Te livokʼ xchiʼuk te lichʼi ta jun abol sba lum ti nopol xil Romae. Toj tsots laj kil jvokol li ta jkuxlejale. Muʼyuk laj kojtikin li jmeʼe xchiʼuk muʼyuk bu lek laj kil jbakutik xchiʼuk li jtote. La jchan kʼuxi xuʼ xikuxi ti bu toj xibal sbae.

Lik elkʼajkun kalal lajuneb jabilale, jech xtok kʼalal kichʼoj xaʼox lajcheb jabilale li jatav lokʼel ta sba velta li ta jnae. Oy jayib velta ti ay slokʼesun tal ta kavilto li jtote. Skotol ora ta jvul jbakutik xchiʼuk li krixchanoetike xchiʼuk toj anil jnaʼ xikap. Kʼalal kichʼoj chanlajuneb jabilale lilokʼ-o batel li ta jnae. Li naki ta kaye xchiʼuk la jlajes droga. Kʼalal ch-och akʼobale ta jambe stiʼ jkotuk karo vaʼun te chivay: skʼan toʼox sakub chilik, mi laje ta jsaʼ voʼ sventa jmeltsan jba jutuk.

La jchan lek elekʼ. Kʼusiuk noʼox xkelkʼan: ta jochbe smoralik li antsetike, chi-och ta elekʼ ta apartamentoetik xchiʼuk li ta akʼobaltike chi-och ta naetik. Laj kichʼ lek ojtikinel, jaʼ yuʼun laj kichʼ takel ta ikʼel yoʼ xi-och ta jtsop pandiyero ti lek ojtikinbile, jaʼ te lik «jchan mas elekʼ» yuʼun och kelkʼan vankoetik. Ta skoj ti toj jpʼel xkale lik yichʼikun ta mukʼ li ta jtsop pandiyero bu oyune. Muʼyuk bu chibat mi muʼyuk kichʼoj batel jpistolae yuʼun ta yolon jxonjol onoʼox chkakʼ vayel. Jaʼ xa jkuxlebinoj li majbaile, li drogae, li elekʼe, li mulivajele xchiʼuk li chopol kʼopetik ta jtunese. Skotol ora tsaʼikun li polisiaetik yoʼ tstikʼikun ta chukel xchiʼuk oy jayibuk velta la staikun batel. Ta epal jabiletik ta kaye oyun xchiʼuk ta chukinab.

Kʼalal lilokʼ jkoj ta chukele ay jvulaʼan junmeʼ. Muʼyuk toʼox jnaʼoj mi jaʼik xa stestigotak Jeova li junmeʼ xchiʼuk li chaʼvoʼ jprimotake. Laj yikʼikun batel ta stsobajelik, ta skoj ti ta jkʼan ta jkʼel kaʼi kʼu yelan ch-echʼe la jchʼam. Kʼalal likʼotkutik li ta Salon sventa tsobobbaile laj kalbeik ti ta jkʼan chichoti ti bu nopol  li tiʼ nae, sventa teuk noʼox jsat buchʼu ta xlokʼ xchiʼuk buchʼu ta x-och, pe te kichʼoj li jpistolae.

Li ta tsobajel taje la sjelbun li jkuxlejale. Xvul to ta jol ti xi la jnope: «¡Oyun ta yan-o balumil!». Buyuk joypʼin bal li jsate stseʼet noʼox satik skotolik xchiʼuk toj lek yoʼontonik. Tey-o ta jol li slekil yoʼontonik xchiʼuk ti stseʼet satik laj kil li stestigotak Jeovae. ¡Solel toj jelel laj kaʼi ti bu toʼox oyune!

La jnop ta jchan Vivlia xchiʼuk li stestigotak Jeovae. Kʼalal la jchan batel mas ta sventa li Vivliae laj kakʼ venta ti skʼan jel li jkuxlejale. Jech kʼuchaʼal liʼe, la jtsak lek ta mukʼ li kʼusi tsʼibabil ta Proverbios 13:20 ti xi chale: «Li bochʼo jaʼ chchiʼin li bochʼotic oy sbijilique ta xbijub batel ec; yan li bochʼo jaʼ chbat xchiʼin li bol cristianoetique te chbolib o ec». Te laj kaʼibe smelolal ti skʼan xkikta komel li jchiʼiltak ta pandiyeroe. Mu kʼunuk laj kaʼi, pe koliyal ti la skoltaun Jeovae tsal kuʼun.

Jech xtok laj kikta slajesel droga, vaʼun lik sakubuk li jbekʼtale. Laj kakʼ persa yiktael li sikʼolajele xchiʼuk li drogae. La jlokʼ li stsotsil jol ti toj natik toʼoxe, la jlokʼes li yareteal jchikine xchiʼuk laj kikta stunesel li chopol kʼopetike. Sba to velta laj kaʼi ti xuʼ jpajes jba ta sventa li kʼusitik chopol ta jpase.

Muʼyuk onoʼox lek chkaʼi skʼelel xchiʼuk xchanel li vunetike, jaʼ yuʼun toj vokol laj kaʼi yakʼel ta koʼonton li skʼelel Vivliae. Akʼo mi jech, ta kʼunkʼun lik jkʼan li Jeovae. Ta tsʼakale oy kʼusi jel laj kaʼi li ta jkuxlejale: oy jmul laj kaʼi li ta jol koʼontone. Nopajtik noʼox chopol chkaʼi jba xchiʼuk ta jnop ti muʼyuk chakʼbun perton Jeova ta skoj ti ep kʼusitik chopol jpasoje. Kʼalal jech chkaʼi jba taje, ta ora noʼox ta jchan li sloʼilal xkuxlejal ajvalil David ta sventa ti kʼu yelan akʼbat perton yuʼun Jeovae akʼo mi toj tsots li smul la spase, taje jaʼ chakʼbun spatobil koʼonton (2 Samuel 11:1–12:13).

Li jtos vokol xtok laj kaʼie jaʼ li xcholbel mantal krixchanoetik ta snaʼike (Mateo 28:19, 20). ¡Solel chixiʼ mi oy buchʼu te jta li buchʼu oy kʼusi chopol jpasojbe ta voʼnee! Akʼo mi jech, ta kʼunkʼun lik chʼayuk kuʼun li xiʼele xchiʼuk lik jkʼupin xchiʼinel ta loʼil krixchanoetik sventa xkalbe skʼoplal li Jtotik te ta vinajel ti stuk xa noʼox jeche, ti toj ep chakʼbutik pertone.

Li yojtikinel Jeovae jaʼ la spoj li jkuxlejale. Jutuk mu skotoluk li kamigotak ta voʼnee chamemik xa o mi moʼoje tikʼajtik ta chukel. Pe li voʼone jun koʼonton oyun xchiʼuk oy kʼusi toj kʼupil sba jmalaoj li ta jelavele. Laj xa jchan ti skʼan bikʼit xkakʼ jbae, ti jchʼunej mantalukune xchiʼuk ti stsal kuʼun ti toj echʼem toʼox xikape, koliyal taje jaʼ la skoltaun yoʼ lekuk xkil jba xchiʼuk li yantike. Ximuyubaj xchiʼuk li kʼupil sba kajnil ti Carmen sbie. Jmoj ta jkolta jlakʼnakutik sventa xojtikinik lek li kʼusi chal Vivliae.

Oy to kʼusi chkal xtok, li avie muʼyuk xa chi-elkʼaj sventa jsaʼ li kʼusi chtun kuʼune. Te to chi-abtej bakʼintik li ta vankoe, pe muʼyuk xa chkelkʼan yuʼun jaʼ xa noʼox ta jchʼuba.