JELBAT-O XKUXLEJALIK YUʼUN LI VIVLIAE

Solel jaʼ toʼox ta jsaʼ li kʼusi ta jkʼan jtuke

Jaʼ tsloʼilta Christof Bauer

KʼUSI ORA VOKʼ: 1951

SLUMAL: ALEMANIA

KʼU TOʼOX YELAN XKUXLEJAL: JTOYBA XCHIʼUK TSVENTAIN SBA STUK

KʼU TOʼOX YELAN XKUXLEJAL: Te toʼox nopol linaki ta Leipzig kʼalal bikʼitun toʼoxe, ta voʼneal República Democrática Alemana, ti stsʼakinoj Polonia xchiʼuk República Checa. Kʼalal vakib jabilale libatkutik ta naklej ta Brasil ta skoj li yabtel jtote, ta mas tsʼakale ta Ecuador.

Kʼalal chanlajuneb jabilale, li jtot jmeʼe la stakikun batel ta chanun ta jun internado ta Alemania. Ta skoj ti toj nom oyun ta stojolalike skʼan jchabi jba jtuk. Jaʼ yuʼun solel lik jventain jba jtuk xchiʼuk muʼyuk kʼusi jventa-o mi chopol chil yantik li kʼusitik ta jpase.

Kʼalal vuklajuneb xaʼox jabilale li jtot jmeʼe sutik tal ta Alemania. Ta slikebale la jchiʼinik ta naklej. Pe ta skoj ti nop xkaʼi ta jventain jba jtuke toj vokol laj kaʼi ti jchʼunbe smantalike. Jaʼ yuʼun kʼalal vaxaklajuneb jabilale lilokʼ batel li ta jnae.

Ta kʼunkʼun laj kaʼi ti muʼyuk sbalil li jkuxlejale, jaʼ yuʼun lik jsaʼ ti kʼuxi xuʼ oyuk sbalile. Kʼalal ay jkʼel jayibuk organisasionetike, kʼot ta nopel kuʼun ti jaʼ mas lek ti xkojtikin li kʼupil sba Balumil yoʼ to mu sokesik li krixchanoetike.

La jman jkot jmoto, lilokʼ batel li ta Alemaniae, vaʼun libat ta África. Pe, lisut talel ta Europa yuʼun sok li jmotoe. Kʼalal meltsaje libat kʼalal ta Portugal ta jun tiʼ nab. Li tee la jnop ti jaʼ lek ti chkikta li xanbal ta motoe xchiʼuk ti ta varko xa xixanav yoʼ xkojtikin spʼejel li Balumile.

Lik jchiʼin jtsop kerem tsebetik ti chchapan sbaik sventa chtuchʼik li mukʼul nab Atlanticoe. Te laj kojtikin li buchʼu kʼot ta kajnil ti Laurie sbie. Libatkutik ta islas del Caribe xchiʼuk li-echʼkutik jlikel ta Puerto Rico, vaʼun lisutkutik ta Europa. Oy ta koʼonton xchiʼuk Laurie ti jmankutik jkot velero (varko) sventa te xinakikutike. Pe kʼalal jelav xaʼox oxib u ti yakalunkutik ta saʼel li jvarkokutike, la jkechankutik saʼel. Yuʼun laj kichʼ takel ta ikʼel sventa xi-och ta soltaroal ta Alemania.

Voʼlajuneb u li-abtej ta Marina (soltaroal ta nab), li vaʼ ora taje jaʼo linupun xchiʼuk li Laurie. Ta jkʼankutik ti jechuk-o ti buyuk noʼox xibatkutike. Kʼalal skʼan toʼox jutuk xi-och ta Marinae jmanojkutik xa onoʼox jkot jlanchakutik xchiʼuk kʼalal ochemun xaʼoxe ta kʼunkʼun lik jmeltsankutik ta velero. Li kʼusi oy  ta koʼontonkutike jaʼ ti te xinakikutike xchiʼuk ti xi xanavkutik-o ta spʼejel Balumile. Kʼalal lilokʼ li ta Marinae muʼyuk toʼox tsutsem kuʼunkutik smeltsanel li jvarkokutike, pe li vaʼ ora taje jaʼo la staunkutik ta chiʼinel ta loʼil li stestigotak Jeovae xchiʼuk lik jchʼamkutik chanubtasel ta Vivlia.

TI KʼU YELAN LA SJEL JKUXLEJAL LI VIVLIAE: Ta slikebale muʼyuk bu persa laj kil ti skʼan jel li jkuxlejale: nupunemun lek ta registro sivil xchiʼuk li ants ti jmoj nakalun xchiʼuke, komem xa onoʼox kuʼun sikʼolajel (Efesios 5:5). Jech xtok, ti chixanav ta spʼejel Balumil sventa chkojtikin li kʼusitik labalik sba spasoj li Diose, la jnop ti jaʼ jtos ti kʼuxi xuʼ jtunes li jkuxlejale.

Pe ti melel xkaltike oy onoʼox kʼusi skʼan jel li ta jkuxlejale, jaʼ li jtalelale. Jechun-o ti solel jtoybaune xchiʼuk ti ta jventain jba jtuke. Ta jkʼan chkakʼ ta ilel li kʼusitik xitojob spasele xchiʼuk li kʼusitik lek kʼotem ta pasel kuʼune. Solel jaʼ noʼox ta jsaʼ li kʼusi ta jkʼan jtuke.

Oy jun kʼakʼal la jkʼel li Mantaletik ta Vits ti lek ojtikinbile (Mateo, kapitulo 5-7). Ta slikebale labal laj kaʼi li kʼusi laj yal Jesús ta sventa li muyubajele. Jech kʼuchaʼal liʼe, li stuke laj yal ti jaʼ noʼox xuʼ xmuyubaj li buchʼutik chaʼiik viʼnal xchiʼuk taki oʼontonale (Mateo 5:6). La jakʼbe jba kʼuxi ti xuʼ xmuyubajik li buchʼutik chaʼiik viʼnal xchiʼuk taki oʼontonale. Kʼalal yakal ta jchan batel mas li Vivliae laj kakʼ venta ti jkotoltik chtun kuʼuntik li kʼusitik sventa mantale, pe jaʼ noʼoxe skʼan bikʼit xkakʼ jbatik yoʼ xkakʼtik venta ti chtun kuʼuntike. Jech kʼuchaʼal laj yal li Jesuse: «Xmuyubajik noʼox li buchʼutik oy ta sjol yoʼontonik ti chtun yuʼunik mantale» (Mateo 5:3, TNM).

Ta Alemania lik jchankutik li Vivliae, pe libatkutik ta Francia, ta tsʼakale ta Italia. Buyuk noʼox ti chibatkutike te ta jtakutik li stestigotak Jeovae. Li kʼusi toj labal sba laj kil ta stojolalike jaʼ ti kʼu yelan skʼanoj sbaike xchiʼuk ti jmoj tsobolike. Laj kil ti jmoj yermano sbaik ta spʼejel Balumile (Juan 13:34, 35). Ta tsʼakale laj kichʼkutik voʼ.

Akʼo mi jaʼun xaʼox stestigo Jeova, la jtukʼibtas-o batel li jtalelale. Li Laurie xchiʼuk li voʼone jnopojkutik xaʼox ti chixanavkutik batel ta varko ta stiʼil nab ta África xchiʼuk ti x-echʼ jtuchʼkutik li mukʼul nab Atlántico jaʼ to mi likʼotkutik ta Estados Unidose. Kʼalal jaʼo te oyunkutik ta oʼlol mukʼul nab ta jun uni bikʼit varko ti joyobtabil ta epal voʼe, solel toj bikʼit laj kaʼi jba ta stojolal li Mukʼul Jpasvaneje. Ta skoj ti muʼyuk kʼusi mas ta jpase lik jchʼakbe lek yorail skʼel Vivlia, yuʼun muʼyuk kʼusi stakʼ mas pasel li ta oʼlol nabe. Li kʼusi mas laj yakʼ jnopbe skʼoplale jaʼ li sloʼilal Jesús kʼalal ay ta Balumile. Akʼo mi jaʼ jun tukʼil vinik li stuke xchiʼuk ti toj labalik sba li stalelale, muʼyuk bu tsots xa tajek skʼoplal laj yaʼi sba. Li kʼusi mas tsots skʼoplal laj yaʼi ta xkuxlejale, jaʼ li kʼusi ta skʼan Stote.

Kʼalal la jnopbe mas skʼoplal li skʼelobil laj yakʼ komel ta ilel li Jesuse, laj kakʼ venta ti skʼan baʼyel xkakʼ ta jkuxlejal li Ajvalilal yuʼun Diose, maʼuk li kʼusi ta jkʼan jtuke (Mateo 6:33). Kʼalal likʼotkutik xaʼox ta Estados Unidos xchiʼuk li kajnile la jnopkutik ti chkiktakutik ti buyuk noʼox chibatkutike xchiʼuk laj kakʼ mas ta koʼontonkutik ti chitunkutik ta stojolal li Diose.

KʼUSITIK SBALIL JTAOJAN: Kʼalal jaʼ toʼox ta jsaʼ li kʼusi ta jkʼan jtuke, muʼyuk bu jun koʼonton ta sventa li kʼusitik ta jpase yuʼun mu jnaʼ mi lek chkʼot ta pasel. Li avie jtaoj xa li snioʼal pʼijilal ti tukʼ tsbeiltasune (Isaías 48:17, 18). Jech xtok, li avie oy xa sbalil li jkuxlejale, yuʼun chkichʼ ta mukʼ Dios xchiʼuk ta jkolta yantik sventa xojtikinik li Diose.

Koliyal li tojobtaseletik ta Vivliae mas xa lekubem li jnupunelkutike. Jech xtok, li Jeovae yakʼojbunkutik jun kuni tsebkutik ti kʼupil sbae xchiʼuk xojtikin xa Jeova xchiʼuk skʼanoj.

Mu skotoluk velta ti lek noʼox jelav li jkuxlejalkutike. Pe li Jeovae muʼyuk bu yiktaojunkutik junuk velta, jaʼ yuʼun jpʼel koʼontonkutik muʼyuk chkikta jbakutik xchiʼuk jech-o ta jpat koʼontonkutik ta stojolal (Proverbios 3:5, 6).

[Ts’ib ti muk’tik sletraile ta pajina 15]

Laj kakʼ venta ti skʼan baʼyel xkakʼ ta jkuxlejal li Ajvalilal yuʼun Diose