Livokʼ ta Riga, ta kapital yuʼun Letonia. Li voʼon xchiʼuk li jvixe jaʼ la stsʼitesunkutik li jmeʼkutike. Akʼo mi katolika li jmeʼe, jaʼ noʼox chibatkutik ta chʼulna kʼalaluk oy kʼusi tsots skʼoplal tspasike. Jchʼunoj onoʼox ti oy kʼusi tsots yipe, pe ta skoj ti keremun toʼoxe ep kʼusitik la xchʼaybun koʼonton.

Kʼalal yakalun ta chʼiele, li jmeʼe laj yakʼ venta ti oy jpʼijil ta stsʼakel xchiʼuk ta stukiel kʼusitike. Ta skoj ti oy ep kʼusitik ti stakʼ tukiel xchiʼuk ti stakʼ tsʼakel li ta jnae, li jmeʼe tsvul yoʼonton mi laj yiktaun jtuke. Jaʼ yuʼun la skʼelanbun jun pakete bikʼtal takʼinetik ti xuʼ jtsʼake, solel ta jkʼupin stsʼakel xchiʼuk stukiel. Taje maʼuk noʼox li kʼusi ta jkʼupin spasele, yuʼun lek chkil xtok li anilajel ta motosikletae. Li jmeʼe la stsakbun jbi ta jun anilajel ta motosikleta ti jaʼ sbi Zelta Mopēds (El ciclomotor de oro). Baʼyel lik anilajkun ta jun uni bikʼit moto (ciclomotor), laje lik anilajkun ta mukʼta motosikleta.

Ta anil noʼox la jchan xchiʼuk mu ta jaluk noʼox ep la jpas kanal li ta xibal sba tajimol taje. Oxib to velta la jpas kanal ta Letonia li ta tajimol superbikes sbie, xchiʼuk chib to velta la jpas kanal ta estados bálticos.

Kʼalal jaʼo lek tajek chbat jkuxlejal li ta anilajele, li jlekom Evijae (ti linupun xchiʼuk ta tsʼakale) lik skʼoponan li stestigotak Jeovae. Li stuke la stabe junantik svuntak li stestigotak Jeovae, ti te talem bu xuʼ stsak sbi sventa skʼan junuk chanubtasel ta Vivliae. Li Evijae la snojes li vun taje xchiʼuk la stak batel ta koreo. Ta anil noʼox tal vulaʼanatuk yuʼun chaʼvoʼ stestigotak Jeova, vaʼun lik chanubtasatuk ta Vivlia. Li voʼone toj lek laj kil, pe li vaʼ kʼakʼal taje muʼyuk toʼox ta koʼonton li kʼusitik ta sventa mantale.

Ta jelavele, li chaʼvoʼ stestigotak Jeovae laj yalbeikun mi xuʼ jchiʼin ta xchanel Vivlia xchiʼuk ti xkaʼi li kʼusi chchanik li  Evijae. La jchʼun li kʼusi laj yalbeikune xchiʼuk toj kʼupil laj kaʼi li kʼusi la jchikintae. Li kʼusi mas kʼot ta koʼontone jaʼ li kʼusi chal Vivlia ta sventa ti chkʼataj ta jun paraiso li Balumile. Jech kʼuchaʼal liʼe, kʼalaluk laj yakʼbeikun kil li Salmo 37:10, 11 ti xi chale: «Mu xa jaluc liʼ oyic li bochʼotic chopolique; acʼo me chasaʼic to, pero mu xa xataic o. Yan li bochʼotic biqʼuit chacʼ sbaique jaʼ chuʼuninic o li yosilalique; jun noʼox yoʼnton te oyic o». Taje jaʼ li kʼusi la stijbun-o koʼontone.

Mas xaʼox lichʼi ta mantal. Lik kakʼ venta ti ep tajek li kʼusitik mu jechuk chchanubtasvanik li relijionetike. Pe jaʼuk li chanubtaseletik ta Vivliae solel toj labal sba laj kil, yuʼun lek srasonaltak xchiʼuk lek jamal li kʼusi chale.

Kʼalal yakal ta jchan batel li Vivliae, te laj kaʼi ti yichʼoj tajek ta mukʼ kuxlejal li Jeovae (Salmo 36:9). Li kʼusi laj kaʼi taje solel kʼot ta koʼonton, yuʼun lajel li kʼusi toʼox ta jpase muʼyuk xa chkakʼ ta vokol li jkuxlejale. Jaʼ xa la jtunes jkuxlejal sventa jmuyubta li Jeovae. Jaʼ yuʼun, li ichʼel ta mukʼe, ti lek ojtikinbilune xchiʼuk ti oy ta koʼonton ti jpas kanal li ta anilajel ta motosikletae muʼyuk xa mas tsots skʼoplal laj kil.

Li ta 1996 li-ay ta jun mukʼta tsobajel internasional yuʼun stestigotak Jeova ta Tallin (Estonia), ti mu nomuk yiloj li estadio ti bu toʼox li-anilaj ep ta veltae. Li ta mukʼta tsobajele laj kil krixchanoetik ti jeltos slumalik te stsoboj sbaike xchiʼuk ti jun noʼox yoʼontonike. Jech kʼuchaʼal liʼe, jun stestigo Jeova chʼay smoral, li voʼone la jnop ti muʼyuk xa chchaʼsutesbate. Pe akʼo mi jech ta jlikel noʼoxe jun stestigo Jeova la stabe li smorale xchiʼuk la sutesbe skotol li sbele. ¡Toj labal sba laj kil! Li avie, ¡laj xaʼox kaʼibe smelolal ti chakʼ ta xkuxlejalik ta melel li kʼusi chchanik ta Vivlia li stestigotak Jeovae! Li voʼon xchiʼuk li Evijae lichʼikutik batel ta mantal, xchiʼuk li ta 1997 laj kichʼkutik voʼ kʼuchaʼal stestigotak Jeova.

Jlom kamigotake chamik ta skoj ti chopol tajek laj yichʼ batel li xkuxlejalike xchiʼuk ti anil tajek ch-anilajik ta smotosikletaike. Kʼalal lik jchan li Vivliae, lik kaʼibe smelolal ti oy kʼusi jbainoj ta stojolal li J-akʼkuxlejal Jeovae. Li yojtikinobil taje jaʼ van skoltaojun ti kuxulun to li avie.

Li voʼon xchiʼuk li Evijae chanib jabil litunkutik ta tsʼakal ora ta Betel yuʼun stestigotak Jeova ta Riga. Li avie yakal ta jtsʼiteskutik kuni tsebkutik ti Alise sbie, xchiʼuk yakal ta jkolta sventa xchʼi mas li kʼanel yuʼun ta stojolal li Jeovae. Jech xtok, jun matanal kichʼoj xtoke jaʼ ti jun kʼakʼal ta xemana chbat tunkun ti bu tsjelubtasik ta yantik kʼop li vunetike, ta jmeltsan karoetik xchiʼuk yantik kʼusitik ti tsokanuke. ¡Toj lek chkaʼi ti ta jtunes jpʼijil ti ta jbikʼtal noʼox la jchan sventa jpas li kʼusitik lekike! Li avie ta to jtukian kʼusitik xchiʼuk ta jchaʼmeltsanan xtok.

Jaʼ jun matanal chkil xchiʼuk kutsʼ kalal ti jmoj chkakʼkutik ta ojtikinel li melel Diose, taje jaʼ koliyal li kʼusi la jchan ta Vivliae. Ta melel, ¡li kʼusi yaloj Dios ta sventa li paraiso ta Balumile la sjel-o jkuxlejal!