Ta jbikʼtal onoʼox lek tajek chkil li teʼtikaltike, li chonbolometike xchiʼuk yantik. Nopajtik noʼox chilokʼ xchiʼuk kutsʼ kalal ta yojtikinel kʼupil sba vitstikaltik xchiʼuk tsʼantsʼan voʼetik ti te nopol li ta Jyväskylä ta yutil lum Finlandia. Jkʼanoj tajek li chonbolometike, kʼalal bikʼitun toʼoxe mi oy bu laj kil jkotuk bolom o jkotuk tsʼiʼe ta jkʼan ta jpet. Kʼalal la jta jvaʼleje chopol laj kil ti mu xkʼuxubinik chonbolometike. Ta tsʼakale, li-och ta jun organisasion ti tspakbe skʼoplal sderecho chonbolometike, te la jta yan krixchanoetik ti jech tsnopik kʼuchaʼal voʼone.

Ta jpaskutik kampanyaetik sventa li sderecho chonbolometike. Sventa chkakʼkutik ta ilel ti chopol chkilkutik ti chchonik snukulil chonbolometike xchiʼuk ti tstunesik sventa chchanunajike, ta jpukbekutik skʼoplal xchiʼuk ta jpaskutik marcha. Jech xtok, la jlikeskutik jun achʼ organisasion sventa chichʼ chabiel li chonbolometike. Ta skoj ti ep kʼusitik jpasojkutik sventa x-epaj ti chichʼ chabibel sderechoike, oy bakʼintik ti chopol chilik li ajvaliletike. Ep ta velta laj kichʼ chukel xchiʼuk li-ay ta chapanobbail.

Maʼuk noʼox chkat-o koʼonton taje, yuʼun chkat-o koʼonton xtok li vokoliletik oy ta balumile. Ta jelavele, oy jayibuk organisasion ti bu la jtikʼ jbae, te tsakal skʼoplal li Amnistía Internacional xchiʼuk Greenpeace. Te kakʼoj kipal sventa jkoltaik ta spasel li kʼusitik tspasike. Ta jkolta povreal krixchanoetik, li buchʼu chil svokolik ta viʼnale xchiʼuk yantik ti oy svokolike.

Pe kʼunkʼun laj kakʼ venta ti mu xjel kuʼun li kʼusitik oy ta balumile. Akʼo mi chchapaj yuʼunik yilel jlom bikʼtal vokolil li organisasionetik taje, li tsatsal vokolile yantik noʼox stsatsaj. Jaʼ kuchem yuʼun yilel li kʼusi chopole, yuʼun skotol krixchanoetik mu noʼox kʼusi sventaik. Mu kʼusi spas kuʼun laj kaʼi.

Ta skoj ti chopol chkaʼi ti mu kʼusi spas kuʼune, lik jnopbe skʼoplal Dios xchiʼuk Vivlia. Xchanubtasojikun xa onoʼox ta Vivlia li stestigotak Jeovae. Akʼo mi lek laj kil ti oy slekil yoʼontonik xchiʼuk oyun ta yoʼontonike, mu toʼox xkom chkaʼi li kʼusitik ta jpase. Pe taje mu xa jechuk.

Lik jtunes xchiʼuk lik jchan li Jvivliae. Te la jta spatobil koʼonton ta melel. Kiloj ti oy tekstoetik ti chchanubtasvan sventa jkʼuxubintik li chonbolometike. Jech kʼuchaʼal liʼe, Proverbios 12:10 chal ti skʼan xkʼuxubin xchonbolomtak li lekil krixchanoetike. Jech xtok, jchanoj xa ti maʼuk ta smul Dios li vokolil oy ta balumile. Yuʼun jaʼ ta skoj ti ep buchʼu mu xchʼunbeik smantal Dios ti jech epajeme. Toj labal sba laj kil kʼalal la jchan kʼu to yepal kʼanvanem li Jeovae xchiʼuk ti oy tajek smalael yuʼune (Salmo 103:8-14).

La jta jlik vun xtok ti bu chal ti xuʼ jkʼan li livro ¿Kʼusi chchanubtasvan ta melel li Vivliae? vaʼun, laj tak batel. Mu ta sjaliluke kʼot stijik stiʼ jna jun nupultsʼakal ti jaʼik stestigo Jeova sventa chalbeikun mi ta jkʼan chanubtasel ta Vivlia, vaʼun la jchʼam. Jech xtok, lik batkun ta tsobajeletik ti ch-echʼ ta Salon sventa Tsobobbaile. Ta skoj taje kʼot ta koʼonton li kʼusi yakalun xchanel ta Vivliae.

Koliyal li Vivliae xuʼ xa ep kʼusi jel ta jkuxlejal. Laj kikta ti chisikʼolaj toʼoxe xchiʼuk ti muʼyuk spʼisol chkuchʼ poxe. Jlekubtasoj xa li jpat jxokone xchiʼuk li jkʼopojele. Jelem xa xtok ti kʼuyelan chkil li ajvaliletike (Romanos 13:1). Mu xa jechuk jkuxlejal ti muʼyuk toʼox smelolale, ti chimulivaj toʼoxe.

Toj tsots laj kaʼi yiktael li organisasionetik bu toʼox tikʼilune. Pe taje mu ta aniluk pas kuʼun. Baʼyele, mi laj kikta li kabtel tee xkoʼolaj ta jvalopatin laj kaʼi li organisasion taje. Pe laj kakʼ venta ti jaʼ noʼox xjel yuʼun kʼusitik oy ta balumil li Ajvalilal yuʼun Diose. Oy ta koʼonton chkakʼbe yipal ti jaʼ xa noʼox jpas li kʼusitik sventa Ajvalilal yuʼun Diose xchiʼuk ti xchanik li yantike (Mateo 6:33).

Kʼalal ta jpakbe toʼox skʼoplal yantike chaʼvokʼ chkil li krixchanoetike, jvokʼ lekik xchiʼuk jvokʼ chopolik, vaʼun mi chopolike chapalun xa sventa oy kʼusi chopol jpasbe. Pe koliyal li Vivliae mu xa jechuk jpʼajojan li yantike. Yuʼun kakʼoj xa persa sventa jechuk xikʼanvan kʼuchaʼal yajtsʼaklom Cristo ti skʼanoj skotol krixchanoetike (Mateo 5:44). Jech xtok, chkakʼ ta ilel ti kʼanvanemun kʼalal chkalbe yantik li lekil aʼyej sventa Ajvalilal yuʼun Diose. Ximuyubaj yuʼun li kʼusi ta jpase, yuʼun chakʼ jun oʼontonal, muyubajel xchiʼuk tspatbe yoʼonton melel li krixchanoetike.

Jun xa koʼonton li avie, yuʼun skotol li kʼusi chkat-o koʼontone jaʼ oy ta skʼob li Jeovae. Jchʼunoj ti ta skoj ti jaʼ Jpasvaneje, mu xakʼ ti xichʼ ilbajinel li chonbolometik xchiʼuk krixchanoetike, mi jaʼuk ti sokesik li kʼupil sba Balumile. Moʼoj, yuʼun ta stojolal li Ajvalilal yuʼune poʼot xa xchaʼmeltsan li kʼusitik sokeme (Isaías 11:1-9). Maʼuk noʼox ximuyubaj-o ti jnaʼoj xa li melele, ximuyubaj-o xtok ti xuʼ jkolta yantik sventa xakʼ xchʼunel yoʼontonik eke. Mu xa jechuk chkaʼi ti skʼan jel li kʼusitik oy ta balumile.