb xaʼox jabil jnupunelkutike la jchʼak jbakutik, vaʼun ta mas tsʼakale la jtuchʼ jnupunelkutik.

Li sba velta liloʼilaj xchiʼuk stestigotak Jeovae jaʼo kʼalal skʼan toʼox jchʼak jbakutike. Kʼot stijik stiʼ jna chaʼvoʼ xchiʼuk laj yalbeikun mi ta jkʼan junuk chanubtasel ta Vivlia. Ta skoj ti lek chanem chkaʼi jba ta sventa li Vivliae, la jchʼam li chanubtasele, pe jaʼ noʼox sventa xkakʼbe yilik ti mu meleluk li kʼusi chakʼik ta chanele. Ep kʼusitik tsotsik la jakʼ ti jnopoj muʼyuk stakʼobile, pe labal to laj kil ti ta Vivlia la stakʼbeikun skotole. Te laj kakʼ venta ti mu epuk kʼusi jnaʼ ta sventa li Vivliae. Pe li kajnile muʼyuk onoʼox bu lek chil li stestigotak Jeovae xchiʼuk li voʼon eke mu onoʼox xixokob, jaʼ yuʼun muʼyuk xa la jchʼamik.

Kʼalal echʼ xaʼox voʼob jabile, jaʼ to liloʼilaj yan velta xchiʼuk stestigotak Jeova. Jmoj xaʼox nakalun xchiʼuk Elvira, li stuke muʼyuk chopol chaʼi mi chkakʼ ochuk ta jna li stestigotak Jeovae, jaʼ yuʼun lik kichʼ chanubtasel yan velta. Akʼo mi jech, echʼ jayibuk jabil sventa jel jkuxlejal.

Laj kakʼ venta ti oy kʼusitik skʼan jel ta jkuxlejal mi ta melel ta jkʼan chitun ta stojolal Jeovae. Li kʼusi baʼyel skʼan jpase jaʼ ti xkikta li kʼejimol ta chʼulnae xchiʼuk ti jsaʼ yan kabtele (Apocalipsis 18:4). Jech xtok, skʼan xinupun xchiʼuk li Elvirae.

Pe li kʼusi toj vokol laj kaʼie jaʼ ti mu ta aniluk xikape. Oy chib teksto ta Vivlia ti la skoltaun tajeke. Ta Salmo 11:5 la jchan ti spʼajoj majbail li Jeovae xchiʼuk li ta 1 Pedro 3:7, la jchan ti skʼan xkichʼ ta mukʼ kajnil sventa xchikintabun j-orasion li Diose. La jnopbe skʼoplal li tekstoetik taje xchiʼuk la jkʼanbe koltael Jeova, vaʼun kʼunkʼun lik lekubuk li jtalelale.

Li avie ximuyubaj xchiʼuk kutsʼ kalal. Yakal ta jlekubtas ti kʼuyelan xkil jba xchiʼuk li jnichʼnab li ta baʼyel kajnile, xchiʼuk xtok ta jkolta sventa tsotsuk xchʼunel yoʼonton li kutsʼ kalal xchiʼuk Elvirae.

Ta jbikʼtale ta jkʼan ox chikʼot ta paleal sventa jkolta li krixchanoetike, avie jnaʼoj xa kʼuyelan xuʼ jkoltaik ta melel, taje jaʼ chakʼbe sbalil li jkuxlejale. Li avie, chkakʼ chanun sventa son yoʼ jmakʼlin li kutsʼ kalale. Ta jtojbe tajek ta vokol Jeova ti oy smalael yuʼun ta jtojolale, yuʼun la skoltaun sventa jel li jkuxlejale xchiʼuk xikʼot ta lekil krixchano.